Va'Atəŋ 41

Wissineɗ na Farawən

1Sə dərɓagan wəzva sula, Farawən assinke. Tay ziwwe ama məlpa Nil, 2Yaŋ awəl wasliɗe muguluŋgit buhul məkirit lelewɗe nawla, dəgilyoŋ səddəv Nil. Ndəɗaŋ ətaɗaŋ addəvit vəlarɗe. 3Sə dərɓegeti, wasliɗe muguluŋgit buhul meɓɓet daryawɗe məterit kekyẽ kekyẽ dəgilyoŋ sə məlpa na Nil. Aziwweŋ azet wasliɗe na ma Nil neki, 4wasliɗe muguluŋgit buhul daryawɗe kekyẽ kekyẽ nek, ampirninik en məkirit lelewɗe neki. Sissiŋ Farawən fəɗahə.

5Ndən leŋgi, assin masulani, ki hay buhul aka ŋgaf taka, moggon gborgodono' arani. 6Dərɓegeti, ki hay yaŋ buhul kəfyuwa kəfyuwa dəgilyoŋ. Səmyã na mawala aŋkəluwke. 7Ki hay kəfyuwa kəfyuwa nek asɗəkinik ki hay mogget gborgodono' neki. Farawən fəɗah na: mbara wissine yi.

8 # DAN 2:2 Təki addaŋ na, ki Farawən azlaɓka, aslən əye məs sesergeɗe də wən neti dit məsmaɗɗulet na Eziptə pakə. Farawən aboton sit wissine nani, ɗəf tay dəɓap ənah sən Farawən ɓa. 9Daya net ɗiy na zəga nawsa anah sən Farawən na: «Wanərban mbərayən naw dəpaŋka. 10Gədəv Farawən adək aket məɗɗaŋ wəza nani, azgaw a fərsəna ana daya net məgaŋ fərsəna da, in də daya net muɗakaŋ peŋ. 11Sulagəm pak missinik dəfəɗ taka, in dəndəni, naway pak də an wissine nan aŋgəl ənaha. 12Gawla, mə Ibri tay adak də mənamə, balam na daya net məgaŋ fərsəna yi. Məŋɗaŋ sənək wissineɗ namə. Abotet səmik wissineɗ nam naway pak va wissine nan asani. 13Agəɗək va abotet səməŋ pak təɗe'i: nawa, məmndagawi, ɗəf maɓɓanəŋka, məlawni.»

Yosef tay əbotet wissineɗ na Farawən

14Farawən slən əki Yosef, məzzay əgilgən də kakara sə fərsəna. Yaŋ məfaɗ kiyən, lukutɗe nan dədəɗgəti, ambat ana Farawən da. 15Farawən anah sən Yosef na: «Nissinke, ya ɗəf tay dəɓap əboton su gabban ɓa. Yaŋ nəprəm akok dawnəh na, an kəprəmək wissine na, kawboton gabbani vasa.» 16Yaŋ Yosef azlan sən Farawən, amna: «Intə ɓa, Maŋgəlva wazlan sən Farawən də moggoni.» 17Farawən aɓsən Yosef na: «Addəv issine naw na, inyakən ziwwe a mabuzgum na Nil. 18Wasliɗe muguluŋgit buhul məkirit lelewɗe nawla, dəgilyoŋ səddəv Nil. Ndəɗaŋ ətaɗaŋ addəvit vəlarɗe. 19Sissiŋ wasliɗe muguluŋgit meɓɓet buhul yeŋ daryawɗe diyɗa məterit kekyẽ kekyẽ dəgilyoŋgu, nəwəl ɗah zeŋvit aka dələv na Eziptə dəwənnan pak də daryaw vas ɓa. 20Wasliɗe mə kakyã'ɗe daryawɗe nek ampirinik en məkirit buhul na maddaabəŋ neki. 21Səza ampirini, məsənni na va ampirinke ɓa, vi daryaw net asanək va lahəŋka'e. Yaŋ nəfɗahə, 22yaŋ addəv wissine naw mbərən əmpa na, nəwəl ki hay buhul aka ŋgaf taka, aret gborgodono' moggoni. 23Sə dərɓagani ki hay buhul, məkufit kəfyuwa kəfyuwa dəgilyoŋ, səmyã na mawala aŋkəluwke. 24Məkufit kəfyuwa kefyuwa nek assetinik en ki hay buhul moggon naka! Nənah sitik məs sesergeɗe, ya ɗəf tay dəboton su səret ɓa.»

25Yosef azlan sən Farawən na: Na Farawən na, wissine taka yi. Maŋgəlva aprəmanək sən Farawən an adaŋgla naɗɗa. 26Wasliɗe muguluŋgit lelewɗe buhulu, wəzva buhuli yi, ki hay moggon buhulu, wəzva buhuli ye'e: as pak wissine taka yi. 27Wasliɗe məkakye'ɗe, daryawɗe buhul dəzzoŋ dərɓeget meɓɓetiŋki, wəzva buhuli, ki hay buhul məkufən kəfyuwa, səmyã na mawala azləŋka, wəzva buhul na may adawsani. 28Yaŋ an nəŋgəl kawnah sən Farawən, Maŋgəlva arban sənək Farawən, an aŋgəl naɗɗa. 29Wəzva buhul dədazzan abeŋ, əba wasan diyɗa aka dələv na Eziptə va asani. 30Sə dərɓagan na, wəzva buhul na may na ŋgarya wagəɗə, kazgəti ki əba dəgəɗ aka dələv na Eziptə gərakə. May waddakan dəlva. 31Kawsənni na əba agəɗək ɗah aka dəlvəŋka ɓa, vi may dədazzan dərɓagan va may na ŋgarnyaŋka. 32Aka wissine na Farawən təl sulaŋ na, Maŋgəlva aziwginik əpel nani. Maŋgəlva waɗɗa də kakara.

33«Ya kakaŋ na, Farawən dəwəl ɗəf an də maɗɗulan dəɗi aka dələv na Eziptə. 34Dəɗah Farawən dəɗi ɗiy nakkoson wən na dəlva, dəgəmaŋgən mesle'e na zəga səka dələv na Eziptə, addəv wəzva buhul nawbaŋka! 35Dəkkalangən zəga nawzəm addəvit wəzvaɗe mogget nabeŋki, dəziyingən haykəmari ammba va Farawən, dəzaɓangən ka dəssangən zəga nawzəm a walaŋgəleɗe metiŋgiti. 36Dəsangən wəzaɓ addəv dələv na Eziptə, ammba wəzva buhul na may dədazzan aka dəlvəŋka, vasna may arɓehet na ɗiy səka dələv ɓa.»

Yosef akkpaŋgək daya aba Farawən

37Əpelis lewi yi aza Farawən dit məɗɗaŋ wəza nan pakə. 38Farawən aɓsit gewleɗ nan na: «Wamərah ɗəf məs Əmpəs na Maŋgəlva asan akan va ɗəfəŋ sa?» 39Farawən anah sən Yosef na: «Adan Maŋgəlva arban suk wən nan pakə, ɗəf tay də wəsən məs maɗɗulan va is ɓa? 40#WNM 7:10Istə kədawsok aka gəla nawa, wən an kənah sit ɗiy naw pak anan adazbaŋgə, də mazaŋga na məlĩ naw nəday kiyuk kaka'ə.» 41Farawən anah sən Yosef: «Awle: nəɗikuk aka dələv na Eziptə dəwənnani.» 42#DAN 5:29Farawən aprətək ndama nawɗi va məlĩ nan səka van, akkpasən Yosef aka vani, ndən kulo' sən lukut na ngərayã, law sən verzle na meleŋge awlani. 43Apeŋgin aka masula mawta nani, yas adaŋzlaŋ vaŋvəl abani: «Kulanəngəni!» Vas Farawən aɗi aka dələv na Eziptə dəwənnani.

44Farawən aɓsən Yosef na: «Intə Farawən. An is kənah ɓa, ɗəf tay nawslan pərəm van təreŋ aka dələv na Eziptə ɓa.» 45Yaŋ Farawən alvan Yosef na, Safnat-Pane'ah, apsəntək guluk iya nat na Asnat, wətən Poti-Fera məsdələv na On. Yosef ambatək əbbalan dələv na Eziptə. 46Gala Yosef aziw aba Farawən, məlĩ na Eziptə na, tay də wəzva kaklaw hoku.

Yosef azarək səba Farawən abbalan dələv na Eziptə. 47Addəv wəzva nawba buhuluŋka, Zəga na mabardaw agəɗək diyɗa. 48Yosef akkalanək zəga nawzəm pak addəv wəzva buhuluŋ səka dələv na Eziptə, aziyək zəga nawzəm məkkalan sə walaŋgəleɗe na muyã dəssoŋ tərwəslə a walaŋgəleɗe gugriɗe. 49Yaŋ Yosef akkalan haykəmari ɗigit ɗigiti, va hoyoŋko na pehe, gap awɓap əŋɗan əmpa ɓa, vi man awsla ɓa.

50Ka wəzva na may dəgapgəni, Yosef awək kirin sula dət Asnat, wətən Poti-Fera, məsdələv na On. 51Yaŋ Yosef alvan Tizi nan na, Manase, vi amna: «Maŋgəlva azgətgəwək ki əzəmsahã naw də gəla na əbba pakə.» 52Alvan Zərmba nan na, Efrayim, ənah nan addəv əlvas na: «Maŋgəlva akol suwək uwa aka dələv nawzəm sahã nawa.»

53Wəzva buhul nawba naka dələv na Eziptə nak agraka. 54#WNM 7:11Wəzva buhul na may tay əki kiyən va Yosef anah farə. May tay aket dəlveŋge gboŋgu, ya aka dələv na Eziptə dəwənnan hara na, zəga na wəzəm tay. 55#YOH 2:5May tay əda aka dələv na Eziptə gboŋ kana, ɗiy atəŋgaŋgək əssõh zəga nawzəm ava Farawən də əhəma. Farawən azlan sit ɗiy na Eziptə pak na: «Məddoŋ mula Yosef, məɗɗa an adawnah sukum.» 56May atəhək dələv pakə. Yosef akolik met meheɗ na walaŋgəleɗe gugriɗ pak avələk haykəmari sit ɗiy na Eziptə. Vi may awanək zən a Eziptə. 57Ɗiy pak tay əzzoŋ a Eziptə əlbəh əzəm ava Yosef, vi may agəɗək aka dələv gboŋgu va may na ŋgarnya.

Currently Selected:

Va'Atəŋ 41: GB

Highlight

Copy