Va'Atəŋ 40

1Dərɓeget wənɗes pak na, ɗəf məpsən əsa sən məlyã də mədə peŋ ana məlĩ da, aɗɗaŋgək mbərayən aba məlĩ na Eziptə. 2Farawən adək gədəv aket ɗiy gugriɗ sula səret ɗiy nabani: Daya net muɗakaŋ zəga nawsa də daya net mədaŋ peŋ, 3məmpeti a fərsəna eŋgil ana daya net məgaŋ gəla na fərsəna da, a təki an Yosef asan məfərsəna. 4Daya net məgaŋ fərsəna appetik ammba va Yosef dəgəɗ sitgən wəza, assoŋguk pay ɓəɓay a fərsəna.

Yosef tay əboton issine net mə fərsənet sula neki

5Daya na zəga nawsa də daya na peŋ na məlĩ na Eziptə məmpet addəv gəla na fərsəna, assineŋgik sulegit pak dəfəɗ taka, naway pak də wəssine nani, də əboton nani. 6Yosef pay azet də pumo, arih na, naway pak tay simbime simbime. 7Yaŋ assohẽt ɗiy gugriɗ na Farawən mes dəsoŋ dəndən addəv gəla na ɗəf daya nan neki: «Vimi kəssoŋ simbime simbime dəpaŋ vaŋkəŋ di?» 8Azlan sənən na: «Missinik dəpaŋka, ya ɗəf tay nawboton səm wissine van ɓa.» Yosef aɓsit na: «Maŋgəlva yi nawboton ɓa sa? Mənah su ɗa.»

9Daya na zəga nawsa nak aboton sənək wissine nan sən Yosef aɓsən an: «Nissinik na, megezlembirke tay abawa. 10Kiva megezlembirke van tay hoku a zluzluŋgburun. Atəŋ əgilgin motogononi, ndən təŋ əffuyõ, mokkoy net kirtin anahəka. 11Huloŋguk nawsa mbazla na megezlembirke na Farawən tat avawa. Nigimik mokkoyɗe nek kãw, nəmburesl addəvət huloŋguk na Farawən nəpsənət ammba vani.» 12Yosef aɓsən na: «Gabba wən nan yaŋka. Kivan hokuŋ na, əvoŋ hoki yi. 13Addəv əvoŋ hoku əmpa na, Farawən waɗi kiko wamndogok a gəloko. Wakəpsənət huloŋguk na zəga nawsa nan va kədapsən lahəŋka. 14Ya an kəɗɗumonək, va məsam də is na, pay kərəh kiyko, kəɗɗumgən akawa, kəpelgən wən naw sən Farawən, nəgilgən səddəv gəlaŋka. 15Vi əhal məhalu səka dələv net mə Ibriɗe, aŋ van dayday nəgəɗ zəga nawtoŋgu a fərsəna ɓa.»

16Adan daya net mədaŋ peŋ ana məlĩ da nak awla Yosef abotonək wissine van təstəsə, aɓsən na: «Naw pak nissinik na, in tat dit hiliŋgiɗ na way hoku na məpəpəla akawa. 17Addəv kəggəl an na disiŋ faɗə, zev gəpeɗ məs Farawən adawzəm temtem pak tahəŋgə, biŋgeɗ tahəŋ iyeɗnin səddəv kəggəl səkawa.» 18Yosef azlani, amna: «Vaŋ aŋgəl ənəha. Kəggəlɗe hokuŋki, əvoŋ hoki yi. 19Apələk pay hoku Farawən wataw kiyuk səkoko. Walawuk aka wəlaŋga, biŋgeɗ wazlorkuni.»

20Pay mohokon nak agapə, pay wəzləra nawwa na Farawən, agəɗək waynabaya sit məɗɗaŋ wəza nan pakə, akiyik ɗiy gugriɗ nawzəm də an nawsa neki. 21Aɗiyək daya na zəga nawsa nak aka wəza nani, yas apsənət huloŋguk aka va Farawən, 22yaŋ məlaw daya net ɗiy mədaŋ peŋ naka. Va Yosef aboton sit wissine neti; 23daya na zəga nawsa nak dəɗɗum aka Yosef ɓa, ndən kiyən zəgətə.

Currently Selected:

Va'Atəŋ 40: GB

Highlight

Copy