Wəza net Maslənɗe 4

Piyer gəm Yohanna aba əkkal net ɗiy gugriɗe

1Aka Piyer də Yohanna adawpeleŋ sitin ɗiy, məsdəlveŋge də daya net məgaŋ Gəla na Maŋgəlva gəm Sadukiɗe gboŋgboyõ azeti. 2Gədivit adək diyɗa, vi adawyegetin ɗiyi gəm adarbanən əsilye səka əmta də Yesu. 3Vini armenini azgetin a fərsəna hã vit mazayən vi moskoy agəɗək səkayə. 4Ɗiy diyɗa səret məs dəprəmən əpel van atafaŋka, əŋɗa net wagəɗ zel gabal sle'i.

5Vit pumpum nani, deyeɗe, ɗiy məsɓeti gəm mərbaŋ-mahenziŋ akkalaŋgək a Yerusalem. 6Ndəɗaŋgə: Hanna daya net məsdəlveŋge, Kayafas, Yohanna, Alekzaŋdər dit ɗiy na mazlalwa daya net məsdəlveŋge pakə. 7Adan aziwgitin addak təkiya, assohetinke: Də əɓap mawani awaniɓa də iya na naway nokum kəɗɗanən zəgaŋ di? 8Piyer aknahək də Zeŋgile Salala aɓsit na: deyeɗe net diyi gəm ɗiy məsɓeti, 9adassohomən dəpaŋ na vi wəza moggon an məgəɗ sən məs gbəgba'i, də tive mi məmbəlgən di. 10Məsən baymokum dit mə Israyelɗe pak na: Addəv iya na Yesu Kristu mə Nazaret məs kəkkpa'aŋgə, məs Maŋgəlva asilgin səka əmta, mbəlembəle nani ɗəfəŋ asan abokum aŋ məmbələn. 11#GLƊ 118:22Ndəni:

Gərəm məs mənokum məzərkaŋ gəla kəzelenəni,

ndən dəkkpaŋ gərəm kiwən naka bezler.

12Əkõh tay aza ɗəf maɓɓan ɓa, vi iya maɓɓan tay məpsa ammba disiŋ a walaŋgit ɗiy məs mədawkõh dəndən ɓa.

13Adan awlanən Piyer də Yohanna tahəŋ ɓəlɓələ, arəhən na ɗiyəŋ də əsən ɓa, ɗiy-ɗarəŋgə na, agəɗ sitik gərəŋgə, asənnənək na adawaŋgək də Yesu, 14tay ulanən ɗəf məs dəmbəl nak a maŋgevet mãy Piyer ziwwe, dərahaŋ nawzlan ɓa. 15Aɗi sitinik wən nan dəgulyoŋgən sə təki nakkal neti, yaŋ atawanən wən nan a walaŋ ziti. 16Aɓɗaŋ na, mbar mədawgəɗ sit ɗiyiŋ di? Vi gesiŋ, ɗiy na Yerusalem pak asənənək sekene məs aɗɗaŋ appaka ta'ə, aməɓap ənəh na dəgəɗ ɓa ɓa. 17Ya vi wən nan adawan zən a waleŋgit ɗiy ɓa na, mətek sim adawpeleŋ də iyaŋ aza ɗəf taka dayday ɓa. 18Yaŋ ayenin əmpa, aɗi sitin wən nan tataŋtataŋ adawpeleŋ mãy adaɗɗaŋ əyak də iya na Yesu ɓa.

19Yaŋ Piyer də Yohanna azlanəni aɓsitin na: Moggoni aba Maŋgəlva məprəmgən mokum day ki Maŋgəlva sa? Mətaw wən nani. 20Vi nam məɓap na əmsan mam məpel na aket zəgeɗ məwələ dit en məprəm ɓa ɓa. 21Adan apeleŋ sitin tataŋtataŋ, ndəɗaŋ mbegiti. Zəga tay arahaŋ azet nawtaw wən aket ɓa, vi ɗiy pak tay əgagdakanən Maŋgəlva aka zəga məs dəgəɗə. 22Vi əzva na ɗəf van tay day ki kaklaw poɗo məs sekene nawmbəlgən agəɗ akan vani.

Əkkam net məzutafaŋgə

23Səza məppeti, mãy Piyer də Yohanna pay azet ɗiy neti. Anah sitinik an deyeɗe net məsdəlveŋge dit ɗiy məsɓet anahaŋgə. 24#ƏGI 20:11; NEH 9:6; GLƊ 146:6Adan net aprəmən vaska, ndəɗaŋ pak akkamanənək Maŋgəlva də makret taka, aɓɗaŋ na: Daya, istə kəɗɗa disiŋ də dəlvafuŋ gəm pehe dit zəgeɗ naddəvit pakə. 25#GLƊ 2:1,2Istə kəpel də ma afəm Davit gawla nok də Zeŋgile Salala, kəmnah:

Vimi ɗiy-ɗar adaɗɗaŋ gogoyo

mãy ɗiy əhãyaŋ ɗar di?

26Milyẽŋge naka dələv wasilyoŋgu,

ɗiy gugriɗ tahəŋ əsapən met aka

Daya gəm aka mesiya nani.

27 # LUK 23:7-11 MAT 27:1,2; MAR 15:1; LUK 23:1; YOH 18:28,29 Vi Herodə, Pontiyus Pilat dit ɗiy-ɗarə gəm ɗiy na Israyel akkalaŋgək addəv walaŋgəla-metiŋgiŋ gesiŋ aka Yesu gawla nok Salala məs kəppay sən mẽlẽ. 28Vi kaɗɗe zəgeɗ məs voko gəm əŋgla nok aziwgitin dafsən dəɗɗaŋgəni. 29Kakaŋ na Daya, azi horok aka əhãy neti. Apsit ɓəɓəl sit belemɗe nok nawpel əpel nok gərakə. 30Appar vok kana, vi məs gbəgbaɗe dəmbaŋgəni, sekeneɗi gəm zəgeɗ naggət aket dəɗɗaŋgən də iya na Yesu gawla nok Salala. 31Adan akkamaŋgə, təki məs akkalaŋ aɓəlka. Ndəɗaŋ pak aknəhaŋgək də Zeŋgile Salala, tay əpelnən wən na Maŋgəlva məza də geslne ɓa.

Məzutafaŋ tay uɗakanən ərəh net a walaŋ ziti

32 # WNM 2:44,45 Məzutafaŋ addəv əsap net pak tahəŋ mekret taka, megenegenet taka, ɗəf taka tay dədawnəh na arya nani ɓa, zəgeɗ net pak tahəŋ sapə. 33Də əɓap metiŋgin maslənɗe adawpeleŋ aka əsilye na Daya Yesu səka əmta. Mbəlembəle metiŋgin tay aket pakə. 34Ɗəf tay məzuray a weleŋgit ɓa. Ɗəf məs dit gulyeŋge awaniɓa dit gəleɗe əvilini, əkinin koɓeɗ net zəgeɗ məs avəlaŋ vani. 35Tay əkitin avet maslənɗe, ndəɗaŋ əpsən ɗəf pak aza wəray nani.

36Yaŋ Yosef məs maslənɗe alvaŋ na Barnabas va ənəh na ɗəf məzəsɓet ɗiyi, mə Levi muwa a Kiprus, 37tay də gulyo, səza avəla, aki koɓeɗ nani, aɗi abet maslənɗe.

Currently Selected:

Wəza net Maslənɗe 4: GB

Highlight

Copy