Ruuka 3
3
Ameegyo ga Yohana Omubatiizi
(Mataayo 3:1-12; Mariko 1:1-8; Yohana 1:19-28)
1Gwaari omwaaka gwi ikumi ne etaano gwa mubhukaangati bhwo omutemi omukuru Tiberio, no omwaanaangwa we ekyaaro kya Yudea yaari Pontio Pirato. No omukaangati we ekyaaro kya Gariraaya yaari Herode,#3:1 Herode. Rora Herode Antipasi mu Bhugaruri bhwa Amangʼana Amakongʼu. no omukaangati we ebhyaaro bhya Iturea na Tarakoniti yaari Firipo, wamwaabhu Herode. No omukaangati we ekyaaro kya Abirene yaari Risania. 2Na abhaseengeri abhakuru#3:2 Abhaseengeri abhakuru. Rora abhaseengeri mu Bhugaruri bhwa Amangʼana Amakongʼu. nibho bhaari Anasi hamwe na Kayafa.
Kwe eriibhaga riyo, Yohana omwaana wa Zakaria wuyo, yaari mwiitirigo, na hano yaari eyo akahaabhwa engʼana na Taatabhugya. 3Yohana yaari aragya kuhitira ekyaaro kyoosi kino kyareeni ne Ekitaaro kya Yorodaani, eno ararwaazira engʼana yiyo. Yaari arabhabhuurira abhaatu, “Mute ebhibhi bhyeenyu mumukyoorere Taatabhugya no okubatiizwa, okubha abhaabhire ebhibhi bhyeenyu!” 4Niigo amangʼana gayo ga Yohana gabheeri kyeego gakaamirwe mukitabhu no omurooti Isaya:
“Omuutu wuno akubhirikira kwe eriiraka ikuru okurwa mwiitirigo:
‘Mumukorere Omukuru enzira,
mugororokye eziinzira zino araahite.
5Muribhe amaruuma goosi,
na muroosye ebhiguru ne ebhiswa.
Mugororokye eziinzira zino ziikiikiri,
na muroosye ebhiruumwa bhisuuhu.
6Niho abhaatu bhoosi bharaarore obhutuurya bhuno bhukurwa ku Taatabhugya.’ ”#3:6 Rora Isaya 40:3-5.
7Abhaatu bhaaru bhaari bharamuuzaku Yohana, kubha abhabatiize. Kyaamwe, akabha arabhabhuurira, “Emwe orwiibhuro rwe enzoka! Weewi abhabhuuriiri kubha muranagya kuryaara obhutemwa bhwa Taatabhugya bhuno bhukuuza kwo okubatiizwa ego? 8Ambe, mukore amahokya gano, gakweerekya kubha mumariri kuta ebhibhi bhyeenyu na mumwiikyooreeri Taatabhugya. Mutataanga kugaamba kubha Taatabhugya arabhiikirirya kyeego mukwiizuungya, ‘Zaazi weetu ni Aburahamu!’#3:8 Aburahamu. Rora engʼana yino mu Bhugaruri bhwa Amangʼana Amakongʼu. Ndabhabhuurira kubha, Taatabhugya aranagya kukyoosya amagina gano kubha abhaana bha Aburahamu! 9Na bhoono obhutini bhwe ekiina kya Taatabhugya bhuri iguru weenyu kyeego ehaazi eri iguru ya amatina ge emiti. Na bhano bhatakukora amahokya amazomu bharatinirwa ekiina, kyeego emiti gyoosi gino gitakwiibhura emisumo emizomu gikutinwa no okurekerwa mumuriro.”
10Niho amahizo ga abhaatu bhano bhaari bharimu, bhakamubhuurya Yohana, “Bhoono, tukoreki?” 11Akabhakyoora, “Wowoosi wuno ane emyeenda ebhiri, aruusye ogumwe kuwuno ataanagwe. Na wowoosi wuno ane ebhyaakurya, ewe woosi asoondere wuno ataanabhyo.”
12Kwiihizo riyo bhaari bhariho na abhatobhya bhe eriigooti,#3:12 Abhatobhya bhe eriigooti ni bhaatu bhano bhaari kukumania eziimbirya muserikaare ya Rooma. Rora amangʼana gano mu Bhugaruri bhwa Amangʼana Amakongʼu. neebho bhakamuuzaku Yohana, okubha abhabatiize. Bhakamubhuurya, “Ee Omweegya, na neetwe tukoreki?”
13Akabhakyoora, “Muraatobhe eriigooti, mutatobha ikuru kukira ekireengero kino kiteerweho.”
14Neebho bhaari bhariho abhasirikare, bhakamubhuurya, “Neetwe tukoreki?”
Akabhakyoora, “Mutaaza kuruusya omuutu ebhigiro bhyaaye, na mutaaza kumubheehera. Na kweeki mwiiswe na amariho gano mukuhaabhwa.”
15Abhaatu bhoosi, bhaari bhariibhuurya no okwiiseega muziikoro zyaabhu kubha, hamwe Yohana niwe Masiya. 16Yohana akabhabhuurira bhoosiigo, “Enye, ndabhabatiiza kwa amaanzi. Nawe araaza omuutu owuundi inyuma waane wuno akunikira amanaga, enye nitakungʼarira kubha omuhokya waaye naabhe okutazura eziikobha zye ebhikweera bhyaaye! Ewe niwe arabhabatiiza kwe Ekoro Muhoreeru. 17Ewe ni kyo omurimi wuno akugwaata oruhuungo mumabhoko gaaye okubha aseese omukuunyu kurwa mungano. Engano yiyo, arayikumanirya mukitara kyaaye, nawe omukuunyu, aragwookya mumuriro guno gutakurima.”
18Kwa amangʼana gayo goosi na agaandi, Yohana yaari arabhariihya no okukumiirirya abhaatu bhayo, kwo okubharwaazira Amangʼana Amazomu ga Taatabhugya.
19Nawe Yohana akamwiiyogya Herode, kwo okubha Herode akamusikirya Herodia no okumukora mukaaye, nawe Herodia wuyo yaari akweerirwe no wamwaabhu omusuuhu. Yohana akamurekya kungʼana yiyo, na kwe ebhibhi ebhiindi bhyoosi bhino yaari arakora. 20Niho, Herode akaaruhya ebhibhi bhyaaye kweeki, kwo okumubhoha Yohana munyuumba ya abhabhohwa.
Yohana aramubatiiza Yeesu
(Mataayo 3:13-17; Mariko 1:9-11)
21Hano Yohana ya akyaari kubhohwa, abhaatu bhaaru bhaari bharabatiizwa, Yeesu woosi akaaza kubatiizwa. Eriibhaga yaari kusabha, eriisaaro rikiiguka, 22Ekoro Muhoreeru akamwiikira iguru yaaye kye ekiguuti. Niho, eriiraka rikarwa mwiisaaro rikabhuga, “Awe naawe Omwaana#3:22 Omwaana. Rora Omwaana wa Taatabhugya mu Bhugaruri bhwa Amangʼana Amakongʼu. waane omuseegwa, nizomereerwe naawe.”
Ehamati ya Yeesu Krisito
(Mataayo 1:1-17)
23Eriibhaga rya Yeesu okutaanga emirimo gyaaye, ahaabha ne emyaaka miroongo etatu (30). Abhaatu bhahiiseega kubha, ahaabha omwaana wa Yusufu.
24Na Yusufu wuyo, yaari omwaana wa Heri,
na Heri, yaari omwaana wa Matati,
na Matati, yaari omwaana wa Raawi,
na Raawi, yaari omwaana wa Meriki,
na Meriki, yaari omwaana wa Yanai,
na Yanai, yaari omwaana wa Yusufu.
25Na Yusufu, yaari omwaana wa Matatia,
na Matatia, yaari omwaana wa Amosi,
na Amosi, yaari omwaana wa Nahumu,
na Nahumu, yaari omwaana wa Esiri,
na Esiri, yaari omwaana wa Nagai.
26Na Nagai, yaari omwaana wa Mati,
na Mati, yaari omwaana wa Matatia,
na Matatia, yaari omwaana wa Semei,
na Semei, yaari omwaana wa Yoseki,
na Yoseki, yaari omwaana wa Yoda.
27Na Yoda, yaari omwaana wa Yoanani,
na Yoanani, yaari omwaana wa Resa,
na Resa, yaari omwaana wa Zerubabeeri,
na Zerubabeeri, yaari omwaana Shearitieri,
na Shearitieri, yaari omwaana wa Neri.
28Na Neri, yaari omwaana wa Meriki,
na Meriki, yaari omwaana wa Adi,
na Adi, yaari omwaana Kosaamu,
na Kosaamu, yaari omwaana wa Erimadamu,
na Erimadamu, yaari omwaana wa Eri.
29Na Eri, yaari omwaana wa Yoshua,
na Yoshua, yaari omwaana wa Eriezeri,
na Eriezeri, yaari omwaana wa Yorimu,
na Yorimu, yaari omwaana wa Matati,
na Matati, yaari omwaana wa Raawi.
30Na Raawi, yaari omwaana wa Simioni,
na Simioni, yaari omwaana wa Yuuda,
na Yuuda, yaari omwaana wa Yusufu,
na Yusufu, yaari omwaana wa Yonamu,
na Yonamu, yaari omwaana wa Eriakimu.
31Na Eriakimu, yaari omwaana wa Merea,
na Merea, yaari omwaana wa Mena,
na Mena, yaari omwaana wa Matata,
na Matata, yaari omwaana wa Natani,
na Natani, yaari omwaana wa Daudi.
32Na Daudi, yaari omwaana wa Yeese,
na Yeese, yaari omwaana wa Obeedi,
na Obeedi, yaari omwaana wa Boazi,
na Boazi, yaari omwaana wa Sarimooni,
na Sarimooni, yaari omwaana wa Nasoni.
33Na Nasoni, yaari omwaana wa Aminadabu,
na Aminadabu, yaari omwaana wa Adimini,
na Adimini, yaari omwaana wa Arini,
na Arini, yaari omwaana wa Hezirooni,
na Hezirooni, yaari omwaana wa Pereesi,
na Pereesi, yaari omwaana wa Yuuda.
34Na Yuuda, yaari omwaana wa Yaakobo,
na Yaakobo, yaari omwaana wa Isaaka,
na Isaaka, yaari omwaana wa Aburahamu,
na Aburahamu, yaari omwaana wa Teera,
na Teera, yaari omwaana wa Nahoori.
35Na Nahoori, yaari omwaana wa Serugi,
na Serugi, yaari omwaana wa Reu,
na Reu, yaari omwaana wa Peregi,
na Peregi, yaari omwaana wa Ebeeri,
na Ebeeri, yaari omwaana wa Sheera.
36Na Sheera, yaari omwaana wa Kenaani,
na Kenaani, yaari omwaana wa Arufakisadi,
na Arufakisadi, yaari omwaana wa Shemu,
na Shemu, yaari omwaana wa Nuhu,
na Nuhu, yaari omwaana wa Rameki.
37Na Rameki, yaari omwaana wa Metuseera,
na Metuseera, yaari omwaana wa Enoki,
na Enoki, yaari omwaana wa Yareedi,
na Yareedi, yaari omwaana wa Maharareri,
na Maharareri, yaari omwaana wa Kenaani.
38Na Kenaani, yaari omwaana wa Enoshi,
na Enoshi, yaari omwaana wa Seeti,
na Seeti, yaari omwaana wa Adaamu,
na Adaamu, yaari omwaana wa Taatabhugya.
Currently Selected:
Ruuka 3: ZAK
Highlight
Share
Copy
Want to have your highlights saved across all your devices? Sign up or sign in
© 2023 Wycliffe Bible Translators, Inc. All rights reserved.
