Ruuka 1
1
1Omuguungibhwa Teofiro, garya gaakorirwe gati weetu, abhaatu bhaaru bhakoriri omukya gwo okukaama iguru yaku. 2Gakaamirwe bhwaheene amangʼana gano twabhuuriirwe na bhano bhaagaruuzi amangʼana gayo, kwa ameeso gaabhu, bhano bhakunyaragania engʼana ya Taatabhugya kurwa obhweemero. 3Noosi nigiisuunziri no okugamenyeekererya bhwaheene, kyeego goosi gakorirwe kisi kweemera kubhutaangiro, nikarora ni kisi nikukaamire gayo ngʼorangʼora, 4okubha obhe no obhuheene kugarya wegiibhwe.
Obhurooti bhwo okwiibhurwa kwa Yohana Omubatiizi
5Eriibhaga Herode#1:5a Herode. Rora Herode Omukuru mu Bhugaruri bhwa Amangʼana Amakongʼu. yaari omutemi wa Yudea, ahaabha ariho omuseengeri#1:5b Omuseengeri. Rora abhaseengeri mu Bhugaruri bhwa Amangʼana Amakongʼu. wumwe wa Taatabhugya, eriina ryaaye Zakaria, yaari musaango yo obhuseengeri bhwa Abiya. Na mukaaye Erizabeti, ewe yaari wa mukisyooko kyo omuseengeri Haruuni. 6Abhabhiri bhayo, bhaari abhaheene embere wa Taatabhugya, ebho bhaari bhariigwa emigiro gyo Omukuru gyoosi, okutama kubha ni isoro. 7Bhatahaabha no omwaana, kwo okubha Erizabeti yaari muguumba, neebho bhaari bhakuunguhiri bhukongʼu.
8Orusiku rumwe, esaango ya Zakaria yaari erakora ruunga rwaaye rwo obhuseengeri embere wa Taatabhugya. 9Kunyaangi yo obhuseengeri bhwaabhu, Zakaria akasorwa kwo okwiitoorwa obhwiitoori kubha, niwe araasikire ahahoreeru he eriiseengerero#1:9 Eriiseengerero. Rora engʼana yino mu Bhugaruri bhwa Amangʼana Amakongʼu. ryo Omukuru, Taatabhugya, okubha amuguundirirye omuruumbaaso. 10Kwiibhaga ryo okwookya omuruumbaaso, habhoori bhakiikumania abhaatu bhaaru kumusabha Taatabhugya.
11Niho, Zakaria akahwaarukirwa na maraika#1:11 Maraika. Rora engʼana yino mu Bhugaruri bhwa Amangʼana Amakongʼu. wo Omukuru. Maraika wuyo, akiimeerera orubhaara rwo obhuryo rwa ahagiro he ezahaabu ho okuguundirirya omuruumbaaso. 12Hano Zakaria yamuruuzi, akiitakya no okwoobhoha bhukongʼu!
13Nawe, maraika akamubhuurira, “Awe Zakaria, otoobhoha! Taatabhugya yiigwiiri amasabhi gaazo. Mukaazo Erizabeti, arakwiibhurira omwaana we ekisubhe, oramutoga eriina Yohana. 14Omwaana wuyo, niwe araakore muzomererwe no okuriiryaata, na abhaatu bhaaru bharazomererwa kwo okwiibhurwa kwaaye. 15Arabha omukuru embere wa Omukuru. Ataanywe amaanzi go omuzabibu#1:15a Amaanzi go omuzabibu. Rora amangʼana gano mu Bhugaruri bhwa Amangʼana Amakongʼu. ne ebhiindi bhyoosi bhino bhikugwaata. Arabha yiizuriibhwe Ekoro Muhoreeru#1:15b Ekoro Muhoreeru. Rora amangʼana gano mu Bhugaruri bhwa Amangʼana Amakongʼu. kurwa muunda ya nina. 16Arakyoorya Abhiiziraeri bhaaru kwo Omukuru, Taatabhugya waabhu. 17Aramukaangatira Omukuru okubha amubhanurire abhaatu okumusuungʼaana obhuuzi bhwaaye no okukaangatibhwa ne ekoro no obhunagya kya bhwa Eriya.#1:17 Abhayahudi bhariiseegera kubha araaza kweeki omurooti Eriya, okubhanura okuuza kwa Krisito. Rora Maraaki 4:5-6. Arabhagwaatania bhataata na abhaana bhaabhu, no okubhakora bhano bhatakumwiigwa Omukuru bhabhe na amangʼeeni ge eheene.”
18Zakaria akamubhuurya maraika, “Ndora enye na mukaane tukuunguhiri! Niki kiraanierekye obhuheene bhwo okubhona omwaana?”
19Maraika wuyo akabhuga, “Enye neenye Gaburieri, nikwiimeerera embere wa Taatabhugya. Ewe niwe anitumiri kubha, niize kukubhuurira amangʼana gano amazomu. 20Kwo okubha otiikiriirye gano nakubhuuriiri, kweema bhoono orabha imuumu, na otakunagya kugaamba tee, kuhikira gayo garaakorwe kwiibhaga ryaaye.”
21Abhaatu bhaari bharaganya Zakaria ahuruke igutu, bhakaruguura kurora kyeego yakezeerimu. 22Hano yaahurukirimu, ataanagirye kweeki kukeerenia nabho, akageenderera kubha imuumu. Yaari areerekya kwa amabhoko, bhakamenya kubha aruuzi obhurori.
23Hano yamariri eziisiku zaaye zo okukora emirimo mwiiseengerero, akagya yiika. 24Kyaamwe, mukaaye Erizabeti akagega enda, akamara emyeeri etaano yaari akiibhisa, 25akabhuga, “Omukuru, niwe anikoreeri ego! Anduusiirye eziisoni embere wa abhaatu.”
Obhurooti bhwo okwiibhurwa kwa Yeesu
26Hano enda ya Erizabeti yahikirye emyeeri esaasabha, Taatabhugya akatuma maraika Gaburieri mumugye gwa Nazareeti, mukyaaro kya Gariraaya. 27Akatumwa kumuukya wumwe, eriina ryaaye Mariamu, yaari ayuungiibhwe no omusubhe wumwe, eriina ryaaye Yusufu, we ekisyooko kyo omutemi Daudi.#1:27 Daudi. Rora engʼana yino mu Bhugaruri bhwa Amangʼana Amakongʼu.
28Hano maraika yagiiri ku Mariamu, akamubhuurira, “Ndakukeerya, awe omutweerwa we ebhite, Omukuru ari hamwe naawe.”
29Hano akiigwa amangʼana gayo, akanyaaka mukoro, akiibhuurya, “Nkeeryaki yino?”
30Maraika akamubhuurira, “Weyaa Mariamu, otoobhoha! Omutweerwa we ebhite wa Taatabhugya. 31Rora! Oragega enda, na oriibhura omwaana we ekisubhe, oramutoga eriina ryaaye Yeesu. 32Arabha omukuru, arabhirikirwa Omwaana wa Taatabhugya Wuno Ari Iguru we Ebhigiro Bhyoosi. Omukuru, Taatabhugya arabhwiimeererya kweeki obhukaangati bhwo obhutemi bhwa Daudi isikuru waaye, no okumuha omwaana wuyo. 33Arabha omutemi wa abhaatu bhoosi bha Iziraeri kirakeego, no obhutemi bhwaaye, bhutakubha no obhuteero.”
34Mariamu akabhuurya, “Garabhabhwi, neenye nitakaruuzi omusubhe?”
35Akamukyoora, “Ekoro Muhoreeru arakwiikira, na amanaga ga Taatabhugya Wuno Ari Iguru we Ebhigiro Bhyoosi, garakukuundikiirya. Kweego, omwaana wuno akwiibhurwa, arabha omusorwa no okutogwa Omwaana wa Taatabhugya.#1:35 Omwaana wa Taatabhugya. Rora amangʼana gano mu Bhugaruri bhwa Amangʼana Amakongʼu. 36Naabhe omuhiiri waazo Erizabeti, wuno abhaatu bhaari bhamumenyiri kubha ni muguumba, agegiri enda yo omwaana we ekisubhe mubhukikuru bhwaaye. Bhoono ariinda ya emyeeri esaasabha. 37Gayo gaatuukiri kwo okubha ku Taatabhugya, bhyoosi bhiraturikana.”
38Mariamu akabhuga, “Neenye omugya wo Omukuru, ebhe kweenye kyeego ogaambiri.” Kyaamwe akagya.
Mariamu aragya kukeerya Erizabeti
39Mariamu akakora bhwaangu orugeendo, rwo okugya ku Erizabeti eziisiku ziyoziyo, mumugye gumwe gwe ebhiguru bhya Yudea. 40Hano yasikiiri wa Zakaria, akamukeerya Erizabeti. 41Hano Erizabeti akiigwa akeeriibhwe na Mariamu, omwaana yaari muunda yaaye akatumatuma. Hayohayo Erizabeti akiizuribhwa ne Ekoro Muhoreeru, 42kyaamwe akagaamba kwiiraka ikuru, “Mubhakari bhoosi, awe naawe omutweerwa we ebhite! No oriibhura omwaana omutweerwa ebhite. 43Enye ni weewi, naabhe nina wo Omukuru waane yiize kunikeerya? 44Hano niigwiiri oranikeerya, omwaana akatumatuma muunda yaane kwo obhuzomererwa. 45Awe naawe omutweerwa ebhite, kwo okubha wiikiriirye gano Omukuru yakubhuuriiri gakorwe.”
Omweembo gwa Mariamu
46Mariamu akabhuga,
“Ekoro yaane, eramukumya Omukuru,
47erazomererwa niwe Taatabhugya Omutuurya waane,
48kwo okubha anihiitiri omugya waaye,
yiingabha enye ni munyookobhu.
Kurwa bhoono, abhaatu bhe eziinyiibhuro zyoosi na zino zikuuza,
bharabha bharanibhirikira kubha neenye omutweerwa we ebhite,
49kwo okubha Taatabhugya wa amanaga,
anikoreeri amangʼana ge ekiruguuro,
ne eriina ryaaye ni ihoreeru, rirakira amariina goosi.
50Taatabhugya arageenderera kubharorera ebhigoongi
no okubhasakirya abhaatu bhe eziinyiibhuro zyoosi,
bhano bhakumwiigwa.
51Akoriri amangʼana amakuru kwa amanaga go okubhoko kwaaye,
anyarageenie abharegenu bhoosi.
52Yiituumirye abhakaangati kurwa kubhituumbi bhyaabhu bhyo obhutemi,
kimwe abhatiirirye abhanyookobhu.
53Bhe enzara, abhiigutirye bhwaheene,
nawe abhaniibhi abhaheebhiri amabhoko bhusa.
54Abhahiitiri no okubhasakirya Abhiiziraeri, abhabhagati bhaaye,
akabharorera ebhigoongi.
55Akakora kyeego yaragiri Aburahamu na bhazaazi bheetu,
na abhaatu bhe ehamati yaaye kirakeego.”
56Mariamu akamara emyeeri etatu ari we Erizabeti, niho yagarukiri yiika waaye.
Okwiibhurwa kwa Yohana Omubatiizi
57Eziisiku zo okwiibhura kwe Erizabeti zikahika, akiibhura omwaana we ekisubhe. 58Hano abhanyaroobho na abhahiiri bhaaye bhakiigwa kyeego Omukuru yamuroreeri ebhigoongi bhyaaru, bhakazomererwa hamwe neewe.
59Omwaana wuyo, hano yahikirye orusiku rwa kanaane, bhakaaza kumusaara.#1:59 Kumusaara. Rora okusaarwa mu Bhugaruri bhwa Amangʼana Amakongʼu. Bhakeenda kumutoga eriina rya wiise Zakaria. 60Kyaamwe, nina akaanga, akabhuga, “Zeyi, atogwe Yohana.”
61Bhakamukyoora, “Ndora eriina riyo ritari mubhahiiri bheenyu!”
62Niho, bhakabhuurya wiise, kwo okumweerekya na amabhoko, abhazweenie kyeego akweenda atoge omwaana waaye. 63Akasabha ekigiro kyo okukaamira, akakaama, “Eriina ryaaye niwe Yohana.” Bhoosi ego bhakaruguura! 64Kyaamwe, omunwa gwaaye gukiigurwa, kweeki akabha aragaamba, akumukumya Taatabhugya.
65Abhanyaroobho bhoosi, bhakahaha, engʼana yiyo ekanyaragana bhukongʼu mbaara zoosi ze ebhiguru bhya Yudea. 66Kwo okubha bhoosi bhakiigwa obhunagya bhwo Omukuru bhwaari hamwe neewe, bhakabha bhakiibhuurya, “Omwaana wuyo arabha muutuki?”
Omweembo gwa Zakaria
67Zakaria, wiise wo omwaana wuyo, akiizuribhwa ne Ekoro Muhoreeru, akagaamba obhurooti,
68“Akumibhwe Omukuru, Taatabhugya wa Abhiiziraeri,
kwo okubha yiiziri kututuurya etwe abhaatu bhaaye.
69Taatabhugya atureeteeri Omutuurya weetu wa amanaga,
omwiibhurwa we ekisyooko kya Daudi, omuhokya waaye,
70kyeego yaragiri ekare hayo kubharooti bhaaye abhahoreeru.
71Akaraga kututuurya kubhabhisa bheetu,
na mumabhoko ga bhoosi bhano bhakutubhiihirirya.
72Akabhuga kubha, arabharorera ebhigoongi bhazaazi bheetu
no okuhiita eriiragano#1:72 Eriiragano. Rora engʼana yino mu Bhugaruri bhwa Amangʼana Amakongʼu. rirya eriihoreeru.
73Eriiragano riyo niryo akakora na zaazi weetu Aburahamu.
74Tutuuriibhwe kurwa mumabhoko ga abhabhisa bheetu,
okubha tumuseengere, kutama kubha ne ehaha,
75tubhe bhahoreeru na abhaheene embere waaye,
kuziisiku zeetu zoosi.
76Awe omwaana waane,
orabhirikirwa omurooti wa Taatabhugya Wuno Ari Iguru we Ebhigiro Bhyoosi.
Orakaangata embere wo Omukuru,
abhone omweererye abhaatu kuziinzira zino araahitire.
77Obhabhuurire abhaatu bhaaye kubha,
bharatuuribhwa kwo okwaabhirwa kwe ebhibhi bhyaabhu,
78kwe ebhigoongi bhyaaru no obhunyoohu bhwa Taatabhugya weetu.
No obhutuuribhwa bhuyo bhuratuhwaarukira kyo obhweero kurwa iguru.
79Na bhukabhabharira bhoosi bha mukiirima
na bhano bhakwoobhoha enyaako yo oruku runo rwaari kuuza.
Bhuratukaangata tee,
tubhe turahita munzira yo omureembe.”
80Yohana akakiina, akabha na amanaga mukoro yaaye, akagya kwiikara mwiitirigo tee, hano eriibhaga ryahikiri akarweera mu Bhiiziraeri.
Currently Selected:
Ruuka 1: ZAK
Highlight
Share
Copy
Want to have your highlights saved across all your devices? Sign up or sign in
© 2023 Wycliffe Bible Translators, Inc. All rights reserved.
