Amahokya ga Abheega 2

Ekoro Muhoreeru arabhiituumira abhiikirirya

1Hano orusiku rwe enyaangi ya Pentekositi#2:1 Pentekositi yaari ni nyaangi ya amagesa ku Bhayahudi, na kweeki yaari ni siku miroongo etaano (50) kweema orusiku runo Yeesu yaryookiri. Rora Abharaawi 23:15-22. rwahikiri, abhiikirirya bha Yeesu bhoosi bhaari bhiikumaniirye ahagiro hamwe. 2Rugeendo rumwe, kukahwaaruka eriiraka kyo obhukama obhuhaari bhwo okurweera mwiisaaro, eriiraka riyo rikiizurya enyuumba yoosi muno bhaari bhiikumaniirye. 3Niho bhakarora ebhigiro kyo orurare rwo omuriro, bhikatwaanikana, bhikiituuma iguru wa bhoosi. 4Abhaatu bhoosi bhano bhaari kurusiku ruyo, bhakiizuribhwa Ekoro Muhoreeru, bhakataanga kugaamba kubhigaambo ebhiindi, kyeego Ekoro Muhoreeru akabhakaangata okugaamba.

5Ambe, Yerusaremu bhaari bhariho Abhayahudi bhano bhaamwiikiriirye Taatabhugya, na bhaari bharweereeri kubhyaaro bhyoosi.#2:5 Kwiibhaga riyo Abhayahudi bhaaru bhaari bhanyarageeni mubhyaaro ebhiindi. 6Hano bhakiigwa eriiraka riyo, esaango ekuru ya abhaatu bhakasikana. Bhoosi bhakaruguura, kwo okubha bhakiigwa ebhigaambo bhyaabhu bhya simuka kyeego bhikugaambwa. 7Hano bhaari bhakuruguura no okugaandaara, bhakiibhuurya, “Awe bhoosi bhano tukubhiigwa bharagaamba ego, bhatari Abhagariraaya? 8Erabhabhwi etwe twoosi okubhiigwa bharagaamba ebhigaambo bhyeetu bhya simuka? 9Na gati weetu, bharimu abhaatu okurwa ebhyaaro bhya Abhapariti, Abhamedi na Abheeramu. Na abhaandi bhararwa ebhyaaro bhya Mesopotamia, Yudea, Kapadokia, Poonto na Asia, 10Furigia, Pamufiria na Misiri. Na abhaandi bhakarwa mbaara zye ekyaaro kya Ribia kino kiri haguhi no omugye gwa Kirene, na abhaandi bheetu ni bhagini okurwa mumugye gwa Rooma. Gati waabhu ni Bhayahudi bha simuka na Abhayahudi bhano bhaarwiiri ebhyaaro ebhiindi, bhano bhiikiriirye enyaangi ye Ekiyahudi. 11Na bhariho abhaaru ni Bhakirete na abhaandi ni Bhaaraabu. Etwe twoosi turabhiigwa bharagaamba ebhigaambo bhyeetu iguru wa amahokya amakuru ga Taatabhugya!”

12Abhaatu bhoosi bhakaruguura no okutitiikana eno bhariibhuurya, “Niki obhugazuro bhwa amangʼana gano?”

13Nawe abhaandi bhakabhaseka, bhakabhuga, “Awe bhano bhagwaatirwe na amaanzi go omuzabibu!”

Petero ararwaazira esaango ya abhaatu

14Niho Petero akiimeerera hamwe na abheega ikumi na wumwe bharya. Akataanga okubhabhuurira abhaatu bhayo kwiiraka ikuru, “Emwe Abhayahudi abharikyaane, na neemwe abhiikari abhaandi bha Yerusaremu, mumenye eriingʼana rino, no okwiitegeerera amangʼana gaane. 15Abhaatu bhano bhatagwaatirwe kyeego mukwiiseega, mutakurora ekyaari etabhoori, eriibhaga rya katatu! 16Nawe engʼana yino ni yirya yagaambirwe no omurooti Yoeri,

17‘Taatabhugya arabhuga, muziisiku zyo obhuteero,

ndabhiikirya Ekoro Muhoreeru iguru wa abhaatu bhoosi.

Abhaana bheenyu bhe ekisubhe na bhe ekikari bhararuusya obhurooti,

na abhamura bheenyu bhararora obhurori,

na abhakaruka bheenyu bhararoota ebhirooto.

18Kuziisiku ziyo ndabhiikirya Ekoro Muhoreeru waane

naabhe iguru wa abhagya bhaane,

abhasubhe na abhakari,

neebho bhararuusya obhurooti.

19Ndakora ebhiruguuro iguru kwiisaaro,

ne ekyeerekenio mukyaaro hano.

Na abhaatu bhararora ebhyeerekenio bhya amanyiinga no omuriro,

ne eryooki ryo omwooki.

20Eryoobha ririikyoora kubha ekiirima,

no omweeri gurakaangaara kya amanyiinga,

gayo garakorwa hano rukubha rukyaari kuuza

orusiku orukuru rwo obhuguungo bhwo Omukuru.

21Nawe omuutu wuyo woosi wuno akusabha

kwo okwiisiga eriina ryo Omukuru,

aratuuribhwa.’#2:21 Rora Yoeri 2:28-32. ”

22Petero akageenderera kugaamba, “Emwe abhaatu bha Iziraeri, mwiitegeerere amangʼana gano. Taatabhugya omweene yabheerekirye kubha arakora emirimo kuhitira ku Yeesu wa Nazareeti, yakoriri ego kwe enzira ye ebhitiika, ebhiruguuro ne ebhyeerekenio bhino akukora gati weenyu, kyeego emwe abheene mumenyiri. 23Yeesu wuno yatuurirwe mumabhoko geenyu, kyeego Taatabhugya yeendiri okurwa obhutaangi, na neemwe mukamwiitira kumusaraba, kwe enzira ya abhaatu abhabhi.#2:23 Abhaatu abhabhi, obhugazuro obhuundi bhuratura kubha, abhaatu bhano bhatari Abhayahudi. 24Nawe Taatabhugya akamuryoora kurwa mubhaku, akamuruusya mubhururu bhwo oruku, kwo okubha etaangaturikeeni agwaatwe no oruku! 25Naabhe omutemi Daudi akagaamba iguru wa Yeesu,

‘Nikamurora Omukuru embere waane eriibhaga ryoosi.

Na nitakusiingisibhwa kweeki,

kwo okubha ari kukubhoko kwaane kwo obhuryo.

26Kweego, ekoro yaane ekazomererwa,

kweeki orurimi rwaane rurariryaata.

No omubhiri gwaane,

gurabha no obhwiisige,

27kwo okubha awe otakunitiga nyaari.

No otakwiikirirya omubhiri gwo Omuhoreeru waazo gubhore.

28Awe onierekirye eziinzira zo obhuhoru,

Oniizuriirye obhuzomererwa bhwaaru,

kwo okubha orabha hamwe na neenye.’#2:28 Rora Zaburi 16:8-11. ”

29Petero akageenderera okugaamba, “Abhahiiri bhaane, ndeenderwa nibhabhuurire kwe eheene kubha zaazi weetu Daudi akakwa. Neewe akabhiikwa ne embiihira yaaye eriho hano tee reero. 30Nawe, kwo okubha Daudi yaari omurooti, akamenya kubha Taatabhugya akamuragania kwo okumwiirahiirira kubha, yaramutuura omuutu wumwe we ehamati yaaye kubha omukaangati wo obhutemi bhwaaye.#2:30 Rora 2 Samweeri 7:12-13. 31Daudi akabha ararora amangʼana gano garaatuuke embere, akagaamba iguru wo okuryooka kwa Masiya#2:31a Masiya ni ngʼana ye Ekieburania, obhugazuro bhwaku ni wuno ahakirwe amaguta. Mu Kiyunaani bharabhuga Krisito. Rora Krisito mu Bhugaruri bhwa Amangʼana Amakongʼu. weetu, kubha ataatigirwe nyaari no omubhiri gwaaye gutaabhoriri.#2:31b Rora Zaburi 16:10.

32“Taatabhugya akamuryoora Yeesu kurwa mubhaku, na neetwe twoosi ni bhamenyeekererya bhe engʼana yiyo. 33Taatabhugya akamugororokya no okumutiirya obhukuru, bhoono yiikeeri orubhaara rwaaye rwo obhuryo. Kyaamwe Taata akamuha Yeesu Ekoro Muhoreeru kyeego akamuragania, Yeesu woosi akatwiikirya Ekoro Muhoreeru, kyeego mukurora no okwiigwa. 34Daudi omweene ataatiiriri okusikira mwiisaaro, nawe akabhuga,

‘Omukuru, Taatabhugya akamubhuurira Omukuru waane,

“Wiikare orubhaara rwaane rwo obhuryo,

35tee hano nikutuura abhabhisa bhaazo

iyaasi wa amaguru gaazo.” ’#2:35 Rora Zaburi 110:1.”

36Petero akamaririirya okugaamba, “Abhiiziraeri bhoosi mureenderwa mumenye kwe eheene kubha, Yeesu wuno mukiita, niwe wuyowuyo Taatabhugya akamukora kubha Omukuru na Masiya!”

37Hano abhaatu bhiigwiiri amangʼana gayo, gakabhanyahaara bhukongʼu muziikoro zyaabhu. Kyaamwe, bhakamubhuurya Petero na abheega abharikyaaye, “Abhahiiri bheetu, bhoono tukorebhwi?”

38Petero akabhakyoora, “Mwoosi mute ebhibhi bhyeenyu, na mubatiizwe kuriina rya Yeesu Krisito, okubha mwaabhirwe ebhibhi bhyeenyu na murasuungʼaana Ekoro Muhoreeru. 39Obhurage bhuno ni iguru weenyu na abhaana bheenyu, na kubhaatu bhoosi bhano bhari mubhyaaro ebhiindi. Omukuru, Taatabhugya weetu, araabhabhirikire abhaatu bhoosi bhabhe bhaaye.”

40Petero akageenderera okubhariiha abhaatu bhayo kwa amangʼana agaandi maaru no okubhakumiirirya, akabhuga, “Mwiituurye no okurwa murwiibhuro orubhi runo!” 41Abhaatu bho okuhika ebhikwe bhitatu (3,000) bhakiikirirya ameegyo gano Petero yaari kweegya kurusiku ruyo, bhakabatiizwa, bhakagwaatana na abhaanabheega abhaandi bha Yeesu.

Abhiikirirya bha Yeesu bhariikirirania

42Neebho abhiikirirya bhaari bhariiruusya okweega ameegyo ga abheega bha Yeesu, na bhakagwaatana hamwe no okurya mwiigari ryo Omukuru eriihoreeru#2:42 Okurya mwiigari ryo Omukuru eriihoreeru, obhugazuro bhwaku ni kubhega omukaate no okunywa amaanzi go omuzabibu kwo okumuhiita Omukuru Yeesu. no okumusabha Taatabhugya. 43Abheega bhano bhaari bharakora ebhyeerekenio ne ebhiruguuro bhyaaru, bhikakora bhoosi bhakagwaatwa ne ehaho ya Taatabhugya. 44Na abhiikirirya bhoosi bhaari no obhumwe, na ebhigiro bhyaabhu bhyoosi bhyaari kyo obhumwe bhwaabhu. 45Hano bhahaagurya ebhigiro bhyaabhu, bhahaatwaana abhaatu bhoosi kyeego bhaari bhakweenda. 46Kuziisiku zoosi, bhahaasikanira mwiiseengerero#2:46 Eriiseengerero. Rora engʼana yino mu Bhugaruri bhwa Amangʼana Amakongʼu. rya Taatabhugya. Bhahaabhega omukaate enyuumba kwe enyuumba, na bhahaasaanga okurya ebhyaakurya kwo obhuzomererwa na kwe ekoro yimwe. 47Bhahaamukumya Taatabhugya no okubhazomera abhaatu bhoosi. Ne eziisiku zyoosi Omukuru Yeesu akageenderera okutuurya abhaandi, na abhiikirirya bhakaaruha.

Currently Selected:

Amahokya ga Abheega 2: ZAK

Highlight

Copy