मरकुस 2
2
सोगुबा याॽमि नुबोक्पॽआ
(मत्ति ९:१-८; लुका ५:१७-२६)
1इक्याक नियाक ए़क्साङ येसु कफनरहुम सहर टेघडा। मोबा याॽमिजिडे़ॽ येसु खिमबेॽनोॽ टुये लुमे खा लेडोक्टुजि। 2मोबा बेॽलो याॽमिजि येसुबेॽ लेस्सामि मोडोगे़ॽ खिम होङ्सिॽयुनुङ पाखे़ॽयु पेन्ढाम ठाउँनोॽ माॽआड। मोडोक्पेॽ येसुडे़ॽ याॽमिजि निवाहाङ्मि बचन खेम्मे़ॽनिङ्सिडुजि।
3मोडोक्पेॽनोॽ रिबाङेॽ इक्को सोगुबा याॽमि खिमाजिनुङ येसु टुढाम खिमबेॽ लेस्सामि। 4याॽमिजि बेॽलो सुम्बॽआसे़ॽ माहाजिडे़ॽ मो सोगुबा येसुमि के़क्पेॽ मालाघे़ॽहेसुजि। मोडोगे़ॽ माहाजिडे़ॽ येसु पेम्बॽआ सोझो मिन्डु वाचेन टेनुङ मो सोगुबा इम्ढाम रुङ्घाक्नुङ्नोॽ येसुमि पोम्बेॽ टाम ले़ःॽनुङ हेॽओक्टुजि। 5माहाजिमि बिस्वास खाङ्नुङ येसुडे़ॽ मो सोगुबा याॽमि लुसु, “होउ पसा, हे़ने़हा चोप पापमि आम्लाङ लिसा।”
6इगो खा खेम्नुङ मोबेॽ सुम्बॽआ यहुदि धारमिक नियम इःॽखुबाजि निवे़ॽयु कासामि, “इगो याॽमिडे़ॽ इन्ढोङ इडोक्मा खा इःमे़ॽनिङ्सिन्डुए ? 7इगोसे़ॽको, निवाहाङ्रे सिःक्चोन्डु। निवाहाङ्बाङ हाइको असे़ॽटे पापमि आम्लाङ पिहेन्डुए ?” 8तर मोडोक्पेॽनोॽ येसुडे़ॽ माहाजिमि निवामि खा लेडोक्पेसु, मोबा माहाजि लुसुजि, “हे़निङे़ॽ इन्ढोङ इडोॽ मिॽइन्डानुमे ? 9इगो सोगुबा याॽमि ‘हे़ने़हा पाप आम्लाङ लिसा लुमा’ ने़ःक्चा ले़येन्डे ‘हे़ने़ए़ रुङ्घाक खिमानुङ राप्से लुमा ने़ःक्चा ले़ये’ लो लुसानुमे ? 10तर खेप्सानुमे, इगो मक्खाम्डेमबेॽ का याॽमिमि पसे़ॽ याॽमिजिमि पाप आम्लाङ पिमे अधिकार टुये लुमे खामि परमान हे़निङ पिनिम्ने़।” मोबा येसुडे़ॽ मो सोगुबा याॽमि लुसु, 11“के़ॽ हे़न लुन्ने़, हागो पुके़ॽनुङ आम्मि रुङ्घाक खिमानुङ खिम खडे।” 12चोबे़ॽ खाङ्मारोनोॽ मो याॽमि सुवाक्टोॽ पुकडा, मोबा रुङ्घाक खिनुङ खे़ॽपेसा। याॽमिजि खरि मिन्साङ निवाहाङ्मि ओहाङ ले़ःॽसाङ इडोॽ काबोगामि, “इडोक्मा खरिगो इन्डोक्पेॽसो मे़ङ्खाङ्डिॽ।”
येसुडे़ॽ मे़क्चेन लाघुबा खोमि चोङ्सा टोङ्बॽआ
(मत्ति ९:९-१३; लुका ५:२७-३२)
13येसु फेरि गालिल टोम्लिॽवा के़क्पेॽ खडा। मोबेॽ बेॽलो याॽमिजि खोबेॽ सुप्सामि मोबा येसुडे़ॽ माहाजि सिक्छे पिसुजि। 14मोबाङ येसु खे़ॽटिङ्माबेॽ इक्को मे़क्चेन लाघुबा याॽमि मे़क्चेन लामे़ॽनिङ्सिबॽआ येसुडे़ॽ खाङ्डोक्टु। मो याॽमि अलफयसमि पसा ले़टे़। मोबा येसुडे़ॽ मो लुसु, “कानुङ राप्से” इडोॽ लुबॽआ खेम्नुङ खो येःपुगा मोबा खोमि ए़ङ्गुवा ए़ङ्गुवा खडा।
15येसु मो मे़क्चेन लाघुबामि खिमबेॽ चाबाङ लिनुङ खडा, मोबा खोम चोङ्साजिनुङ सोरि चासिॽ पेना। मोबेॽ बेॽलो हाइखा मे़क्चेन लाघुबा पापि याॽमिजिसो येसुनुङ सोरि टुसामे। 16फरिसि लुमे हुलबेॽहा यहुदि धारमिक नियम इःॽखुबाजिडे़ॽ येसु मे़क्चेन लाघुबाजि, मोबा हाइखा पापि याॽमिजिनुङ सोरि चामे़ॽनिङ्सिबॽआ खाङ्डोक्नुङ माहाजिडे़ॽ येसुमि चोङ्साजि लुसुजि, “खो इन्ढोङ मे़क्चेन लाघुबा पापि याॽमिजिनुङ सोरि पेन्नुङ चाये ?” 17माहाजिमि खा खेम्नुङ येसुडे़ॽ इडोॽ लुसुजि, “सिडा ले़ःॽखुबागो मे़न्टुक्खुबाजिमि लागि ने़ॽनि टुक्खुबाजिमि लागिगोरे पाप्मिये। मोडोक्नोॽ का धरमिजिमि लागि ने़ॽनि तर पापिजि हिङ्मेॽसिॽ लेङ्इटिङे।”
मे़न्चारेॽ पेम्मे खा
(मत्ति ९:१४-१७; लुका ५:३३-३९)
18कोहि याॽमिजिडे़ॽ बप्तिस्मा पिघुबा युहन्नामि चोङ्साजिनुङ फरिसि लुमे हुलबेॽहा याॽमिजि मे़न्चारेॽ पेम्बॽआ बेलाबेॽ येसुबेॽ लेन्नुङ सिप्सुजि, “बप्तिस्मा पिघुबा युहन्नामि चोङ्साजिनुङ फरिसि लुमे हुलबेॽहा याॽमिजि मे़न्चारेॽ पेङ्इम्मे, तर इन्ढोङ हे़ने़हा चोङ्साजि चाहिँ मे़न्चारेॽ पेम्मिने ?” 19येसुडे़ॽ माहाजि लुसुजि, “फुङ्सयाबेॽ के़ॽपॽआ जन्तिजिनुङ सोरि लेम्बॽआ याॽमिजि मे़न्चारेॽ खे़ए़म्मे ? नायोङ्बानुङ सोरि टुमाबेॽको असासो मे़न्चारेॽ पेम्मिने। 20तर इक्याक मोडोक्हा याकसो लेङ्इहा, नायोङ्बा खोजिबाङ हाघे़ॽमा सिॽइये, मोबा माहाजि मे़न्चारेॽ पेङ्इम्मे।
21 “फेरि पुरानो चेॽ रेॽमाबेॽ असे़ॽसो चोङ चेॽमि टालोडे़ॽ रेबुजिने। रेबुहोङ्सो चोङ चेॽमि टुक्रा सुम्घे़ये मोबा छना नाःक्खे़ये मोडोगे़ॽ छना बेॽए होङ्वाया लिये।
22 “मोबा असे़ॽ चोङ अङ्गुरमि मद्य पुरानो साउकमि सुपपेॽ युङ्इन्डुजे ? युक्सुजिहोङ्सो मो सुप नाःक्खे़ये मोबा अङ्गुरमि मद्य ओप्खे़हा। मोडोगे़ॽ चोङ अङ्गुरमि मद्य चोङ सुपपेॽनोॽ युङ्मा खे़ये।”
नाजामे याकमि खा
(मत्ति १२:१-८; लुका ६:१-५)
23नाजामे यिडे़ॽ येसु सिचाम सोङ्रामि राम लिसाङ खे़ॽमे़ॽनिङ्सिडे़। इडोॽ खे़ॽमाबेॽ येसुमि चोङ्साजिडे़ॽ सिचाममि खाॽवा युप्पुगुजि। 24इगो खाङ्डोक्नुङ फरिसि हुलबेॽहा याॽमिजिडे़ॽ येसु लुसुजि, “खाक्से न! नाजामे याकपेॽ यहुदि धारमिक नियमडे़ॽ ए़ले़ःॽमे लुबॽआ योम्बोक हे़ने़हा चोङ्साजिडे़ॽ इन्ढोङ ले़ःॽमे़ॽनिङ्सिन्डुजे ?” 25येसुडे़ॽ माहाजि इडोॽ लुसुजि, “हाङ्बा दाउदनुङ खोमि लङ्गामजि चामे खा इमाङ माॽआडेम्बेॽ सगे़ॽ सिमाबेॽ हाङ्बा दाउदडे़ॽ इमाङ ले़टुए ? हे़निङे़ॽ मे़नेडानुमे ? 26अबियाथार लुमे चोप्पा एप्पा याडाङ्बामि पालोबेॽ मन्दिरबेॽ चेॽटिबॽआ चरेपा खोमि लङ्गामजिनुङ चोसुजि। माहा चरेपा चाहिँ यहुदि धारमिक नियमबेॽ चाहिँ याडाङ्बाजिबाङ हाइखाजि असे़ॽसो चामा मे़म्फे़ने़। तर हाङ्बा दाउदडे़ॽ टाङ्बे़ॽरेॽ ने़ॽनि खोमि लङ्गामजिनुङ हाःजोसु।”
27येसुडे़ॽ माहाजि लुसुजि, “याॽमिजिगो नाजामे याकमि लागि टोङ्बॽआ ने़ॽनि, तर याॽमिमि लागि चाहिँ नाजामे याक टोङ्बॽआ ले़ये। 28मोडोगे़ॽ का याॽमिमि पसा चाहिँ नाजामे याकमिसो परभु ले़ङे।”
Currently Selected:
मरकुस 2: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
