लुका 24
24
येसु सिबॽआबाङ हिङ्बोक्पॽआ
(मत्ति २८:१-१०; मरकुस १६:१-११; युहन्ना २०:१-१०)
1आइताबारमि माॽमिसेम्लाम मेॽनामिॽचि खोजिडे़ॽ पोरोक्पॽआ नाम्जानुहा केवा याङ्मानुङ येसुमि येःॽमाबेॽ खडामि। 2मोबेॽ रुक्माबेॽ येःॽमा टे़क्पॽआ रुङ्गोॽवा सेम्बेबॽआ चुप्टुजि। 3येःॽमा होङ्सिॽयु पे़खे़ॽनुङ खाङ्माबेॽ मोबेॽ परभु येसुमि सिगुयाक माॽआडा। 4मेॽनामिॽचि खरि मिन्नुङ इमा ले़ःॽमे ले़ःॽमे लिनुङ येःप्मे़ॽनिङ्सिमाबेॽ हाक्चोक्टोॽ उथ्रिॽमा पोॽइये चे़ॽ चाङ्खुबा निप्पाङ याॽमिजि खोजिमि के़क्पेॽ येःबाजि। 5इगो खाङ्नुङ मेॽनामिॽचि बेॽलो किस्सिमानुङ भुइबेॽ पोप्युसामि। मोडोक्पेॽ मोजिडे़ॽ सिप्साजु, “हिङ्रिक याॽमि इन्ढोङ्डे सिघे़ॽपॽआजिमि रुम्बेॽ योॽइन्डानुमे ? 6येसुगो इगोबेॽ माॽआये खो हिङ्बोक्पेटे़! याक्लो खो गालिलबेॽ टुमाबेॽ हे़निङ इमाङ लुबॽआ ले़टे़ मिॽखाक्सानुमे। 7खोसे़ॽ ‘का याॽमिमि पसा पापि याॽमिजिडे़ॽ राःप्खे़ॽनुङ काप्सिङ्बेॽ सिॽनेम्मे मोबा सुम याकपेॽ हिङ्बोक्इङे’ लुबॽआ खा हे़निङे़ॽ मिन्डेडानुमे ?” 8मोडोक्पेॽ खोजिडे़ॽ मो बचन मिॽटोक्टुजि।
9मोबा टेघे़ॽनुङ खोजिडे़ॽ खाङ्बॽआ चोप खा येसुमि एघारो जना चोङ्साजिनुङ हाइखा चोप याॽमिजि खेम्मेॽटुजि। 10माहा मेॽनामिॽचि मरियम मग्दलिनि, याकुबमि मामा मरियम, योअन्नानुङ हाइखा मेॽनामिॽचिसो टुसामे। इघाजिडे़ॽनोॽ येसुमि चोङ्साजि माहा खा खेम्मेॽटुजि। 11तर माहा चोङ्साजिडे़ॽ इघा खा मे़ॽनोक्हा मिॽनुङ बिस्वासनोॽ मे़ले़टुजि। 12तर पत्रुस चाहिँ सुवाक्टोॽ येःॽपोक्नुङ येसुमि येःॽमालाम पिङ्खडा। मोबेॽ रुक्नुङ खोसे़ॽ उःक्युनुङ येःॽमा होङ्सिॽयु खाङ्माबेॽ सिचेॽरेॽनोॽ टुसा। इगो खाङ्नुङ खो खरि मिन्साङ टेआबा।
येसु इम्माउस खे़ॽठाम रामबेॽ
(मरकुस १६:१२-१३)
13मो याकनोॽ येसुमि निप्पाङ चोङ्साजि यरुसलेमबाङ राम्माबेॽ निच्चि बोङ्डोक ओः सिॽइये इम्माउस निङ्मा खिम्डेम खे़ॽमे़ॽनिङ्सिडाजि। 14खोजिडे़ॽ येसुमि टुम्बेॽ लिबॽआ खा इःमे़ॽनिङ्सिडुजे। 15इडोक्मा खा इःसाङ खे़ॽमे़ॽनिङ्सिमाबेॽ मोबेॽ येसुसो लेन्नुङ खोजिनुङ्नोॽ राम्बोगा। 16तर खोजिडे़ॽ येसु लुनुङ मे़लेसाजु। 17येसुडे़ॽ खोजि लुसुजि, “हे़न्जिङ इमाङमि टुम्बेॽ खा इःसाङ राम्मे़ॽनिङ्सिन्जे ?” खोजि मोबेॽनोॽ येःबाजि, खोजिमि नजिक निरास खाङ्मुसे़। 18मोजिबेॽ केलेओपास निङ ले़ःॽखुबे़ॽ येसु लुसु, “यरुसलेमबेॽ लिबॽआ खामि टुम्बेॽ मे़खे़म्घुबा हे़ने़ॽरेॽनोॽ इक्को याॽमि ले़येले़। यरुसलेमबेॽ असेॽङा लिबॽआ खा हे़ने़ॽ इमाङ्सो मे़ङ्खेम्डिॽटुए ?” 19येसुडे़ॽ मोजि सिप्सुजि, “इन्डोक्मा खाडे ?” मोजिडे़ॽ लुसाजु, “नासरत पेङ्घुबा येसुमि टुम्बेॽए खाडि। खो इक्को अगमबक्ता ले़टे़, खोसे़ॽ निवाहाङ्नुङ चोप याॽमिजिमि रुम्बेॽ सक्तिदाङ्बा योम्बोक ले़टुए। 20तर कानिङ्हा एप्पा याडाङ्बाजिनुङ हाइखा बेॽहा याॽमिजिडे़ॽ खो दन्डा पिनुङ काप्सिङ्बेॽ सेॽनेॽमेॽटुजि। 21खोसे़नोॽ इस्राएलिजि मुक्ति पिये लुनुङ कानिङे़ॽ आसा ले़टुङ्मे़। तर खोनोॽ काप्सिङ्बेॽ सेॽनेबॽआसो आइ सुम याक याक्खे़टे़। 22फेरि कानिङ्मि कोहि नानुसाजिमि खा खेम्नुङ कानिङ खरि लिटिङ्मे़। माहाजि माक्मिसेल्लाम येःॽमाबेॽ खडामि, 23तर माहाजिडे़ॽ येसुमि सिगुयाक मोबेॽ मे़न्चुप्मिटुजि मोबेॽ थाङ्सिरिदुतजि चुप्मिटुजि, माहाजिडे़ॽ लुसुजिरो ‘येसु हिङ्रिक लिबेटे़।’ 24इडोक्मा खा खेम्नुङ कानिङ्मि हाइखा लङ्गामजिसो येःॽमा खाङ्सिॽ खडामि चइबानोॽ येसुगो मोबेॽ मे़न्चुप्टुजि।”
25येसुडे़ॽ मोजि लुसुजि, “हे़न्जिङ इन्डोक्मा उम्बरिङ्जि ले़न्जे, इन्ढोङ्होङ अगमबक्ताडे़ॽ लुबॽआ खा हे़निङे़ॽ बिस्वास मे़ले़ःॽहेसानुम। 26इमा खिरिस्टडे़ॽ खेः आङ्नुङ खोमि महिमाबेॽ खे़ॽमानोॽ खडे़ ने़ॽने ?” 27मोबा येसुडे़ॽ मोसानुङ अगमबक्ताजिडे़ॽ धारमिक नेॽचिराबेॽ खोम्टाङ्बामि टुम्बेॽ साप्पॽआ खा मोजि नुरोॽ इःबेॽटुजि।
28खोजि इम्माउस खिम्डेममि के़क्पेॽ रुक्माबेॽ येसु चाहिँ ए़डे़ॽ पोम्बेॽ खे़ॽमा योगा। 29तर मोजिडे़ॽ खो लुसाजु, “हागो नम किॽखे़ॽसिॽ पोरोइटे़, आइ हे़नसो कानिङ्नुङ्नोॽ सोरि पेने।” मोबा येसु मोजिनुङ्नोॽ सोरि पोप्सिॽ खडा। 30येसु चासिॽ पेम्माबेॽ चरेपा हुकपेॽ याङ्मानुङ निवाहाङ ओहाक पिसु मोबा चरेपा एॽनुङ मोजि पिसुजि। 31मोडोक्पेॽरे येसु ले़येले़ लुनुङ खोजिडे़ॽ लेसाजु। तर मोडोक्पेॽनोॽ येसु मे़खडा। 32खोजिदाङ्बा कासाजि, “खो काजिङ्नुङ रामबेॽ राम्माबेॽ धारमिक नेॽचिरामि खा नुरोॽ इःबेॽमाबेॽ काजिङ्मि निवा बेॽलोनोॽ साप्थाक्से ने़ॽनेन्डे ?”
33मोबाङ ए़क्साङ खोजि येःॽपुक्नुङ यरुसलेमलाम टेघडाजि। मोबेॽ रुक्माबेॽ मोजिडे़ॽ एघारा जना चोङ्साजिनुङ सुम्बॽआ हाइखा याॽमिजि चुबाजु। 34माहाजिडे़ॽ मोजि लुसुजि, “चइबानोॽ परभु हिङ्बोॽइटा इन्ढोङ्होङ खो सिमोननुङ खाङ्मुटा।” 35मोबा खोजिडे़ॽसो रामबेॽ लिबॽआ खानुङ येसुडे़ॽ चरेपा एॽमाबेॽरेॽ खो लेबॽआ खा मोबेॽ टुबॽआ चोप याॽमिजि लुबेॽटुजि।
चोङ्साजिनुङ येसु खाङ्मुबॽआ
(मत्ति २८:१६-२०; मरकुस १६:१४-१८; युहन्ना २०:१९-२३; एप्पा चोङ्सा १:४-८)
36इघा खा इःमे़ॽनिङ्सिमाबेॽ हाजोक्टोॽ येसु खोजिमि रुम्बेॽ येःबा, मोबा खोसे़ॽ माहाजि लुसुजि, “हे़निङ सान्ति।” 37माहाजि “कानिङ्मि पोम्बेॽ सिरावारे ले़ङ्इटा” लुनुङ बेॽलो किस्सिडामि। 38तर येसुडे़ॽ लुसुजि, “इन्ढोङ हे़निङ इडोॽ किस्सिन्डानिङे ? हे़निङ्मि निवाबेॽ सङ्का ले़न्डानुमे ? 39के़हा हुक सराङ खाक्सानुमे मोबा हे़निङे़ॽ का ले़न्डानिङे। हे़निङ्मि हुगे़ॽ सुःबानिङे, हे़निङे़ॽ का खाङ्मे़ॽनिङ्सिन्डानुमे के़ए़ हिङाबेॽ सानुङ से़ॽकोॽवा टुहा, तर सिरावामिगो सानुङ से़ॽकोॽवा माहा।” 40इडोॽ लुनुङ येसुडे़ॽ खोमि हुक सराङ खाङ्मे़ॽटुजि। 41माहा चोप खाङ्नुङ माहाजि खरि मिन्साङ बेॽलो साप्थाक्सामि, माहा खाबेॽ बिस्वासनोॽ मे़ले़ःॽहेसुजि। मोबा येसुडे़ॽ सिप्सुजि, “हे़निङ्नुङ इमा इमा चामाहा खा टुहा ?” 42माहाजिडे़ॽ ङिबॽआ ङामि हे़क येसु पिसुजि। 43येसुडे़ॽ मो ङा माहाजिमि पोम्बेॽनोॽ चोसु। 44मोबा येसुडे़ॽ इडोॽ लुसुजि, “हागो के़ॽ हे़निङ्नुङ टुमाबेॽ लुबॽआ खा पुरा लिजाटहा। मोसाडे़ॽ साप्पॽआ यहुदि धारमिक नियमबेॽ, मोबा अगमबक्तानुङ भजनसङ्ग्रहबेॽ साप्पॽआ चोप के़ए़ टुम्बेॽहा खा पुरा लिमानोॽ खे़हा लुनुङ के़ॽ हे़निङ लुबॽआ ले़टे़!”
45मोबा ए़क्साङ येसुडे़ॽ माहाजि निवाहाङ्मि बचनबेॽ साप्पॽआ खाडे़ॽ लुमायोक्पॽआ खा लेमे निवा पिसाङ लुसुजि। 46येसुडे़ॽ खोजि लुसुजि, “इडोॽ साप्पॽआ ले़ये, खिरिस्टडे़ॽ खेः आङ्नुङ सिमानोॽ खे़ये, मोबा सुम याकपेॽ हिङ्बोक्मा खे़ये। 47पाप ले़ःॽमा लेडानुमहोङ निवाहाङ्बाङ आम्लाङ चुप्मिन्डानुमे लुमे सुसमाचार खिरिस्टमि निङ्बेॽ यरुसलेमबाङ तरिक्नुङ चोप जातिहा याॽमिजि परचार ले़ःॽमा खे़ये। 48हे़निङे़ॽनोॽ इघा खा खाङ्बॽआनुङ लेबॽआसे़ॽ हे़निङे़ॽनोॽ याॽमिजि खेम्मेॽमा खे़म्मे। 49हागो खेप्सानुमे, के़ए़ पाबे़ॽ हे़न्ज्रुङ हुप्पॽआ खा के़ॽ हे़निङ्बेॽ पाङ्इनुङे, तर निवाहाङ्बाङ्ए सक्ति मे़न्चुप्रेॽलो हे़निङ इगो सहरबेॽनोॽ पेन्डिक्सानिङे।”
येसु थाङ्सिरिॽटु खे़ॽपॽआ
(मरकुस १६:१९-२०; एप्पा चोङ्सा १:९-११)
50मोबा ए़क्साङ येसुडे़ॽ खोम चोङ्साजि बेथानियालाम चिॽखे़ॽटुजि। मोबेॽ रुक्नुङ खोसे़ॽ हुक ठेॽनुङ चोङ्साजि आसिस पिसुजि। 51खोसे़ॽ आसिस पिमे़ॽनिङ्सिमाबेॽ चोङ्साजिबाङ हाःघे़ॽनुङ थाङ्सिरिॽटु ठेॽपोक्खडा। 52मोबा खोमि चोङ्साजि ओहाङ ले़ःॽमानुङ बेॽलो साप्थाक्साङ यरुसलेम टेआबामि। 53माहाजि सानिङ्नोॽ निवाहाङ्मि ओहाङ ले़ःॽसाङ मन्दिरबेॽ पेनामि।
Currently Selected:
लुका 24: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
