लुका 10
10
येसुडे़ॽ बहत्तर जना चोङ्साजि पाङ्बॽआ
1मोबा ए़क्साङ परभु येसुडे़ॽ हाइखा बहत्तर जना चोङ्सा से़नुजि। खो खे़ॽसिॽपोरोक्पॽआ खिम्डेमबेॽ खो खे़ॽमा याक्लो निप्पाङ, निप्पाङ ले़ःॽनुङ मो खिम्डेमनुङ सहरराजि इडोॽ लुनुङ पाक्सुजि। 2“सुम्मा खे़हा बालिगो बेॽलो टुहा, तर खेत्लाजि चुक्खे़टामे। इघा बालिदाङ्बा परभुनुङ पारथना ले़टानुमे खोसे़ॽ बालि सुम्खुबा खेत्लाजि पाङ्बेये। 3हागो हे़निङ खडानिङे, तर खेप्सानुमे, एःबाजिमि रुम्बेॽ सामुजि पाङ्बॽआडोक्नोॽ हे़निङ के़ॽ याॽमिजिमि रुम्बेॽ पाङ्मे़ॽनिङ्सिनिम्ने़। 4हे़निङे़ॽ याङ, चाब्रा, राङ्सुप इमाङ्सो ए़क्खिसानुमे रामबेॽ असानुङ्सो सेवा मुमाबेॽ बेॽलो एे़ॽफोप्मे।
5 “हे़निङ हाम्बे याॽमिमि खिमबेॽ रुॽइन्डानुम, चोप्पाङ याक्लो ‘निवाहाङ्डे़ॽ इगो खिमबेॽहा याॽमिजि सान्ति पिरो’ लुनुङ आसिस पिसानुमे। 6मो खिमबेॽहा याॽमिजिडे़ॽ सान्ति नेन्जोसुजिहोङ खोजिडे़ॽ सान्ति चुप्मिन्डुजे। तर माहाजिडे़ॽ सान्ति मे़नेन्जोसुजिहोङ मो सान्ति हे़निङ्बेॽनोॽ टेआप्मिये। 7हाम्बे खिमडे़ॽ हे़निङ नुरोॽ ले़म्मे मो खिमबेॽनोॽ पेनानिङे, हाइखा खिमराजि ए़ॽपोबानिङे। माहाजिडे़ॽ इमाङ इमाङ चामा उङ्मा पिम्मे माहानोॽ चासानुमे, इन्ढोङ्होङ खेत्लाडे़ॽ योम्बोकमि नमयाक चुप्मानोॽ खे़ये।
8 “मोडोक्नोॽ सहरराजि खे़ॽमाबेॽसो मोबेॽहा याॽमिजिडे़ॽ स्वागत ले़ःॽनुङ पिबॽआ चामा चासानुमे। 9मोबा सहरबेॽ टुहा टुक्खुबाजि नुबोगानुमे, ‘हागो निवाहाङ्मि राज्य लेङ्सिॽपोरोक्इटे़’ लुमे़ खा खेम्मेॽटानुमे। 10तर हाम्बे सहरबेॽ खे़ॽमाबेॽ मोबेॽहा याॽमिजिडे़ॽ हे़निङ स्वागत मे़ले़ःॽमिहोङ मो सहरबाङ खे़ॽनुङ इडोॽ लुसानुमे, 11‘कानिङ्मि सराङ्फे़क्माबेॽ किःक्पॽआ धुलोसो हे़निङ्मि बिरोधबेॽ फाप्युङ्आटुङ्मे। तर हे़निङे़ॽ इगो खा लेसानुमे निवाहाङ्मि राज्य हे़निङ्मि के़क्पेॽनोक लेम्बेटे़।’ 12के़ॽ हे़निङ लुनिम्ने़, निवाहाङ्डे़ॽ न्याय ले़ःॽमे़ यिडे़ॽ मो सहरबेॽहा याॽमिमि दोसाबाङ्सो सदोम सहरबेॽहा याॽमिमि दोसा आङ्हेमारोमा लिये।#उत्पत्ति १९”
बिस्वास मे़ले़ःॽखुबा सहरबेॽहा याॽमिजिमि दोसा
(मत्ति ११:२०-२४)
13 “होउ, खोराजिननुङ बेथसेदाबेॽहा याॽमिजि, हे़निङ चापहिमा चुप्खुबाजि! हे़निङ्मि रुम्बेॽ ले़ःॽपॽआ खरिहा योम्बोक टुरोसनुङ सिदोन सहरबेॽ ले़ःॽपॽआ ले़टाहोङ मोबेॽहा याॽमिजिडे़ॽ उहिलेनोॽ खोजिटाङ्बे़ॽ पाप ले़ःॽमा लेॽनुङ सिङ्घिमामि चेॽ चाङ्मानुङ खरनि सिःडुजि होला। 14निवाहाङ्डे़ॽ हे़निङ्मि खा ठाःक्मे यिडे़ॽ हे़निङ्मि दोसाबाङ्गो सिदोननुङ टुरोसमि दोसा बेॽलोनोॽ आङ्हेमारोमा लिये। 15होउ, कफरनहुमबेॽहा याॽमिजि, इमा हे़निङ थाङ्सिरिॽटु रुॽइन्डिङ्मा मिङ्इन्डानिङे ? हे़निङ्गो खेःलोकबेॽ सिॽइन्डानिङे।”
16येसुडे़ॽ चोङ्साजि लुसुजि, “हे़निङ्हा खा खेम्खुबाजिडे़ॽ के़ए़न्नोॽ खा खेम्इन्डुजे। हे़निङ्मि खा मे़ङ्खेम्खुबाजिडे़ॽ के़ए़ खासो खेप्सुजिने मोबा के़हा खा मे़ङ्खेम्खुबाजिडे़ॽ का पाङ्घुबा निवाहाङ पाबामि खासो खेप्सुजिने।”
बहत्तर जना चोङ्साजि टेजाबॽआ
17येसुडे़ॽ पाङ्बॽआ बहत्तर जना चोङ्साजि टेजासामि मोबा साप्थाक्साङ येसु लुसुजि, “परभु, हे़ने़ए़ निङ्मि सक्तिबेॽ मङे़ॽमा चापजि कानिङ्मि अधिनबेॽ लेस्सामि।” 18येसुडे़ॽ माहाजि लुसुजि, “के़ॽ सैतान नमसेल्लेॽवाडोॽ नान्द्रुङ्माबाङ हेओक्मे़ॽनिङ्सिबॽआ खाङ्डोक्टुङ। 19खेप्सानुमे, के़ॽ हे़निङ पुसे़ॽनुङ बिच्छि सिक्मे़ मोबा सतुरजिमि चोप सक्तिसोक्पेॽ अधिकार पिबेनिम्ने़। इमाङे़ॽसो हे़निङ नासि ले़ःॽहेमिने। 20मोडोक्सो मङे़ॽमा चापजि हे़निङ्मि अधिनबेॽ टुम्मे लुनुङ ए़ॽसाप्थाक्सानिङे। तर टाङ्बामि निङ थाङ्सिरिॽटु साप्नुङ युङ्बॽआ ले़ये लुनुङ चाहिँ साप्थाक्सानिङे।”
येसुडे़ॽ निवाहाङ ओहाक पिबॽआ
(मत्ति ११:२५-२७; १३:१६-१७)
21मोडोक्पेॽनोॽ येसुबेॽ पबित्रा होङ्निवा लेन्नुङ मोमि हाङ्हाङ्बेॽ लुसु, “हे निवाहाङ पाबा, थाङ्सिरिनुङ मक्खाम्डेममि मायोङ्बा के़ॽ हे़न ओहाक पिन्ने़ इन्ढोङ्होङ निवादाङ्बानुङ चेन्दुबाजिबाङ चुम्नुङ युङ्बॽआ खा हे़ने़ॽ इमाङ्सो मे़लेघुबाजि पिटुजे। हे पाबा इडोॽ ले़ःॽमानोॽ हे़ने़ॽ नेन्जोसु!
22 “पाबे़ॽ का चोप सक्तिनुङ अधिकार पिबेटिङे। पसा असा ले़ये लुनुङ का पाबे़ॽरेॽनोॽ लेये, इडोक्नोॽ पाबा असा ले़ये लुनुङ पसानुङ खोसे़ॽ लेमेॽपॽआ याॽमिजिबाङ हाइखाजिडे़ॽ लेसुजिने।”
23मोबा येसु चोङ्साजिलाम हिङ्घे़ॽनुङ माहाजि खुस्रिङ्मु लुसुजि, “इघा चोप खाङ्डोक्खुबा हे़निङ सारो आसिसनुङ्हाजि ले़न्डानिङे। 24के़ॽ हे़निङ लुनिम्ने़ नुरोॽ खेप्सानुमे, हे़निङे़ॽ खेम्बॽआनुङ खाङ्बॽआ इघा खा अगमबक्ताजिनुङ हाङ्बाजिडे़ॽसो बेॽलो खेम्मानुङ खाङ्मा मिॽटुजि तर खोजिडे़ॽ मे़ङ्खाङ्डोक्टुजि, मोबा मे़ङ्खेम्डोक्टुजि।”
नुबा पेन्लागाम
(मत्ति २२:३४-४०; मरकुस १२:२८-३१)
25इक्को यहुदि धारमिक नियम इःक्खुबा लेन्नुङ येसुमि निवा रेम्मामि येसु लुसु, “हे गुरुज्यु, इन्डोक्पेॽसो ए़स्सिमे हिङ्मवा चुप्मामि के़ॽ इमाङ ले़ःॽमा खे़ये ?” 26येसुडे़ॽ मो याॽमि लुसु, “धारमिक नियमबेॽ इमाङ साप्पॽआ ले़ये ? हे़ने़ॽ इमाङ लेसुए ?” 27मोसे़ॽ लुसु, “हे़ने़ॽ परमपरभु हे़ने़ए़ निवाहाङ चोप निवाडे़ॽ, चोप सक्तिडे़ॽनुङ चोप सोःक्माडे़ॽ नम्नम ले़टे। मोबाङ हे़ने़ए़ पेन्लागामजि आमटाङ्बाडोक्नोॽ नम्नम ले़टे।” 28येसुडे़ॽ लुसु, “हे़ने़ॽ नुरोॽ लुसु। हे़ने़ॽसो मोडोक्नोॽ ले़टे। मोबा इन्डोक्पेॽसो सिघे़ॽनिये हिङ्मवा चुप्मिन्डुए।” 29तर मोसे़ॽ येसुमि पोम्बेॽ खोमटाङ्बा नुबा खाङ्मुमामि येसु सिप्सु, “मोडोक्होङ काङ्मि पेन्लागाम चाहिँ असाडे ?” 30येसुडे़ॽ मो याॽमि लुसु, “इक्को याॽमि यरुसलेमबाङ यरिहो सहर उङ्मे़ॽनिङ्सिडा। मोडोक्पेॽनोॽ खुसुबाङ्जिडे़ॽ मो याॽमि चुप्टुजि। खो उक्चुङ्रे़क चुङ्नुङ सिघे़ॽलो मोःक्नुङ याःॽयोसुजि। 31इॽछोॽ ए़क्साङ मो राम ले़ःॽसाङ इक्को याडाङ्बा लेस्सा, मोबाङ मोसे़ॽ मो याॽमि मे़ङ्खाङ्डिडोॽ ले़ःॽनुङ खडा 32इडोक्नोॽ इक्को मे़क्चेन लाघुबासो मो रामबाङ्नोॽ लेस्सा, मोसो मोडोक्नोॽ मे़ङ्खाङ्डिडोॽ ए़ङ्घडा।
33 “ए़क्साङ इक्को सामरिसो मो रामबाङ्नोॽ लेस्सा। खोसे़ॽ मो सिघे़ॽलो रोम्आबॽआ याॽमि खाङ्डोक्टु। खाङ्मासोरोक्नोॽ खोमि निवे़ॽ नम्नम मिॽटु। 34मो सामरि मोमि के़क्पेॽ खे़ॽनुङ हुवाबेॽ जैतुनमि#१०:३४ फोप्रोॽमाडोॽमा केवा यिम्मे चा, इगोमि केवा सिडासो ले़ये केवानुङ अङ्गुरमि#१०:३४ चरचरेडोॽमा किङ्इये चामा नुये चा, इगोमि मद्य सिडासो ले़ये मद्य टिनुङ चेॽडे़ॽ हिःक्पेॽटु। मोबा खोसे़ए़न्नोॽ गधाबेॽ चेॽटिनुङ इक्को चाबाङ खिमबेॽ सेन्से स्याहार ले़टु। 35वागिया माक्मि मो चाबाङ खिमदाङ्बा सिसे़ङ्मि निच्चि मुन्डा पिसाङ लुसु, ‘इगो याॽमि नुरोॽ खाङ्बेॽमे हाइखासो खरचा सिॽहोङ का टेजानुङ फोङ्इनुङ्हा’।”
36मोबा येसुडे़ॽ मो सिप्सु, “हे़ने़ॽ मिॽमाबेॽ इघा सुम्बाङ याॽमिजिबेॽ खुसुबाङ्जिमि हुकपेॽ सिॽपॽआ याॽमिमि पेन्लागाम असाडे ?” 37मोसे़ॽ लुसु, “मो याॽमि नम्नम ले़ःॽखुबा।” मोबा येसुडे़ॽ लुसु, “खाडे, हे़ने़ॽसो मोडोक्नोॽ ले़टे।”
येसु, मारथा, मरियमनुङ चुप्पॽआ
38इक्याक येसुनुङ खोमि चोङ्साजि खे़ॽमे़ॽनिङ्सिमाबेॽ इक्को खिम्डेमबेॽ रुक्टुजि। मोबेॽ मारथा निङ ले़ःॽखुबा मेॽनामिॽडे़ॽ चुप्नुङ खोमि खिमबेॽ स्वागत ले़टु। 39मारथामि इक्को मरियम निङ ले़ःॽखुबा सम्समा निसा टुसे़। खो परभु येसुमि खा खेम्सिॽ येसुमि सराङ के़क्पेॽ पेना। 40मारथा चाहिँ चाबाङ्जिमि लागि चामा खे़ङ चुङ्मे योम्बोकपेॽ फोःप्सिघडा। इडोॽ खोमदाङ्बे़ॽ बेॽलो योम्बोक ले़ःॽमा सिप्पॽआसे़ॽ मारथा येसुबेॽ लेन्नुङ कासा, “हे परभु, चोप योम्बोक के़ॽरेॽनोॽ ले़ःॽमाबा सिजाघे़टिङे। के़ए़ निसे़ॽ इमाङ्सो योम्बोक ले़ःॽमाराप्निबा हे़ने़ॽ मे़ङ्खाक्सुए ? के़ए़ निसा आप्नुङ का योम्बोक ले़ःॽमाराप्मा लुबेॽमाना।” 41परभु येसुडे़ॽ मारथा लुसु, “होउ मारथा नानि, हे़न बेॽलो खामि लागि सुरता ले़ये। 42तर चोप्पाङ बेॽए खा इक्कोरेॽनोॽ टुये, मोनोॽ मरियमडे़ॽ सेङ्इटुए। मो खा खोबाङ असे़ॽसो ङाप्खे़ॽहेसुजिने।”
Currently Selected:
लुका 10: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
