युहन्ना 2
2
काना सहरबेॽ फुङ्सया लिबॽआ
1नथानेलनुङ चुप्पॽआ सिङ्आराम गालिलमि काना सहरबेॽ इक्को फुङ्सयामि भत्तेर टुसे़। मोबेॽ येसुमि मामासो टुसे़। 2येसुनुङ खोमि चोङ्साजिसो मो फुङ्सयाबेॽ के़ःॽपॽआ ले़टामे। 3अङ्गुरमि मद्य रुक्खे़ॽपॽआसे़ॽ येसुमि मामाडे़ॽ येसु लुसु, “अक्खाजिनुङ अङ्गुरमि मद्य रुॽखे़टहा।”
4इडोक्मा खा खे़म्नुङ येसुडे़ॽ खो लुसु, “मामा, के़ॽ इमाङ ले़ःॽमा खे़ये, का ए़ॽलुमा। हागोरो काङ्मि योम्बोक ले़ःॽमे बेला मे़लेन्डिॽ।”
5येसुमि मामाडे़ॽ मोबेॽ टुघुबा सेउतेजिबेॽ खे़ॽनुङ लुसुजि, “येसुडे़ॽ इमा ले़ःॽमा लुये हे़निङे़ॽ मोडोक्नोॽ ले़टानुमे।”
6हागो यहुदिजिमि चलनबेॽ चोखो ले़ःॽमाबेॽ पाप्मिहा इक्को सये लिटर वाङ्इये चुक्चि गोटा रुङ्गोॽवामि पस्ना टुसा।
7येसुडे़ॽ माहा योम्बोक ले़ॽखुबाजि लुसुजि, “इघा पस्ना इॽठुप योङा एन्डानुमे।” माहाजिडे़ॽ पस्ना इॽठुप इॽठुप योङा एन्डुजि।
8येसुडे़ॽ माहाजि लुसुजि, “ए़डे़ॽवा सिप्नुङ भत्तेरमि एप्पा पिसानुमे।” माहाजिडे़ॽ लाघे़ॽनुङ मो एप्पा पिसुजि। 9भत्तेरमि एप्पाडे़ॽ मो योङा सेबु, मो योङा चाहिँ अङ्गुरमि मद्य लिबेबॽआ ले़टा। माहा हाम्बाङ लाजे़ॽटुजे लुनुङ खोसे़ॽ मे़लेसुए, तर मोबेॽ योङा ए़ङ्खुबाजिडे़ॽरेॽ मो खा लेसुजे। मोबा भत्तेरमि एप्पाडे़ॽ नायोङ्बा टुढामबेॽ लेन्नुङ लुसु, 10“हाइखा याॽमिजिडे़ॽको भत्तेरबेॽ याक्लो नुबा अङ्गुरमि मद्य उङ्मा पिम्मे, मोबा याॽमिजिडे़ॽ बेॽलो उङ्सेॽनुङ्रेॽ मलुवा अङ्गुरमि मद्य पिम्मे, तर हे़ने़ॽको नुबा अङ्गुरमि मद्य हागोरो हाम्नुङ युङ्इटु।”
11येसुडे़ॽ ले़ःॽपॽआ खरिमा योम्बोकपेॽ इगो चोप्पाङ याक्लोमा योम्बोक गालिलमि काना सहरबेॽ ले़ःॽपॽआ ले़टे़। इडोक्मा खरिमा योम्बोकबाङ खोसे़ॽ टाङ्बामि महिमा खाङ्मुसु। इगो खाङ्नुङ खोमि चोङ्साजिडे़ॽ खो निवाहाङ्मि पसा ले़ए लुनुङ छना बेॽलो बिस्वास ले़टुजि।
12काना सहरमि फुङ्सया ए़क्साङ येसु खोमि मामा, निसाजिनुङ चोङ्साजि सोरि कफनरहुम सहरबेॽ खे़ॽनुङ मोबेॽनोॽ इक्याक नियाक पेना।
येसुडे़ॽ मन्दिरबेॽ इन्जाखुबाजि यिक्पॽआ
(मत्ति २१:१२-१३; मरकुस ११:१५-१७; लुका १९:४५-४६)
13यहुदिजिमि छुट्कारा चाड लेङ्सिॽपोरोक्पॽआ ले़टा, मोडोक्पेॽ येसु यरुसलेम खडा। 14मो मन्दिरमि सोक्लुङ्बेॽ याॽमिजिडे़ॽ गोरु, सामु, उख्रिॽवाजि इन्जामे़ॽनिङ्सिबॽआ, याङ लेम्मे़ॽनिङ्सिबॽआ#२:१४ याङ लेम्मे़ॽनिङ्सिबॽआ रोमि हाङ्बानुङ्मा याङ्बाङ यहुदि याङ लेम्मा खडे़, इन्ढोङ्होङ मन्दिरबेॽ भेटि चेॽटिमाबेॽ यहुदि याङ्रेॽ चेॽटिमा खडे़ चुप्टुजि। 15मोबा येसुडे़ॽ पडाकमि इक्को कोररा टोङ्नुङ माहा इन्जाखुबा याॽमिजिनुङ खोजिमि गोरुजि, सामुजि मन्दिरबाङ पाखे़ॽयु यिॽहाक्सुजि, मोबा याङ लेङ्घुबाजिमि टेबुल ओप्पेबेॽटुजि। 16मोबा येसुडे़ॽ उख्रिॽवा इन्जाघुजि लुसुजि, “इगोबाङ हे़निङ्मि इघा चोप थोक लाघे़ॽटानुमे, के़ए़ पाबामि खिम इन्जाढाम ए़ॽटोक्सानुमे।”
17मोडोक्पेॽ खोमि चोङ्सजिडे़ॽ धारमिक नेॽचिराबेॽ साप्पॽआ इगो खा मिॽटोक्टुजि, “हे़ने़ए़ खिममि लागि के़ए़ जोस का होङ्सिॽयु मिडोक्नोॽ हाङ्इये।”#भजनसङ्ग्रह ६९:९
18तर यहुदि डायोङ्बाजिडे़ॽ येसु लुसुजि, “हे़न्नुङ इडोॽ ले़ःॽमे अधिकार टुहा ? टुयेहोङ इमा कानिङ इक्को खरिमा चिङ्गा खाङ्मेॽहेये ?” 19येसुडे़ॽ माहाजि लुसुजि, “इगो मन्दिर योबेसानुमे, मोबा के़ॽ सुम याकपेॽ फेरि इगो आङ्सेनुङे।”
20माहाजिडे़ॽ लुसुजि, “इगो मन्दिर आङ्सेॽमा रिक्पोङ एच्चि निङ यगा, इमा हे़ने़ॽ सुम याकपेॽनोॽ आङ्सेन्डुए ?”
21तर येसुडे़ॽ लुबॽआ मो मन्दिर चाहिँ खोम टाङ्बामिन्नोॽ हिङा ले़टे़। 22ए़क्साङ येसु सिबॽआबाङ सुम याकपेॽ हिङ्बोगा मोडोक्पेॽ येसुडे़ॽ लुबॽआ इगो खा खोमि चोङ्साजिडे़ॽ मिडुजि, माहाजिडे़ॽ धारमिक नेॽचिराबेॽ साप्पॽआ खानुङ येसुडे़ॽ लुबॽआ बचनबेॽ बिस्वास ले़टुजि।
23छुट्कारा चाडमि बेलाबेॽ येसु यरुसलेमबेॽ टुसे़। मोडोक्पेॽ खोसे़ॽ बेॽलो खरिहा योम्बोक ले़टु। इघा खाङ्नुङ बेॽलो याॽमिजिडे़ॽ खोबेॽ बिस्वास ले़टुजि। 24तर येसुडे़ॽ माहाजिबेॽ भरोसा मे़ले़टु, इन्ढोङ्होङ माहा चोप याॽमिजि इन्डोक्हाजि ले़म्मे लुनुङ खोसे़ॽ नुरोॽ लेसुजे। 25येसु याॽमिजिमि निवामि टुम्बेॽ असे़ॽसो इःॽमा मे़म्पाप्टे़ इन्ढोङ्होङ याॽमिजिमि निवा इन्डोॽ ले़ये लुमे चोप खा खोसे़ॽ नुरोॽ लेन्डुहा।
Currently Selected:
युहन्ना 2: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
