युहन्ना 18
18
येसुमि बिरोध ले़ःॽपॽआ
(मत्ति २६:४७-५६; मरकुस १४:४३-५०; लुका २२:४७-५३)
1मोबा इघा पारथना इःसेॽनुङ येसु खोमि चोङ्साजिनुङ किद्रोन लुमे खोल्सा मेए़रेङ इक्को बगैँचाबेॽ खडा। 2मो ठाउँ येसु धोका पिघुबा चोङ्सा यहुदा इस्करियोतडे़ॽसो लेसुए, इन्ढोङ्होङ येसु मो ठाउँबेॽ टाङ्बामि चोङ्साजिनुङ सानिङ खडे़। 3मोडोक्पेॽनोॽ हुकपेॽ ताब्या, टोङ्इरा याङ्मानुङ, मोबा वामि उःप्मानुङ फरिसिजिनुङ एप्पा याडाङ्बाजिडे़ॽ पाङ्बॽआ मन्दिर हुङ्घुबाजि मोबा रोमि तिरिङ्गाजिनुङ सोरि यहुदा मोबेॽ लेस्सा।
4मोबा टाङ्बासोक्पेॽ लिसिॽपोरोक्पॽआ चोप खा खोसे़ॽ याक्लोबाङ्नोॽ लेसुहा। मोडोगे़ॽ येसु पोम्बेॽ खे़ॽनुङ माहाजि लुसुजि, “हे़निङे़ॽ असाडे योक्मे़ॽनिङ्सिन्डानुमे ?”
5माहाजिडे़ॽ इडोॽ लुसुजि, “नासरतमि येसु!”
येसुडे़ॽ माहाजि लुसुजि, “का खोनोॽ ले़ङे।” खो राःप्मेॽखुबा यहुदासो खोजिनुङ्नोॽ येःप्किगा। 6“का खोनोॽ ले़ङे” येसुडे़ॽ लुबॽआ खेम्मासोरोॽ माहाजि चोप ए़ङ्गुवालाम सेन्नुङ भुइबेॽ काक्सामि। 7फेरि येसुडे़ॽ माहाजि सिप्सुजि, “हे़निङे़ॽ असाडे योक्मे़ॽनिङ्सिन्डानुमे ?”
माहाजिडे़ॽ लुसुजि, “नासरतमि येसु।” 8येसुडे़ॽ माहाजि लुसुजि, “का खोनोॽ ले़ङे लुनुङ के़ॽ हे़निङ असिॽ लुबेनिम्ने़। चइबानोॽ हे़निङे़ॽ कानोॽ योक्पॽआहोङ, इघा याॽमिजि चाहिँ खे़ॽमेॽटानुमे।” 9इडोॽ “हे पाबा, हे़ने़ॽ का पिबॽआजि असासो नासि मे़लिमेॽटुङ”#भजनसङ्ग्रह ४१:९; १०९:४-८ लुनुङ येसुडे़ॽ याक्लो लुबॽआ बचन पुरा लिजासा।
10मोबा सिमोन पत्रुसडे़ॽ खोनुङ टुबॽआ ताब्या रिक्नुङ चोप्पा एप्पा याडाङ्बामि सेउते माल्खस निङ ले़ःॽखुबा याॽमिमि चुप्थिङ ने़ए़क पे़क्पेबेॽटु। 11तर येसुडे़ॽ पत्रुस लुसु, “हे़ने़ए़ ताब्या सिपपेॽ एन्डे। इमा काङ्मि पाबाडे़ॽ का पिबॽआ इगो खेःमि खोरियाबाङ के़ॽ ए़ॽउङ्मे ?”
हन्नासमि पोम्बेॽ येसु
12मोबा ए़क्साङ तिरिङ्गाजिनुङ माहाजिमि कप्ताननुङ मन्दिर हुङ्घुबाजिडे़ॽ येसु राःप्नुङ हिगुजि। 13याक्लो माहाजिडे़ॽ येसु हन्नास टुढामबेॽ चिॽखे़ॽटुजि, हन्नास चाहिँ मो निङ्मि चोप्पाङ एप्पा याडाङ्बा कैयाफामि खोम्नाम्बा ले़टे़। 14इगो कैयाफाडे़ॽनोॽ “यहुदि जाति चोप सिमाबाङ्गो मोमि साटो इक्को याॽमि सिमानोॽ नुबा लिये” लुनुङ यहुदिजि सल्लहा पिबॽआ ले़टे़।
पत्रुसडे़ॽ येसु लेसुङ्नि लुबॽआ
(मत्ति २६:६९-७०; मरकुस १४:६६-६८; लुका २२:५५-५७)
15सिमोन पत्रुसनुङ येसुमि हाइको इक्को चोङ्सा येसुमि ए़ङ्गुवा ए़ङ्गुवा खडाजि। मो हाइको चोङ्साडे़ॽ चोप्पाङ एप्पा याडाङ्बा नुरोॽ लेबॽआ ले़टे़। मोडोगे़ॽ खो येसुनुङ्नोॽ चोप्पाङ एप्पा याडाङ्बामि सोॽलुङ्बेॽ खडा। 16तर पत्रुस चाहिँ राम्बडेमबाङ पाखे़ॽयुनोॽ येःप्मे़ॽनिङ्सिडा। मोबा मो चोप्पाङ एप्पा याडाङ्बाडे़ॽ लेबॽआ इक्को चोङ्साडे़ॽ राम्बडेमबेॽ येःप्खुबा राङ्मिॽ पिच्छा लुनुङ, पत्रुस होङ्सिॽयु चिॽआप्टु। 17मो राम्बडेमबेॽ येःप्खुबा मेॽनामिॽडे़ॽ पत्रुस सिप्सु, “इमा हे़नसो इगो याॽमिमि चोङ्साजिबेॽ इक्को ने़ॽने ?”
पत्रुसडे़ॽ लुसु, “कागो ने़ॽनि।”
18चुङ लुबॽसे़ॽ मोबेॽ सेउतेजिनुङ मो खिम हुङ्घुबाजिमि टुप्नुङ हुङ्मे़ॽनिङ्सिडामि, मोबा पत्रुससो माहाजिनुङ्नोॽ येःप्नुङ मि हुक्सा।
चोप्पाङ एप्पा याडाङ्बाडे़ॽ येसु सिम्बॽआ
(मत्ति २६:५९-६६; मरकुस १४:५५-६४; लुका २२:६६-७१)
19हागो खिमहोङ्सिॽयु चोप्पाङ एप्पा याडाङ्बाडे़ॽ येसुमि सिक्छेनुङ खोमि चोङ्साजिमि टुम्बेॽ खो सिप्सु। 20येसुडे़ॽ खो लुसु, “के़ॽ याॽमिजिमि पोम्बेॽ लुटुङ्हाजि, के़ॽ सानिङ चोप यहुदिजि सुम्ढाम खिमबेॽनुङ मन्दिरबेॽ सिक्छे पिसुङ्जि। मोबेॽ चोप यहुदिजि सुम्इम्मे। के़ॽ कुम्नुङ इमाङ सिक्छेसो मे़म्पिडिॽ। 21इन्ढोङ कानोॽ सिम्इङे ? के़ॽ इःॽपॽआ सिक्छे खेम्घुबाजिनोॽ सिप्साजे। के़ॽ इमाङ इःडुङ मोबा इमाङ लुसुङ चोप खा खोजिडे़ॽनोॽ लेन्डुजे।”
22येसुडे़ॽ इघा खा लुमे़ॽनिङ्सिमाबेॽ खोमि के़क्पेॽ येःप्पॽआ इक्को तिरिङ्गाडे़ॽ इडोॽ लुसाङ येसु फे़ःक्साङ लुसु, “इन्ढोङ चोप्पाङ एप्पा याडाङ्बानुङ्सो इडोॽ यामुये ?”
23येसुडे़ॽ मो याॽमि लुसु, “के़ॽ मङे़हा खा लुबॽआ टुहोङ मोमि गबाहि पिमे, तर के़ॽ चाइबमा खा लुटुङ्होङ हे़ने़ॽ का इन्ढोङ रोम्इङे ?” 24मोबा येसु हिःक्नुङ्नोॽ चोप्पाङ एप्पा याडाङ्बा कैयाफाबेॽ पाक्सु।
पत्रुसडे़ॽ फेरि येसु लेसुङ्नि लुबॽआ
(मत्ति २६:७१-७५; मरकुस १४:६९-७२; लुका २२:५८-६२)
25मोडोक्रोसो सिमोन पत्रुस येःप्नुङ मि हुङ्मे़ॽनिङ्सिडा। मोबेॽ मि हुङ्घुबा हाइखाजिडे़ॽ फेरि खो सिप्सुजि, “हे़नसो मो याॽमिमिनोॽ चोङ्सा ने़ॽने ?”
पत्रुसडे़ॽ लुसु ने़ॽनि, “कागो ने़ॽनि।”
26मोबेॽ मि हुङ्घुबाजिबेॽ इक्को चोप्पा एप्पा याडाङ्बामि सेउतेमि टाङ्बाङ्सो टुसे़। मोसो सेउतेनोॽ ले़टे़। मोसे़ॽ पत्रुस लुसु, “के़ॽ हे़न येसुनुङ्नोॽ बगैचाबेॽ खाङ्बॽआ ने़ॽनेन्डे ?” 27पत्रुसडे़ॽ हाइके खेपसो फेरि कागो ने़ॽनि लुसु, मोडोॽ लुमासोरोॽ वापा ओगा।
पिलातसमि पोम्बेॽ येसु
(मत्ति २७:१-२,११-३१; मरकुस १५:१-२०; लुका २३:१-५,१३-२५)
28मोबा माक्मिसेल्लाम यहुदि मायोङ्बाजिडे़ॽ येसु कैयाफामि खिमबाङ रोमि एप्पा बेॽए डायोङ्बामि हाङ्खिमबेॽ चिॽखे़ॽटुजि। यहुदि डायोङ्बाजि चाहिँ हाङ्खिम होङ्सिॽयु पे़खडामि, इन्ढोङ्होङ छुट्कारामि चाड चामामि खोजि चोखो पेम्मामि लागि मोडोक ले़ःॽपॽआ ले़टे़। 29मोडोगे़ॽ रोमि बेॽए मायोङ्बा पिलातस पाखे़ॽयु पे़आप्नुङ माहा यहुदि डायोङ्बाजि लुसुजि, “हे़निङे़ॽ इगो याॽमिमि बिरोधबेॽ इमाङ आप्टिक टिटानुमे ?”
30माहाजि इक्को सेम्लाडे़ॽ पिलातस लुसुजि, “इगो याॽमि अपराधि मे़ले़टाहोङ कानिङे़ॽ हे़ने़ए़म्बेॽ इमा ले़ःॽसिॽ लाप्मे़ ?”
31पिलातसडे़ॽ माहाजि लुसुजि, “हे़निङे़ॽनोॽ इगो याॽमि चिक्खे़ॽटानुमे मोबा हे़निङ्मि यहुदि धारमिक नियमडे़ॽ लुडिडोॽ इगो न्याय ले़टानुमे।”
तर माहा यहुदि डायोङ्बाजिडे़ॽ पिलातस लुसुजि, “हाम्बे याॽमिसो सेॽनेमे दन्डा पिमे अधिकार कानिङ्नुङ माॽआहा।” 32टाङ्बा इन्डोॽ सिमा खे़ये लुनुङ येसु खोमटाङ्बे़ॽ लुबॽआ खा पुरा लिमामि इडोॽ लिबॽआ ले़टे़।
33पिलातस फेरि हाङ्खिम होङ्सिॽयु खे़ॽनुङ येसु के़ःॽनुङ सिप्सु, “इमा हे़न यहुदिजिमि हाङ्बा ले़ये ?”
34येसुडे़ॽ इडोॽ लुसु, “इगो खा आमटाङ्बे़ॽ लुमे़ॽनिङ्सिन्डुएन्डे अथबा हाइखाजिडे़ॽ काङ्मि टुम्बेॽ हे़न लुबेॽटामे ?”
35पिलातसडे़ॽ लुसु, “इमा हे़ने़ॽ का यहुदिडे मिॽइये ? हे़ने़हा जातिनुङ एप्पा याडाङ्बाजिडे़ॽ हे़न के़ए़ हुकपेॽ जिम्मा पिटामे। हे़ने़ॽ इमा मङे़ॽमा योम्बोक ले़टुए ?”
36येसुडे़ॽ पिलातस लुसु, “काङ्मि राज्य इगो मक्खाम्डेममि ने़ॽनि। के़ए़ राज्य इगो मक्खाम्डेमबेॽ ले़टाहोङ्गो के़हा सेवाकजि काङ्मि लागि कागामे होला, मोबा का यहुदिजिमि हुकपेॽ सिॽमा मे़म्पाप्टे़। तर काङ्मि राज्य इगोबेॽ ने़ॽनि।”
37पिलातसडे़ॽ येसु सिप्सु, “मोडोक्होङ हे़न हाङ्बानोॽ ले़ये ?”
येसुडे़ॽ लुसु, “का हाङ्बा ले़ङे लुनुङ हे़ने़ॽनोॽ लुमे़ॽनिङ्सिये। इगोमि लागि मोबा चाइबमा गबाहि पिमामि का इगो मक्खाम्डेमबेॽ टोक्इटिङे। चाइबमा खा नेन्जाखुबा चोबे़ॽ के़हा खा खेम्इन्डुजे।”
38पिलातसडे़ॽ येसु सिप्सु, “चाइबमा इमाङ्डे ?” इडोॽ लुनुङ पिलातस पाखे़ॽयु खे़ॽनुङ माहा यहुदिजि लुसुजि, “के़ॽ इगो याॽमिबेॽ इमाङ्सो आप्टिक मे़न्चुप्टुङ। 39तर छुट्कारामि चाडबेॽ के़ॽ हे़निङ्मि लागि इक्को कैदि लेप्पेमे चलन टुये। इमा हे़निङ्मि लागि यहुदिजिमि हाङ्बा लेप्पिॽमे़ ?”
40तर माहाजि इडोॽ कासाङ वोसामि, “इगो याॽमि ने़ॽनि, बारब्बा चाहिँ लेॽपेॽमा।” मो बारब्बा चाहिँ डाकु ले़टे़।
Currently Selected:
युहन्ना 18: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
