मात्ति 11
11
बाप्तिस्मा पिखुबा युहान्नागा छिम्योक
(लुका ७:१८-३५)
1येसुङा खा चेॽया उका एहिच जाना चेलाचि लुइचिहोङ्, उङ् गालिल लिङ्खामगा साहारचिबे याॽमिचि चिन्से नुङ् नुसाला खेम्मेसे ख्या॥
2बाप्तिस्मा पिखुबा युहान्ना छेक्पाङ्बे वायानिङ्, खिरिस्टङा चोगुहा कामगा उतुम्बे उङा खेप्सु॥ न्हाङ् उका चेलाचि येसुगाबे खा चेॽया छिम्से पाक्सुचि, 3“कानिङ् आस चोगुम्ङाना खिरिस्ट न्दागान्येम कानिङ् हेकोना याॽमिगा लाम्बु सोम्ङायेम?”
4येसुङा पोलोवा पिचि, “न्निङ्दा इहा-इहा निमासिइवागा नुङ् खेम्मा सिइवागा, खेइघोङ् ङ्खा चेॽयामाङ् युहान्ना खेम्मेतानुम– 5मिक्सुरुम्बाचिङा न्निमासिमे, लाम्मा मेयाखुबाचि न्लाम्मासिमे, कोरिचि न्नुमासिमे, नाभाक मेखेम्खुबाचिङा नाभाक ङ्खेम्मासिमे, न्स्याहाचि हिङ्गिलिक न्लेङ्मासिमे न्हाङा तुखिसुम्बाचिङा नुसाला खेम्मा न्दोक्मासिमे॥#यासाइया ३५:५-६; ६१:१ 6का साङ्का मेन्जोक्खुबा याॽमि जेप्पा आसिक तोक्खुबा ओम॥”
7बाप्तिस्मा पिखुबा युहान्नागा चेलाचि ङ्खेॽमास्यानिङ् येसुङा याॽमिचि युहान्नागा उतुम्बे खाॽला लुचि, “न्निङ्दा इसा चा मेॽनिङ्ना सुन्नेना ठोङ्बे इहा सोसे खेइघा? इना हिॽवाङा योक्सुना मिक्ला? 8मेन्नाभोङ् इना सोसे खेइघा? उचुन्हा-उचुन्हा तेक वाखुबाचि? ङ्खाॽलाहाचि गो हाङ्पाङ्बेॽले ङ्वामे॥ 9जेप्पा कायास्यानि, इना सोसे खेइघा? इना निङ्वाफुमाभाङ् चेक्खुबा सोसे? का न्निङ्दा लुमेॽनेनिन, न्निङ्दा निङ्वाफुमाभाङ् चेक्खुबा हाक्निङ्चा माडा एको निसुक्सुम्गाना॥ 10बाप्तिस्मा पिखुबा युहान्नामाङ् न्ना याॽमि ओम॥ उका उतुम्बे धार्मासाप्लाबे खाॽला छेप्तामा–
‘सो, ङ्गा ओन्दाङ्-ओन्दाङ् आका सालेन पिखुबा पाक्स्वाङ्,
न्हाङ् उङा ङ्गा लागि लाम्बु त्यार चोग्वाना॥’ #
मालाकि ३:१
11 “जेप्पा का न्निङ्दा लुमेॽनेनिन, मामुभाङ् ङ्वायाहा याॽमिचिबे बाप्तिस्मा पिखुबा युहान्ना हाक्निङ् माडा इसा चा मान्ना॥ ङ्खोङ्चा निङ्वाफुमागा राज्याबे इसा घाक हाक्निङ् मिना, न्ना युहान्ना हाक्निङ्चा माडा लेङ्मेॽना॥ 12बाप्तिस्मा पिखुबा युहान्नाङा पार्चार चोगुहा नाहाङ्तो खिङ्बेलाक सोम्मा निङ्वाफुमागा राज्या इब्बे-इब्बे पुमा सिमे॥ न्हाङ् बिरोध चोक्खुबा याॽमिचि च्हेन जोबारजोस्ति नाबे उमागा न्जोक्मासिमेहा॥#लुका १६:१६ 13इजाङ्बाङ्निङ् युहान्नागा पालो सोम्मा मोसाङा पिइघा ब्यावास्था नुङ् निङ्वाफुमाभाङ् चेक्खुबाचि घाकङा निङ्वाफुमागा राज्यागा उतुम्बे न्जेक्तुक्सा॥ 14ङ्खाचिङा लुइघा चेॽया बिस्वास चोग्वाम्घाभोङ् ङ्खाचिङा ‘तामेॽना’ लुइघा एलिया च्हेन युहान्नामाङ् ओम॥#मालाकि ४:५; मात्ति १७:१०-१३; मार्कुस ९:११-१३ 15इसागा खेम्माहा उनाभाक ङ्वान्ने, न्नाङा खेप्सुनि॥
16 “हेन्सेन्हा याॽमिचि का इनुङ् तोक्सुङ्चिङ्? ङ्खाचि गो बाजारबे ङ्युङ्मेहोङ् माडा सेम्लाङा काम्निभाकचिनुङ् खाॽला साला लेन्चाखुबा पिछानाछा लोॽवाहाचि–
17 ‘कानिङ् न्निङ्गा लागि फुलुलुबा मुतुम्ङा,
ङ्खोङ्चा न्निङ्दा न्लाक्तिगान॥
कानिङ् बिलापका छेम लुतुम्ङा,
ङ्खाॽनिङ्गो न्निङ्दा ङ्हाबिगान॥’
18 “इजाङ्बाङ्निङ् युहान्ना चाम्योङ्बाबे निङ्वा मेम्बिखुबा न्हाङ् सिम्लेॽमाङ्गा माध मेउङ्खुबा साया, ङ्खोङ्चा उङ्चिङा ‘ना याॽमिबे इसिॽना मुइ वान्नेॽना’ न्ल्वा॥ 19याॽमिगा उच्या चासाङ्-उङ्साङ् ताया, न्हाङा उङ्चिङा न्ल्वा, ‘सोयानुम्घायि, न्ना थेक्खुबा, सिङ्घोखुबा, तिरो पोक्खुबा नुङ् पापिचिगा काम्निभाक!’ निङ्वाफुमागा बुद्दि ठिक्हा बाङ्ना चेॽयागा पार्मान उका हेक्साङ् लाम्खुबाचिगा कामभाङ्माङ् ओमेहा॥”
बिस्वास मेन्जोक्खुबागा लागि चेतावानि
(लुका १०:१३-१५)
20हेखा साहारचिबे येसुङा प्याक आच्चाम्माहा काम चोगुक्सा, ङ्खाबेॽहा याॽमिचि पास्चाताप न्जोगानिन्हाङा उङा खाॽला लुसाङ् थिन्दुचि–
21 “ओ खोराजिन नुङ् बेथ्सेदा बेॽहा याॽमिचि, न्निङ्दा धिक्कार! इजाङ्बाङ्निङ् न्निङ्गा युम्बे चोगाहा आच्चाम्माहा काम टुरोस नुङ् सिदोन साहारबे चोगानिङ्बि ङ्खाचि उइले भाङ्रा ङ्हाप्सुहोङ् छुबुक न्नेक्तुहोङ् पास्चाताप न्जोगाब्याबि॥ #
यासाइया २३:१-१८; इजिकिएल २६:१-२१; योएल ३:४-८; आमोस १:९-१०; जाकारिया ९:२-४ 22का न्निङ्दा लुमेॽनेनिन, निरिक्का लेनबे न्निङ्गा हाक्निङ्गो टुरोस नुङ् सिदोन साहारबेॽहा याॽमिचिगा तुखि प्याक आङ्मा यामाहा लेङ्मेहा!
23 “ओ काफार्नाहुमबेॽहा याॽमिचि, इना न्निङ्दा ‘कानिङ् वालोकपे आदार तोक्त्वाम्ङाहा’ मितिमिघायि? न्निङ्दा गो नाराकपे तास्वाम्गाना! इजाङ्बाङ्निङ् न्निङ्दाबे चोगाहा आच्चाम्माहा काम सादोमबे चोगानिङ्बि सादोम साहार हेन्सेन सोम्मा चा वायामासाबि! #
यासाइया १४:१३-१५; उथुक १९:२४-२८ 24ङ्खाॽनिङ्गो का न्निङ्दा लुमेॽनेनिन, निरिक्का लेनबे न्निङ्गा हाक्निङ्गो सादोम साहारबेॽहा याॽमिचिगा तुखि आङ्मा यामाहा लेङ्मेहा॥”#मात्ति १०:१५; लुका १०:१२
ङ्यागास्याहाचि आराम चोक्माना ठोङ्
(लुका १०:२१-२२)
25ङ्खिङ्बेला येसुङा काया, “ओ आप्पा, वालोक नुङ् ताम्दाङ्फुमागा ह्वाङ्बा, का न्दा नुनिङ्वा पिमेॽनेन, इजाङ्बाङ्निङ् बुद्दिमानि नुङ् चेन्दुनाङान काखुबा याॽमिचिभाङ् चुमुघोङ् युक्सुघा खा चेॽया इहाचा मेनिखुबाचि योक्मेतुक्सुचिगा॥ 26जेप्पा आप्पा, न्दा खाॽला चोक्मा माङ् उचुन एतागा॥
27 “आप्पाङा का घाकथोक जिम्मा पियामाङ्हा॥ उप्पाङा से उच्या चिनाचोग्वा, न्हाङा उप्पा चा उच्याङा से चिनाचोग्वाना, हेकोहा इसाङा चा चिनान्जोग्वान्निना॥ ङ्खाॽनिङ्गो उच्याङा चिनाचोक्मेतुचिहाङा च्हेन उप्पा चिनान्जोग्वाना॥ #
युहान्ना ३:३५; १:१८; १०:१५
28 “ओ यागिसिइघा नुङ् प्याक खाले भारिङा फेङ्दिघा याॽमिचि, काबे तायानि, का न्निङ्दा आराम पिमेॽनेनिन्हा॥ 29आका जुवा खुयानुम न्हाङ् कानुङ् चिन्दानि, इजाङ्बाङ्निङ् का लुङ्माराङ्बा नुङ् मि लेङ्खुबाङान, न्हाङा न्निङ्दा निङ्वाबे आराम तोक्त्वाम्गाना॥#यार्मिया ६:१६ 30इजाङ्बाङ्निङ् आका जुवा खुॽमा साजिलोना, न्हाङ् आका भारि साप्हा॥”
Currently Selected:
मात्ति 11: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
