लुका 13
13
पाप चोक्माभाङ् लासानि
1ङ्खिङ्बेला न्नाबे न्छुप्साहा एकोहिप्पाङ् याॽमिचिङा येसु गालिलि याॽमिचिगा उतुम्बे खाॽला न्लु, “बोलि न्जोक्मास्याहा इखिङ् गालिलि याॽमिचि रोम खाम्युक्का तायेन्राङ्बा पिलातासङा सिमेतुचि न्हाङा ङ्खाचिगा हेलि बोलिदान न्जोक्मास्याहा पोसुचिगा हेलिनुङ् फासा॥” 2येसुङा ङ्खाचि लुचि, “ङ्खा न्सिसुचिहा याॽमिचि हेकोहा गालिलि याॽमिचि हाक्निङ् प्याक पाप चोक्खुबा न्सायाहोङ् खाॽला तुखि आङ्साङ् न्स्याहाभोङ् मितिॽवाघायि? 3ङ्खाॽला मेन्ना, का लुम्मेॽनेनिन, न्निङ्दा चा पास्चाताप न्जोगिगानभोङ् ङ्खाॽलामाङ् तुखि आङ्साङ् सिइवाघा॥ 4न्हाङा न्ना सिलोआम्बेॽना धाराहारा लेक्सुक्सानिङ् एता#१३:४ आठारा जाना॥ याॽमिचि फेङ्दिसिचि, ङ्खा याॽमिचि यारुसालेम साहारबे वाखुबा हेकोहा याॽमिचि हाक्निङ् प्याक पाप चोक्खुबा न्सायाहाभोङ् मितिॽवाघायि? 5ङ्खाॽला मेन्ना, का न्निङ्दा लुम्मेॽनेनिन, न्निङ्दा चा पास्चाताप न्जोगिगानभोङ् घाक ङ्खाॽलामाङ् सिइवाघा॥”
उसा मेङ्गेङ्खुबा वेक्पुगा उथाप
6न्हाङा येसुङा ना ताप्चेॽया लुचि, “एको याॽमिङा उका सिम्लेॽमाङ्हाम्बे एको वेक्पुगा उथाप लितुक्सा॥ उङ् न्ना वेक्पुगा उथाप्पे उसा केक्सुहायेम भोङ् बेला-बेलाबे सोसे तायामासा, ङ्खाॽनिङ्गो एको चा न्दोक्तुन॥ 7न्हाङा उङा सिम्लेॽमाङ्हाम सोखुबा खाॽला लु, ‘सो, का सुम फिम्बिलिङ् नाहाङ्तो ना वेक्पुगा उथाप्पे उसा केङ्मेहायेम्भोङ् लाम्बु सोङ्, ङ्खाॽनिङ्गो केङ्मायि ङ्गेक्सुन, नाङा बित्थाबे खाम से ओगाटे चोगुक्सु हाकु इम्दाहाक्सु॥’ 8न्ना सिम्लेॽमाङ्हाम सोखुबाङा लु, ‘हाङ्बा हाकु ए फिम्बिलिङ् वान्सोॽनि, का नागा उसाम खिरिरि खोन्द्वाङ्होङ् मोल एन्द्वाङ्हा॥ 9ना केङ्दिमेॽनायेम, केक्सुभोङ् उचुन्माङ् लेक्सा, ङ्गेक्सुन भोङ् इम्दाहाक्स्वाङ्ना॥’”
येसुङा उगाब्याना मामु नुमेतुना
10इमा आराम चोक्माना लेनबे येसुङा एको याहुदि छुम्पाङ्बे चिन्मास्या॥ 11न्नाबे एता फिम्बिलिङ् ओन्दाङ् नाहाङ्तो इसिॽना मुइङा याक्सुहोङ् उमिसिङ् उगाब्याना एको मामु वाया॥ उङ् उगाब्याहोङ् चेङ् येप्मा मेयाखुमा लेक्सामासा॥ 12येसुङा न्ना मामु याॽमि निसुहोङ् ओन्दाङ् काहोङ् खाॽला लु, “ओ मामु, न्दा तुक्माभाङ् नुयागाना॥” 13न्हाङा न्ना मामुगा पुप्साब्याना उमिसिङ्बे उमुकङा तोक्ति, ङ्खिङ्बेलामाङ् न्ना मामु चेङ् येबाहोङ् निङ्वाफुमागा पार्साम्सा चोक्मा तारोक्तु॥
14न्ना मामु याॽमि आराम चोक्माना लेनबे नुमेतुना निसुहोङ् याहुदि छुम्पाङ्बेॽना तायेन्राङ्बागा उछिक एक्ता न्हाङ् न्नाबेॽहा याॽमिचि लुचि, “काम चोक्मागा या लेन ङ्वान्ने, ङ्खा लेनचिबे ताइघोङ् नुयानि, ङ्खाॽनिङ्गो आराम चोक्माना लेनबे मेन्ना॥”#पारास्थान २०:९-१०; ब्यावास्था ५:१३-१४
15येसुङा न्ना खाॽलाना पोलोवा पि, “ओ किहि काप्खुबाचि, इना आराम चोक्माना लेनबे न्निङ्गा गोरु कि गाधा फुक्स्वाम्चिम्गाहोङ् माङ्च्वा उङ्मेसे ङ्खेत्वाम्चिम्गान्हायि? 16ना आब्राहामगा उच्या साइतानङा एता फिम्बिलिङ् नाहाङ्तो तुखि पिनेसुक्सा, इना आराम चोक्माना लेन ओमभोङ् साइतानगा उमुकपाहाङ् मेम्फोङ्मानायि?” 17येसुगा खाॽलाना पोलोवा ङ्खेप्सुहोङ् उका घाक बिरोधिचि ङोन्सिॽमाबे ङ्ङाया, ङ्खाॽनिङ्गो हेकोहा याॽमिचि च्हेन उङा चोगुहा खा आच्चाम्माहा काम न्निसुहोङ् न्जोदास्या॥
यारोगा दाना नुङ् खामिरगा ताप्चेॽया
(मात्ति १३:३१-३३; मार्कुस ४:३०-३२)
18न्हाङा येसुङा ङ्खाचि लुचि, “निङ्वाफुमागा राज्या खाॽलाना ओमभोङ् का इनुङ् तोक्सुङ्? 19न्ना यारोगा एको दाना लोॽवाना ओम॥ न्ना याङ्लि एको याॽमिङा उलाम्धाङ्बे ह्वेतु, न्हाङा न्ना पुसाहोङ् एको माडा उथाप लेक्सा, न्हाङ् न्नागा ह्वाकचिबे न्वाकुच्याकचिङा होप ङ्गाचि॥”
20येसुङा फेरि लुचि, “निङ्वाफुमागा राज्या का इनुङ् तोक्सुङ्? 21न्ना गो खामिर लोॽवाना ओम॥ एको मामुङा मिॽयाङ् खामिर सुम डालो खोॽमुङ्बे फास्वा, न्हाङा ङ्खा घाक खोॽमुङ् होम्द्वा॥”
छुछुॽना वालाम्बुङ्
(मात्ति ७:१३-१४,२२-२३; ८:११-१२)
22येसु यारुसालेम खेॽमास्यानिङ् लाम्बुबे उङा साहार-साहार नुङ् तेन-तेनचिबे चिन्साङ् ख्या॥ 23ङ्खिङ्बेला एको याॽमिङा उङ् छिम्दु, “चिन्खुबा, मिॽयाङ् याॽमिचिङा से मुक्ति न्दोक्त्वानायि?” 24येसुङा पोलोवा पिसाङ् लुचि, “छुछुॽना वालाम्बुङ्भाङ् उमा योगानि, इजाङ्बाङ्निङ् का न्निङ्दा लुम्मेॽनेनिन, प्याक याॽमिचि छुछुॽना वालाम्बुङ्भाङ् उमा ङ्योङ्मे ङ्खाॽनिङ्गो उमा ङ्यामेनिन्हा॥ 25खिङ् सोम्मा गो वालाम्बुङ् होसामा, ङ्खाॽनिङ्गो इलेन पाङ्ह्वाङ्बाङा वालाम्बुङ् छेक्तिॽवा, न्हाङा न्निङ्दा च्हेन पाखान्धाङ् खाॽला कासाङ् वालाम्बुङ् ढोक्ढोक चोग्वाम्गा, ‘हाङ्बा वालाम्बुङ् होसाब्याघायि॥’ उङा लुइवागा, ‘न्निङ्दा इसासिगान? न्हाङ् हेॽनाहाङ् ताइघा? का चिनान्दोङ्मेॽनेनिन्हा॥’ 26ङ्खिङ्बेला न्निङ्दा काइवागा, ‘कानिङ् न्दानुङ् युङिङ्होङ्, चाम्ङा उङुम्ङा न्हाङ् न्दा आनिङ्गा तेन्कुबे चिन्दागा॥’ 27ङ्खाॽनिङ्गो उङा फेरि न्निङ्दा लुइवागा, ‘न्निङ्दा इसासिगान? हेॽनाहाङ् ताइघा? जेप्पा का चिनान्दोङ्मेॽनेनिन्हा, ओ इसिॽहा काम चोक्खुबाचि आयुम्भाङ् खेब्यानि॥’#छेम ६:८ 28ङ्खिङ्बेला न्निङ्दा आब्राहाम, इसाहाक, याकुब नुङ् निङ्वाफुमाभाङ् चेक्खुबाचि निङ्वाफुमागा राज्याबे निस्वाम्चिम्गा न्हाङा न्निङ्दा च्हेन पाखा लेप्ताहाक्सिॽवागानिङ् न्निङ् केङ् छिम्साङ् हाबिॽवागा॥#मात्ति ८:११-१२; २२:१३; २५:३० 29याॽमिचि नाम्लोन, नाम्युङ्, फेक्सालाङ्, छुप्तालाङ्, यो-खे तो-मो घाक भाङ् न्दामेहोङ् निङ्वाफुमागा राज्याबे उङ्नुङ् चासे ङ्युङ्मे॥ 30ङ्खाॽनिङ्गो लोप हेक्साङ् आखुबाचि ओन्दाङ् ङ्ङामे, न्हाङ् लोप ओन्दाङ् आखुबाचि हेक्साङ् ङ्ङामेहा॥”#मात्ति १९:३०; २०:१६; मार्कुस १०:३१
यारुसालेम मितुहोङ् येसुगा उनिङ्वा तुगाना
(मात्ति २३:३७-३९)
31ङ्खिङ्बेलामाङ् एकोहिप्पाङ् फारिसिचि येसु वायानाबे न्दायाहोङ् खाॽला न्लु, “न्दा नाभाङ् लोन्दाघोङ् हेकोना ठोङ्बे खेब्या, इजाङ्बाङ्निङ् हाङ् हेरोद एन्टिपासङा न्दा सिमागा योक्मासिम्मेकाना॥”
32येसुङा ङ्खाचि लुचि, “ख्यानिघोङ् न्ना स्याल खाॽला लुयानुम, ‘का लोप च्हेन इसिॽहा मुइ लोन्नाहाङ्माहा नुङ् तुखाबाङ्चि नुमेॽमाहा काम चोग्वाङ्, न्हाङा का चोक्माहा काम हानि याइवाङाहा॥ 33ङ्खाॽनिङ्गो हेन, वान्दिक्ङा नुङ् उचुम्फाकङा का आका काम चोक्साङ् यारुसालेमबे खेमेङ्, इजाङ्बाङ्निङ् यारुसालेम पाखा हेॽनाचा निङ्वाफुमाभाङ् चेक्खुबा न्सिस्वानिन्ना॥’
34 “यारुसालेमबेॽहा याॽमिचि, ओ यारुसालेमबेॽहा याॽमिचि! न्निङ्दा निङ्वाफुमाभाङ् चेक्खुबाचि सिस्वाम्चिम्गा, न्हाङा न्निङ्दाबे म्बाक्साहा निङ्वाफुमागा चेॽया ताखुबा याॽमिचि लुङ्खाकङा लेप्त्वाम्चिम्गा॥ वागुमाङा उच्याचि छुप्स्वाचिहोङ् कुप्त्वाचिहा लोॽवा का चा इखिङ् खेप न्निङ्दा छुम्मा योक्नेनिन, ङ्खाॽनिङ्गो न्निङ्दा ङ्गाक्सिगान॥ 35सोयानुम, निङ्वाफुमाङा न्निङ्गा घाक साहार नासिॽवा॥ न्हाङा हाकु हेॽनिङ् सोम्मा न्निङ्दा ‘निङ्वाफुमागा उनिङ्बे ताखुबा आसिक तोक्खुबा ओम’#छेम ११८:२६; यार्मिया २२:५ ङ्गाइवागान ङ्खिङ्बेला सोम्मा का न्निमेकान्हा॥”
Currently Selected:
लुका 13: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
