युहान्ना 1
1
निङ्वाफुमागा चेॽया याॽमि लेक्सारायाना
1घाक हाक्निङ् ओन्दाङ् निङ्वाफुमागा चेॽया वाया, चेॽया निङ्वाफुमानुङ् वाया, न्हाङ् चेॽयामाङ् निङ्वाफुमा साया॥ 2उङ् उथुक नाहाङ्तोमाङ् निङ्वाफुमानुङ् वाया॥
3उथुक नाहाङ्तोहा घाक थोक निङ्वाफुमाङा चेॽयाभाङ्माङ् चोगु, न्हाङ् लेक्साहा हेखाचा थोक उङ् मेॽनिङ् न्लेक्सान॥ 4उङ्बे हिङ्लुङ् वाया, न्हाङ् न्ना हिङ्लुङ्ङा माङ् याॽमिचि जोति पिया॥ 5न्ना जोति कुइम्नाबे चाम्काचोङ्मे, न्हाङ् कुइम्नाङा ओम्ना हेॽनिङ्चा एम्सिॽमा ङ्यासुन्ना॥
6निङ्वाफुमाङा युहान्ना बाङ्ना एको याॽमि पाक्सु॥#मात्ति ३:१; मार्कुस १:४; लुका ३:१-२ 7उङ्भाङ् घाक याॽमिचिङा न्ना जोतिबे बिस्वास न्जोगुनिभोङ् न्ना जोतिगा गाबाहि पिॽमागा उङ् साचि लेक्साराया॥ 8युहान्ना उङ् आफाइ च्हेन न्ना जोति म्मेतासान, ङ्खाॽनिङ्गो न्ना जोतिगा गाबाहि पिसे से तायामासा॥ 9न्ना जोति घाक याॽमिचि जेप्पा ओम ओॽमागा कायुङ्लेनबे तायेतासा॥
10उङ् कायुङ्लेनबे वाया, न्हाङ् उङामाङ् कायुङ्लेन चोगु, ङ्खोङ्चा कायुङ्लेनबेॽहा याॽमिचिङा उङ् चिनान्जोगुनिन॥ 11उङ् उका याॽमिचिगाबे ताया, ङ्खाॽनिङ्गो उका याॽमिचिङा उङ् गाराहान न्जोगुनिन॥ 12ङ्खाॽनिङ्गो इखिङ्ङा उङ् गाराहान न्जोगु न्हाङ् उका उनिङ्बे बिस्वास न्जोगु, ङ्खाचि उङा निङ्वाफुमागा उच्याचि लेङ्माना चोक्तोक पिचि॥ 13ङ्खाचि पा-माभाङ् नुङ् याॽमिचिङा म्मितुहोङ् वाम न्लेक्साहा मेनिन्हा, ङ्खाॽनिङ्गो निङ्वाफुमामाङ् उङ्चि पा ओम॥
14निङ्वाफुमागा चेॽया सालुङ् लेक्साराया, न्हाङ् आनुगाराहा नुङ् दायाङा इप्तुहोङ् एङ्गा लुम्बे वाया॥ कानिङ् उका माडा माहिमा निसुम, न्ना माहिमा च्हेन निङ्वाफुमा पागा एको सेॽना उच्यागा लोॽवाना साया॥
15युहान्नाङा उका उतुम्बे गाबाहि पिसाङ् माडा सेम्लाङा खाॽला लुचि, “उङ् न्नामाङ् ओम, उका उतुम्बे का खाॽला कायामासाङ्, ‘का हाक्निङ् हेक्साङ् ताखुबा का हाक्निङ्चा साक्तिसालिना, इजाङ्बाङ्निङ् उङ् आका वाम लेङ्मा हाक्निङ् ओन्दाङ् नाहाङ्तो वान्नेॽना॥’”
16उका प्याक आनुगाराहाभाङ् कानिङ् घाकङा आसिक तोक्तुक्सुम्हा॥ 17इजाङ्बाङ्निङ् निङ्वाफुमाङा ब्यावास्था निङ्वाफुमाभाङ् चेक्खुबा मोसाभाङ् पिया, ङ्खाॽनिङ्गो आनुगाराहा नुङ् सात्याता च्हेन खिरिस्ट येसुभाङ् पिया॥ 18निङ्वाफुमा इसाङा चा हेॽनिङ्चा न्निसुक्सुनिन्ना, ङ्खाॽनिङ्गो निङ्वाफुमानुङ् वाखुबा एको सेॽना उच्याङा कानिङ् निङ्वाफुमा चिना तोक्मेतामाहा॥
बाप्तिस्मा पिखुबा युहान्नागा गाबाहि
(मात्ति ३:१-१२; मार्कुस १:१-८; लुका ३:१-१८)
19यारुसालेमबेॽहा याहुदि हाङ्गुम्बाचिङा एकोहिप्पाङ् हाङ्खुबाचि नुङ् लेबिचि युहान्नागाबे “न्दा इसागान?” भोङ् छिम्से म्बाक्सुचि, न्हाङा युहान्नागा गाबाहि खाॽलाना साया॥ 20उङा जेप्पा चेॽया मेन्जुप्निले खाॽला लुचि, “का खिरिस्ट मेॽङान्ना॥”
21न्हाङ् ङ्खाचिङा न्छिम्दु, “ङ्खाॽलाभोङ् न्दा इसागान? इना न्दा एलियागान?”#ब्यावास्था १८:१५,१८; मालाकि ४:५
युहान्नाङा लुचि, “का मेॽङान्ना॥”
ङ्खाचिङा फेरि न्छिम्दु, “इना न्दा निङ्वाफुमाभाङ् चेक्खुबा ओम्गान?”
युहान्नाङा लुचि, “का मेॽङान्ना॥”
22ङ्खाचिङा उङ् न्लु, “ङ्खाॽलाभोङ् न्दा इसागान? कानिङ् लुया, न्हाङ् कानिङ् पाङ्खुबाचि लुॽमा यासुम्चिम्ङानि॥ ङ्गा उतुम्बे न्दा आफाइ इ कामेकाना?”
23युहान्नाङा लुचि, “निङ्वाफुमाभाङ् चेक्खुबा यासाइयाङा कायाना लोॽवा ‘हाङ्बा तामाना लाम्बु त्यार चोगानुम’ कासाङ् इसा चा मेॽनिङ्ना सुन्नेना ठोङ्बे ओक्खुबागा का एको सेम्लाङान॥”#यासाइया ४०:३
24ङ्खा छिम्से म्बाक्सुचिहा माध्येबे एकोहिप्पाङ् फारिसिचि चा ङ्वाया॥ 25ङ्खाचिङा उङ् न्छिम्दु, “न्दा खिरिस्ट चा मेकान, एलिया चा मेकान न्हाङा निङ्वाफुमाभाङ् चेक्खुबा चा मेकान्नाभोङ् इजाङ् बाप्तिस्मा पिवाचिघा?”
26युहान्नाङा पोलोवा पिचि, “का गो माङ्च्वाङा बाप्तिस्मा पिवाङ्चिङ्, ङ्खाॽनिङ्गो न्निङ्युम्बे एको वान्ने, न्ना न्निङ्दा चिनान्जोग्वाम्गान॥ 27का हाक्निङ् हेक्साङ् ताखुबा उङ्माङ् ओम, उका लाङ्खोपका उनाम फुङ्मा चा का गो न्थेन्सिमेॽङान्ना॥”
28खा घाक चेॽया यार्दान होङ्मागा योप्पारिक युहान्नाङा बाप्तिस्मा पिॽमास्याना ठोङ् बेथानियाबे लेक्सामासा॥
निङ्वाफुमागा थुमा
29हेक्साङ्ना लेन युहान्नाङा येसु उङ् पोटि तायेतासाना निसुहोङ् खाॽला लुचि, “सोयानुम, कायुङ्लेनबेॽहा याॽमिचिगा पाप पोङ्खेखुबा निङ्वाफुमागा थुमा! 30उका उतुम्बेॽमाङ् का खाॽला लुॽनेन्सानिन, ‘का हाक्निङ् हेक्साङ् एको ताये, उङ् का हाक्निङ् साक्तिसालिना इजाङ्बाङ्निङ् उङ् आका वाम लेङ्मा हाक्निङ् ओन्दाङ् नाहाङ्तो वान्नेॽना॥’ 31का आफाइ उङ् इसा ओमभोङ् चिनान्जोगुक्साङान, ङ्खाॽनिङ्गो उङ् इजिरेलिचिगा उलुम्बे चिना तोक्मेमागामाङ् का माङ्च्वागा बाप्तिस्मा पिसाङ् तायाङ्ना ओम॥”
32युहान्नाङा गाबाहि पिसाङ् खाॽला लुचि, “का निङ्वाफुमागा आत्मा वालोकपाहाङ् ढुकुवा लोॽवा लेक्सुक्साहोङ् उङ् छोङ्बे युङाना निसुङ्ना॥ 33का उङ् चिनान्जोगुक्साङान, ङ्खाॽनिङ्गो का माङ्च्वाङा बाप्तिस्मा पिसे पाङ्खुबाङा खाॽला लुयामासाङ्, ‘हेॽना याॽमि छोङ्बे पाबित्तारा आत्मा तामेहोङ् युङाना निस्वागा, पाबित्तारा आत्माङा बाप्तिस्मा पिखुबा उङ्माङ् ओम॥’ 34का खा चेॽया उङ्बे निसुङ्, न्हाङ् उङ्माङ् निङ्वाफुमागा उच्या ओमभोङ् गाबाहि पिमेॽनेनिन्हा॥”
येसुगा ओन्दाङ्हा चेलाचि
35हेक्साङ्ना लेन फेरि युहान्ना न्ना ठोङ्बे उका हिप्पाङ् चेलाचिनुङ् येबामासा॥ 36ङ्खिङ्बेला उङा येसु खेॽमास्याना निसुहोङ् लुचि, “सोयाचु, निङ्वाफुमागा थुमा!” 37खा चेॽया खेप्साचुहोङ् ङ्खा हिप्पाङ् चेलाचि येसुगा हेक्साङ् लाचोगाचि॥ 38येसुङा हिक्साहोङ् सोचिनिङ् ङ्खाचि ओहेक्साङ्-ओहेक्साङ् तायेतासाचिहा निसुचिहोङ् छिम्दुचि, “न्जिङ्दा इहा योक्मासिम्मेचिघा?”
ङ्खाचिङा लुयाचु, “राब्बि (नागा तुम्बिला ओम, चिन्खुबा), न्दा हेॽने वामेकाना?”
39येसुङा ङ्खाचि लुचि, “आबाचिघोङ् सोयाचु!” ङ्खिङ्बेला नाॽमासेक्का ना मोक्तेहेक्सुसा॥ उङ्चि येसुनुङ् ख्याचि न्हाङ् उङ् वामाना ठोङ् सोयाचु न्हाङा न्ना लेन न्नाबे उङ्नुङ् वायाचि॥
40युहान्नाङा लुचिहा चेॽया खेप्साचुहोङ् येसुगा हेक्साङ् लाचोक्खुबाचिबे एको च्हेन सिमोन पात्तुरुसका उनुन्छा आन्दिरियास साया॥ 41मिहेक्साङ् आन्दिरियासङा उका उफु सिमोन पात्तुरुस तुप्सुहोङ् खाॽला लु, “कान्चिङ् मासिहा तुप्सामाङ्चुङ्ना॥” (न्नागा तुम्बिला “खिरिस्ट” ओम॥) 42आन्दिरियासङा सिमोन येसु वायानाबे खेतु॥ येसुङा सिमोन निसुहोङ् लु, “न्दा योआनेसका उच्या सिमोनगान, हाकु ङ्गा न्निङ् केफास लेङ्मेॽना॥” (केफासका तुम्बिला “लुङ्खाक” ओम॥)
येसुङा फिलिप नुङ् नाथानेल गालिलबे काचिहा
43हेक्साङ्ना लेन येसु गालिलबे खेॽमाना निङ्वा चोगा॥ न्हाङ् न्नाबे फिलिप तुप्सुहोङ् उङा खाॽला लु, “आका आहेक्साङ् लाचोगा॥” 44फिलिप चा आन्दिरियास नुङ् पात्तुरुस लोॽवा बेथ्सेदा साहारबेॽना याॽमि साया॥ 45फिलिपङा नाथानेल तुप्सुहोङ् खाॽला लु, “कानिङ् नासारातपे वाखुबा योसेफका उच्या येसु तुप्सुम्ङाना॥ उका उतुम्बे मोसाङा ब्यावास्थाबे नुङ् निङ्वाफुमाभाङ् चेक्खुबाचिङा चा न्छेप्तुक्साहा॥”
46खा खेप्सुहोङ् नाथानेलङा लु, “इना नासारातपाहाङ्चा खाॽला उचुन्हा चेॽया तामायामेहायि?”
फिलिपङा लु, “तायाघोङ् सो॥”
47येसुङा नाथानेल उङ् पोटि तायेतासाना निसुहोङ् उका उतुम्बे येसुङा लु, “सोयानुम, उङ् जेप्पागा इजिरेलि ओम, उङ्बे छालगा चेॽया इहाचा मान्हा॥”
48नाथानेलङा छिम्दु, “न्दा का इमिन चिनाचोगाङ्गाना?”
येसुङा पोलोवा पि, “फिलिपङा काॽमा हाक्निङ् ओन्दाङ्, न्दा वेक्पुगा उथापका उसामबे वायागानिङ्माङ् का निन्नुङ्नेन्सान्ना॥”
49नाथानेलङा लु, “राब्बि, न्दा गो निङ्वाफुमागा उच्यागान, न्दा इजिरेलिचिगा हाङ् ओम्गान!”
50येसुङा लु, “का न्दा वेक्पुगा उथापका उसामबे निनेन्ना लुॽनेन्नाङा का बिस्वास चोङ्मेङ्गाना? न्दा खा हाक्निङ्चा माम्माहा चेॽया निस्वाघा॥” 51येसुङा लुचि, “जेप्पा का न्निङ्दा लुमेॽनेनिन, न्निङ्दा वालोक होसाना न्हाङ् निङ्वाफुमागा वालोक्दुतचि याॽमिगा उच्याबे तो-मो न्जोक्मास्याहा निस्वाम्चिम्घा॥”#उथुक २८:१२
Currently Selected:
युहान्ना 1: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
