सेगुम्पाक 14
14
आइकोनियान साहारबे पावाल नुङ् बार्नाबास
1पावाल नुङ् बार्नाबास आइकोनियान साहारबेॽना याहुदि छुम्पाङ्बे चा ख्याचिहोङ् खिङ् उचुन चेक्ताचि, उङ्चिगा चेॽया ङ्खेप्सुहोङ् न्नाबे ङ्वायाहा प्याक याहुदिचि नुङ् हेकोहा जातिगा याॽमिचिङा येसुबे बिस्वास न्जोगु॥ 2ङ्खाॽनिङ्गो बिस्वास मेन्जोक्खुबा याहुदिचिङा च्हेन हेकोहा जातिगा याॽमिचि न्थेन्दुचिहोङ् ङ्खाचिङा पावाल नुङ् बार्नाबासका बिरोध चोक्मा न्दारोक्तु॥ 3ङ्खोङ्चा पावाल नुङ् बार्नाबास न्ना साहारबे माङ्फा लेन वायाचि॥ उङ्चिङा हाङ्बाबे भोरोसा युक्साचुहोङ् मेङ्गिसिॽले हाङ्बागा उतुम्बे चेक्ताचि॥ हाङ्बाङा उङ्चि आच्चाम्मा-आच्चाम्माहा चिङ्गो नुङ् काम चोक्माहा साक्ति पिचिहोङ् उङ्चिङा चेक्ताचुहा ङ्खा आनुगाराहागा नुसाला जेप्पागा ओमभोङ् पार्मान पिचि॥ 4ङ्खाॽनिङ्गो न्ना साहारबेॽहा याॽमिचि हिच्चि छुमबे म्फोक्सा॥ इखिङ् याॽमिचि च्हेन सेगुम्पाकचि पोटि, न्हाङ् इखिङ् च्हेन याहुदिचिपोटि लान्जोगा॥ 5न्नाबे हेकोहा जातिगा याॽमिचि नुङ् बिरोध चोक्खुबा याहुदिचिङा उङ्चि हाङ्गुम्बाचिनुङ् न्दोङाहोङ् पावाल नुङ् बार्नाबास लुङ्खाकङा लेम्सिॽमाहाचि भोङ् चेॽया ङ्हुप्तु॥ 6ङ्खाॽनिङ्गो खा चेॽया पावाल नुङ् बार्नाबाङा था तोक्ताचुहोङ् लुकोनिया बाङ्ना लिङ्खामबे आखुबा लुस्तारा नुङ् डार्बि साहारचिबे खुसाख्याचि॥ 7ङ्खा साहारचि नुङ् यो-खेहा ठोङ्चिबे चा उङ्चिङा नुसाला पार्चार चोगामासाचु॥
पावाल नुङ् बार्नाबास लुस्तारा नुङ् डार्बि साहारबे
8लुस्तारा साहारबे उलाङ् मेन्दाखुबा एको याॽमि वाया॥ उङ् वायानिङ् नाहाङ्तोमाङ् लाङ्सुरुम्बा सायाहोङ् हेॽनिङ्चा लाम्मा ङ्यासामासान॥ 9न्नाबे पावाल चेक्तानिङ् न्नाङा उनिङ्वा पिहोङ् खेम्मास्या॥ पावालङा चा न्नागा उनाचिकपे उचुन सो॥ न्हाङ् उङा ना याॽमिबे “का चा नुमा यामेङ्ना” बाङ्ना बिस्वास वेॽनाभोङ् था तोक्तु॥ 10न्हाङा पावालङा माडा सेम्लाङा खाॽला लु, “न्दा पोगाघोङ् चेङ् येबा!” खाॽला लुना खेप्सुहोङ् सोलोक न्ना याॽमि चा मुथिङ्गिरिक पोगा, न्हाङ् लाम्मा तारोक्तु॥
11पावालङा चोगुहा ङ्खा काम न्निसुहोङ् न्नाबेॽहा याॽमिचिङा लुकोनिया चेॽयाबे खाॽला कासाङ् ङ्ङोक्ता, “माङ्चि ले याॽमि न्लेक्सारायाहोङ् कानिङ्बे न्दायामाहा॥” 12ङ्खाचिङा बार्नाबास जिउस उनिङ् ङ्युक्सुबि न्हाङा पावाल च्हेन हार्मेस ङ्युक्सुबि, इजाङ्बाङ्निङ् पावाल निङ्वाफुमागा चेॽया प्याक चेक्खुबा साया॥ 13जिउस माङ्गा माङ्पाङ् च्हेन न्ना साहारगा उयुम्बे वाया॥ न्नाबेॽना हाङ्खुबाङा गोरुचि नुङ् फुङ्तिगेक#१४:१३ फुङ्गा तिगाना माला॥ ताहोङ् साहारगा मुक्खे वालाम्बुङ्बे ताया॥ इजाङ्बाङ्निङ् उङ्चि घाक तोङ्माहोङ् पावाल नुङ् बार्नाबास गोरुचिङा बोलि पिॽमा म्मितुक्साचि॥
14ङ्खाॽनिङ्गो सेगुम्पाक बार्नाबास नुङ् पावालङा ङ्खा चेॽया खेप्साचुहोङ् सोलोक उङ्चि तेक छिन्नाहाङ्साङ् याॽमिचिगा उलुम्बे लुक्ताख्याचिहोङ् माडा सेम्लाङा खाॽला लुयाचुचि, 15“हाओ काम्निभाकचि, मेन्ना खा इ चोगिहेक्सिघा? कान्चिङ् चा न्निङ्दा लोॽवाहा याॽमिचिङान॥ कान्चिङ्गो खाॽलाहा बित्थाहा काम लेप्तिम्घोङ् वालोक, सामुन्दारा, ताम्दाङ्फुमा नुङ् न्नाबे वेॽहा घाक थोक चोक्खुबा हिङ्गिलिक्ना निङ्वाफुमा पोटि लासिगानिभोङ् नुसाला खेम्मेसे तायामाङ्चिङ्हा॥#पारास्थान २०:११; छेम १४६:६ 16उइलेहा याॽमिचि गो निङ्वाफुमाङा उङ्चि न्निङ्वाबे म्मितुहा लोॽवा चोक्मा पिक्साचि॥ 17ङ्खाॽनिङ्गो उङा हेॽनिङ्चा उचुन्हा नुङ् भोलो लेङ्माहा काम चोक्मा न्लेप्तिक्सुन्हा॥ इजाङ्बाङ्निङ् उङा ताङ्खेङ्भाङ् वासिक तामेत्वाहोङ् ठिक बेलाबे चाचिॽया केङ्मेत्वा॥ कानिङ् खोॽनुङ् चाम्योङ्बा पिमेहोङ् याॽमिगा निङ्वा आनान्दाङा भोरिपुर्ना चोङ्बिमे॥ खाॽला निङ्वाफुमाङा चोगुहा कामङामाङ् उका साचि पिमेहा॥” 18खा घाक चेॽया लुयाचुचिहोङ् पावाल नुङ् बार्नाबासङा उङ्चि बोलि चोक्माभाङ् बोल्लाइङा ओन्दास्याचुचि॥
19न्हाङा एन्टिओखिया नुङ् आइकोनियानभाङ् एकोहिप्पाङ् याहुदिचि न्दाया॥ ङ्खाचिङा ङ्खा प्याक याॽमिचि न्थेन्दुचिहोङ् घाकङा पावाल लुङ्खाकङा न्लेप्तु॥ न्हाङ् उङ् स्याना लोप्पि म्मिताहोङ् साहारभाङ् पाखा न्साहेतुहोङ् न्लेप्ताहाक्सु॥ 20ङ्खाॽनिङ्गो बिस्वासिचि न्दायाहोङ् उका इघुरुम न्छुप्सानिङ् पावाल मुथिङ्गिरिक पोगा, न्हाङ् साहारबे लासाख्या॥ न्नागा हेक्साङ्ना लेन उङ् बार्नाबासनुङ् डार्बि साहारबे ख्या॥
पावाल नुङ् बार्नाबास सिरियागा एन्टिओखियाबे
21पावाल नुङ् बार्नाबासङा डार्बि साहारबे नुसाला खेम्मेताचुचिहोङ् प्याक याॽमिचि चेला चोगाचुचि॥ न्हाङा ङ्खाचि लुस्तारा नुङ् आइकोनियान लेङ्साङ् पिसिदिया लिङ्खामगा एन्टिओखियाबे लासाचि॥ 22न्नाबे उङ्चिङा चेलाचि “बिस्वासपे चात्तु लेक्सानि” लुसाङ् साहास पियाचुचि॥ न्हाङ् “कानिङ् निङ्वाफुमागा राज्याबे तामाहाक्निङ् ओन्दाङ् प्याक तुखि आङ्मा पोराचोङ्मेहा” भोङ् चिन्दाचुचि॥ 23न्हाङा पावाल नुङ् बार्नाबासङा ङ्खाचिगा घाक छुम्वाङ्चिबे धार्मासाप्ला चिन्खुबाचि सेगाचुचि, न्हाङा उपाबास ङ्युङाहोङ् पार्थाना चोक्साङ् ङ्खाचि उङ्चिङा बिस्वास न्जोगुना हाङ्बागा उमुकपे ङ्युक्सुचि॥ 24न्हाङा उङ्चि पिसिदिया खाम्युक लेङ्साङ् पाम्फिलिया लिङ्खामबे तायाचि॥ 25उङ्चिङा पार्गाबे चा निङ्वाफुमागा चेॽया खेम्मेताचुचि, न्हाङ् आटालिया साहारबे उक्साचि॥
26न्नाभाङ् उङ्चि होङ्गाॽवाबे थाङाचिहोङ् सिरियागा एन्टिओखियाबे लासाचि॥ न्ना एन्टिओखियाबेॽहा बिस्वासि फुनुन्छाचिङा माङ् पावाल नुङ् बार्नाबास निङ्वाफुमागा आनुगाराहाबे ङ्युक्सुचिहोङ् नुसाला खेम्मेॽमेसे म्बाक्सुक्साचि॥ ङ्खा काम पुरा चोगिॽयाचुहोङ् उङ्चि फेरि न्नाबेॽमाङ् लासारायाचि॥ 27उङ्चि एन्टिओखियाबे तायाब्याचिहोङ् छुम्वाङ्बेॽहा घाक बिस्वासिचि कायाचुचि॥ न्हाङ् निङ्वाफुमाङा उङ्चिभाङ् इमिन्हा काम चोगुहा, न्हाङा उङा हेकोहा जातिगा याॽमिचिगा लागि इमिन बिस्वास चोक्माना लाम्बु फान्दुबिचिहा ङ्खा चेॽयागा उतुम्बे ङ्खाचि योक्मेताचुचि॥ 28न्हाङा उङ्चि माङ्फा लेन न्नाबेॽहा बिस्वासिचिनुङ् वायाचि॥
Currently Selected:
सेगुम्पाक 14: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
