मति 7
7
दोसरि जनके दोस झिन लगोइह
(लुका ६:३७-३८,४१-४२)
1येसुजि फेरि कहलसि, “दोसरि जनके न्याय झिन करिह हसे परमेस्वर फेनि तोहराके न्याय नाहिँ करबसि। 2केहकेकि जसने तोहरा दोसरे जनके न्याय करबह, वसने परमेस्वर फेनि तोहाराके न्याय करबसि। जुन नापसे तोहरा दोसरे जनके न्याय करबह, परमेस्वर फेनि उहे नापसे तोहराके न्याय करबसि।#मरकुस ४:२४ 3तुइ केहके यापन भयवाक यखियामा भेलि घुजिया देखसहि, बाकि तोर यपने यखियामा भेलि मुङडावा हइने देखसहि? 4जब तोर यपने यखियामा मुङडा बडइ जउँ, तुइ कस्के यापन भयवाके, ‘याउ मुइ तोर यखियामा भेलि घुजिया निकडादेबहि’ कहके कहे सकबहि। 5अरे कपटिया, पहिला यपने यखियामा भेलि मुङडावा त निकडोहि, तब मतरे तुइ यापन भयवाक यखियामा भेलि घुजिया निकडावेके तहिँया खाँ डउलसे देखे सकबहि।
6 “पवितर चिजुसभ कुकुरानिके झिन दिह, नत फिरके तोहराके कटतइ। यापन मोतियाह सुवरवानिक यागा झिन फकिह, केहकेकि हुनुका टङवासे धङतइ।
मङह, खोजह हसे ढकढकउह
(लुका ११:९-१३)
7 “मङह त तोहरा पउबह, खोजह त तोहरा भेटोबह, ढकढकउह त तोहार तहिँया केउरिया खोलेतइ। 8केहकेकि जुने मङसिय, उअ पउसिय, जुने खोजबिय, उअ भेटोबिय हसे जुने केउरिया ढकढकोतइ वकर तहिँया केउरिया खोलेतइ। 9तोहारमधे कुन हखबह, जाकर बेटवा रोटि मङइकि, वकरके पत्थरा देबह, 10हसे माछरि मङइकि, साँप देबह? 11तोहरा पापि मन्से भके फेनि यगर यापन बेटवा-बेटियाके डउल चिजु देवे जनले बडह जउँ, स्वरगमा रहलाहर तोहार परमेस्वर पिता, हुनेसाङे मङलहरानिके झन कतेक बहुत यसल चिजु नाहिँ देबसि!
12 “दोसरि मन्सावाह तोहराके जसने व्यबहार करइ कहके चाहसह, तोहरा फेनि हुनुकाके वसने करिह। केहकेकि इहे व्यवस्था हसे अगमवक्तावानिक सिछा हखइ। #
लुका ६:३१
सेकटि दुवारि
(लुका १३:२४)
13 “सेकटि दुवारि माहे भितरा पेसिह, केहकेकि चकरि दुवरिया हसे उसार पइडवा विनासमा पुगोतइ, वसने दुवारि माहे बहुत जन पेसे खोजसइ। 14बाकि जिवनमा पुगोनवा दुवरिया सेकटि हसे पइडवा गारह हसइ हसे इचिके जन मतरे उअ पउतइ।
गाछ हसे वकर फर
(लुका ६:४३-४४)
15 “झुठा अगमवक्तावानिसे चेतले रहिह। हुनुका भेडाक भेसमा तोहार लघिना यतइ, बाकि भितरा त हुनुका डेरटावनेक बनकुतासभ नहिँया हसइ। 16हुनुकर कमवासे तोहरा हुनुकाके चिनबह। कथि काँटक झाङमा अंङगुर हसे सिउडिक गाछमा कोइलार फरसइ? 17उहेसे जम्मे यसल गाछमा यसल फर फरसइ, बाकि खराब गाछमा खराब फर फरसइ। 18डउल गाछमा खराब फर हइने फरसइ, नत खराब गाछमा डउल फर फरसइ। 19डउल फर हइने फराह जम्मे गछवा काटके यगियामा फकेतइ।#मति ३:१०; लुका ३:९ 20यसने हुनुकर फरवासे तोहरा हुनुकाके चिनबह।#मति १२:३३
21 “मोरके ‘प्रभु, प्रभु’ कहलहरा जम्मे जन स्वरगक राजमा नाहिँ पेसतइ। बाकि स्वरगमा रहलाहर मोर पिताक इछा जुने पुरा करबिय, उअ मतरे स्वरगक राजमा पेसबिय। 22उअ दिन बहुत जन मोरके कहतइ, ‘प्रभु, प्रभु, कथि हमरा यपनहुँक नाउँमा अगमवाडि हइने फदकलहुँ? कथि यपनहुँक नाउँमा भुतसभ हइने निकडोलहुँ हसे यपनहुँक नाउँमा बहुत यचम्म-यचम्मक कामसभ हइने करलहुँ?’ 23बाकि मुइ हुनुकाके कहबहिँ, ‘मुइ त तोहराके चिनले हइने बडहिँ। अरे दुस्ट काम करलहराह, मोरसे तनाउ जाह।’#भजन ६:८
दु खलिक जग
(लुका ६:४७-४९)
24 “उहेसे जुने मोर इअ बतवासभ सुनतइ हसे वसने करतइ, मुइ वकरेके एगुडा बुद्धियार मन्सेसाङे दजबहि, जुने यापन घरवा सिलवा वपरा बनोलिय। 25घरवा बनोलेपर, पानि परलइ, बाढि यलइ, धुधुइ चललइ हसे उअ घरवामा ठोकेलइ ताफेनि घरवा हइने भसकलिय। केहकेकि उअ घरवाक जगवा सिलवा वपरा बनावल रहलइ। 26बाकि जुने मोर इअ बतवा सुनके फेनि वसने नाहिँ करतइ, मुइ वकरेके एक जन मुरुख मन्सेसाङे दजबहि, जुने यापन घरवा बलुवा वपरा बनोलिय। 27घरवा बनोलेपर, पानि परलइ, बाढि यलइ, धुधुइ चललइ हसे उअ घरवामा ठोकेलइ, तब उअ घरवा भसकके नास भेलिय।”
28येसुजिक इअ जम्मे सिछा सुनसकलेपर, भिडवाक मन्सावाह छक परलइ।#मरकुस १:२२; लुका ४:३२ 29केहकेकि येसुजि हुनुकाके व्यवस्थाक-गुरुसभ नहिँया हइने, बाकि अधिकार पावल मन्से नहिँया सिखोइ रहलसि।
Currently Selected:
मति 7: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
