मति 24

वराट दिनक चिन्‍हासभ

(मरकुस १३:१-१३; लुका २१:५-१९)

1येसुजि मन्‍दिरवासे निकडके जाइखुनि चेलवाह हुनेक लघिना याके हुनेके मन्‍दिरवाक बनावट देखोलइ। 2बाकि येसुजि हुनुकाके कहलसि, “कथि तोहरा इअ जम्‍मे देखइ बडह? मुइ तोहराके सदियो कहइ बडहिँ, एगुडा पत्‍थरा फेनि दोसरि पत्‍थरवा वपरा नाहिँ रहतइ, उअ जम्‍मे भस्‍कतइ।”

3जब येसुजि जइतुन पहडावामा बइठल रहलसि, तब चेलवाह चुपे-चुपे हुनेक लघिना याके पुछलइ, “हमराके कहहुँ, इअ जम्‍मे कहिया हतइ त? यपनहुँ यावेके हसे इअ संसारक वराट हखे जाइकि चिन्‍हा कथि हतइ?”

4येसुजि जवाफ देते कहलसि, “हुसियारसे रहिह! कुनहुँ फेनि तोहराके झिन झुकोइ। 5केहकेकि बहुत जन मोर नाउँमा ‘मोहिँ मुक्‍ति देलाहर ख्रिस्‍ट हखहि’ कहते यतइ हसे बहुत मन्‍सेसभके धोखा देतइ।

6 “जब तोहरा लडाइ भेल हसे लडाइक हाला सुनबह, तब तोहरा झिन डेरइह। इअ घटनासभ हखहि परतइ, बाकि तखनहिँ वइघरहिँ संसारक वराट नाहिँ हतइ। 7केहकेकि जाति-जातिक विरोधमा हसे राज-राजक विरोधमा उठतइ। ठउरि-ठउरिमा यनिकाल परतइ हसे भुइचाल जेतइ। 8बाकि इअ जम्‍मे बतवा एगुडा जनियानिक हलुकाइखुनिक सुरुक दुःखक नहिँया हखइ।

9 “तखनहिँ मन्‍सावाह तोहराके पकडतइ, सतोतइ हसे मारतइ। तोहरा मोरके विस्‍वास करलेसे जम्‍मे जतियाक मन्‍सावाह तोहराके घिना करतइ।

10 “तब बहुत जन यापन विस्‍वाससे पाछा हटतइ। हुनुका एक-दोसरि जनके धोखा देतइ हसे घिना करतइ। 11हसे बहुत जन झुठा अगमवक्‍तासभ याके बहुत जनके धोखा देतइ।

12 “पाप बढलेसे बहुत जनक प्रेम जुड हतइ। 13बाकि जुने याखिरलइ सहसान रखबिय उअ उद्धार पउबिय।#मति १०:२२ 14परमेस्‍वरक राजक इअ सुसमाचार संसार भर जम्‍मे जतियाक मन्‍सावानिके गवाहिक रुपमा परचार करेतइ हसे वकरपाछा संसारक वराट हतइ।

डरलग्‍ना सङकस्‍टक जुनक बारेमा

(मरकुस १३:१४-२३; लुका २१:२०-२४)

15 “उहेसे जब तोहरा दानिएल अगमवक्‍तावाक फदकलि नहिँया ‘असुद्ध पारना घिन लगना चिजु’ # दानिएल ९:२७; ११:३१; १२:११ मन्‍दिरवाक पवितर ठउरियामा ठडियाइल देखबह, (इअ पढलाहराह यकर यरथ बुझिय) 16तब यहुदिया छेतरमा रहलहराह पहडावावरि भगिह। 17जुने घरवाक छतवा वपरा बडिय, उअ यापन घरवामा भेलि चिजु-बिज लेवेके तहिँया तर झिन नभिय। 18जुने खेतवामा बडिय उअ यापन लुगवा लेवेके तहिँया घर फिरके झिन जइय।#लुका १७:३१ 19तखनहिँ भारदेहि हसे दुध पियोलहर दाओसभक हालत डेरटावनेक हतइ। 20उहेसे जडवाक कि विसराम दिनवामा भागे झिनपरइ कहके तोहरा परथाना करिह।#२४:२० जडवाक जुनवामा इस्राएलमा बहुत पानि परसइ हसे जाड फेरि हसइ तके यातरा करेके फेनि खाँ गारह हसइ। यहुदि मन्‍सावानिक विसराम करना दिनवामा दु किलोमिटर मतरे बुलसइ। उहेसे जडवाक जुनवामा कि यहुदि मन्‍सावानिक विसराम करना दिनवामा इस्राएलि मन्‍सावानिक हुनुकर सतरुवानिसे भागके जायके खाँ गारह हसइ। 21केहकेकि यसनुक महासङकस्‍ट यतइ कि, परमेस्‍वर इअ संसारक सिरिस्‍टि करलिसे यखनिलइ न त यसनुक भेल बडइ, न कबहुँ फेरि यसनुक हतइ।#दानिएल १२:१; प्रकास ७:१४ 22यगर परमेस्‍वर उअ दिनवाह नाहिँ घटोले रहतसि जउँ, कुनहुँ फेनि बचे नाहिँ सकतिय। बाकि हुने यापन छानलि मन्‍सावानिक तहिँया उअ दिनवाह घटादेबसि।

23 “तखनहिँ कुनहुँ तोहराके ‘हेरह, मुक्‍ति देलाहर ख्रिस्‍ट यहवाँ बडसि’ कि ‘वहवाँ बडसि’ कहके कहतइ जउँ, तोहरा उअ बतवामा विस्‍वास झिन करिह। 24केहकेकि झुठा ख्रिस्‍टसभ हसे झुठा अगमवक्‍तासभ देखा परतइ। हुनुका जबड-जबड चिन्‍हा हसे यचम्‍मक काम देखोतइ तके सकभर परमेस्‍वरक छानलि मन्‍सावानिके फेनि झुकोतइ।

25 “हेरह, मुइ तोहराके इअ बतवा यगाहेसे कहदेले बडहिँ। 26यगर मन्‍सावाह तोहराके ‘हेरह, ख्रिस्‍ट त उराठ-ठउरियामा बडसि’ कहके कहले फेनि तोहरा झिन जइह, हसे ‘हुने भितरा कोठवामा बडसि’ कहके कहले फेनि तोहरा विस्‍वास झिन करिह। 27केहकेकि जसने यकसवामा चिलकइकि पुरवेसे पछियलइ इजोर हसइ, वसने मुइ मन्‍सेक पुतर यवइकि फेनि जम्‍मे मन्‍सावाह देखतइ।#लुका १७:२३-२४ 28जहवाँ सिना हसइ, वहवाँ गिधसभ फेनि जामा हसइ।#लुका १७:३७#२४:२८ गिधवाह सिना भेलि ठउरियामा देखा परल नहिँया मन्‍सेक पुतर यवइकि फेनि जम्‍मे मन्‍सावाह देखतइ।

मन्‍सेक पुतरक परकट हखना दिन

(मरकुस १३:२४-२७; लुका २१:२५-२८)

29 “उअ डरलग्‍ना सङकस्‍टक दिनसभ बितलेपर बेरियावा यन्‍हार हखबिय हसे जोन्‍हवा इजोर नाहिँ देबिय। यकसवासे तरगनवाह खस्‍तइ हसे यकास मन्‍डलक जम्‍मे सक्‍तिसभ डिङतइ। # यसइया १३:१०; ३४:४; इजकिएल ३२:७; योएल २:१०-३१; ३:१५; प्रकास ६:१२-१३

30 “वकरपाछा यकसवामा मुइ मन्‍सेक पुतर यवइकि चिन्‍हा देखार हतइ। तखनहिँ धरतियाक जम्‍मे जतियाक मन्‍सावाह कनहनरोहन करतइ हसे हुनुका मन्‍सेक पुतरके जबड सक्‍ति हसे महिमासाङे यकसवाक बदरियामा यवइकि देखतइ। # दानिएल ७:१३; जकरिया १२:१०-१४; प्रकास १:७ 31हसे मुइ मन्‍सेक पुतर यापन स्‍वरगदुतवानिके धुतुहाक यवाजसाङे पठोबहि हसे हुनुका संसारभरसे मोर छानलि मन्‍सावानिके जामा करतइ।

कोइलारक गाछसे सिछा

(मरकुस १३:२८-३१; लुका २१:२९-३३)

32 “याबे कोइलरवाक गछवासे पाठ सिखह। जब कोइलरवाक गछवाक डरवाह नरम भके टुसा निकडे लगसइ, तब गरमक जुन लजिके यलइ कहके तोहार थाह हसइ। 33वसने, जब मोर कहलि इअ जम्‍मे बतवाह पुरा हखते जाइकि देखबह, तब मोर यइना दिन लजिके बडइ कहके जनिह। 34मुइ तोहराके सदियो कहबहिँ, इअ जम्‍मे बतवा पुरा नाहिँ हखइलइ इअ पुस्‍ता नाहिँ बिततइ। 35स्‍वरग हसे धरतिया बितके जेतइ, बाकि मोर कहलि वचनसभ कबहुँ फेनि नाहिँ बिततइ।

हुसियार रहेके सिछा

(मरकुस १३:३२-३७; लुका १७:२६-३०,३४-३६)

36 “बाकि उअ दिन कि जुनवाक बारेमा ककरहुँके फेनि थाह हइने बडइ। न त स्‍वरगदुतवानिके, न मुइ पुतरके, बाकि परमेस्‍वर पिताक मतरे थाह बडइ। 37मुइ मन्‍सेक पुतर यवइकि नोहाक समयमा भेल नहिँया हतइ।#उत्‍पति ६:५-८ 38केहकेकि जसने दाहा यइलिसे यागा, नोहा पनिया-जहजवा भितरा पेसइलइ, मन्‍सावाह खइते-पियते हसे बियाह-बारि करते रहलइ। 39हसे दहवाक पनिया याके जम्‍मे जनके नास हइने करइलइ, इअ कथि हखइ बडइ कहके हुनुकर थाह हइने भेलइ। मुइ मन्‍सेक पुतर यवइकि फेनि वसने हतइ।#उत्‍पति ७:६-२४ 40तखनहिँ खेतवामा काम करलहरा दु जनमधे एक जन लिगेबिय हसे दोसरि जन छुटबिय। 41वसनेकरते दु जन जनियानि सङहि जतवामा पिठा पिसते रहतइ, तब एक जन लिगेबिय हसे दोसरि जन छुटबिय।

42 “उहेसे तोहरा चेतले रहिह, केहकेकि प्रभुजि कुन दिन यबसि कहके तोहार थाह हइने बडइ। 43बाकि इअ बतवा बुझले रहिह, यगर घरवाक मलिकवा चोरवा कखनि यबिय कहके जनले रहतिय त, उअ जगले रहतिय हसे यापन घरवा फोरे नाहिँ देतिय। 44उहेसे तोहरा तयार रहे परतइ, केहकेकि मुइ मन्‍सेक पुतर तोहार हइने सोचलि जुनवामा यबहिँ।#लुका १२:३९-४०

इमान्‍दार हसे बइमान बहरिया

(लुका १२:४१-४८)

45 “विस्‍वासिलो हसे बुद्धियार यगुवा कुने हखिय? जकरेके मलिकवा यापन बहरियावानिके ठिक जुनमा जेउना देवेके तहिँया जिम्‍मा देबिय। 46यगर मलिकवा फिरके यवइकि उअ यगुवाके यपने कहलि नहिँया काम करइ पउबिय, उअ वकरेके इनाम देबिय। 47मुइ तोहराके सदियो कहइ बडहिँ, मलिकवा उअ यगुवाके यापन जम्‍मे धन-सम्‍पतियाक जिम्‍मा देबिय। 48बाकि यगर उअ दुस्‍ट यगुवावा ‘मोर मलिकवा हल-हालि नाहिँ यबिय’ कहके सोचके, 49मोदहरियासभसाङे खाँ-पिके यापनसाङे काम करलहरा बहरियावानिके पिटे लगबिय जउँ, 50उअ यगुवावाक मलिकवा वकर यसरा हइने करलि दिन हसे थाह हइने भेलि जुनवामा यबिय। 51उअ वकरेके काडा दन्‍ड देबिय हसे कपटियासभ भेलि ठउरियामा फाँकदेबिय, जहवाँ मन्‍सावाह कनतइ हसे दतवा किटकिटोते रहतइ।”

Currently Selected:

मति 24: CTHR

Highlight

Copy