लुका 9

येसुजि बारह जन चेलासभके पठोलसि

(मति १०:५-१५; मरकुस ६:७-१३)

1एक दिन येसुजि यापन बारह जन चेलवानिके बलाके, हुनुकाके भुत निकडावेके हसे मनियइलि मन्‍सावानिके डउल बनावेके तहिँया सक्‍ति तके अधिकार देलसि। 2वकरपाछा येसुजि हुनुकाके परमेस्‍वरक राजक बारेमा परचार करे हसे मनियइलि मन्‍सावानिके डउल बनावेके तहिँया पठोलसि। 3येसुजि हुनुकाके यसके कहलसि, “याबे तोहरा जाइखुनि यापनसाङे किहो चिजु फेनि झिन लिह। तोहरा लाठि, झोला, पइसा, खइना चिजु हसे फेरहा लुगा फेनि झिन बोकिह। 4जुन घरवामा मन्‍सावाह तोहराके यादर-भाव करतइ, उअ गउँवासे बिदा नाहिँ हखइलइ उहे घरवामा रहिह। 5यगर मन्‍सावाह तोहराके यादर-भाव नाहिँ करतइ जउँ, तोहार यापन टङवाक धुरिया#९:५ अयहुदि मन्‍सावाह निस्‍ठा हइने बडइ कहके देखोना एगुडा चिन्‍हा हखइ। साछिक तहिँया झहराके उअ सहरवा छाडि दिह।”#लुका १०:४-११; प्रेरित १३:५१ 6तब हुनुका बिदा भके गाउँ-गाउँ जाके सुसमाचार परचार करते मनियइलि मन्‍सावानिके फेनि डउल बनोलइ।

हेरोद येसुजिक बारेमा यलमलेलिय

(मति १४:१-१२; मरकुस ६:१४-२९)

7तब गालिलि परदेसक सासक हेरोद अन्‍तिपास इअ जम्‍मे घटनावा सुनके छक परलिय, केहकेकि कतेक जन बप्‍तिस्‍मा देलाहर युहन्‍ना मरके जियल बडिय कहके कहइ रहलइ। 8कतेक जन एलिया याइल बडिय हसे याको कतेक जन कुनहुँ पुरान अगमवक्‍तावा मरके जियल बडिय कहके कहइ रहलइ।#मति १६:१४; मरकुस ८:२८; लुका ९:१९ 9तब हेरोद कहलिय, “युहन्‍नाक घेन्‍टिया त मुइ काटे लगोले रहलहिँ, बाकि इअ कुने हखिय, जाकर बारेमा मुइ यसनुक बात सुनइ बडहिँ?” तब उअ येसुजिके भेटेके गहनि मन करलिय।

येसुजि पाँच हजार मन्‍सेसभके खियोलसि

(मति १४:१३-२१; मरकुस ६:३०-४४; युहन्‍ना ६:१-१४)

10येसुजिक पठोलि बारह जन प्रेरितवाह फिर याके यापन करलि जम्‍मे बतवा हुनेके सुनादेलइ। वकरपाछा येसुजि हुनुकाके यापनसाङे बेथसेदा सहरवामा लेके गेलसि। 11बाकि मन्‍सावाह इअ बतवा थाह पाके हुनुकर पाछा-पाछा गेलइ। येसुजि हुनुकाके स्‍वागत करके परमेस्‍वरक राजक बारेमा सुनोलसि हसे मनियइलि मन्‍सावानिके फेनि डउल बनोलसि।

12जब बेरियावा डुबे जाइ रहलिय, तखनहिँ येसुजिक उहे बारह जन प्रेरितवाह याके कहलइ, “गुरुजि, इअ मन्‍सावानिके बिदा देहुँ, ताकि हुनुका यासपासक गउँवामा जाके यापन तहिँया बास हसे खइना चिजुक जोगाड करे सकइ, केहकेकि इअ एगुडा सुनसान ठउरि हखइ।” 13बाकि येसुजि हुनुकाके यसके कहलसि, “तोहराहिँ हिनिकाके किहो खइना चिजु देह।” तब हुनुका कहलइ, “गुरुजि, हमारसाङे त पाँच गो रोटि हसे दु गो माछरि मतरे बडइ। हमरा यतेक जन मन्‍सेसभके खियावेके तहिँया याको खइना चिजु किने परतइ?”#२ राजा ४:४२-४४ 14वहवाँ मरदाना मन्‍से मतरे लगभग पाँच हजार जन जतुरा रहलइ। येसुजि चेलवानिके कहलसि, “मन्‍सावानिके पचाँस-पचाँस जनक दाफामा बइठे लगोइह।” 15तब चेलवाह वसने करके मन्‍सावानिके बइठादेलइ। 16वकरपाछा येसुजि पाँच गो रोटिया हसे दु गो मछरिया लेलसि तके स्‍वरगवरि हेरके परमेस्‍वरके धन्यवाद देके रोटिया तके मछरिया खाडा-खाडा बनाके चेलवानिके बाँटे लगोलसि। 17हुनुका जम्‍मे जन यघाइलइ खेलइ हसे चेलवाह उबरलि खडवा बारह ढकिया उठोलइ।

येसुजि मुक्‍ति देलाहर ख्रिस्‍ट

(मति १६:१३-२३; मरकुस ८:२७-३३)

18एकपल्‍टा जब येसुजि यसकरे परथाना करइ रहलसि, हुनेक चेलवाह फेनि हुनेक लजिके रहलइ। तब येसुजि हुनुकाके पुछलसि, “मन्‍सावाह मोरके कुने हखहि कहके कहसइ?” 19हुनुका जवाफ देते कहलइ, “कुनहुँ बप्‍तिस्‍मा देलाहर युहन्‍ना, कुनहुँ एलिया हसे कतेक जन चाहिँ कुनहुँ एक जन पुरान अगमवक्‍ता फेरि जियल बडिय कहके कहसइ।”#मति १४:१-२; मरकुस ६:१४-१५; लुका ९:७-८ 20तब येसुजि चेलवानिके पुछलसि, “बाकि तोहरा मुइ कुने हखहि कहके कहसह त?” तखनहिँ पतरुस जवाफ देते कहलिय, “यपनहुँ त परमेस्‍वरक पठावल ख्रिस्‍ट#९:२० ख्रिस्‍ट कहले अभिसिक्‍त कराइल जन हखसि। हखहुँ!”#युहन्‍ना ६:६८-६९

21बाकि येसुजि हुनुकाके “इअ बतवा ककरहुँके फेनि झिन कहिह” कहके आग्‍या देलसि हसे 22हुनुकाके फेरि कहलसि, “मुइ मन्‍सेक पुतरके समाजक बडके यगुवाह, मुख्‍य पुजेरियाह हसे व्‍यवस्‍थाक-गुरुसभसे बहुत दुःख भोगे परतइ। हुनुका मोरके बहिस्‍कार करतइ हसे मारतइ। बाकि तिसरि दिनवामा मुइ फेरि जिके उठबहिँ।”

चेलवानिक करे परना त्‍याग

(मति १६:२४-२८; मरकुस ८:३४–९:१)

23येसुजि जम्‍मे जनके कहलसि, “यगर कुनहुँ मोर चेला हखे खोजबह जउँ, उअ यपनहिँके इन्‍कार करिय हसे सबदिन यापन क्रुस बोकके#९:२३ क्रुस बोकके मोर पाछा यवइ कहले दुःख भोगेके तयार हखेके हखइ। मोर पाछा यइय।#मति १०:३८; लुका १४:२७ 24केहकेकि जुने यापन प्रान बचावे खोजतइ उअ सदि जिवन गुमोतइ, बाकि जुने यापन प्रान मोर तहिँया गुमोतइ, उअ सदि जिवन पउतइ।#मति १०:३९; लुका १७:३३; युहन्‍ना १२:२५ 25जब एक जन मन्‍से जम्‍मे संसारके हाथ पारके फेनि यापन प्रानके नास पारबिय जउँ, वकर कथि फाइदा हतइ त? 26यगर कुनहुँ मोरसे हसे मोर वचनसे लजेतइ जउँ, मुइ मन्‍सेक पुतर यापन महिमा, परमेस्‍वर पिता हसे पवितर स्‍वरगदुतवानिक महिमा लेके यवइकि वकरसे फेनि लजेबहिँ। 27बाकि मुइ तोहराके सदियो कहबहिँ, यहवाँ ठडियलरामधे कतेक जन परमेस्‍वरक राज नाहिँ देखइलइ नाहिँ मरतइ।”

येसुजिक भेस बदलाइल

(मति १७:१-८; मरकुस ९:२-८)

28इअ बतवा कहलिक आठ दिन पाछा, येसुजि पतरुस, युहन्‍ना हसे याकुबके यापनसाङे लेके पहडावामा परथाना करे गेलसि। 29जब येसुजि परथाना करइ रहलसि, तखनहिँ येसुजिक मोहडावाक रुप बदलेलइ हसे हुनेक लुगवा बिजुलि नहिँया चहकार गोरहर भेलइ। 30वहवाँ यरमरका दु जन मन्‍से देखा परलइ हसे येसुजिसाङे बात करे लगलइ। हुनुका मोसा हसे एलिया रहलइ। 31हुनुका स्‍वरगक महिमामा परकट भके, येसुजि कस्‍के परमेस्‍वरक इछा पुरा करेके तहिँया यरुसलेममा मरे परतइ कहके हुनेसाङे बात करइ रहलइ।

32तखनहिँ पतरुस हसे वकर सङहतियवाह खुभे डउलसे सुतल रहलइ। बाकि उठइकि त हुनुका येसुजिक महिमा देखलइ हसे हुनेसाङे ठडियाइल दु जनके फेनि देखलइ। 33उअ दु जन मन्‍सावा बिदा भके जाइखुनि पतरुस येसुजिके कहलिय, “गुरुजि, हमरा यहवाँ रहेके डउल बडइ! हमरा यहवाँ तिन गो छपरि बनाउ। यपनहुँक तहिँया एगुडा, मोसाक तहिँया एगुडा हसे एलियाक तहिँया फेनि एगुडा!” बाकि पतरुस कथि कहइ बडिय कहके वकर थाह हइने भेलइ।

34पतरुस फदकते-फदकते एगुडा बादर याके हुनुकाके झापदेलिय हसे बदरिया झपलेसे हुनुका डेरेलइ। 35तखनहिँ बदरियासे यसके कहके एगुडा स्‍वर यलइ, “इअ मोर छानल पुतर हखिय, यकर बात सुनिह।”#२ पतरुस १:१७-१८ #यसइया ४२:१; मति ३:१७; १२:१८; मरकुस १:११; लुका ३:२२ 36जब उअ स्‍वरवा रोकेलइ, तब येसुजि मतरे वहवाँ रहलसि। तखनहिँ चेलवाह चुपचाप रहलइ हसे यापन देखलि जम्‍मे घटनावा मनवामा धरके ककरहुँके फेनि हइने कहलइ।

येसुजि भुत लागल छउडके डउल बनोलसि

(मति १७:१४-१८; मरकुस ९:१४-१७)

37दोसरि दिन, जब येसुजि यापन चेलवानिसाङे पहडावासे तरवरि नभलसि, तखनहिँ वहवाँ मन्‍सेक जबड भिड हुनेके भेटे यलइ। 38उअ भिडवासे एक जन मन्‍से चिल्‍लाके कहलिय, “गुरुजि, मोर बेटवाके हेरदेहुँ, केहकेकि मोर एगुडे मतरे बेटा बडिय। 39हेरहुँ, वकरेके एगुडा भुत-आत्‍मा पकडसिय हसे उअ यरमरका चिलेसिय। वकरेके यसनुक लजरापजरि करदेसइ कि वकर मुहवासे थेप-गाज निकडसइ, तब उअ भुत-आत्‍मा वकरेके खुभे चोट लगाके मतरे छाडके जेसिय। 40मुइ यपनहुँक चेलवानिके भुत-आत्‍मा निकडादेहुँ कहके बिन्‍ति करलहिँ, बाकि हुनुका निकडवहिँ हइने सकलइ।” 41येसुजि कहलसि, “अरे अविस्‍वासि हसे हइलठ मन्‍सेसभ, मुइ तोहारसाङे कतेक दिन रहबहिँ हसे तोहराके कखनलइ सहबहिँ?” वकरपाछा येसुजि उअ मन्‍सावाके कहलसि, “तोर बेटवाके यहवाँ यनहिँ।” 42उअ मन्‍सावा यापन बेटवाके यनते-यनते भुत-आत्‍मा वकरेके पटकके गुटुमुटु पारके तर फाकदेलिय। तब येसुजि भुत-आत्‍माके डटलसि हसे छउडवाके डउल बनाके वकर बाबाके जिम्‍मा लगादेलसि। 43परमेस्‍वरक यसनुक महान सक्‍ति देखके जम्‍मे मन्‍सावाह छक परलइ।

येसुजि यापन मृत्‍युक बारेमा कहलसि

(मति १७:२२-२३; मरकुस ९:३०-३२)

तब येसुजि यापन चेलवानिके यसके कहलसि, 44“मोर बतवा ध्‍यान देके सुनिह, मन्‍सावाह मुइ मन्‍सेक पुतरके विस्‍वासघात करके मन्‍सावानिक हथवामा सपदेतइ।” 45बाकि हुनुका येसुजिक कहलि बतवा हइने बुझेसकलइ, केहकेकि इअ बतवाक यरथ हुनुकरसे छिपावल रहलइ हसे हुनुका यकर बारेमा येसुजिके पुछेके फेनि याट हइने करलइ।

सबसे महान कुने?

(मति १८:१-५; मरकुस ९:३३-४०)

46याबे बारह जन चेलवानिक बिचा कुने सबसे महान हखिय कहके बात चललइ।#लुका २२:२४ 47येसुजि हुनुकर मनवाक विचार जानके एगुडा बाचाके यानके यापन लघिना ठडियाइके 48हुनुकाके कहलसि, “जुने मोर नाउँमा इअ बचवाके गरहन करतइ, उअ मोरके फेनि गरहन करतइ हसे जुने मोरके गरहन करतइ, उअ मोरके पठोलहराके फेनि गरहन करतइ, केहकेकि तोहारमधे जुने सबसे झिनिक बडिय, उहे महान हखबिय।”#मति १०:४०; लुका १०:१६; युहन्‍ना १३:२०

49तब युहन्‍ना कहलिय, “गुरुजि, हमरा एक जन मन्‍सेके यपनहुँक नाउँमा भुत निकडोइ देखलहुँ। बाकि हमरा वकरेके रोके खोजलहुँ, केहकेकि उअ हमार दाफाक मन्‍से हइने रहलिय।” 50तब येसुजि चेलवानिके कहलसि, “वकरेके झिन रोकिह, केहकेकि जुने तोहार विरोध हइने करसइ, हुनुका तोहरे वरिक हखइ।”

सामरियाक मन्‍सावाह येसुजिके यादर हइने करलइ

51जब स्‍वरग जायके जुन लजिके भेल रहलइ, येसुजि यरुसलेमवरि जायके निरनय करलसि। 52येसुजि कतेक मन्‍सेसभके पहिनेसे तयार करेके तहिँया सामरिया परदेसक एगुडा गाउँमा पठोलसि। 53बाकि येसुजि यरुसलेमवरि जाइबडसि कहके थाह पाके, कुनहुँ फेनि हुनेके स्‍वागत हइने करलइ। 54इअ देखके, हुनेक चेलवाह याकुब हसे युहन्‍ना कहलइ, “प्रभु, कथि हमरा स्‍वरगसे यागि झारके हिनिकाके नास पारु कहके यपनहुँ चाहबहुँ?”#२ राजा १:९-१६

55बाकि येसुजि घुमके हुनुकाके डटलसि, [हसे यसके कहलसि, तोहारसाङे त कस्‍नुक आत्‍मा बडइ कहके तोहरा बुझले हइने बडह। मुइ मन्‍सेक पुतर त मन्‍सावानिके नास करे कहके हइने, बाकि हुनुकाके बचावेके तहिँया याइल बडहिँ।]#९:५५ इअ पदवा पहिलाक ग्रिकमा हइने रहलइ, बाकि पाछेसे जोडलेसे कतेक लउठा संस्‍करनमा कोस्‍ठमा राखल बडइ। 56वकरपाछा येसुजि हुनुकाके लेके दोसरि गउँवामा गेलसि।

चेलाक गुड

(मति ८:१९-२२)

57येसुजि हसे हुनेक चेलवाह वहवाँसे जाइखुनि एक जन मन्‍से याके यसके कहलिय, “हे प्रभु, यपनहुँ जहवाँ जेबहुँ मुइ फेनि यपनहुँक पाछा जेबहिँ।” 58बाकि येसुजि उअ मन्‍सावेके जवाफ देते कहलसि, “हेरहि, गिदरानिक रहेके सोन्‍हर बडइ, चेरइयाक कोथा बडइ, बाकि मुइ मन्‍सेक पुतरक मुडवा राखेके ठउरि फेनि हइने बडइ।”

59तब येसुजि दोसरे एक जन मन्‍सेके कहलसि, “मोर पाछा याउ!” बाकि उअ मन्‍सावा कहलिय, “गुरुजि, पहिला जाके मोर बाबाके गाडे देहुँ।” 60येसुजि वकरेके जवाफ देते कहलसि, “मुरदवानिके मुरदवाहि गाडे दिह#९:६० आत्‍मिकि रुपमा मरलहरानिके मरलहरहिके गाडे देवेके हखइ। , बाकि तुइ जाके परमेस्‍वरक राजक परचार करसि।”

61तखनहिँ दोसरे एक जन याके येसुजिके कहलिय, “प्रभुजि, मुइ यपनहुँक पाछा यबहिँ, बाकि पहिला मोरके यापन घरवामा भेलि मन्‍सावानिसे बिदा लेवेके जाए देहुँ।”#१ राजा १९:२० 62तब येसुजि वकरेके कहलसि, “जुन मन्‍सावा हरवाक परहेथवा पकडके पाछावरि हेरसइ, उअ परमेस्‍वरक राजक तहिँया लाइक हइने हसइ।”

Currently Selected:

लुका 9: CTHR

Highlight

Copy