युहन्‍ना 6

येसुजि पाँच हजार मन्‍सेसभके खियोलसि

(मति १४:१३-२१; मरकुस ६:३०-४४; लुका ९:१०-१७)

1किहो समय पाछा येसुजि गालिल तलवाक वाहिपार गेलसि। वकरेके तिबेरियास ताल फेनि कहसइ। 2मन्‍सेसभक एगुडा जबड भिड येसुजिक पाछा लगलइ, केहकेकि हुने मनियइलि मन्‍सावानिके यचम्‍मसे डउल बनोइकि हुनुका देखले रहलइ। 3तब येसुजि एगुडा पहाडमा गेलसि हसे यापन चेलवानिसाङे वहवाँ बेठलसि। 4तखनहिँ यहुदियानिक निस्‍तार-पाबनि यवइ रहलइ।

5येसुजि यापन लजरिया उठाके हेरइकि मन्‍सेसभक एगुडा जबड भिड यापनवरि यवइकि देखके फिलिपके कहलसि, “इअ मन्‍सावानिके खियावेके तहिँया हमरा कहवाँसे रोटि किनके यानेके?” 6येसुजि इअ बतवा फिलिपक मनवा जाँचेके तहिँया कहले रहलसि, केहकेकि हुने जथि करे जाइरहलसि, उअ बतवा हुनेक पहिलेसे थाह रहलइ।

7तखनहिँ फिलिप हुनेके जवाफ देलिय, “दु सय चाँनिक पइसाक#६:७ दु सय चाँनिक पइसाग्रिक भासामा “दु सय दिनार” लिखाइल बडइ। इअ लगभग आठ महिनाक बनिहारि हतइ। (उअ जुनवामा एक दिनक बनिहारि एक दिनार रहलइ) रोटि किनके हरेक जनके इचिका-इचिका देले फेनि नाहिँ पुगतइ।”

8हुनेक चेलवाहमधे एक जन, सिमोन पतरुसक भयवा अन्‍द्रियास कहलिय, 9“यहवाँ एक जन छउड बडिय, वकरसाङे जउक पाँच गो रोटि हसे दु गो माछरि बडइ, बाकि यतेक जन मन्‍सेके इतुरेसे कहवाँ पुगतइ?”

10येसुजि चेलवानिके कहलसि, “मन्‍सावानिके बइठे लगोह” वहवाँ बहुत घाँस भेल एगुडा जमार रहलइ हसे मन्‍सावाह वहवाँ बेठलइ। वहवाँ लगभग पाँच हजार जतुरा मरदाना मन्‍से रहलइ। 11तब येसुजि उअ पाँच गो रोटिया लेके परमेस्‍वरके धन्‍यवाद देलसि हसे बेठलि मन्‍सावानिके खाएके तहिँया चेलवानिके बाटे लगोलसि। हुने मछरिया फेनि वसने करके बाटे लगोलसि। हुनुका जम्‍मे जन यघाइलइ खेलइ। 12हुनुका यघाइलइ खइलेपर येसुजि यापन चेलवानिके कहलसि, “उबरलि खडवा-खुसरिया बटियोह, ताकि किहो नास झिन हखइ।” 13खाके उबरलि उअ पाँच गो रोटियाक खडवाह उठोइकि बारह ढकिया भेलइ।

14उहेसे हुनेक करलि यचम्‍मक चिन्‍हा देखके मन्‍सावाह कहलइ, “संसारमा यबसि कहके हमार यसरा करल अगमवक्‍ता सदियो हुनेहिँ हखसि!” 15मन्‍सावाह हुनेके बरिवटि राजा बनावे खोजइबडइ कहके थाह पउलेपर येसुजि फेरि यसकरे पहडावावरि गेलसि।

येसुजि पनिया वपरा बुललसि

(मति १४:२२-३३; मरकुस ६:४५-५२)

16साँझ भेलेपर येसुजिक चेलवाह तलवावरि गेलइ, 17हसे डोङवामा चढके तलवाक वाहिकरवा कफरनहुम सहरवरि जाए लगलइ। तखनहिँ यन्‍हार भेल रहलइ हसे येसुजि हुनुकर लघिना यखनिलइ हइने याइल रहलसि। 18बयार जबड माहे चललेसे तलवाक पनियामा मचाल उठइ रहलइ। 19हुनुका डोङवा खियोते-खियोते लगभग पाँच-छउ किलोमिटर तनाउ गेल रहलइ। तखनहिँ हुनुका येसुजिके पनिया वपरा-वपरा बुल्‍ते डोङवावरि यवइकि देखलइ हसे हुनुका खाँ डेरेलइ। 20बाकि येसुजि हुनुकाके कहलसि, “मुइ हखहि, झिन डेराह।” 21तब इअ सुनके चेलवाह गग्‍सते येसुजिके डोङवामा चढोलइ हसे हुनुकर पुगे परनवा ठउरियामा डोङवा वइघरहिँ पुगलिय।

22तलवाक तिरवामा एगुडा मतरे डोङा रहलइ हसे यापन चेलवानिसाङे येसुजि उअ डोङवामा हइने चढल रहलसि, बाकि हुनेक चेलवाह मतरे चढल रहलइ कहके तलवाक वाहिकरवा रहलि मन्‍सावानिके दोसरि दिन याद भेलइ।

23तब तिबेरियास सहरवासे याको डोङासभ उअ ठउरियाक लजिक यलइ, जहवाँ येसुजि परमेस्‍वरके धन्‍यवाद देके मन्‍सावानिके रोटि खियोले रहलसि। 24जब भिडवाक मन्‍सावाह नत येसुजि न हुनेक चेलवानिके वहवाँ देखलइ, तब हुनुका डोङवाहमा चढके कफरनहुम सहरवावरि येसुजिके खोजे गेलइ।

येसुजि जिवनक रोटि हखसि

25हुनुका येसुजिके तलवाक वाहिपार भेटलेपर हुनेके पुछलइ, “गुरुजि, यपनहुँ यहवाँ कहिया यलहुँ?”

26येसुजि जवाफ देते कहलसि, “मुइ तोहराके सदियो कहइ बडहिँ, तोहरा मोर देखोलि यचम्‍मक चिन्‍हासभक यरथ बुझके हइने, बाकि यघाइलइ रोटि खाए पउलेसे तोहरा मोरके खोजसह। 27नास हखना जेउनाक तहिँया काम झिन करिह, बाकि अनन्‍त जिवनलइ रहना जेउनाक तहिँया काम करिह, जुन मन्‍सेक पुतर तोहराके देबिय। केहकेकि यकरे तहिँया परमेस्‍वर पिता वकरमा यापन छाप लगोले बडसि।”

28हुनुका येसुजिके पुछलइ, “वसके भेले परमेस्‍वरक चाहल काम करेके तहिँया हमरा कथि करे परतइ त?”

29येसुजि हुनुकाके जवाफ देते कहलसि, “परमेस्‍वरक चाहल काम इअ हखइ: हुने जकरेके पठोले बडसि वकरमा विस्‍वास करिह।”

30उहेसे हुनुका येसुजिके कहलइ, “यपनहुँ कथि यचम्‍मक चिन्‍हा देखोबहुँ, उअ देखके हमरा यपनहुँके विस्‍वास करु? यपनहुँ कथि काम करबहुँ? 31हमार पुरखावाह उराठ-ठउरियामा मन्‍न कहल रोटि खेलइ। इअ बतवा धरमसास्‍तरवामा लिखाइल बडइ, ‘हुने स्‍वरगसे हुनुकाके खाएके तहिँया रोटि देलसि’।”#प्रस्‍थान १६:४,१५; भजन ७८:२४

32तब येसुजि हुनुकाके कहलसि, “मुइ तोहराके सदियो कहबहिँ, तोहराके स्‍वरगसे रोटि देलाहर मोसा हइने हखिय, बाकि स्‍वरगसे तोहराके सदि रोटि देलाहर त मोर पिता हखसि। 33केहकेकि परमेस्‍वरक रोटि उहे हखिय, जुने स्‍वरगसे याके संसारक मन्‍सावानिके जिवन देसिय।”

34हुनुका येसुजिके कहलइ, “हजि, इअ रोटिया हमराके सबदिन देहुँ।”

35येसुजि हुनुकाके कहलसि, “जिवनक रोटि मोहिँ हखहि। जुने मोर लघिना यबिय उअ कबहुँ नाहिँ भुखेबिय हसे मोरमा विस्‍वास करलहराक कबहुँ नाहिँ पियास लगतइ। 36बाकि मुइ तोहराके कहसकले बडहिँ, तोहरा मोरके देखले बडह, ताफेनि विस्‍वास हइने करसह। 37जुन मन्‍सावानिके पिता मोरके देबसि हुनुका मोर लघिना यतइ हसे मोर लघिना यलहरवानिके मुइ कबहुँ नाहिँ फिरोबहिँ। 38केहकेकि मुइ स्‍वरगसे यापन इछा पुरा करेके तहिँया हइने याइल हखहि, बाकि मोरके पठोलहराक इछा पुरा करेके तहिँया याइल हखहि। 39जुने मोरके पठोले बडसि हुनेक इछा इअ हखइ कि, जकरेके हुने मोरके देले बडसि, हुनुकरमधे ककरोके फेनि मुइ नाहिँ बिसराउ, बाकि हुनुकाके अन्‍तिम दिनवामा जिउँताउ। 40केहकेकि मोर पिताक इछा इअ हखइ कि, पुतरके हेरलहरा हसे वकरेके विस्‍वास करलहरा जम्‍मे जन अनन्‍त जिवन पउतइ हसे अन्‍तिम दिनवामा मुइ हुनुकाके जियोबहिँ।”

41येसुजि “स्‍वरगसे याइल रोटि मोहिँ हखहि” कहलेसे यहुदि मन्‍सावाह हुनेक विरोधमा घुनघुनाए लगलइ। 42हुनुका यसके कहलइ, “कथि इअ योसेफक बेटा येसु हखिय हइने, जाकर बाबा हसे दाओके हमरा चिनसहुँ? यखनि इअ कस्‍के ‘मुइ स्‍वरगसे याइल हखहि’ कहके कहसिय?”

43तब येसुजि हुनुकाके जवाफ देलसि, “तोहरा यपनहिँ-यपनहिँ झिन घुनघुनाह। 44मोरके पठोलहरा पिता मन्‍सावानिके मोर लघिना यावेके मन नाहिँ देइकलइ, कुनहुँ फेनि मोर लघिना यावे नाहिँ सकतइ हसे अन्‍तिम दिनवामा मोर लघिना यलहरवाके मुइ जियोबहिँ। 45अगमवक्‍तावानिक कितबवामा यसके लिखाइल बडइ, ‘परमेस्‍वर उअ जम्‍मे जनके सिखोबसि।’ हरेक जन जुने पिताक सिछा सुनतइ हसे सिखतइ उअ मोर लघिना यबिय।#यसइया ५४:१३ 46परमेस्‍वर पिताके कुनहुँ फेनि हइने देखले बडइ। जुने परमेस्‍वरसे याइल हखिय, उहे मतरे पिताके देखले बडिय। 47मुइ तोहराके सदियो कहइ बडहिँ, जुने विस्‍वास करबिय वकरसाङे अनन्‍त जिवन बडइ। 48जिवनक रोटि मोहिँ हखहि। 49तोहार पुरखावाह उराठ-ठउरिमा मन्‍न खेलइ, ताफेनि हुनुका मरलइ। 50बाकि मुइ स्‍वरगसे याइल रोटिक बारेमा बात करइ बडहिँ। जुने इअ खेबिय उअ कबहुँ नाहिँ मरबिय। 51स्‍वरगसे याइल जिउते रोटि मोहिँ हखहि। यगर कुनहुँ इअ रोटिया खेतइ जउँ उअ सबदिन जिउते रहबिय। जुन रोटिया मुइ संसारक मन्‍सावानिक तहिँया देबहिँ, उअ मोर देहि हखइ।”

52तब यहुदियाह एक-दोसरि जनसाङे ठोरा-बोलि करे लगलइ, “इअ मन्‍सावा कस्‍के हमराके यापन देहि खाए देवे सकबिय?”

53उहेसे येसुजि हुनुकाके कहलसि, “मुइ तोहराके सदियो कहबहिँ, यगर तोहरा मन्‍सेक पुतरक देहि नाहिँ खेबह हसे वकर रकत नाहिँ पियबह जउँ, तोहारमा अनन्‍त जिवन नाहिँ रहतइ। 54जुने मोर देहिया खेसिय हसे रकतवा पियसिय वकरसाङे अनन्‍त जिवन बडइ तके अन्‍तिम दिनवामा मुइ वकरेके जियोबहिँ। 55केहकेकि मोर देहिया सदि खइना चिजु हखइ हसे मोर रकत सदि पियना चिजु हखइ। 56मोर देहिया खेलहरवा हसे मोर रकत पिलहरा मोरमा रहबिय तके मुइ वकरमा रहबहिँ। 57जसने जिउते परमेस्‍वर पिता मोरके पठोलसि हसे हुनेक कारनसे मुइ जियसहिँ, वसने करके मोरके खेलहरवा फेनि मोर कारनसे जियबिय। 58स्‍वरगसे याइल रोटि इहे हखिय। इअ तोहार पुरखावानिक खाइल रोटि नहिँया हइने। हुनुका खेलइ हसे मरलइ। बाकि मोर देलि रोटिया खेलहरवा सबदिन जियतइ।” 59येसुजि इअ बतवा कफरनहुम सहरवाक सभाघरवामा सिछा देइखुनि कहले रहलसि।

बहुत जन चेलासभ येसुजिके छाडके गेलइ

60इअ बतवा सुनके येसुजिक चेलवाहमधे बहुत जन कहलइ, “इअ सिछा त बहुत गारह बडइ, इअ कुने स्‍विकार करे सकबिय?”

61चेलवाह यकर बारेमा घुनघुनाइ बडइ कहके जनलेपर येसुजि हुनुकाके कहलसि, “कथि इअ बतवाक कारनसे तोहरा पाछा हटबह त? 62यगर तोहरा मुइ मन्‍सेक पुतरके जहवाँ उअ पहिला रहलिय, वपरा जाइकि देखबह जउँ तोहार कस्‍नुक लगतइ? 63जिवन देलाहर त परमेस्‍वरक आत्‍मा हखसि। मन्‍सावानिक सक्‍तिसे इअ काम हखे नाहिँ सकतइ। जथि बात मुइ तोहराके कहले बडहिँ उअ आत्‍मा हसे जिवन हखइ। 64बाकि तोहारमधे कतेक जन यसनुक बडह जुने मोरके विस्‍वास हइने करसह।” विस्‍वास हइने करलाहर कुने हखइ हसे हुनेके धोखा देलाहर कुने हखबिय कहके येसुजिक त सुरुहिँसे थाह रहलइ। 65वकरपाछा येसुजि फेरि कहलसि, “उहेसे मुइ तोहराके कहले रहलहि, यगर पितासे मोर लघिना यावेके मन नाहिँ दियाइल रहतइ जउँ कुनहुँ फेनि मोर लघिना यावे नाहिँ सकतइ।” 66उहे कारनसे येसुजिक चेलवाहमधे बहुत जन फिरके गेलइ हसे हुनेक पाछा यावेके छडलइ।

67उहेसे येसुजि बारह जन चेलवानिके पुछलसि, “कथि तोहरा फेनि मोरके छाडके जेबह?”

68तब सिमोन पतरुस जवाफ देलिय, “हे प्रभुजि, हमरा काकर लघिना जाउँ? यपनहुँसाङे त अनन्‍त जिवन देना वचन बडइ। 69हमरा जनले हसे विस्‍वास करले बडहुँ कि, यपनहुँ परमेस्‍वरक पवितर जन हखहुँ।”#मति १६:१६; मरकुस ८:२९; लुका ९:२०

70तब येसुजि हुनुकाके जवाफ देलसि, “कथि मुइ यपनहिँ तोहरा बारह जनके छानले हइने त? ताफेनि तोहारमधे एक जन सइतान हखिय।” 71येसुजि इअ बतवा सिमोन इस्‍कोरियतक बेटवा यहुदाक बारेमा कहले रहलसि, केहकेकि उअ बारह जन चेलवाहमधे एक जन भके फेनि पाछेसे हुनेके धोखा देलिय।

Currently Selected:

युहन्‍ना 6: CTHR

Highlight

Copy