Lʉ́ka 3
3
Yooháani Mʉbatisáaji Yoomwiimirya Njɨra Yéesu
(Matáayo 3:1-12; Maáriki 1:1-8; Yooháani 1:19-28)
1Haaha, ʉjáa wafíkire mwaaka wa ikimi na ɨsaano (15) wa ʉtemi wa Kaisáari Tiberío. Mpɨɨndɨ ijo, Poontío Piláato noo ajáa gávana wa ɨsɨ ya Yudéea, Heróode Antípaasi noo ɨɨmɨrɨráa ɨsɨ ya Galiláaya na Filíipi mwaanaavo na Heróode noo ɨɨmɨrɨráa ɨsɨ ya Ituréa na ɨsɨ ya Tirakoníiti na Lisanía noo ɨɨmɨrɨráa ɨsɨ ya Abiléene. 2Kei mpɨɨndɨ ijo, Anáasi na Kayáafa noo vajáa veeneɨsɨ vakʉʉlʉ. Isáare ra Mʉlʉʉngʉ rɨkamʉʉjɨra Yooháani mwaana wa Sakaría ʉko ɨsɨ ya ibaláángwii. 3Yooháani adomáa na nkaande joosi ja lʉʉjɨ lwa Yorodáani, yoovariyʉla ʉbatíiso wa vaantʉ kʉvalandʉka fuma uvii waavo, sa Mʉlʉʉngʉ asee, ʉvɨ waavo wasírire. 4Ja ˆvyeene Ijʉva alʉʉsa kɨtáabwii cha Isáaya mʉláali na mʉtwe waachwe,
“Mʉʉntʉ yookaanɨrɨra vikʉlʉkʉʉlʉ ɨsɨ ya ibaláángwii,
‘Imyi neeja njɨra sa Ijʉva.
Wololi njɨra ˆngʼeene arɨ tweera.
5Kɨra nkuruwo fʉkɨrwa ɨrɨ,
kɨra lʉʉlʉ na kiduunda yaaniririwa viri.
Njɨra ˆjawoda wololwa jiri,
na jira ˆjabonkoka yaaniririwa jiri.
6Na vaantʉ voosi koona varɨ
ʉlamuriri wa Mʉlʉʉngʉ.’”#Laanga Isáaya 40:3-5.
7Haaha vaantʉ ˆvarɨ foo vʉʉjáa na kʉrɨ Yooháani sa avabatise. Yooháani avawyɨɨráa yoosea, “Eri, nyuunyu mbyaala ya nyororooda! Nɨ ani ˆavalúmire kutu mʉtɨɨje nkalari ya Mʉlʉʉngʉ ˆyookʉʉja? 8Tʉmami mɨrɨmo ˆɨrɨ koonekya kɨkomi mwaválandukire fuma uvii waanyu. Reki kwiiririkana mitimii yaanyu, ‘Aburaháamu nɨ taáta wiitʉ!’ Nɨ kʉvawyɨɨra niise, Mʉlʉʉngʉ ifaanaa avalandʉle mawye aya yave vaana va Aburaháamu! 9Baa haaha, chaarya chavíikirwe miririi ya kɨra mʉtɨ. Kɨra mʉtɨ sɨ ˆʉtʉ́ʉngaa ndɨɨwa ˆjabooha, temwa ʉrɨ na fweitɨrwa ʉrɨ iviivii ra mooto.”
10Aho, ɨra mpuka ya vaantʉ ɨkamuurya, “Haaha nɨ che tʉrɨ bweeyya?” 11Yooháani akavasea, “ˆArɨ na nkáancho ivɨrɨ, amʉheere ɨmwɨ ʉra ˆasiina, na ʉra ˆarɨ na chóorya abweeyye viivyo.”
12 Vasaankanʼyi kóodi novo vakʉʉja sa vabatisiwe, maa vakamuurya Yooháani, “Mukiindya na suusu tasaakwa tʉbweeyye joolɨ?” 13Ne akavasea, “Karɨ mʉsʉ́mʉlaa kʉlookya vira ˆvyeene Miiro yaruma tʉkʉ.”
14Valwi nkoondo novo vakamuurya voosea, “Ha suusu nɨ che tʉrɨ bweeyya?” Yooháani akavasea, “Karɨ muvúulaa mʉʉntʉ viintʉ vyaachwe tʉkʉ, na karɨ mʉkóovereryaa sa mʉpate mpía ja mʉhonyo tʉkʉ, maa kaa, ikinkimi na mɨsáala yaanyu.”
15Vaantʉ vara ˆvaawoojera kʉʉja kwa Masía mpɨɨndɨ ijo, voosi viiseáa mitimii yaavo ifaanaa ɨkava Yooháani noo Masía. 16Aho, maa Yooháani akavasea vaantʉ voosi, “Nɨɨnɨ vabatisa niise na maaji. Maa kaa, amwaarɨ yookʉʉja nyuma yaanɨ ˆarɨ na ngururu kʉlookya nɨɨnɨ, nɨɨnɨ sɨ ndɨrɨ daha baa tʉmama mʉrɨmo wa mʉtʉ́mwa, wo reherya nkova ja mirunkumo yaachwe tʉkʉ. Yeeye vabatisa arɨ na Mʉtɨma Mʉʉja na mooto. 17Saama yaachwe yo keerera akwáatire mɨkonwii yaachwe. Iímire neeja kʉfyaahɨra lʉʉha lwaachwe, ajiinge ngáano kyoomii maa kaa, mukúúnku achɨmɨke mootwii sɨ ˆurímaa.” 18Kwa masáare ayo na yɨɨngɨ ˆyarɨ foo, Yooháani avalʉmáa kutu vaantʉ, mpɨɨndɨ ˆavavariyʉrɨráa Masáare Maaja.
19Maa kaa, Yooháani ˆakamʉdalavye mʉtemi Heróode Antípaasi sa viintʉ ˆajáa amʉsʉmʉla Herodía muki wa mwaanaavo, na sa mavɨ yɨɨngɨ ˆatʉmamáa, 20Heróode akoongererya ʉvɨ wɨɨngɨ ko muchuunga mʉnyololwii Yooháani.
Yéesu Yoobatisiwa
(Matáayo 3:13-17; Maáriki 1:9-11)
21Sikʉ ɨmwɨ mpɨɨndɨ Yooháani ˆajáa akaarɨ yeekerwa, vaantʉ voosi ˆvakahʉmʉle batisiwa, Yéesu ne akabatisiwa. Mpɨɨndɨ Yéesu ˆaloombáa, kurumu kʉkaatʉka dwee. 22Mʉtɨma Mʉʉja wa Mʉlʉʉngʉ akakiima mweeri yaachwe arɨ ja nkúnde. Aho, sawúti ɨkafuma kurumwii, yoosea, “Weewe ʉrɨ Mwaana waanɨ. Nakweenda, neeriwa mʉtɨma mʉnʉmʉʉnʉ nɨ weewe.”
Lʉkolo lwa Yéesu
(Matáayo 1:1-17)
23Yéesu ajáa afíkiirye myaaka makumi yatatʉ (30) de akaanda mʉrɨmo waachwe. Na vaantʉ viiririkanáa yeeye nɨ mwaana wa Yooséefu.
Yooséefu nɨ mwaana wa Éeli ajáa.
24Éeli nɨ mwaana wa Matáati ajáa.
Matáati nɨ mwaana wa Láawi ajáa.
Láawi nɨ mwaana wa Méliki ajáa.
Méliki nɨ mwaana wa Yanái ajáa.
Yanái nɨ mwaana wa Yooséefu ajáa.
25Yooséefu nɨ mwaana wa Matatía ajáa.
Matatía nɨ mwaana wa Amóosi ajáa.
Amóosi nɨ mwaana wa Nahúumu ajáa.
Nahúumu nɨ mwaana wa Ésili ajáa.
Ésili nɨ mwaana wa Nagáai ajáa.
26Nagáai nɨ mwaana wa Máati ajáa.
Máati nɨ mwaana wa Matatía ajáa.
Matatía nɨ mwaana wa Semeíini ajáa.
Semeíini nɨ mwaana wa Yoséeki ajáa.
Yoséeki nɨ mwaana wa Yóoda ajáa.
27Yóoda nɨ mwaana wa Yoanáani ajáa.
Yoanáani nɨ mwaana wa Réesa ajáa.
Réesa nɨ mwaana wa Serubabéeli ajáa.
Serubabéeli nɨ mwaana wa Searitiéeli ajáa.
Searitiéeli nɨ mwaana wa Néeri ajáa.
28Néeri nɨ mwaana wa Méliki ajáa.
Méliki nɨ mwaana wa Áadi ajáa.
Áadi nɨ mwaana wa Kosáamu ajáa.
Kosáamu nɨ mwaana wa Elimadáamu ajáa.
Elimadáamu nɨ mwaana wa Éeri ajáa.
29Éeri nɨ mwaana wa Yooshʉ́a ajáa.
Yooshʉ́a nɨ mwaana wa Elieséeri ajáa.
Elieséeri nɨ mwaana wa Yoríimu ajáa.
Yoríimu nɨ mwaana wa Matáati ajáa.
Matáati nɨ mwaana wa Láawi ajáa.
30Láawi nɨ mwaana wa Simeóoni ajáa.
Simeóoni nɨ mwaana wa Yʉ́ʉda ajáa.
Yʉ́ʉda nɨ mwaana wa Yooséefu ajáa.
Yooséefu nɨ mwaana wa Yonáamu ajáa.
Yonáamu nɨ mwaana wa Eliakíimu ajáa.
31Eliakíimu nɨ mwaana wa Meléa ajáa.
Meléa nɨ mwaana wa Méena ajáa.
Méena nɨ mwaana wa Matáasa ajáa.
Matáasa nɨ mwaana wa Nasáani ajáa.
Nasáani nɨ mwaana wa Daúdi ajáa.
32Daúdi nɨ mwaana wa Yéese ajáa.
Yéese nɨ mwaana wa Obéedi ajáa.
Obéedi nɨ mwaana wa Boáasi ajáa.
Boáasi nɨ mwaana wa Salimóoni ajáa.
Salimóoni nɨ mwaana wa Nashóoni ajáa.
33Nashóoni nɨ mwaana wa Aminadáabu ajáa.
Aminadáabu nɨ mwaana wa Adimíini ajáa.
Adimíini nɨ mwaana wa Aráamu ajáa.
Aráamu nɨ mwaana wa Hesiróoni ajáa.
Hesiróoni nɨ mwaana wa Peréesi ajáa.
Peréesi nɨ mwaana wa Yʉ́ʉda ajáa.
34Yʉ́ʉda nɨ mwaana wa Yaakúupu ajáa.
Yaakúupu nɨ mwaana wa Isaka ajáa.
Isaka nɨ mwaana wa Aburaháamu ajáa.
Aburaháamu nɨ mwaana wa Téera ajáa.
Téera nɨ mwaana wa Nahóori ajáa.
35Nahóori nɨ mwaana wa Serúugi ajáa.
Serúugi nɨ mwaana wa Réeu ajáa.
Réeu nɨ mwaana wa Peléegi ajáa.
Peléegi nɨ mwaana wa Ebéeri ajáa.
Ebéeri nɨ mwaana wa Sáala ajáa.
36Sáala nɨ mwaana wa Kenáani ajáa.
Kenáani nɨ mwaana wa Arɨfakisáadi ajáa.
Arɨfakisáadi nɨ mwaana wa Shéemu ajáa.
Shéemu nɨ mwaana wa Nʉ́hʉ ajáa.
Nʉ́hʉ nɨ mwaana wa Lámeki ajáa.
37Lámeki nɨ mwaana wa Mesuséela ajáa.
Mesuséela nɨ mwaana wa Enóoki ajáa.
Enóoki nɨ mwaana wa Jeráadi ajáa.
Jeráadi nɨ mwaana wa Mahalaléeli ajáa.
Mahalaléeli nɨ mwaana wa Kenáani ajáa.
38Kenáani nɨ mwaana wa Enóoshi ajáa.
Enóoshi nɨ mwaana wa Séeti ajáa.
Séeti nɨ mwaana wa Adáamu ajáa,
na Adáamu nɨ mwaana wa Mʉlʉʉngʉ ajáa.
Currently Selected:
Lʉ́ka 3: LAG
Highlight
Share
Copy
Want to have your highlights saved across all your devices? Sign up or sign in
© 2023 Wycliffe Bible Translators, Inc. All rights reserved.
