SAN JUAN 5

Tej tul tnaabl jun xjal aj Betesda

1Mas yaj, attzen jun ninkꞌij cye judío. Juꞌ tzunj, e xiꞌ Jesús tuj Jerusalén.

2Nkatzen ttziiꞌ jtapya tocsen tiꞌ tnom te Jerusalén jaaꞌ nchi pona xjal qꞌueylecxte carnel, tocxsen jun txꞌajbil cye xjal tuj tapya. Betesda tbi txꞌajbil tuj cyyol judío. Bix ttziiꞌtzen txꞌajbil tcub jweꞌ pach nuk te paꞌtbil, bix tuꞌn cyxmuun xjal cyuj tuꞌn kꞌij. 3Cyujtzen pach cotzꞌlecx nim xjal yaab cyuj, ke mos̈, ke cox, bix kej xjal mintiiꞌ cyipen. Nchi ayontzen xjal tuꞌn tyucch aꞌ tuj txꞌajbil. 4Tuj cywitz xjal, at maj e cuꞌtz jun tsanjel Dios tuj cyaꞌj bix e yucch aꞌ tuj txꞌajbil tuꞌn, tuꞌn tkꞌonte tipemal aꞌ. Jtneel xjal e cuꞌx tuj aꞌ tej tyucch aꞌ, e kꞌanen tiꞌj alcyej yabel niꞌkꞌan.

5Tuj tzunj lugar e ten junxin xjal otk tzꞌoc jun tyabel tiꞌjxin winakoxlaaj jnabkꞌi. 6Tej tlonte Jesús ja yaab, el tniyꞌxin tiꞌj otk tzꞌel nim kꞌij tyabtlenxin. Bix e xiꞌ tkbaꞌnxin te yaab:

—¿Tajpey tuꞌn tcoꞌpja tuj tyabela?―tz̈ixin.

7—Taat, waja, pero min-al jun wuyena ntzaj onente weya, tuꞌn ncuꞌx kꞌoꞌna nejl tuj aꞌ oj tjaw yucch. N-oc wipena tiꞌj tuꞌn npona tneel tuj aꞌ, pero jaca maj ncuꞌx nejl juntl xjal nwitza―tz̈i yaab.

8E xiꞌ tkbaꞌn Jesús te:

—Weyꞌtztzen, kꞌinwe tpopa, bix beta―tz̈ixin.

9Tejtzen t-xiꞌ tkbaꞌn Jesús juꞌwa, tzin nkꞌanjtl yaab, tzin jaw tiiꞌntlxin tpopxin, bix nxiꞌ betlxin.

Pero e kꞌanj yaab tuj kꞌij te ajlabl, jkꞌij xjan tuꞌn miꞌn akꞌanan ke xjal judío. 10Juꞌ tzunj, e xiꞌ cykbaꞌn kej judío cyiw eteꞌ tuj cyley tej yaab otk kꞌanj:

—Jkꞌij te ajlabl jaꞌlewe. Yaaꞌn kꞌoꞌn tuꞌn ley tuꞌn t-xiꞌ tiiꞌna tpopa―tz̈ikexin.

11Pero aj ttzakꞌbeꞌn yaab cyexin:

—Nuk s-oc nbiꞌna tyol jxjal xkꞌanen weya jaꞌlewe. Jaj xjala s-aj kbante weya tuꞌn tjaw nbalkꞌiꞌna npopa bix tuꞌn nbeta―tz̈ixin.

12Juꞌ tzunj, e xiꞌ cykanenxin texin:

—¿Alcyej xjal s-aj kbante tey tuꞌn tjaw tbalkꞌiꞌna tpopa bix tuꞌn tbeta?―tz̈ikexin.

13Pero jxjal otk kꞌanj, mintiiꞌ tumel tuya alcye otk kꞌanen te, cuma tej njaw tbalkꞌiꞌnxin tpopxin, otk tzꞌel lkꞌe Jesús tiꞌj txꞌajbil cyxol nim xjal.

14Chꞌintzen tbajlen, e xiꞌ Jesús tuj tja Dios tuꞌn tcnet jxin xjal otk kꞌanj tuꞌnxin, bix e xiꞌ tkbaꞌnxin te:

—Jeyꞌ, ma cyaj t-xumlala baꞌn. Pero at-x juntl cxeꞌl nkbaꞌna tey. Miꞌntzen tbinchatla mas il, tuꞌn miꞌn txiꞌy tuj jun il mas kaꞌ twitzj jnejl―tz̈i Jesús.

15Tej tel tniyꞌxin tiꞌj ka ja Jesús otk kꞌanen texin, e xiꞌxin cyuya nejenel cye judío, bix e xiꞌ tkꞌumenxin cye ka tuꞌn Jesús otk kꞌanjxin. 16Yal kej judío, cuma e kꞌane Jesús cye xjal tuj kꞌij te ajlabl, juꞌ tzunj e kꞌojl ke judío tiꞌjxin, bix e cyajbe tuꞌn tcub cybyoꞌn jaxin.

17Tejtzen tbinte Jesús min el baꞌn j-e bint tuꞌnxin tuj cywitz nejenel cye judío, e xiꞌ tkbaꞌnxin cyexin:

—Bajx cyjaꞌ tkꞌoꞌn Nmana Dios tuꞌn miꞌn tcꞌojla twitz txꞌotxꞌ cykil kꞌij. Bix jax juꞌx weya, ilxsen tiꞌj tuꞌn wakꞌanana tuya Nmana―tz̈ixin.

18Tej cybinte judío tyol Jesús, masxsen e cyajbexin tuꞌn tcub cybyoꞌnxin, cuma yaaꞌn nuk oꞌcx el t-xooꞌnxin kꞌij te ajlabl tuj cywitzxin, sino jax juꞌx e tkbaxin ka Diosxin, cuma e tkbaxin ka Dios Tmanxin.

Jtipemal o tzaj tkꞌoꞌn Dios te Tcwal

19E xiꞌ tkbaꞌnxin cyexin:

—Cykꞌoꞌncxix cycꞌuꞌja tiꞌj cxeꞌl nkbaꞌna cyey. Alcyej nbint wuꞌna, yaaꞌn nuk waja tuꞌn tbint. N-oc ncyeꞌyena, inayena, Tcwal Dios, tiꞌj ti nbint tuꞌn Nmana, tuꞌntzen junx taꞌ waakꞌena tuya taakꞌen Nmana. Alcyej nbint tuꞌn Nmana, n-oc wipena tiꞌj tuꞌn tbint wuꞌna tisenx nbint tuꞌn Nmana. 20N-oc wakꞌa te Nmana. Juꞌ tzunj, ntzaj tyeecꞌan weya cykilcaj tzin tbinchaꞌn. Ma chin kꞌanen jun xjal mintiiꞌ tipen t-xumlal, pero ctzaal tyeecꞌantl Nmana akꞌuntl mas jawnex twitzj lu tuꞌn tbint wuꞌna, tuꞌntzen cyjaw kleeꞌy tiꞌj. 21Tisen tzunj, cjawel itzꞌj ke cyimne tuj cyamecy wuꞌna. Tisenx njatz itzꞌj cyimne tuꞌn Nmana tuj cyamecy bix nxiꞌ tkꞌoꞌn cychunkꞌlal, jax juꞌx weya, inayena Tcwal, cxeꞌl nkꞌoꞌna cychunkꞌlal xjal. Bix inayena kbalte alcyej xjal ckꞌojel cychunkꞌlal, 22cuma yaaꞌn Nmana kbalte alcyej xjal ckꞌojel cycastiwa, sino o kꞌoj tuꞌn Nmana weya tuꞌn nkbante alcyej xjal ckꞌojel cychunkꞌlal bix alcyej xjal ckꞌojel cycastiwa, 23tuꞌntzen cyniman cykil xjal inayena tisenxsen nchi niman Kman Dios. Alcyej xjal min tzꞌoc tbiꞌn inayena, jax min tzꞌoc tbiꞌn Nmana, cuma smaꞌn kena tuꞌn Nmana.

24Jaxxix cxeꞌl nkbaꞌna cyey, kej xjal cꞌoquel cybiꞌn nyola bix chi ocslal tiꞌ Dios, j-e tzaj tsmaꞌn inayena, attzen cychunkꞌlal te junx maj, bix mlay cheꞌx tuj castiwa, sino ma chi clet tuj cyamecy te junx maj, tuꞌntzen cypon tuj cychunkꞌlal tuya Dios. 25Cybiꞌncxix nyola. Tzul jun kꞌij, bix ya ma tzyet tuꞌn tul, kej xjal at tuj be te cyamecy te junx maj, cꞌoquel cybiꞌn nyola, bix kej cxeꞌl cybiꞌn, chi oqueltzen tuj cychunkꞌlal tuya Dios. 26Baꞌn txiꞌ nkꞌoꞌna cychunkꞌlal, cuma ma tzaj tkꞌoꞌn Nmana wipemala tuꞌn t-xiꞌ nkꞌoꞌna. Tisenx ntzaj chunkꞌlal tiꞌj Nmana Dios, jax at chunkꞌlal wuyena, inayena Tcwal. 27Bix cuma in oca te xjal, juꞌ tzunj ma tzaj tkꞌoꞌn Nmana woclena te kbalte alcye kej xjal chi xeꞌl tuj castiwa bix alcye kej xjal chi oquel tuj cychunkꞌlal tuya Dios. 28Miꞌn baj cycꞌuꞌja tiꞌj nxiꞌ nkbaꞌna cyey. Tzul jun kꞌij cykilca xjal o chi cyim cꞌoquel cybiꞌn oj ntxcoꞌna cyiꞌj, 29bix il tiꞌj chi jawetz tuj cyamecy. Kej xjal o chi binchan baꞌn, chi jawetz tuꞌn tkꞌoj cychunkꞌlal, bix kej xjal o chi binchan kaꞌ, chi jawetz tuꞌn tkꞌoj cycastiwa.

Tuꞌnj tbinchben Jesús tzin tkbaꞌn o tzaj tsmaꞌn Dios ja

30Pero yaaꞌn wuꞌnxwe cxeꞌl nkbaꞌna alcye kej xjal ckꞌojel cycastiwa. N-oc ncꞌuꞌja tiꞌj ti taj Nmana, tuꞌntzen baꞌn txiꞌ nkbaꞌna ti pjel cye xjal. Juꞌ tzunj, tuj tumelxix jnxiꞌ nkbaꞌna, cuma yaaꞌn weya wajbil. Jaj tajbil Nmana e tzaj tsmaꞌn inayena.

31Nuket nuk inayena nxiꞌ nkbaꞌna ka junx waakꞌena tuya taakꞌen Dios, tujtzen kley mintiiꞌtle il tiꞌj tuꞌn cyocslana nyola. 32Pero at juntl xjal tstiwa wiꞌja. Jatzen Nmana. Bix ntzkiꞌna ilxsen tiꞌj tuꞌn cyocslana tiꞌj tyol, cuma jaxxix tyol. 33At juntl. Tuj cywitza najben Juan Bautista te jun tstiwa ka smaꞌn kena tuꞌn Dios. O txiꞌ cysmaꞌna cysanjela tuyaxin, bix o cyiikꞌa tyolxin wiꞌja. 34Te weya, mintiiꞌ il tiꞌj tuꞌn tajben tyol jun xjal tuꞌn tcywix yol wiꞌja ka smaꞌn kena tuꞌn Dios. Pero ma chin yolena tiꞌ Juan tuꞌn tajben tyolxin cyey, tuꞌntzen cycleta. 35Jaxte ajben Juan tisen jun jul tzaj, te cyeybil tuj be. Bix jun rato baꞌn eꞌla tuj cywitza tuꞌn cybinteya j-e tkꞌumexin.

36J-e tkꞌume Juan nim e tyeecꞌa ka junx weya waakꞌen tuya taakꞌen Dios, pero jnbint wuꞌna mas tzin tyeecꞌan twitzj tyol Juan. J-akꞌuntl ma tzaj tkꞌoꞌn Nmana weya tuꞌn tbint wuꞌna, tisenj tej nkꞌaneya jxjal mintiiꞌ tipen, tzin tkbaꞌn ma tzaj tsmaꞌn Nmana inayena. 37Bix jax Nmana o tzaj tyeecꞌan smaꞌn kena tuꞌnxin. Pero min o txiꞌ cybiꞌna tkꞌajkꞌajel twiꞌxin bix min o cyajbey tuꞌn tel cyniꞌya tiꞌjxin. 38Min ma tzꞌocx tyolxin tuj cyanema tuꞌn n-el cyiiqꞌuena tyol jxjal ma tzaj tsmaꞌnxin. 39Njaw cys̈iꞌna ootxa tyol Dios, cuma tuj cywitza ckꞌojel cychunkꞌlala te junx maj nuk tuꞌnj nchi cyeꞌyena tuj. Pero jtaakꞌen tyol Dios yaaꞌn tuꞌn tkꞌonte cychunkꞌlala. Nuk jaj tuꞌn ncneta cyuꞌna. 40Pero cycyꞌiy tuꞌn cyocslana wiꞌja, tuꞌntzen tten cychunkꞌlala te junx maj.

41Ma txiꞌ nkbaꞌna yaaꞌn tuꞌn waja tuꞌn wela baꞌn tuj cywitz xjal. 42Ma txiꞌ nkbaꞌna cuma ntzkiꞌna tiken cycyꞌiy nyola. Jaj cuma min n-oc takꞌ Dios cyey. 43Ma chin tzaja cyxola te t-xel Nmana, pero cycyꞌiy tuꞌn cyocslana wiꞌja. Pero oj cyul juntl wik nuk cyuꞌnx cyiib, chi ocslala cyiꞌj tuya cykil cycꞌuꞌja. 44Cycyꞌiy tuꞌn cyocslana wiꞌja, cuma nuk cyaja ejeeꞌy nejenel cye judío tuꞌn tjaw nimset cybiy cyuꞌn xjal. Mintiiꞌ cyajbila tuꞌn cyela baꞌn twitzj jun Dios at. 45Pero mintiiꞌ il tiꞌj tuꞌn t-xiꞌ nkbaꞌna te Nmana at cyila, cuma jax tley Moisés tzin kbante min tzꞌoc cybiꞌna, amale tujet cywitza chi cletela tuꞌnj cynimbila tiꞌ tley Moisés. 46Nuket ocslankey tyol Moisés, jax otle chi ocslana wiꞌja, cuma j-e cyaj ttzꞌiꞌben Moisés, nbyaꞌntzen wiꞌja. 47Pero cuma ma tzꞌel cyxooꞌna j-e cyaj ttzꞌiꞌben Moisés, ¿titzen tten tuꞌn cyocslantey jnxiꞌ nkbaꞌna cyey?―tz̈i Jesús cye judío.

Currently Selected:

SAN JUAN 5: mamTS

Highlight

Copy