ມັດທາຍ 19
19
ການຢ່າຮ້າງ
(ມຣກ 10:1-12)
1ເມື່ອພຣະເຢຊູເຈົ້າກ່າວຖ້ອຍຄຳເຫລົ່ານີ້ຈົບແລ້ວ ພຣະອົງກໍອອກຈາກແຂວງຄາລີເລໄປຍັງແຂວງຢູດາຍ ເຊິ່ງຢູ່ທາງຟາກໜຶ່ງຂອງແມ່ນ້ຳຈໍແດນ, 2ມີປະຊາຊົນຈໍານວນຫລວງຫລາຍໄດ້ຕິດຕາມພຣະອົງໄປ ແລະ ພຣະອົງໄດ້ຮັກສາພວກເຂົາໃຫ້ດີພະຍາດຢູ່ທີ່ນັ້ນ.
3ພວກຟາຣີຊາຍບາງຄົນໄດ້ມາຫາພຣະອົງເພື່ອທົດລອງພຣະອົງ. ພວກເຂົາຖາມວ່າ, “ເປັນການຖືກຕ້ອງຕາມກົດບັນຍັດທີ່ຜູ້ຊາຍຈະຢ່າຮ້າງເມຍຂອງຕົນເພາະສາເຫດໃດກໍຕາມແມ່ນບໍ?”
4ພຣະອົງຕອບວ່າ, “ພວກເຈົ້າບໍ່ໄດ້ອ່ານພຣະຄຳພີບໍທີ່ວ່າຕັ້ງແຕ່ຕົ້ນເດີມ ພຣະຜູ້ສ້າງ ‘ໄດ້ສ້າງພວກເຂົາໃຫ້ເປັນຊາຍ ແລະ ຍິງ’,#19:4 ປຖກ 1:27 5ແລະ ກ່າວວ່າ, ‘ດ້ວຍເຫດນີ້ ຜູ້ຊາຍຈຶ່ງອອກຈາກພໍ່ແມ່ຂອງຕົນໄປຜູກພັນຢູ່ກັບເມຍຂອງຕົນ ແລະ ພວກເຂົາທັງສອງກໍເປັນກາຍດຽວກັນ’?#19:5 ປຖກ 2:24 6ດັ່ງນັ້ນ ພວກເຂົາຈຶ່ງບໍ່ໄດ້ເປັນສອງອີກຕໍ່ໄປ, ແຕ່ເປັນກາຍດຽວກັນ. ເຫດສະນັ້ນ ສິ່ງທີ່ພຣະເຈົ້າໄດ້ໃຫ້ເຂົ້າຮ່ວມກັນແລ້ວ ຢ່າໃຫ້ມະນຸດເຮັດໃຫ້ພາກຈາກກັນ”.
7ພວກເຂົາຖາມພຣະອົງວ່າ, “ຖ້າຢ່າງນັ້ນເປັນຫຍັງໂມເຊຈຶ່ງສັ່ງໃຫ້ຜູ້ຊາຍເຮັດໜັງສືຢັ້ງຢືນການຢ່າຮ້າງໃຫ້ເມຍຂອງຕົນ ແລະ ສົ່ງນາງໜີໄປໄດ້?”
8ພຣະເຢຊູເຈົ້າຕອບພວກເຂົາວ່າ, “ໂມເຊອະນຸຍາດໃຫ້ພວກເຈົ້າຢ່າຮ້າງເມຍຂອງຕົນໄດ້ ເພາະໃຈຂອງພວກເຈົ້າທັງຫລາຍແຂງກະດ້າງ. ແຕ່ບໍ່ໄດ້ເປັນຢ່າງນີ້ຕັ້ງແຕ່ຕົ້ນ. 9ເຮົາບອກພວກເຈົ້າວ່າ, ຜູ້ໃດຢ່າຮ້າງເມຍຂອງຕົນໂດຍທີ່ນາງບໍ່ໄດ້ຫລິ້ນຊູ້ກັບຊາຍອື່ນ ແລ້ວໄປແຕ່ງງານກັບຍິງອື່ນ ຜູ້ນັ້ນກໍຫລິ້ນຊູ້”.
10ພວກສາວົກຈຶ່ງເວົ້າກັບພຣະອົງວ່າ, “ຖ້າການເປັນຜົວເມຍເປັນເຊັ່ນນີ້ ບໍ່ແຕ່ງງານກໍຄົງຈະດີກວ່າ”.
11ພຣະເຢຊູເຈົ້າຕອບວ່າ, “ບໍ່ແມ່ນທຸກຄົນສາມາດຮັບຄຳສັ່ງສອນນີ້ໄດ້, ເວັ້ນແຕ່ບັນດາຜູ້ທີ່ພຣະເຈົ້າໃຫ້ເທົ່ານັ້ນ 12ດ້ວຍວ່າ ມີຜູ້ເປັນກະເທີຍມາແຕ່ກຳເນີດກໍມີ, ມີມະນຸດເຮັດໃຫ້ເປັນກະເທີຍກໍມີ ແລະ ຜູ້ເລືອກຈະເປັນໂສດເພາະເຫັນແກ່ອານາຈັກສະຫວັນກໍມີ. ຜູ້ໃດຍອມຮັບເຊັ່ນນີ້ໄດ້ກໍຈົ່ງຮັບເອົາ”.
ພຣະເຢຊູເຈົ້າ ແລະ ເດັກນ້ອຍ
(ມຣກ 10:13-16; ລກ 18:15-17)
13ຫລັງຈາກນັ້ນ ປະຊາຊົນໄດ້ນໍາເດັກນ້ອຍມາຫາພຣະເຢຊູເຈົ້າເພື່ອໃຫ້ພຣະອົງວາງມືໃສ່ພວກເຂົາ ແລະ ອະທິຖານເພື່ອພວກເຂົາ. ແຕ່ພວກສາວົກໄດ້ຫ້າມພວກເຂົາໄວ້.
14ພຣະເຢຊູເຈົ້າກ່າວວ່າ, “ຈົ່ງປ່ອຍໃຫ້ເດັກນ້ອຍມາຫາເຮົາ ຢ່າຂັດຂວາງພວກເຂົາ ເພາະອານາຈັກສະຫວັນເປັນຂອງຄົນທີ່ເປັນເໝືອນເດັກນ້ອຍເຫລົ່ານີ້”. 15ເມື່ອພຣະອົງວາງມືຂອງພຣະອົງເທິງພວກເຂົາ, ພຣະອົງໄດ້ອອກຈາກທີ່ນັ້ນໄປ.
ເສດຖີ ແລະ ອານາຈັກຂອງພຣະເຈົ້າ
(ມຣກ 10:17-30; ລກ 18:18-30)
16ຄັ້ງໜຶ່ງ ມີຊາຍຄົນໜຶ່ງມາຫາພຣະເຢຊູເຈົ້າ ແລະ ຖາມວ່າ, “ອາຈານເອີຍ, ຂ້ານ້ອຍຈະຕ້ອງເຮັດສິ່ງດີອັນໃດຈຶ່ງຈະໄດ້ຊີວິດນິລັນດອນ?”
17ພຣະເຢຊູເຈົ້າຕອບວ່າ, “ເປັນຫຍັງເຈົ້າຈຶ່ງມາຖາມເຮົາວ່າອັນໃດດີ? ມີຢູ່ພຽງຜູ້ດຽວທີ່ດີ. ຖ້າເຈົ້າປາຖະໜາຈະເຂົ້າສູ່ຊີວິດ ຈົ່ງຮັກສາຄຳສັ່ງທັງຫລາຍໄວ້”.
18ລາວຖາມຄືນວ່າ, “ຄຳສັ່ງຂໍ້ໃດ?”
ພຣະເຢຊູເຈົ້າຕອບລາວວ່າ, “‘ຢ່າຂ້າຄົນ, ຢ່າຫລິ້ນຊູ້, ຢ່າລັກ, ຢ່າເປັນພະຍານບໍ່ຈິງ, 19ຈົ່ງນັບຖືພໍ່ ແລະ ແມ່ຂອງເຈົ້າ’#19:19 ອພຍ 20:12-16; ພບຍ 5:16-20 ແລະ ‘ຈົ່ງຮັກເພື່ອນບ້ານຂອງເຈົ້າເໝືອນຮັກຕົນເອງ’#19:19 ລລວ 19:18”.
20ຊາຍໜຸ່ມຄົນນັ້ນໄດ້ຕອບວ່າ, “ຂ້ານ້ອຍໄດ້ຖືຮັກສາຂໍ້ຄຳສັ່ງເຫລົ່ານີ້ທັງໝົດ ມີສິ່ງໃດອີກທີ່ຂ້ານ້ອຍຍັງຂາດຢູ່?”
21ພຣະເຢຊູເຈົ້າຕອບວ່າ, “ຖ້າເຈົ້າຢາກເປັນຄົນດີຄົບຖວ້ນ, ຈົ່ງໄປຂາຍທຸກສິ່ງທີ່ເຈົ້າມີຢູ່ ແລະ ແຈກຢາຍໃຫ້ແກ່ຄົນຍາກຈົນ ແລ້ວເຈົ້າຈະມີຊັບສົມບັດໃນສະຫວັນ, ຫລັງຈາກນັ້ນ ຈົ່ງຕາມເຮົາມາ”.
22ເມື່ອຊາຍໜຸ່ມໄດ້ຍິນເຊັ່ນນັ້ນ, ລາວກໍຈາກໄປດ້ວຍຄວາມທຸກໃຈເພາະລາວເປັນຄົນຮັ່ງມີຫລາຍ.
23ແລ້ວພຣະເຢຊູເຈົ້າກ່າວແກ່ພວກສາວົກຂອງພຣະອົງວ່າ, “ເຮົາບອກພວກເຈົ້າຕາມຄວາມຈິງວ່າ, ຍາກຫລາຍທີ່ຄົນຮັ່ງມີຈະເຂົ້າໄປໃນອານາຈັກສະຫວັນ. 24ເຮົາບອກພວກເຈົ້າອີກວ່າ, ໃຫ້ອູດໂຕໜຶ່ງລອດຮູເຂັມກໍຍັງງ່າຍກວ່າຄົນຮັ່ງມີຈະເຂົ້າໃນອານາຈັກຂອງພຣະເຈົ້າ”.
25ເມື່ອພວກສາວົກໄດ້ຍິນດັ່ງນັ້ນ, ພວກເພິ່ນກໍປະຫລາດໃຈຫລາຍຈຶ່ງຖາມວ່າ, “ຖ້າຢ່າງນັ້ນ ຜູ້ໃດສາມາດພົ້ນໄດ້?”
26ພຣະເຢຊູເຈົ້າແນມເບິ່ງພວກເພິ່ນ ແລະ ກ່າວວ່າ, “ສຳລັບມະນຸດກໍເປັນໄປບໍ່ໄດ້, ແຕ່ສຳລັບພຣະເຈົ້າທຸກສິ່ງເປັນໄປໄດ້”.
27ເປໂຕຕອບພຣະອົງວ່າ, “ພວກຂ້ານ້ອຍໄດ້ປະຖິ້ມທຸກສິ່ງເພື່ອຕິດຕາມພຣະອົງ! ແລ້ວພວກຂ້ານ້ອຍທັງຫລາຍຈະໄດ້ສິ່ງໃດແດ່?”
28ພຣະເຢຊູເຈົ້າກ່າວແກ່ພວກເພິ່ນວ່າ, “ເຮົາບອກພວກເຈົ້າຕາມຄວາມຈິງວ່າ, ຂະນະທີ່ທຸກສິ່ງຖືກສ້າງຂຶ້ນໃໝ່ ເມື່ອບຸດມະນຸດນັ່ງເທິງບັນລັງອັນຮຸ່ງເຮືອງຂອງພຣະອົງ, ພວກເຈົ້າຜູ້ໄດ້ຕິດຕາມເຮົາມາກໍຈະໄດ້ນັ່ງເທິງບັນລັງສິບສອງບ່ອນ ເພື່ອພິພາກສາຄົນອິດສະຣາເອນສິບສອງເຜົ່າເໝືອນກັນ. 29ແລະ ຜູ້ໃດທີ່ໄດ້ປະຖິ້ມເຮືອນ ຫລື ອ້າຍເອື້ອຍນ້ອງ ຫລື ພໍ່ແມ່#19:29 ເອກະສານເກົ່າທີ່ຂຽນດ້ວຍມືບາງສະບັບວ່າ ແມ່ ຫລື ເມຍ ຫລື ລູກ ຫລື ໄຮ່ນາ ເພື່ອເຫັນແກ່ເຮົາ ຜູ້ນັ້ນຈະໄດ້ຮັບຜົນຕອບແທນຮ້ອຍເທົ່າ ແລະ ຈະໄດ້ຊີວິດນິລັນດອນເປັນມໍລະດົກ. 30ແຕ່ມີຫລາຍຄົນທີ່ເປັນຜູ້ຕົ້ນຈະກັບເປັນຜູ້ປາຍ ແລະ ມີຫລາຍຄົນທີ່ເປັນຜູ້ປາຍຈະກັບເປັນຜູ້ຕົ້ນ.
Currently Selected:
ມັດທາຍ 19: LCV
Highlight
Share
Copy
Want to have your highlights saved across all your devices? Sign up or sign in
ພຣະຄຳພີລາວສະບັບສະໄໝໃໝ່™ ພັນທະສັນຍາໃໝ່
ສະຫງວນລິຂະສິດ © 2023 ໂດຍ Biblica, Inc.
ໃຊ້ໂດຍໄດ້ຮັບອະນຸຍາດ ສະຫງວນລິຂະສິດທັງໝົດ.
New Testament, Lao Contemporary Version™
Copyright © 2023 by Biblica, Inc.
Used with permission. All rights reserved worldwide.
