Etenda 12
12
Kunyandithsiwa kwaa civungithsa
1Mwethso thsikati, Fumu Heroda wa tatekire kwanga no ku nyandithsa amweya mu kereke. 2Wepaire ko mwere Jakovo mukurwa Johani o mukwerume, 3Ou a monine ci eyi ya nyanyukithsire Majuda, wa shumunine no ku kwata Peturu karo. Eyi kuma ya tendaharire pa Thsidika thso Makende o kupira Mamene. 4Ou a manine ku mu kwata, wa mu pakire mu kamenga, no ku mu pa kwipani ine yo mashwarare eyi yekarire no mashwarare ane thsipani no thsipani ci a mu nyunge. Heroda kuma a anekerire ku mu punithsera ku mbunga munyima thzo Paseka. 5Mweyo, Peturu wa nyungiwire mu kamenga. Unone kereke thza takamithsire ku mu romberera kwa Nyambi.
Peturu aa punithsiwa mu kamenga
6Othsiku o diyuwa edi a fotire Heroda ci a mu rete mu kuta ou di va, Peturu kuma a rarire mu kaci ko mashwarare edi o ku nangiwa no madyenge edi. Karo akwakunyunga aidi kuma a nyungire pa thsero thzo kamenga. 7Popo kangeru ka Fumu ka nemanine ku nyonga thza Peturu, mumunyi oukuru wa munekire mu thsitokithsi omu ekarire Peturu. Kangeru ka pamarire Peturu pa dipee ku mu pindura, no ku amba ci: “O wimane wangu!” Madyenge a wire ku moko enthzi. 8Kangeru ka mu amberire ci: “O vate, karo o cishupeke mashangu oe.” Peturu wa tendire kengeyo. Kangeru ka mu amberire karo ci: “O vate canthzi woe o ni shupwere.”
9Peturu wa punine no ku shupwera kangeru ku tunda mu kamenga. Ka a dimukire ci eyi ka tendire kangeru po ya shemwa, kuma a anekerire ci a mona thsimona. 10A pitererire thsipani thso kutanga thsakwakunyunga, nethsi thso muthsidi, a kumine pa thsikwaro thso thsifu thso ku punena mu mbongi. Thsa ciyanthzurukerire thsothsinda, awopo a punena pora. A endire kengeyo mu mukwakwa ofoci, popo kangeru ka mu thsiire.
11Peturu wa tatekire ku yuvithsithsa eyi ya tendaharire no ku amba ci: “Pano honi naa tawa shemwa ci Fumu na tumu kangeru kenthzi ku na ni patura mu moko a Heroda neyi a na taterera Majuda yoihe ci i tendahare.”
12Ou a yuvithsithsire eyi ya tendaharire, wa thzire ku nthzio thza Madiya mama wa Johani Mareka, o kwa ciwanenine anu owangi o kwa rombera. 13Peturu ou a ka ngongomonine pa thsero, kwa keyire ngamba o mbuyamaana o dithzina dyo Roda ku na mu tawa. 14Ou a dimukire diywi dya Peturu, wa nyanyukire nene. Ka a yanthzururire no ku thsero, unone wa cirire ku huka ku ka tongora ci: “Peturu oyu nemana pa thsero!”
15Awo a mu huthsire ci: “Waa thzaruka!” Unone aye wa ooterire ci ya shemwa yodiyo. Unone awo a hukahukerire ku amba ci: “Ngwa kangeru kenthzi ako.”
16Unone Peturu wa hukahukerire ku ngongomona. Ku hura a na mu yanthzurwerire, a komokire ou a mu monine ci yodiyo. 17Wa wa tutwarithsire ko dyoko dyenthzi, no ku wa tongawera edi a mu punithsire Fumu mu kamenga. Wa wa amberire ci: “Mu ka i tongwere Jakovo naenthzetu akwakutawa.” Ngou a thzire ku ndau thzathzo.
18Ou dya vire, kwekarire mukwangarakanyi oukuru mu kaci ko mashwarare keyi ya tendaharire kwa Peturu. 19Munyima thzo ku mu fotafota nene unone kadi wa ku wana, Heroda wa fotithsithsire akwakunyunga no ku tumina ci a paiwe. Heroda ngou a urumukire ku tunda mu Judea ku thza ku Sesarea oku a kekarire thsikati thsothsipu.
Kufa kwa Heroda Agiripa
20Heroda wa anthziperire nene anu o mu Tire na Sidoni, ngou a ciyuvire ci a ka cimone nenthzi. O kwa shime ku thzako, a tangire tango ku rakwithsa Bulasito ngamba wa fumu, ngou a thzire honi kwa Heroda ku ka romba thsiyaro, inene kuma a kuruperire edya eyi ya tundangire ku ditunga edi a endithsire Heroda.
21Mwedyo diyuwa dya hanguriwire ku ciwana, Heroda wa vatire ekoveyo yenthzi yo thsifumu no kwikara mu ngunja ku amba ku mbunga. 22Anu a hukahukerire ku yoomoka ku amba ci: “Oyu po kadi munu pohuma oyu amba, unone nyambi.”
23Popo kangeru ka Fumu ka mu furire pakuninga ci kuma a fotire ku remekiwa eci Nyambi, tuyoka to mu dira atopo tu mu dya ayepo fa.
24Unone diywi dya Nyambi dya yukire nakwakutawa a vurire.
25Banabasi na Saule ou a ka manine ekwama yo, a ka hukire ku tunda ku Yerusalema, a shimbire Johani oyu wethsiwire ci Mareka.
Currently Selected:
Etenda 12: mho
Highlight
Share
Copy
Want to have your highlights saved across all your devices? Sign up or sign in
©2023 The Seed Company
