Etenda 11

Peturu a tongonona ekwama yenthzi

1Tunganda nakwakutawa o mu Judea yomuhe a yuvire ci Anukenge nawo na tambura diywi dya Nyambi. 2Mweyo, Peturu ou a hukire ku Yerusalema, a ka mu shomororire akwakutawa awa thza ku mukanda. 3Awo ci: “Shime waa ka hungerithsa anu o kukana ku thza ku mukanda no ku ka dyano.”

4Peturu ngou a tatekire ku wa tongonwena yoihe edi ya ka tendaharire. 5Wa ambire ci: “O ku ni di mu mbongi thza Jopa o ku ni rombera, na monine thsimona mu thsimwithso. Na monine thsinu thso ku pitura eci dimbatu dyodikuru o ku thsi shurumuka ku tunda ku wiru ko mikono thzathso thzine. 6Ou na rondororiremo nawa na moninemo eyama yo kaye, ekondwama, eharawi, nenyunyi yo mu wiru. 7Ngou na yuvire diywi edi dya ni amberire ci: ‘Peturu, o katuke, o pae o dye!’

8“Unone na tawire ci: ‘Dyombo, Fumu! Inene na diyerire ku paka mu kanwa yo dithziro yo kukana ku kena!’

9“Unone edyo diywi dya tawire ro muthsidi ku wiru ci: ‘Ethsi a na kenithsa Nyambi wa thsi ninga ci kadi thsikenu.’ 10Eyi ya tendaharire miendo thzihatu. Ngou enu yoihe ya huthsiwire ku wiru.

11“Popo akwerume ahatu a kumine ku nthzio oku na kekarire, awa tumiwire ku tunda ku mbongi thza Sesarea. 12Mupepo wa ni amberire ci ni thzeno ko kukana ku tamangera. Awa akwakutawa o mutanu na yofoci a ni thsindekethzire ku Sesarea no ku kengena mu nthzio thza Koneliasi. 13Koneliasi wa tu tongwerire edi a monine kangeru o ku ka nemana mu nthzio thzenthzi no ku mu ambera ci: ‘O tume anu ku Jopa a kethse munu o dithzina dyo Simoni Peturu, 14kenge naa ku tongwera maywi aa a ku ku retera ci o yoyithsiwe, owe no mwanda woe ouhe.’

15“Ou na tatekire ku amba, Mupepo Oukenu wa keyire kukwo eci edi wa keyire pa petu ku matatekero. 16Ngou na ka vurukire maywi aa a ambire Fumu o ku ninga ci: ‘Johani wa korovethzire ko meyu, unone amwe kenge mwa ku korovethziwa ko Mupepo Oukenu.’ 17Ngeci Nyambi na a pa Anukenge thsipa thsofoci nethsi a tu pire atwe ou twa tawire kwa Fumu Yesu Krisitu ne, nedi yame nodye ci ni kwangithse Nyambi?”

18Ou a yuvire eyi a tutwarire no ku shangara Nyambi ci: “Apo honi Nyambi naa pa nAnukenge ndau thzo ku cera no ku wana mwoyo!”

Kereke thzo mu Antioke o mu Siria

19Akwakutawa awa panthzaanine mukaci ko kunyandithsiwa kuya kwekarireko munyima thzo kwipaiwa kwa Setefani a ka kumine ku Fenisia, Sipera no ku Antioke o kwa thza o rongithsa diywi dya Nyambi ku Majuda pohuma. 20Uno honi kwekarire amweya mu kaciko, akwerume o ku Sipera na Sirene, awa a thzire ku Antioke no ku ka honga nAnukenge Muthzimbu Ouwa wa Fumu Yesu. 21Okoro wa Fumu wekarireno, anu owangi a tawire no ku thsiurukera kwa Fumu.

22Akwa kereke thzo mu Yerusalema a yuvire eyi, ngou a tumine Banabasi ku Antioke. 23Ou a ka kumineko no ku ka mona thsihemo thsa Nyambi, wa nyanyukire no ku wa tanarithsa wahe ci ekarerere kwa Fumu ko micima thzo thzothzihe. 24Banabasi po nedi munu o muwawa, o ku yara Mupepo Oukenu no thsitawo. Anu owangi a retiwire kwa Fumu.

25Banabasi ngou a thzire ku Tarese ku ka fotafota Saule. 26Ou a ka mu wanine wa ka mu retire ku Antioke. Momu widi wo a maninemo mwaka mutumbi o kwa ciwananga nanu omo mu kereke no ku rongithsa anu owangi. Mu Antioke modiyo mo kutanga akwakutawa kwithsiwa ci Makrisitu.

27Mwao mayuwa akwakukethza amweya a urumukire ku tunda mu Yerusalema ku keya ku Antioke. 28Yumweya kukwo o dithzina dyo Agabusi wemanine. Ko ku mu tangerera Mupepo Oukenu, wokethzire ci kenge kwa kwikara ndombo thzothzikuru mu matunga oahe aa a endithsiwa ku Maroma. (Eyi ya tendaharire Kilaude o ku di fumu shokuru mu Roma.) 29Mweyo, erongwa ya ciyuvire ci a tumithse ekwathsa kwaenthzo o ku Judea, munu no munu omu a twethserire momuhe. 30A tendire kengeyo, a pire eyo ekwathsa a Banabasi na Saule awa i twarire kwakuru o kereke o mu Yerusalema.

Currently Selected:

Etenda 11: mho

Highlight

Copy