Markus 4

Yesusti sunumna wana togtoba yamoropne sembe ambatsiogha

(Matius 13:1-23; Lukas 8:4-15)

1Yesusti nen mag Galilea longorop mag abolag piogti, alniro yubu ambarelamsiog. Ambarelamsiogpa nimi maikno sirik longo warekaekpa, el kabong mag alip toman piroba nhonag pul ingkiog. Kabong lomag pul ingkiogti, “Nimiri na tiboglamneikpa, yubu ambatsinun,” aro mag alibag olog ko'oro piogpa, nimi maikno taneko mag abolag wamek. 2Wamekpa Yesusti likiptop yubuag agha sunumna maikno ambarelamsiog. Yubu ambarelamsiogti, 3“Nari ambatnuahin yubu wali uro seneragto ka'elamlulom! Awe weropne nhondi so'oag wana togtoba maikno yamoro toghol palamog. 4Yamoro toglamogpa, wana nenne inaag timbaog. Inaag timbaog wana togna toghogha taneko winang yingkina ni toro teek. 5Wana nenne babe so'o ologhag kirik phalag timbaog. Anekoag timbaogti, so'o ologhari wana toghogha taneko elemag pongo saelbaog. 6Pongo saelbaog aghana, kirik phalag so'o ologhari, yareng weag wa'in kom. Ane sembe heng waelbaogti, bobori pongoroba taneko elemag halo aro ul taog. 7Nenne babe pongoroba alog aba nusamag timbaogti, pongkaog aghana, alog aba tanekori oro niknibaogpa, toghogne neneko wana maubaog kom. 8Aghana nenne babe so'o mesaag sukuptobag timbaog. So'o mesaag yingkiogne wali uro pongkaogti, wana maubaog. Pongkaogti yo'o nenneri wana teng nhon, nenneri wana teng phende, nenneri wana teng tombare maubaog,” seog.

9Seogti Yesusti ambarelamsiogti, “Aori ka'ebalomne nene nimi niri seneragto saelbamlulom,” seog.

10Seogti el mo wamogpa, elap nhon wamek nimi tanekoap aobare nangap Yesusag yingkina hailamekti, “Likiptop yubuag agha sunumna etpare sunuro ambatsilamne neneko, tam huropne sembe ambatsilam,” aro haibaek. 11Haibaekpa eldi ambarelamsiogti, “Allahri mog so'oag nimi saelba uhiroba aneko samenagna tognoro wamog aghana, wene a'unag tibin nenero ambatnuahin andarina, el wamlulom. Aghana sin nanap nimi lom nenep tangtop kom nimi sembe likiptop yubuag agha ni ambarelamsin. 12Undo ambarelamsine andarina,

‘Wanaag agha ka'ebahengdi seneragsengdi, Allahag samoro yaheng tanena,

Allahri sindi malia uropne tam orog nenero wailag nembaho.

Aghana, sindi sop-sop, “Kembahane,” aro haingdi kemelamukang aghana,

wanaag agha ibukang kom.

“Ka'ebahane,” aro aori ka'elamukang aghana,

wanaag agha seneraghukang kom,’

senelamnari likiptop yubuag agha sunumna sunuro ambarelamsin,” seog.#Yesaya 6:9-10

13Wene seogti, Yesusti nen eldi yubu ka'ero neleptop nang ambarelamsiogti, “A'un sunumna wana yamoro togtoba sembe seneragnep kom tanena, sunumna orange ambatsinenge babe welaro seneraglamlulom? 14Sunumna aneko tibin nembatnuahin. Wana aweag yamoro togtopne poneko Allah yubu walinge ambatto poa tongohirop nimi sembe lemna. 15Wana toglamnaba, inaag timbaogne neneko, Allah yubu ka'erop nimi sembe lemna. Allah yubu ambatto poa tongohirop nimiri ambatsirop yubu ene nimi eneko ka'erop. Ka'erop aghana, ka'eamna abeneko pere phia yonge sikini nubunge nenekori yingkina nimi wanaag tognange abeneko tol-tol yingkirop.

16Wana toglamnaba, kirik phalag yingkirop sen nena, Allah yubu ka'ebi agha elemag awi uro, ‘Saelbanun,’ aro torop nimi sembe lemna. 17Elemag yubu ka'ebandi tomnep aghana, nimi tanekori wanaag yareng pelengka urop kom tanena, nimi taneko mo sesog sembe pongoro wamnep. Nimi tanekori Allah yubu sunsunum uro ul piropne sembe ora nimiri sinag, ‘Seklebaukang,’ aro ulamsisengpa to, sin luknubahisengpa to tanena, kirik phalag timbaog saog nimi wamnepti, elem uro Allah yubu sae limnep.

18Wana toglamnaba, pongoroba alog aba nusamag yingkiogne sunuro lemnange nenekona, nimi nenne Allah yubu ka'erop nimi sembe lemna. 19Undop nimi anekona Allah yubu ka'erop aghana, sindi wanaag sop-sop, ‘Welaro wamnun,’ aro wana ikin uro seneraglamang. Undo seneraglamangdi, ‘Tup tahaneri, nia ni walinge nari saeag taho,’ senenne sindi wanaag to'op tangtopneri, Allah yubu niknil orop. Niknilamlaba sindi wanaag kolo orogti, Allah yubu pongoro wana maubanep kom saog wamla.

20Wana toglamnaba, so'o mesa sukuptobag yingkirop sen nena, sin Allah yubu ka'ero wali uro seneragto salerop nimi sembe lemna. Sindi wali uro Allah yubu saelbanne agha sindi wanaag Allah yubu pongoro wana maiknoro mauamla. Nenneri wana teng nhon maurop, nenneri wana teng phende maurop, nenneri teng tombare maurop saog uro sindi wanaag wamla,” aro Yesusti tibin nenero ambatsiog.

Yesusti sunumna wheaag tol pina ambatsiogha

(Lukas 8:16-18)

21Wene seogti, Yesusti likiptop yubuag sunumna nhon babe ambarelamsiogti, “Nimiri whea timbi agha auk pog kau mombolag niknirop te? Kom pagha tanena, auk pog ae usa mamneba mombolag tognorop te? Kom! Nimiri whea timbi agha whea tinina yan iktoba nhonag melamang.#Matius 5:15; Lukas 11:33 22Nia mangkina tognoro wamlange, ‘Ya'ag tognoro wamlul,’ aro tognop tangtop kom. Nhon babe liliag wamnep aghana, ya'ag liliag wamnep komdi, amik keknep tanepneog wamla. #Matius 10:26 23Nari yubu lemnange aori ka'ebalomne nene nimi niri seneragto saelbamlulom,” seog.

24Seogti Yesusti nen tipto yubu lelamogti, “Nari ambarelamsinne wene ka'elamlomdi, wali uro seneraglamlulom! A'undi ka'elamlom yubu nene sumbi agha seneragto el talapmunne sunsunum uro Allahri babe saeri sumbi agha a'un tatsilul. Abeneog kom aghana, nen phelekto tatsilul. 25Nimi etneri elag wamlenge, ‘O'oro saelbanun,’ senelamle tanena, elag tatnepne nen ma'aro yabilul. Aghana nimi etneri elag wamlenge, ‘Limnun,’ senelamle tanena, elag wamlenge babe kom talul,” seog.

Yesusti sunumna wana togtoba pongoropne sembe lebogha

26Yesusti nen yubu lelamogti, “Amik Allahri mog so'oag nimi maikno saelbamsilul. Mog so'oag nimi saelbamsilulne nenena, nimi nhondi wana togna togtoba aweag meropne saog uro wamla. 27Wana togtoba aweag toghi agha, inipnag mamnep. Kweleknag puknep. Mabom pukom alamnaba, wana togtoba taneko pongoro nubu tanep. Mabom pukom alamnari kemelamnaba, nubu tangtop aghana, pongoroba ane welaro pongorop anena, nimi togna merop nimi enekona ekon. 28Wana so'oag wamlange mo pongorop. Mo pongoro towalengkandi, yo'o waelban tanena, es uandi, wana maurop. 29Wana maubandi, whi tan tanena, ngainge poneko imnari, ‘Yongorop li yan tanena tagnun,’ sembanep,” aro sunumna Allahri mog so'oag nimi saelbamsilulne sembe Yesusti likiptop yubuag agha ambatsiog.

Allahri elap ma'arop nimi maikno saelba uhiroba sembe Yesusti sunumna ambatsiogha

(Matius 13:31-32,34; Lukas 13:18-19)

30Seogti Yesusti nen yubu lelamogti, “Allahri amik ma'arop nimi maikno saelba uhiroba welaro wamnepne ane huropneag agha sunuro ambatsinep? Tam huropneag agha a'unag tibin nenero sumbatsinun? 31Kwarang si so'oag togtopne saog uro wamla. Kwarang si togtopne olog sirik wamla aghana, 32nimiri aweag memna tanena, ni aweag meroba phelekto pongkanep. Nimiri kwarang si olog sirikne nene toro eldi aweag memna tanena, pongoro waelbandi, sae nubunge la'imbanba, winang im toman yabirop winang tanekori kal sae tanekoag ae solanep,” aro sunuro ambatsiog.

33-34Sunumna undo saogne maikno likiptop yubuag agha sunumna ambarelamsiog. Sunumna tol pina likiptop yubuag lero koma yubu nhon babe nimi maikno whingag ambatsiog kom. Ambarelamsiog yubu enena, nimiri wanaag seneragnepne sunsunum uro ambarelamsiog. Ambarelamsiog aghana, nimi maikno lambaekpa, Yesusap eldi yubu ka'ero neleptop nangap mo wamekti, likiptop yubu ambatsiog yubu eneko ni tibin nenero ambarelamsiog.

Yesusti khao aingnibaogha

(Matius 8:23-27; Lukas 8:22-25)

35Sum eneko ae sin taogpa, Yesusti elag neleptop nangag yubu lelamogti, “Nu mag longorop mag kauro tara sip pukap,” seog. 36Seogti eldi yubu ka'ero neleptop nangap kabong mag alip toman piroba nhonag wa'iek. Wa'iekpa yog nimi babe, “Nhon pukap,” aro sindi kabong etpare lomag wa'iekpa, nimi mag abolag wamekne taneko laplobi agha, “Mag kauro tara sip pukap,” aro mag alip toman piek. 37Palamekag abeneko, khao nubunge alniro ulamogti, mag kula'epto yalamogti, kabongag sibil alamog. Sibil alamogpa, mag saplukto kabongag wa'alamogpa, kabong anekoag mag teknebanep saog ulamog. 38Undo unulamogpa, Yesus sin wailag sip kabong kopkobag wamogti, usog eptoba alibag malamog. Malamogpa eldi yubu ka'ero neleptop nangdi kamolamekti, “Nai, yubu amolamsilamne! Magti nu nikniro opsineba ulamla. An, ‘Tebabeag,’ aro log semban koma mo malamlam te?” seek.

39Seekpa, Yesus pukogti, khao anekoag walamogti, mag kula'epto yalamogne anekoag, “Aingnibae! Paplobe!” aro irikaog. Wene seogpa, khao aneko aingnibaogpa, mu ana nubunge ni aneko paplobog.

40Paplobogpa Yesusti eldi yubu ka'ero neleptop nangag yubu lelamogti, “Sa'a sembe a'un log senelamlom? Sa'a sembe a'undi nanag wana palilamnelom kom?” seog.

41Undo unuaogpa, sin log lelem, “Yaghe, mane agha ual,” sembaek. Sembaekti sin mamun hail dalamekti, “Nimi ene etne wamlari, eldi yubu leplaba, khaoap mag nubu uro longorop maghap eldi yubu leplange ka'ebarangdi aingnibarang,” alamek.

Currently Selected:

Markus 4: kklKOS

Highlight

Copy