Matius 19

Nengabo kelabo lip tangtopne sembe Yesusti yubu lebogha

(Markus 10:1-12; Lukas 16:18)

1Yesusti ni yubu aneko ambatsiogti, el Galilea anekoa laplobi agha mag Yordan kauro Yudea piog. 2Nimi maiknori longoro elag neleplamekpa, anekoa nimi maikno naikna wamsiogne wali nenelamsiog.

3Farisi nimi nhon-nhon, “Yesus mibukap,” aro yaekti hailamekti, “Nengabo nhondi kel toamna agha, eldi wanaag, ‘Nari kel karong,’ seneropne wamnep. Musari aruksirop yubu sunsunum uro ela'angeri eldi kel limnep nena, tam sa'a-sa'a wamnepneag agha kel eneko hae limnep te?” aro haibaek.

4Wene aro haibaekpa, Yesusti samoro, “Yubu nhon wamlangena, yum-yum samenag Allahri nimi sunulamsiogti, ‘Nengaboap kelaboap sumbahiog,’ aro mome toro pairopne wamla. Mome nene kemelamlom kom te?#Sumbaogha 1:27 5Apna nen mome nhonagna, ‘Ane sembe nengabori sikini sikinin laplobi agha, ela'angeap elkelap ma'ap tarikneag agha sin nong nhon, sop nhon nenep tangtop,’ seog. 6Ane sembe sin abeneko nong phende kom aghana, nong nhonog nenep tangtop. Allahri ela'angeap elkelap abeneko agha nong nhonog nenero ma'abahiog ane sembe, nimi nhondi babe ela'angeap elkelap a'ep taheng kom,” aro Yesusti ambatsiog.

7Wene aro ambatsiogpa, Farisi nimi tanekori Yesusag hailamekti, “Wene aro leplam. Aghana Musari aruksirop yubu sunsunum uro, nengabo nhondi, ‘Nari kel limnun,’ senelamleri mome nhon, ‘Nari kel ene limna,’ aro mome toro pairopne, ‘Kel enekoag tatleri liplul,’ aro Musari arukahiog.#Ulangan - Sariktoba 24:1-4 Wene aro lebogpa andi, ‘A'ep taheng kom,’ selam tanena, sa'a sembe Musari sinag undo arukahiog?” aro haibaek.

8Wene aro haibaekpa, Yesusti samoro, “Mog so'oag nimi sumbahiogpa, alniro wamek sumag agha undo wamog kom. Ot a'un mog so'oag nimi usog mikipti, Allahri seneropne saelbanep kom nimi wamlom ane sembe, Musari a'unag, ‘Ela'angeri undo ualeri, elkel limnep,’ seog. 9Wene seog aghana, nari wene a'unag yubu ambarelamsin nena, nengabo nhondi kelabo tomnep. Kel eneko yog nengaboap walep tangtopne orog aghana, ela'ange ponekori kel eneko liropti, wendogne tol torop tanena, toropne ponekori ora nimiri kelabo haogha tohiropne ulamla,” aro Yesusti ambatsiog.

10Wene aro ambatsiogpa, eldi yubu ka'ero neleptop nang tanekori yubu lelamekti, “Elkelap ela'angeap wamnepne undop pagha tanena, kelabo tomna koma wamnepne agha wali,” seek.

11Wene seekpa Yesusti, “Undop yubuna nimi niri ka'ero saelbanep kom. Ot Allahri, ‘Nimi eneri saelbalul,’ aro tatsile nimiri agha yubu nene salero ulamnep. 12Nimi nenne ilindi lop orogha mangkahiekpa, kelaboap nikag mamnep komdi, kelabo topsinep kom. Nimi nenne, mog so'oag nimiri, ‘Kelaboap maplul kom,’ aro nimiri lop tohiropba, kelabo tohirop kom.#19:12 Samenag Allah yubu salero ul pirop kom nimiri sin arukna nenehirop nengabo nhon-nhonag, “Nari kelabo kelmaboap o'oro yae paiamsileri, kelabo taneko saelbahileag,” aro lop tolamsiek. Nimi nenne sindam nimiri, ‘Kelabo topsin koma wamebe andarina, Imagne nu saelba uhiropne ponekoringe awe tolamukap,’ aro kelabo tohirop kom. Nari ambarelamsin yubu nene nimi etneri salero ul pinep tanena, saelba ul palamle,” aro Yesusti ambatsiog.

Yesusti me ologne kipsiogha

(Markus 10:13-16; Lukas 18:15-17)

13Wene aro ambatsiogpa, wamek nimi tanekori, “Yesusti me ologne taneag sae pipsileri, Allahag molona molbatsilul,” aro nimi tanekori me kelmabo ologne Yesusag payalamsiek. Aghana eldi yubu ka'ero neleptop nangdi nimi tanekoag, “Payahiseng kom,” aro irikto walamsiek. 14Walamsiekpa Yesusti yubu lelamogti, “A'undi irikahiseng kom. Imagne ponekori sin wamang saog urop nimi babe paiamsildi, saelba ulamsil. Ane sembe, me tane nanag wali yaukang,” seog. 15Wene seogti, Yesusti olog mabo tanekoag sae pipsiogti, anekoa laploa piog.

Tupne nhon Yesusag hailaogha

(Markus 10:17-31; Lukas 18:18-30)

16Ik nhon sum nimi kabuni nhon Yesusag yaog. Yaogti Yesusag hailamogti, “Nai, yubu amolamsilamne. Nari tam walinge sa'ange agha ulamneba, ya'ag kamag uro unne nanag talul?” aro Yesusag haibaog.

17Wene aro haibaogpa, Yesusti nimi enekoag, “Sa'a sembe andi walinge sembe nanag haibanelam? Ot nhonog walinge wamla. An ya'ag kamag uro unneag, ‘Wa'isene,’ senelapmen tanena, Allahri aruksirop yubu salero ul palamlulam,” aro ambarog.

18Wene aro ambarogpa, kabuni enekori, “Aruksirop yubu wela saogne sembe leplam?” aro haibaog.

Wene aro haibaogpa Yesusti, “Nimi ya'ag opsiseng kom. Ora nimiri nengabo kelabo haogha topsiseng kom. Nimiringe haoghaba topseng kom. Minirop yubu lepseng kom. 19Ani anindi yubu ka'ero kiplamsululam. Andamne o'ona senep tangkamlam saog uro andi mog so'oag nimi babe o'ona senelamsululam,” aro ambarog.

20Wene aro ambarogpa, kabuni enekori Yesusag, “Andi ni leplamne nenena saelbamsia kekman wene babe saelbamnari ulamna. Nari saelba ul palamnepneog wamlange nhon babe wamla te?” aro haibaog.

21Wene aro haibaogpa, Yesusti samoro kabuni enekoag, “An, ‘Ni wali uro uitnun,’ senelapmen tanena, pimendi andi saeagha wamlange nimiag kamna kapto topmendi, kamna tatkeikne nimi saeagha orogne tatsululam. Undo tatsimen tanena, tup nenep taneba maikno Imagne ponekori whingag an sembe polop talul. Tatsimenba samoro nanag yamendi, nanag yubu ka'ero neleplamnululam,” aro ambarog.

22Wene aro ambarogpa, kabuni enekori ka'ebaogti, saeagha maikno wamogne sembe, wana ikin taogpa piog.

23Wana ikin uro piogpa, Yesusti eldi yubu ka'ero neleptop nang tanekoag yubu ambarelamsiogti, “Nari a'unag sikne agha ambarelamsin nena, saeagha tup uro urop nimi Imagneri saelba ulamsil nimi tanep ina wa'ina wamnepne eka'uk wamla. 24Nen tipto yubu nhon lemnun. Pham unta nhon el nong olog nenep tangom agha imis phoroba lom toman wa'inep te? Eka'ukti wa'inep kom senelamlom. Aghana nen eka'uk phelektopne nhon wamlangena, tup nimi Allahri saelba ulamsil nimi tanep ina wa'ina wamnepne nen phelekto eka'uk sirik wamla,” seog.

25Wene seogne ka'ebaekti, eldi yubu ka'ero neleptop nimi taneko lo'om paibom seek. Lo'om seekti hailamekti, “Tup nimi sembe eka'uk tanena, etne agha Allahri taluhirop nimi tanep?” aro haibaek.

26Wene aro haibaekpa, Yesusti taongoro kembahiogti, yubu lelamogti, “Allahri taulbahile nimi tanep nena, nimi eldamneri mo uanep kom aghana, nia mangkina Allahri, ‘Uanun,’ senenne sunsunum uro ualeba, uro yabinep,” aro ambatsiog.

27Wene aro ambatsiogpa Petrusti, “Nu kembahimen! Nuringe nia mangkina ni lipsibori, anag neleplangkeap. Ane sembe sa'a agha nunag talul?” aro haibaog.

28Wene aro haibaogpa, Yesusti sinag yubu lelamogti, “Nari yubu sikne agha ambatnuahin. Na mog so'oag nimi tahinge amik saelba uhiropne puka uroba imang wareropneag pukamnun. Nia mangkina wendog tale sum eneko, a'un nanag neleplamnelom nimi babe amik saelba uhirop nang puka uroba aobare tanekoag pukamlulom. Aneko pukapmundi, na umag nimi salero yubu sia lelapmundi, Israel ponekori nimi sisa aobare liksiog nimi sembe tam lelekto kemero karebarelamsululom. 29Nimi etneri, ‘Na Yesusti siag kekhaekto ul palamnun,’ aro eldinge ae, eldi eldo ilipsae, eldi eldo'el ilipsa'el, eldi ili ilin, eldi elmabo elenge awe, nimi enekori nhon sae yamolopsilenge sembe Imagneri lunuro nen teng tombare saog nembi agha ma'aro phelektopneap tatlul. Apna nimi enekoag, ‘Naba name,’ aro ya'ag kamag uro unne babe tatlul. 30Aghana nimi whingagne wene wamang nimi agha, nimi maikno wailag sip taukang. Nimi wailagne wene wamang nimi agha, nimi maikno amik whingag sip taukang,” aro ambatsiog.

Currently Selected:

Matius 19: kklKOS

Highlight

Copy