Matius 15

Sikini yabori seneragto ul piropneag neleplamekne toman Yahudi nimiri Allah yubu abolag nenelameka

(Markus 7:1-23)

1Aneko wamekpa, Farisi nang etpareap, Musari yubu amohirop nang etpareap as Yerusalema Yesusag yaek. Yaekti Yesusag hailamekti, 2“Andi yubu ka'ero neleptop nangdi sae a'elban koma kwaneng telamang. Undo ulamangne toman nunisag yabori, ‘Undo-undo mag a'alel dalamlulom,’ aro ambarelamsiek yubu philamang. Sa'a sembe sindi sae a'elban koma kwaneng telamang?” aro haibaek.

3Wene seekpa, Yesusti samoro yubu lelamogti, “Wene selomba, nari babe haibahinun. Sa'a sembe a'undi a'unisag yabori ul palamekneag neleplamlomne toman Allahri aruksirop yubu irikna philamlom? 4Samenag Allahri yubu lelamog nena, ‘Ani anindi yubu ka'ero kiplamsululam,’ seog.#Keluaran - Lambaeka 20:12; Ulangan - Sariktoba 5:16 Apna, ‘Nimi etneri ili ilin yo'olamsile tanena, nimi eneko ya'ag oplulom,’ seog.#Keluaran - Lambaeka 21:17; Imamat - Memnang 20:9; Markus 7:10 5-6Wene seog aghana, a'undi nimi ambarelamsilomne toman Allahri aruksirop yubu lilobi agha wail ibarelamlom. A'undi yubu ambarelamsilom nena, nimi nhondi eldi nong nimiag yubu lelamsori, ‘Nai kain, nari saeag wamlange agha yepsinepne aneko Allah sembe pimnundi, a'un yepsinep kom,’ aro lemnep. ‘Nong nimi yepsinun kom,’ sele nimi enekori Allahri, ‘Ani anin kipsululom,’ seogne sunsunum uro urop kom. Aghana a'un Farisi nangap, Musari yubu amohirop nangapti nimi enekoag, ‘Hae, “Allahag tatnun,” aro piplam tanena, andi nong nimi yepsululam kom,’ aro nimiag ambarelamsilom. A'undi amona nimiag ambarelamsilomdi, ‘Nunisag yabori ul palamekne sunsunum uro ulamsebe,’ aro ambarelamsilomne toman a'undam nimiri Allahri aruksirop yubu lilobi agha wail ibarelamlom. 7A'unna, ‘Wali sembanukang,’ aro lero urop nimi wamlom. Samenag Yesaya ponekori a'un sembe Allahri yubu silimu tipto sik uro lelamog nena,

8‘Nimi tanekori pamag agha na omeklamneang aghana,

sindi wanaagna sik uro omeklamneang kom.

9Sindi nimiag yubu ambarelamsiang nena,

nimiri senenneag agha, “Undo-undo ulamukang,” aro ambarelamsiang.

Na Allah sembe wanaag seneragna koma omeklamneang aghana, ka'elamna kom,’ seog,”

aro Yesusti ambatsiog.#Yesaya 29:13

10Wene aro ambatsiogti, nimi maikno longolaek nimi taneko yopsiogti, yubu ambarelamsiogti, “Wali uro ka'ebamundi seneraglamlulom. 11Pamag agha nimi kulomag wa'inepne neneko sembe Allahri sembenga kaolbanne senelamla kom. Ot nimiri pamag agha lanaro lemnepne sembe Allahri sembenga kaolbanne sembanep,” seog.

12Wene seogpa, eldi yubu ka'ero neleptop nang taneko elag yaekti, yubu lelamekti, “Andi wene selamne ka'ebi agha Farisi nang taneko wana mali tahil,” aro Yesusag ambarek.

13Wene aro ambarekpa, Yesusti samoro, “Nani Imagne ponekori pongoroba so'oag meamlange nusamag nhon yogne pongkamlange neneko wembanepneog wamla. 14Sin Farisi nang tane lipsisut. Sinna haing uamsin nimiri yog nimi poa yalamsilonga saog uro ulamang. Haing uropne nhondi elkae haing uropne nhon salero poa palamna tanena, sin ni phende abeneko selengaag eba tinil pinep,” seog.

15Yesusti wene seogpa Petrusti, “Andi sunumna likipto leplam yubu ene tibin nenero ambatsululam,” aro wene seog.

16Wene seogpa Yesusti, “A'un olog anam seneraglom kom te? 17Nia mangkina nimiri tenaba sika'enag wa'inne neneko monag kulukandi, ti yarobag lambanep. 18Aghana pamag agha lambanepne neneko, wanaag agha seneragnange agha lambanep. Nimiri wanaag seneraghongkia pamag agha lambanepne neneko sembe Allahri sembenga kaolbanne sembanep. 19Nimiri wanaag agha seneraghongkia, ‘Malia uahane,’ aro seneragto ulamang nena, nimi ya'ag ohirop, ora nimiringe nengabo kelabo haogha pelepsirop, kelabo nengabo top tangkamna koma salik-malik teklop tangtop, nimiringe haogha torop, lolonne minirop, san tilipsirop. 20Nimiri malia uropne lemnange tane agha Allahri sembenga kaolbanne sembanep. Aghana nimiri sae a'elban koma tenaba tenepne eneko sembe Allahri sembenga kaolbanne seneropne kom,” aro Yesusti ambatsiog.

Yahudi sisa kom kel nhondi Yesusag sikne aro wana palilamogha

(Markus 7:24-30)

21Yesus anekoa lambaogti, palamogha mog so'o Tirusap Sidonap piogti wamog. 22Piogpa Kanaan kel nhon so'o enekoag wamogha Yesusag yalamogti, “Nu Saelba Uhiropne an Daud sisange mangap talumne. Na yareag sembane! Na namangkelag phia yonge wa'iori, naikna mali uro seklelamla,” aro ngaepto mololamog.

23Wene alamogpa, Yesusti kel enekoag yubu kiki nhon babe lemna koma wamog. Yubu lemna koma wamogpa, eldi yubu ka'ero neleptop nang taneko Yesusag yaekti, moloro yubu lelamekti, “Ngaeplamla kel ene nu wisog nenelamsil ane sembe, elag yubu lepmenba pilul,” seek.

24Wene seekpa, Yesusti samoro yubu lelamogti, “Na wepto pogneog nena, ot sin Israel nimiri likto pirop nimi pham domba ekel ina piloa saog wamang nimi mo sembe pogneogpa yahi,” seog.

25Wene seogpa, kel eneko Yesus whingag yaogti, yabu sanukto u amupto pulingkina yubu lelamogti, “Nu saelba uhiropne yepnululam,” aro moloro yubu lebog.

26Wene seogpa Yesusti, “Kwaneng roti meri saeag agha pelepto kam sembe toboghatsinepne nene wali kom,” seog.

27Wene seogpa, kel enekori Yesusag samoro, “Nu saelba uhiropne, sik leplam. Aghana sikini yabori kwaneng pairo terobag agha telamnari, ubun pelengel lolamnange neneko kam ologne nhon-nhondi babe ubun taneko togto terop,” seog.

28Kel enekori wene seogpa Yesusti, “Nanin, andi nanag sikne aro wana palilamlamne nubu sirik. Andi wanaag, ‘Uro yaboho,’ senelamlamne nene uro yabilul,” seog.

Wene seog abeneko pere kel eneko elmangkel wali taog.

Yesusti naiktop nimi maikno wali nembahiogha

29Yesus anekoa lambaogti, mag longorop mag sin Galilea abol toman palamogha waelba lebogti, yim nhonag yingkiogti pukamog. 30Yingkina pukamogpa, nimi maiknori nimi naiklamekne, yan keamtirop nimiap, haing urop nimiap, yan mali nimiap, yubu lerop kom nimiap, nimi sa'a-sa'a naikna wamsiogne payalamsiek. Payingkina Yesus whingag pail alamsiekpa, wali nenelamsiog. 31Wali nenelamsiogpa, yubu lerop kom nimiri yubu lelamek. Yan keamtirop nimi wali nenelamsiogpa, yan mali nimi wali yabalamek. Haing uhirop nimi haing kwelekto ililamek. Nimi maikno aneko wamek nimiri nia ni undo uro yabihiogne kembiag agha lo'om seekti, Israel nimi paia uhiropne Allah poneko omeklamek.

Yesusti nimi teng-tengne (4.000) tena tatsiogha

(Markus 8:1-10)

32Yesusti eldi yubu ka'ero neleptop nang yopsiogti, yubu lelamogti, “Nimi maikno nanag yalamongpa, wamap paghabog inipna ik wilindip sum tal. Ik wilindip sum talba, kwaneng orogti kwaneng yo wamangba, yareag senelamsin. Nari sinag, ‘Pululom,’ aro ambatsisene tanena, ‘Kwaneng yoapti mandu aro phukul piikag,’ senelamnari sin kwaneng tatsin koma sae lipsinepne na karong,” seog.

33Wene seogpa, eldi yubu ka'ero neleptop nangdi yubu lelamekti, “Nimi along taneko sembe kwaneng tenaba orog pagha, pai aldesag wamaptina, nuri tala siba kwaneng roti sunuro tol pinep?” seek.

34Wene seekpa Yesusti, “Kwaneng roti etpare saelbamlom?” aro haibahiog.

Wene aro haibahiogpa sindina, “Kwaneng roti saekpareap, ikan ologne etpareap wamla,” seek.

35Wene seekpa, Yesusti nimi maikno wamek nimi tanekoag, “So'oag puksut,” seog. 36Pukekpa kwaneng roti saekpare tanekoap, ikan ologne etpare abenekoap tobogti Allahag, “Nani, wali tatsilam,” aro kibog. Allah kibogti kwaneng roti saekpare taneko saeri khepto-khepto eldi yubu ka'ero neleptop nangag tatsiogpa, nimi maikno tanekoag pogto tatsiek. 37-38Pogto tarel pihiekpa, nimi niri mon og uro teek. Sin kwaneng teek nimi taneko wamek nena, kabuni mo a'ilbahin tanena, teng-tengne (4.000) wamekpa, kelaboap me kelmaboap babe wamek. Nimi tanekori mon og uro teekpa, phelektopne babe wamog. Eldi yubu ka'ero neleptop nangdi kwaneng rotiap, ikan sopap kheptoba phelektopne poloro pibekti, haing agha kau wiroba nubunge saekpareag libaek.

39Wene teekpa, mon og tahiogpa, Yesusti nimi maikno tanekoag, “A'undi asag pululom,” seog. Seogpa lambaekpa, kabong mag alip toman piroba lomag waelbaogti, Magadan so'oag sip piog.

Currently Selected:

Matius 15: kklKOS

Highlight

Copy