Matius 14

Nimi maghag pelengehiropne Yohanes obeka

(Markus 6:14-29; Lukas 9:7-9)

1Wamek sum eneko Herodes nimi nubunge wamogti, Galilea so'oag nimi saelbamsiog. Saelba ulamsiog sum eneko Herodesti Yesus sembe yubu ka'ebaog. 2Ka'ebaogti eldi arukna tanekoag ambarelamsiogti, “El poneko Yohanes nimi maghag pelengehiropne tebaonge poneko kamag tao. El kamag tao ane sembe, Allah mikibari uanepne el pere agha ulamla,” aro ambatsiog.

3Herodesti undo sembamog nena, samenag Yohanes anam teban komag, Herodesti Yohanes salero sae kaupto kop aeag tobongkibog. Kop aeag tobongkibog nena, samen Herodes elkae Filipusti toamog kel Herodias wamogpa, Herodes ponekori elkaeri kel eneko pelepto aog. 4Pelebaogne sembe Yohanesti Herodesag yubu lelamogti, “An ankaeri kel pelebaomne nene, Allahri yubu lebogne irikna phiro uaom,” aro wembaog. 5Wembaogpa Herodesti, “Yohanes opsene,” senelamog aghana, nimi maikno tanekori, “Yohanes Allah yubu silimu tiptopne wamla,” aro seneraglamek. Ane sembe logti, Herodesti Yohanes omna koma liamog.

6Herodes mangap tangto yabiog sum taogpa, mangap taogne seneragto ulamekne sembe nimi maikno yopto kilbahiogti, sani yoro telamek. Sani yoro telamekag aneko Herodias elmangkeldi nimi wameka nusamag kolapto seplamog. Kolapto seplamogpa Herodesti, “Wali,” aro wana awi maikno senelamog. 7Wana awi senelamogneag agha Herodias elmangkel anekoag Herodesti salag palilamogti, “Andi nanag molbanemena tatkenun. Andi, ‘Sa'a-sa'a tatnoho,’ senelamlama tatkene kom tanena, memneri hae omnelul,” aro yubu so'opto salag pibog. 8Ilin Herodiasti, “Yohanes tebalul,” senelamogneag nelepto Herodias elmangkel anekori, “Yohanes maghag pelengehiropne tebalul. Eldi usog ngang pulukto obikti, usog kareptoba ingirobag pai agha ane tarelaneikpa imnun,” seog.

9Wene aro molbaogha aneko ka'ebaogti, yubu sia lenne Herodes poneko wana ikin taog. Wana ikin taog aghana, eldi wanaag seneraglamogti, “Kwaneng nhon telamap nimi taneko whingag, ‘Tatkene kom tanena, memneri omnelul,’ aro yubu so'opto salag pimna,” aro seneraghog. Ane sembe eldi arukna anekoag, “Leplange aneko ualulam. 10Kop aeag pimendi, Yohanesti usog ngang pulukto oplulam,” aro arukaog. 11Arukaogpa eldi arukna aneko kop aeag aneko piogti, Yohanesti usog ngang pulukto obogti, usog ingirobag pai agha kelme enekoag tarel piog. Tarelaogpa kelme enekori poa lebogti, “Yohanes tebal,” aro ilinag lag nembarel piog. 12Wene aro obekpa, Yohanesti yubu ka'ero neleptop nangdi el nong teptoba tolaek. Tolaekti Yohanes nong teptoba aneko poa so'oag sikil piekti, yubu poa Yesusag ambarel piek.

Yesusti nimi teng-tengne (5.000) kwaneng tatsiogha

(Markus 6:30-44; Lukas 9:10-17; Yohanes 6:1-14)

13Yohanes obekne sembe ka'ebaogti, Yesus aneko laploa, “Mo wamnun,” aro kabongag agha mag alip toman nimi oroghag piogti wamog. El laploa piogne sembe aneko yubu sabo tangto yabiogpa ka'ebaekti, nimi as soro kalurop as taneko wamek nimi maikno laplobi agha yan toman Yesusag nelepto palamek. 14Yesus kabong lomag agha lambaogti tilamsiogpa, nimi teng-tengne longolameka tibogahiog. Longkameka tibogahiogti, yareag senelamsiogti, nimi taneko naikna wamsiog nimi wali nenelamsiog.

15Wali nenelamsiogpa, ae iniplamog abeneko eldi yubu ka'ero neleptop nang taneko Yesusag yingkina yubu lelamekti, “Nu wamabag ane ae sorop komag paiag wamap. Wene ae inipna peram talamla. Andi nimi taneag, ‘A'un pululom,’ ambatsimenba as tanetag kwaneng teneba kamna kapto tol-tol pukang,” aro ambarek.

16Wene aro ambarekpa Yesusti, “Sinag teko orogtina pukang kom. A'undi agha kwaneng tatsimunba tukang,” seog.

17Wene seogpa, eldi yubu ka'ero neleptop nang tanekori, “Nunag wamlangena orog. Ot kwaneng roti taroba lambareap, ikan phendeap aghabog wamla,” aro ambarek.

18Wene aro ambarekpa Yesusti, “Wamlange abene payahut,” seog.

19Wene seogti, nimi maikno tanekoag, “O'olaba pongorobaag tane puklulom,” seogpa pukek. Pukekpa Yesusti kwaneng roti taroba lambare tanekoap, ikan phende abenekoap saelbamogti, imag tiwalengkia Allahag, “Wali tatsilam,” aro kibog. Allah kibogti, kwaneng roti saeri khepto-khepto eldi yubu ka'ero neleptop nang tanekoag pogto tatsiogpa, nimi maikno tanekoag tipto tatsiek. 20Pogto tatsiekpa, sin nimi ni tanekori teekpa, mon og tahiog. Teekpa mon og tahiogpa, phelektopne babe wamog. Eldi yubu ka'ero neleptop nangdi kwaneng kheptoba phelektopne poloro pibekti, haing agha kau saog uro wiroba nubunge aobare liro pibek. 21Sin kwaneng teek nimi taneko wamek nena, nengabo mo a'ilbahin tanena, teng-tengne (5.000) wamekpa, kelaboap kelmabo meap babe wamek.

Yesus mag alibag yan ingiro palamogha

(Markus 6:45-52; Yohanes 6:15-21)

22Wene kwaneng teekpa, ta'ap sen koma Yesusti eldi yubu ka'ero neleptop nangag, “A'un kabong lomag wa'imundi, na laplobi agha mag longorop mag sin kauro tara sip sam pululom. A'un sam palapmunba, nari nimi maikno tanekoag, ‘A'undinge asag pululom,’ aro ambatsinun,” seog. 23“Pululom,” seogpa nimi maikno taneko palamekpa, Yesus el mo, “Allahag molona lemnun,” aro yim nhonag waelbaog. Ae imbaogpa, Yesus el mo aneko wamogpa, 24elkabo kabongag waelbaek. Waelbaekti mag abolag laplobekti, longorop mag nubunge nusamag weag piek. Mag sin nusamag palamek aghana, khao whingag siba yalamogpa, mag kula'eptobari kabong aneko yom-yomolamog.

25Inipna kwelekanep tom nusam taogpa, sikin mag longorop mag nubunge nusamag wamekag aneko Yesus mag alip toman yan ingiro palamog. 26Mag longorop mag alip toman yan ingiro palamogha tibaekti, eldi yubu ka'ero neleptop nang taneko logti, “Phia yalamla,” aro log lelem ngolol alamek.

27Wene alamek abeneko pere sinag yubu lelamogti, “Log sembaheng kom. Na Yesus a'unag yalamnari, wana khapto wamsut!” seog.

28Yesusti wene seogpa Petrusti, “Nai, an sik Yesus pagha tanena, ‘Nanag mag alip toman yan ingiro yalulam,’ semenba yanun,” seog.

29Wene seogpa Yesusti, “Yae,” seog.

“Yae,” seogpa Petrus kabongag agha kuluka mag alip toman yan ingiro Yesusag palamog.

30Mag alip toman yan ingiro palamog aghana, Petrusti kemelamogpa, khao mag alip toman yalamogne mikip wamogha kembaog. Khao mikipne sembe Petrusag logne lololaogpa, maghag purukanep uloghog abeneko pere, “Nai, nu Saelba Uhiropne. Na taluro yepne!” aro haum alamog.

31Wene alamogpa, ta'ap sen koma Yesusti men phea sae pelengkia sae saelbamogti, “Sa'a sembe wana wag talamdi, nanag wana palilamlam kom?” seog.

32Wene seogpa, sin phende abeneko kabong lomag wamekne anekoag waelbarekpa, khao aneko aingnibaog. 33Khao aingnibaogpa, sin kabong lomag wamek nimi tanekori yabu sanukto u amupto pulingkina omeklamekti, “An sik uro Allah Elme wamlam,” alamek.

Yesusti mog so'o Genesaret nimi naiklamek nimi maikno wali nembahiogha

(Markus 6:53-56)

34Kabongag agha mag sin kauro tara sip piekti, mog so'o Genesaret sangnil ingkiek. 35So'o anekoag wamek nengabori kemelamekti, “Yesus yal,” aro el taek. El taekti, yubu poa ambatsirop nimi pogsiekpa, sin wamek mog so'oag ubu paiamek as ni tanekoag, “Yesus yal,” aro ambarel pihiek. Yubu poa piekpa, nimi naikto wamek nimi ni Yesusag payalamsiek. 36Payalamsiekpa naiktop nimi tanekori wanaag agha Yesusag mololamekti, “Andi nongag wangkamlam ag sirikag babe mo po'obane tanena, wali tanun,” aro sarikto-sarikto mololamek. Nimi etneri eldi aghag po'olongolamek tanena, wali talamek.

Currently Selected:

Matius 14: kklKOS

Highlight

Copy