OBADIA 1
1
1Heika Obadia pe zis nghuot. Yomzains Yhensain ka Edom dius nyau cho taiq.#Esa 34.5-17, 63.1-6; Yer 49.7-22; Ezk 25.12-14, 35.1-15; Amo 1.11-12; Mal 1.2-5
Yhensain Edom lyis Joeng das
Yhensain ka dius nyau jens lyis nyah loeus kyoh kat las
ngamoq nyah loeus xauhgyo:
Cicont kuot geh! Edom lyis tyi lha jeszan loh goh, ge.
2 Yhensain ka Edom lyis taiq,
Ngos namoq lyis yomnhuk nhang das.
Yuk khanghmuh nvng lyis dius ngis khyoq das.
3Nvng khwank cho ka nvng lyis mhuih goeus.
Nah wusmuh gas lukkhyung thoenkgus jesdvp nghuot.
Nah yhen ka boms nyhang jens mas joq las,
Ngos lyis hank yoh khyoq das lah?
ge taiq zo.
4Nvng nah yhen lhyi
zonsmuh dah sot teh nyhang lha
hauh zis kyi jo mas joq teh kuot toh laus eq
ngos nvng lyis hou mhayah lang khyoq das.
5Nyenh lyis khauh bang los lyis,
nyamoq o zis kyingh dvyoeus.
Dius jens zvbiq thyoq lyis
nyamoq vjangh dvtsiq nyhet toh.
Nghuot laus eq nah jeswus jens gas nah zis shank shoq shenh loh.
6Esau vnyau vshih jens eh, namoq zisyos tsain lhuot loh goeus.
7Namoq dah buisnoms jens namoq lyis mhuih jyomh goeus.
Nyamoq gas namoq lyis namoq mau masyah khat thuq goeus.
Namoq yah nyenstap goh bang gvshih namoq lyis ung tyamp goeus.
Namoq yah wom zo dah dyenschangh jens gas namoq xiklyis lhyik thung toh;
nyamoq gas namoq lyis, nyamoq mas bos dah yik cho khapheh nghuot, ge.
8Ngos Edom lyis joeng nyeih lyis
ngos nyamoq dah yik bang lyis mhont las
nyamoq dah joeui lhyi buot tyamp das.
9Teman dah jeszan bang gyuk nvn das.
Edom mas dah jeslo jens yuk khanghmuh sat zis xauh das.
Edom lyis Chamus Joeng
10Nvng Yakop dah vnyau vshih nghuot dah
nah boekyis lyis lhuot zis yah sat yvmvyah
namoq gas mhont zis xauh las vcaiq vto nyoqnho ngelang gyoh das.
11Jeswus jens nyamoq dah
khyam khomh thyoq khyoq buisnyeis lyis
namoq gas vyvm mas yap joq.
Namoq gas hau Yerusalem dah
yohkhuiq cho lhyi yoeus loh las
nyamoq nyang gvm goh dah Lvbaus teh ma gis.
12Yuda mas nah boek yau kyenh buisnyeis lyis nvng ma gis yoeuh pyo.
Nyamoq dah thyoqpi xauh buisnyeis lyis
nvng ma gis gauslaus.
Nyamoq shanghsenh buisnyeis lyis
nvng ma gis yis.
13Ngah dius jens xauh kham dah cho lhyi yoeuh pyo das zis yahge
nyamoq dyoqbis zainsmuh buisnyeis lyis
namoq nyamoq dah ngwis xing yoeus das zis
namoq hau wus mas ma gis wvng loh.
14Tungh phang luiq los bang lyis
nyhik das zis chotsom mha ma gis yap;
nyamoq dah shanghsenh buisnyeis lyis
nyamoq lyis jeswus loq mas ma gis kyauh.
Dius nyau lyis Soetuon das
15Ngos Yhensain dius nyau jens dvnganh lyis
soetuon das buisnyeis ni goeus.
Edom eh, Nvng kuot vgus
nvng lyis kuot das.
Nvng dyei goeus zis nvng doms xauh yoeus das.
16Ngah dius jens gas ngah gyingshang jing mas
joeng dah kom khoh shuk goeus.
Vyvm vwi mas nyeis dah dius nyau jens gas
joeng cho zes khoh dah kom xauh tsoq shuk shih das.
Nyamoq hauh yvlyis dvnganh shuk las dyuk loh das.
Israel dah Ung cho
17Nghuot laus eq Zion boms mas dvyhamh phang luiq das las,
hauh zis gas gyingshang joqyos nghuot das.
Yakop dius jens gas nyamoq sain das
toeuh yoh dah maunyeis lyis sain das.
18Yakop yahge Yosep dius jens gas nyi teh nghuot das.
Nyamoq gas Esau dius jens lyis
mhotkhyot nyi ngeh teh mhont tyamp das.
Esau dah vnyau vshih ma doeng lo das.
Ngos Yhensain taiq goeus.
19Yuda mautyi mha bang gas Edom mas wvng nyeis das.
Buiswvng jing khyei mha bang gas Philisti pa lhyi yoeus das.
Israel jens gas Ephraim mau yahge Samari mau lhyi sain das.
Benyamin dius jens gas Gilead mau lyis yoeus das.
20Israel mautsung mhayah
jonsdoeus loh dah jesphung ka tauh los las
Phonisi masyah Zarephat jweh shoq ung das.
Yerusalem masyah jonsdoeus loh las
Sardi mas nyeis dah bang gas
Yuda mautyi pheh dah wus jens lyis xauh yoeus das.
21Yerusalem mas dah ung los bang gas
Edom lyis zan las hauh yvlyis guon das las
Yhensain nyang hwankti nghuot das.
Currently Selected:
OBADIA 1: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.
