LUKA 22
22
Yesu lyis Lhaink
(Mat 26.1-5; Mak 14.1-2; Yoh 11.45-53)
1Lhuiq Kat Pwe ge nyhink dah bicheih ma kat ohlhyoq zo pwe jweh ni los nyeis.#Dyu 12.1-27 2Hauh uhlyis phudyei uhjyung jens yahge maussauh lhaih bang gas, nyang lyis khasoeh yoh sat das dah cho tsain xamgoh nyeis. Nghuot laus eq nyamoq gas dius jens lyis gyuk nyeis.
Yudas Yesu lyis Phanhlyen
(Mat 26.14-16; Mak 14.10-11)
3Hauh shvhoeu lhyi dvci aiq yuk mas Iskarot ge dah Yudas jyank mas Satan wvng las, 4nyang thuq loh las phudyei uhjyung jens yahge zau jens jyank mas, nyang lyis khasoeh yoh phanhlyen dyei das cho, nyamoq yah e xamgoh nyeis. 5Hauh bang gas gaus las ngwis dyei das xiklyis xamxonh. 6Nyang nyamoq yah xamxonh las moqjens ma nyeis uhlyis nyang lyis yoh phanhlyen dyei das toeuh xo nyeis.
Lhuiq Kat Pwe Sont Nhang
(Mat 26.17-25; Mak 14.12-21; Yoh 13.21-30)
7Lhuiq Kat Pwe yvnglo sat phudyei las bicheih ma kat ohlhyoq zo pwe shishenh jweh los. 8Housoeh yvmvyah nyang gas, Petru yahge Yohan lyis xik pheh nhang lha taiq kat zis gas, Yang zo das xiklyis Lhuiq Kat Pwe loh sont langh geh, ge.
9Hauh aiq yuk nyang lyis nyei zis gas, Nvng ngamoq lyis khamha loh sont toh dyei langh nhang mes lah, ge.
10Nyang nyah aiq yuk lyis taiq zis gas, Nah aiq yuk wugungs mas wvng loh lyis jywang dvng soeu dvyuk yah xauhgoh das: hauh soeu wvng loh dah yhen khau mha chank wvng loh geh. 11Hauh yhensain lhyi, Ngos ngah changlo jens yah Lhuiq Kat Pwe zo das dah boenghdoq yvp khah zis nghuot lah, ge Svra nyei nhang, oen taiq geh. 12Housoeh lyis nyang sont toh dah yhenthoq yvpmuh dvyvp tuonh shet das, yah nyhenshang houmha ba sont toh langh geh, ge.
13Nyah aiq yuk loh lyis nyang taiq kat vgus nyvng las, hau Lhuiq Kat Pwe nyenhcon lhyi tsain ba sont toh.
Yhensain dah Nyenhcon
(Mat 26.26-30; Mak 14.22-26; 1Kr 11.23-25)
14Shishenh jweh las nyang gas lvgyo jens yah dvgeh kihgus mas joqyos yoeus. 15Nyang nyamoq lyis taiq zis gas, Ngos shanghsenh zis ma xauh shih lyis namoq yah dvgeh haih Lhuiq Kat Pwe svsoh zo shuk mes. 16Ngos namoq lyis taiq zis gas, Mangso munghdan mas doms xauh zo shishenh jweh shoq, ngos haih yvlyis ma zo das, ge.
17Nyang kom lhyi yoeus las jyehjuh chungh lho lha taiq zis gas, Haih zis lyis yoeus las namoq mas gvm geh. 18Ngos namoq lyis taiq bah, Mangso munghdan jweh los shoq, ngos zvbiq shih mas zis ma shuk lo das, ge.
19Hauh thang lhyi ohlhyoq yoeus las jyehjuh chungh lho lha khyiq dyei las taiq zis gas, Haih zis gas namoq xiklyis dyei tyamp dah ngah gungs nghuot. Ngos lyis soh das xiklyis haih zis kuot geh. 20Houyah dvyhangteh nyamoq dye zo thang lhyi kom lhyi yoeus las taiq zis gas, Haih zis gas namoq xiklyis huot tyamp, ngah suih yah kuot toh dah thanghchvp vsaiq nghuot.#Yer 31.31-34
21Nghuot laus eq yoeuh aq, ngos lyis phanhlyen das soeu dah loq gas haih kihgus mas ngah loq yah dvgeh nghuot.#Chd 41.9 22Cangsoeu Lo gas toeuq toh zis yah dvyhangteh loh lo das; nghuot laus eq nyang lyis phanhlyen soeu ka mvtanhzoe nghuot, ge.
23Hauh uhlyis nyamoq eq hauh cho kuot das zis hank nghuot das au, ge tsain nyei goh nyeis.
Kuh Cho Phyen goh
24Hauh thoq lyis changlo jens mas zes kuh soeu hank nghuot nyeis au lhyeh, ge nyamoq taiq phyen goh nyeis yvmas,#Mat 18.1; Mak 9.34; Luk 9.46 25Nyang nyamoq lyis taiq zis gas, Gohnyau hwankti jens gas nyamoq xauh guon bang lyis kyukzo nhantzo. Nyamoq lyis vmingh dyei bang eq, nyamoq nyang gungs lyis jyehjuh yhensain nghuot ge taiqzo.#Mat 20.25-27; Mak 10.42-44 26Nghuot laus eq namoq gas housoeh ma nghuot; namoq mas zes kuh soeu ka zes ngis soeu yhangteh nghuot las, uhjyung ka phuqsoe soeu teh nghuot chah.#Mat 23.11; Mak 9.35 27Womjus mas tsung toh soeu yahge phuqsoe soeu hank zes kuh lah? Wom jus mas tsung toh soeu ma nghuot lhyeh? Nghuot laus eq ngos gas namoq mas phuqsoe soeu teh nghuot nyeis.#Yoh 13.12-15
28Namoq gas, ngos yaukyenh uhlyis, ngos yah dvgeh nyeis bang nghuot. 29Ngah Uwus ngos lyis munghdan dyei zis yah dvyhangteh, ngos namoq lyis dyei. 30Namoq gas ngah munghdan mas, ngah kihgus mas yoh zo shuk das zis yahge soetuon tank mas tsung lha, Israel dvci aiq nyau lyis soetuon das, ge.#Mat 19.28
Yesu Petru He das cho Taiq
(Mat 26.31-35; Mak 14.27-31; Yoh 13.36-38)
31Housoeh las Yhensain taiq zis gas, Simon, Simon Satan gas namoq lyis sunghso khyink teh khyink mes nyeis. 32Nghuot laus eq nah lomsjingh ehnyet ma dyoq das xiklyis, ngos nvng lyis shvmanh dung dyei. Nah nhaiqlom thaiq las doms lhain soh los lyis, nah vmang vnoeuh moq lyis thukxank nyeis aq, ge.
33Petru taiq zis gas, Yhensain eh, ngos gas nvng thung gyoh laus eq, shei chah laus eq nvng yah dvgeh loh das xiklyis cicont nghuot, ge.
34Nyang taiq zis gas, Petru, ngos nvng lyis taiq bah, khvnyens gyoq ma tuon shih lyis nvng, ngos lyis ma seq, ge somh lhain he tyamp das, ge.
Ngwis thung, Bvtmuh, Sham
35Nyang nyamoq lyis doms taiq zis gas, Ngos namoq lyis ngwis thung, bvtmuh yahge thyvkoq ma bos bos nhang kat lyis dvja ja vchah goh lah, ge.#Mat 10.9-10; Mak 6.8-9; Luk 9.3, 10.4
Nyamoq gas, Cha eq ma chah, ge.
36Nyang taiq zis gas, Gvshih gas ngwis thung yoh soeu ka yoeus chi aq, bvtmuh eq houyah dvyhangteh wons aq, moengsa ma yoh soeu ka dyi ungh las wis chi aq. 37Ngos namoq lyis taiq bah, O mha dah dang gas ngos mas nyuk los chah. Houka, Nyang lyis gas lyi lhyweq bang mas bos suon kat goeus; jyoengh ngah cho lhaih toh zis gas nyuk los, ge.#Esa 53.12
38Nyamoq taiq zis gas, Yoeuh aq, moengsa aiq chamh joq, ge.
Nyang gas, Hauh zis luk goeus, ge.
Yesu Shvmanh Dung
(Mat 26.36-46; Mak 14.32-42)
39Hauh thang lhyi nyang gas, vjangh gyangh doq dah Tsanlun boms mas doq loh. Nyah changlo jens eq nyah thang mha chank loh. 40Joqyos mas jweh las nyang nyamoq lyis taiq zis gas, Shiwu yvmas ma wvng loh das xiklyis shvmanh dung nyeis geh, ge lho lha,
41nyamoq nyeis masyah luk dvlom doeuh ko loh las, phvluk zomhgyuis lho lha shvmanh dung zis gas: 42Uwus eh, nvng bauh lyis gas, haih kom ngah jyank masyah yoeus tyamp dyei aq, nghuot laus eq ngah ehnyet ma nghuot, nah ehnyet dvnghuot bas jungh, ge. 43Loeuswons soeu dvyuk maukhung mhayah thuq los las nyang lyis yomdyei nyeis. 44Nyah ehnyet loh thank nyung daus zis yah dvgeh yomkat las shvmanh dung nyeis lyis, nyah gywesjeis eq nyeisjvng mas suih zoq gyoh teh gyoh nyeis.
45Shvmanh dung masyah toq las nyah changlo jens jyank pheh loh lyis, nyamoq gas nhaiqkuk ehnyet yah yhet joq zis lyis loh nyvng. 46Nyang nyamoq lyis taiq zis gas, Namoq chamus yhet joq goh lah? Shiwu yvmas ma bos loh das xiklyis toq las shvmanh dung nyeis geh, ge.
Yesu lyis Nyhik
(Mat 26.47-56; Mak 14.43-50; Yoh 18.3-11)
47Housoeh taiq nyeis shih lyis, yoeuh aq, moqjens yah dvgeh, dvci aiq yuk mas dvyuk nghuot dah Yudas ge soeu ka, nyamoq xik mas loh las, Yesu lyis bvlot tanh das xiklyis nyah jyank mas ni loh. 48Yesu nyang lyis taiq zis gas, Yudas eh, nvng gas cangsoeu Lo lyis bvlot tanh zis yah phanhlyen nyeis vnghuot lah, ge.
49Yesu yah dvgeh nyeis bang gas, bweh los das cho lhyi yoeuh seq las nyang lyis taiq zis gas, Yhensain eh, ngamoq moengsa yah vzan das lah, ge. 50Dvyuk gas Phudyei Zainsmuh jyeidwis dah loqyos no zan thyet dyei.
51Yesu phuk taiq zis gas, No geh, ge hauh no lyis nyang tanh zis yah doms gis nhang.
52Yesu gas jweh los dah phudyei uhjyung jens, yhenmuh gomh zau jens yahge logis jens lyis taiq zis gas, Namoq gas khyanktau nyhik das teh, ngos lyis nyhik das xiklyis moengsa, dunghkuq chi lha los lhyeh? 53Yhenmuh mas nyeih yau nyeih ngos namoq yah dvgeh nyeis uhlyis gas namoq ngos lyis ma nyhik, nghuot laus eq gvshih gas namoq dah shishenh nghuot joq zis yah dvyhangteh, mauchuot dwang dah yomsoq eq nghuot, ge.#Luk 19.47, 21.37
Petru Yesu lyis He
(Mat 26.57-58, 69-75; Mak 14.53-54, 66-72; Yoh 18.12-18, 25-27)
54Hauh dius jens gas Yesu lyis nyhik las Phudyei Zainsmuh dah yhen mha tsain shwih loh. Petru eq nyamoq yah we we masyah chank loh. 55Ganthoq khau mha nyi khat las tsung toh yvmas Petru eq bos. 56Housoeh nyikhyomp yvm mas tsung toh zis lyis jyeidwis nyelo dvyuk nyvng lyis, nyang lyis jeih jeih yoeuh las, Haih soeu eq Yesu yah dvgeh zis nghuot, ge.
57Petru he lha taiq zis gas, Nyelo eh, nyang lyis ngos ma seq, ge.
58Dvxa lhyi gohtoeu dvyuk eq Petru lyis nyvng las, Nvng eq haih bang mas zis nghuot ge lyis,
Petru gas, Vbusbih eh, ngos ma nghuot, ge.
59Dvshishenh ko doms nyangh thang lhyi, gohtoeu dvyuk taiq zis gas, Haih soeu eq jyoengh nyang, nyang yah dvgeh zis nghuot. Nyang Galile dius eq nghuot, ge.
60Petru doms taiq zis gas, Vbusbih eh, nvng cha taiq zis ngos ma seq, ge.
Housoeh taiq yah dvyih gyoq tuon los. 61Hauh uhlyis Yhensain ka Petru lyis lhain yoeuh kat: Gyoq ma tuon shih lyis nvng ngos lyis somh lhain he tyamp das, ge dah Yhensain dang lyis Petru soh los yah dvyih, 62Petru nghe pheh thuq las svsoh ngaus.
Yesu lyis Jwangh las Bat
(Mat 26.67-68; Mak 14.65)
63Yesu lyis nyhik toh bang gas, nyang lyis lyuk las tsain jwangh. 64Nyah nyoq lyis nghop dyei las lyuk zis yah, nyang lyis taiq zis gas, nvng lyis lyuk zis hank nghuot lah? Lvpe pe aq, ge. 65Gohtoeu dah loeusmus soqzo dang eq nyoshoq Yhensain lhyi sang gyuon shih.
Yesu lyis Pilat, Herod Xik mas
(Mat 26.59-66; Mak 14.55-64; Yoh 18.19-24)
66Nyoq nyvng los lyis, dius jens dah logis jens, phudyei uhjyung jens, maussauh lhaih bang tsain huom lha, Yhensain lhyi hauh huom pheh shwih e lha taiq zis gas, 67Nvng Khristu nghuot jyoeng lhyi ka ngamoq lyis taiq aq, ge. Yesu nyamoq lyis taiq zis gas,
Ngos taiq lyis eq namoq jingh das zis ma nghuot. 68Ngos nyeidang lyis eq namoq ma phuk taiq, ngos lyis kat kat das zis ma nghuot. 69Gvshih masyah cangsoeu Lo gas Mangso Yomsoq dah loqyos shot pheh tsung das, ge.
70Nyamoq dvnganhmoq gas, Housoeh lyis nvng Mangso dah Lo nyang nghuot lhyeh, ge tsain nyei.
Nyang gas, Ngos hauh soeu nghuot ge namoq taiq nyeis, ge.
71Housoeh hauh bang taiq zis gas, Yang gohtoeu chah kanghjyoeng chah shih lah? Yvnyang nyah nhuot masyah xauhgyo goeus, ge.
Currently Selected:
LUKA 22: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.
