YONA 1
1
Yona Yhensain domsyos Ma gyo
1Amitai dah lo Yona jyank mas Yhensain dah dang jweh los zis gas,#2Hw 14.25 2Yona! Ninewe wusmuh pheh loh aq. Nyamoq lyis nhaiqlom thaiq los das cho loh taiq kyingh aq. Khasoeh ge lyis nyamoq dah yaunos lyis ngos nyvng. 3Nghuot laus eq Yona gas Yhensain xikkhonh masyah Tarshi wus pheh phang das ge toq loh. Housoeh nyang gas Yopa wus mas gyoh e lha Tarshi pheh goeu loh das sangpho nyvng lyis nyang sangpho khoq kat las, Yhensain xikkhonh masyah phang lha, nyamoq yah dvgeh Tarshi pheh loh das xiklyis sangpho khau mha wvng loh.
Thomh mas Lyeismuh Jyang
4 Yhensain ka hau thomh mas lyeismuh jyang nhang kat. Thomh mas lyeismuh jyang los las sangpho gyop bah ge. 5Sangpho muh zwi bang gas gyuk los las, yuk khanghmuh vsainnyang mangso lhyi tsain kaiq lui. Sangpho siq das xiklyis, houmha bos dah kyahsoe jeis mas tsain tyungh khyoq. Hauh uhlyis Yona gas sangpho vlhunk khau mha gyoh e lha, sop nyang yhet joq.
6Housoeh las sangpho vgyis nyah jyank mas los las, Nvng khasoeh yoh yhet muih joq? Toq aq, nah mangso lhyi dung aq. Yah kang luiq das zis nah mangso yang lyis toq soh mvbeh, ge.
7Tsai, sangpho muh zwi bang gas, Haih shanghsenh cho hank yobos gvng mas nghuot zis yang yoh seq shoq, nyang changh nyang doeugoh yoeuh goh, ge nyamoq tsain doeugoh yoeuh lyis Yona lyis vvng loh. 8Housoeh las nyamoq gas, Hank gvng mas yang haih chiqjyen xauh zis taiq kyoh aq: nah muh cha nghuot? Nvng khapheh yah los? Nvng khamau mas zis nghuot? Nvng chah vnyau nghuot, ge nyang lyis nyei.
9Nyang nyamoq lyis taiq zis gas, Ngos Hebre dius nghuot. Thomh yahge tungyos lyis gvnkhanh toh, maukhung mha dah Yhensain Mangso lhyi paiq soeu nghuot, ge. 10Hauh uhlyis dius jens svsoh gyuk las, Nvng chamus heisoeh kuot, tsain ge: khasoeh ge lyis nyang taiq kyoh yvmvyah nyang gas Yhensain xikkhonh masyah phang soeu nghuot zis dius jens seq. 11Thomh mas lyeismuh jyang yahge jeisphauq zes than los nyeis las, nyamoq gas nyang lyis, Ngamoq xiklyis thomh tam das nyhenshang ngamoq nvng lyis khasoeh kuot das, ge nyei.
12Nyang nyamoq lyis taiq zis gas, Ngos lyis thomh mas doeuh khyoq geh, housoeh lyis namoq xiklyis thomh tam das, haih lyeismuh jyang ka ngah gvng mas namoq lyis zangh zis ngos seq, ge.
13Nghuot laus eq sangpho muh zwi bang gas jyankyvm mas yoh dap shoq yomkat tsain zes laus eq thomh gas lyeis jyang zes than los las ma yoh bweh. 14Housoeh las nyamoq Yhensain lhyi kaiq sang zis gas, Yhensain eh, haih soeu dah kang gvng mas ngamoq ma somh loh bas jungh, tswi ma bos dah suih huot yobos ngamoq lyis vjenh dap nhang; Yhensain eh, nvng gas nvng nhaiqtap khyvlyis kuot goeus, ge. 15Housoeh nyamoq Yona lyis thomh mas doeuh khyoq lyis thomh mas changhphauq eq tam tyamp. 16Housoeh yvmvyah dius jens gas Yhensain lhyi svsoh gyuk las Yhensain lhyi jyungshuk phudyei zis yah tsain nyhen toh.
17Housoeh Yhensain ka Yona lyis nyhau das xiklyis oengmuh dvdoeu lyis toeuq toh zis yah dvyhangteh Yona gas hauh oengmuh womdau mas somh nyeih somh nyens lungh joq.#Mat 12.40
Currently Selected:
YONA 1: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.
