VPOM 8
8
Dvjeis Lhyi Vthang
1Nghuot laus eq Mangso ka Noa yahge nyang yah dvgeh sangpho khau mha dah yewus yahge gaunyhauq dvnganh lyis soh las nyeisjvng thoq mas lyeis muot los nhang lha jeis kanh loh. 2Noq dah jeisthuq dwang lungh yahge maukhung Jeis Khomh eq tsain nyheih lyis mau wus zis eq nghan goeus. 3Jeis gas nyeisjvng thoq masyah dvtsiq dvtsiq yoms loh las, dvxo oengci nyeih lyis gas kanh goeus. 4Lhamhmuh nyhet vkhyvp, dvci nyhet vnyeih lyis sangpho ka Ararat boms mas loh no joq. 5Jeis eq lhamhmuh dvci vkhyvp jweh shoq mvno kanh loh las, hauh vkhyvp canh dvnyeih lyis boms thyoh tsain nyvng zoh loh.
6Hou mhayah nyeici nyeih thang lhyi Noa gas nyang kuot dah sangpho khomhbaiq lyis phank las, 7kvnhoq dvdoeu nhang kat lyis, houka nyeisjvng thoq mas jeis kanh shoq e los dang nyeis. 8Nyeisjvng mas jeis kanh ma kanh seq das xiklyis nyang gas khotjyauh dvdoeu lyis doms nhang kat. 9Nyeisjvng gonh jeis dwings joq shih las, khotjyauh gas nyah khyei nang das nogus ma nyvng yvmvyah Noa nyeis dah sangpho mha doms los. Noa eq nyah loq yhonh kat las khotjyauh lyis yoeus lho lha sangpho khau, nyah joqyos mas doms kat. 10Hou mhayah nyang nyhet nyeih jweh shoq langh thang lhyi, khotjyauh lyis sangpho mhayah doms nhang kat. 11Hauh khotjyauh gas nyenhthang lhyi nyah nhuot mas tsanlun huq jen chweh dvng las Noa jyank mas doms los. Housoeh las nyeisjvng mas jeis kanh loh goeus zis nyang seq. 12Nghuot laus eq nyhet nyeih doms langh shih lho lha hauh khotjyauh lyis doms nhang kat lyis, hauh khotjyauh gas nyah jyank mas ma tauh los lo.
13Noa khyukxo das vzvn, cangxeih vkhyvp canh dvnyeih lyis nyeisjvng thoq mas jeis kanh goeus las Noa gas sangpho nghop phank las yoeuh lyis nyeisjvng kyuk loh nyeis yvlyis nyvng. 14Lhamhmuh nyhet vkhyvp aiqci nyhet vnyeih lyis nyeisjvng vlhomuh kyuk goeus.
15Hauh thang lhyi Mangso Noa lyis taiq zis gas, 16Nvng yahge nah yhensain nyhiq, nah lo jens yahge nah doeusmuh jens sangpho mhayah thuq loh geh. 17Nvng yahge soq bos las dwis ya dwis zis - nghoq, gaunyhauq, nyeisjvng thoq mas du shweh zis dvnganh gas nyeisjvng thoq mas nyamoq nyoshoq jebais los bas jungh, shwih thuq loh aq, ge. 18Housoeh las Noa yahge nyah lo jens, nyah yhensain nyhiq yahge nyah doeusmuh jens eq thuq loh. 19Nyeisjvng thoq mas dwis loh dah yewus, gaunyhauq, gaudu, nghoq dvnganh yah nyang ja nyang sangpho mhayah tsain thuq loh.
Noa Phudyei
20Noa gas Yhensain xiklyis phon ci lha, shangkyei dah gaunyhauq yahge shangkyei dah nghoq vja ja masyah tsain yoeus las hauh phon thoq mas lomhxangh lainh ngheq phudyei. 21Yhensain eq hauh xangh shom nam yoeus las Yhensain nyah ehnyet mas taiq zis gas, Dius gvng mas ngos nyeisjvng lyis khanhamp eq ma nhoengh lo das. Khasoeh ge lyis dius nhaiqlom gas loshang yoq lyis yah ma gis zis bos. Kang dwis zis dvnganh yvlyis ngos mhont khoq yhangteh thang pheh khanhamp eq ma kuot lo das. 22Nyeisjvng joq dvchank, jyo khyoq yoq, jyo yhomh yoq, ngamh zis gywes zis, cungh zvn, nyeih nyenh khanhamp eq ma thank lo das, ge.
Currently Selected:
VPOM 8: NCB
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.