AMO 8
8
Shih Dvkyank Nyoqnyvng
1Ngos Yomzains Yhensain jyank masyah gohtoeu nyoqnyvng dvkoeuq yoh. Hauh yvmas ngos shih dvkyank nyvng. 2Yhensain ka Amo eh, nvng cha nyvng, ge nyei.
Ngos gas, Shih dvkyank nyvng, oen toeuh.
Yhensain ngos lyis taiq, Ngah dius jens Israel xiklyis vthang jweh goeus, nyamoq lyis joeng das cho mha ngah ehnyet ma doms thaiq lo das.#8.2 Shih yahge Vthang ge zis doeusgoh 3Hauh buisnyeis lyis hwankti yhen mha dah chunghthwe ka kuk ngaus thwe bweh das. Dvkhau yah shei mvng tsain joq das. Nyamoq gas tsoeklo tsain doeuh tyamp das, ge.
Israel dah jom cho
4Nyungs bang lyis nang gyik las, hauh mau mas dah shohjyen bang lyis tungh mhont bang namoq eh, haih zis gyo geh. 5Namoq nyang taiq zo zis gas, ngamoq dah jyo yoh ungh das zis gyingshang nyeih lai shoq ma thoq langh nyeis lo. Ngamoq yoh doms ungh das zis No nyeih khanhamp thank das au? Housoeh ngamoq ma jus dah pan, jvng yhung lha ngamoq dah wis bang lyis mhuih zis yah phauh toqh ungh das. 6Ngamoq ma phauh dah sunghso lhyi phauh changh changh yah yoh ungh. Jyen ma yoh cap dah shohjyen soeu dvyuk yuk xo nyvng lyis nyang lyis thyvkoq dvzomh phauh yangh ma bos jons khyvlyis wis das.
7 Yhensain, Israel dah Mangso ka nyamoq dah ma gis zis kuot cho lhyi khanhamp eq ma tohnyhik das ge maukhi toh goeus. 8Housoeh nyeisjvng dwis das, hauh mau mas nyeis bang yuk khanghmuh shanghsenh das. Dvmau gonh nonh das. Houka Nile lvng teh toq los las gyoh das. 9Ngos nyeih gungs lyis buis wvng nhang lhyi, nyeih lyis nyeisjvng gas chuot das shishenh jweh los nyeis. Ngos Yomzains Yhensain taiq goeus. 10Ngos namoq dah pyo pwe lyis shei pwe, namoq dah gaus dah chunghthwe lhyi kuk dah ngaus thwe pheh lhaiq kat das. Ngos namoq lyis uhyuk nhang lha yanghthung dyimis wuot nhang das. Housoeh namoq gas loloeu loteh xiklyis nyah nyhiphoq kuk teh kuk nhang das. Buis wvng shoq hauh buisnyeis gas ma gis mus das.
11Ngos hauh mau mas phanghkhauq nhang lhyi dius jens yuot shet das. Nghuot laus eq zos yuot jeis shet phanghkhauq ma nghuot, Yhensain jyank masyah dah loeus, yuot shet das shishenh jweh los nyeis. Ngos Yomzains Yhensain taiq goeus. 12Dius jens gas Coh Thomh masyah Mediteranean thomh jweh shoq, mautsung mhayah buisthuq pheh jweh shoq suh whang yenh. Nyamoq gas Yhensain jyank masyah loeus dvkhauyah xo laus eq hauh yvlyis ma xo nyvng das. 13Hauh buisnyeis lyis yombos loloeu jens yahge lonyi jens yangh shet las lains das. 14Samari phvra jens lyis lui zis yah maukhi bang, Dan dah mangso nyings yah, Besheba dah mangso nyings yah, ge bang lains las ma doms toq lo das, ge.
Currently Selected:
AMO 8: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.
