AMO 2
2
Moab
1 Yhensain taiq, Moab dius jens gas yaunos doms kuot doms kuot, haih gvng mas ngos nyamoq lyis jyoengh joeng das. Nyamoq gas Edom hwankti dah shohyau lyis shvhwih phuot zis yah ma phauh ma nyang kuot.#Esa 15.1—16.14, 25.10-12; Yer 48.1-47; Ezk 25.8-11; Zep 2.8-11 2Ngos Moab mau mas nyi khyoq las Keriot dah thoenkgus jesdvp ngheq kat das. Moab dius jens gas jeszan yvmas jeslo jens kaiq hoeu lha lvbuh muot uhlyis shei das. 3Ngos Moab dah guon soeu yahge hauh mau mas dah uhshe bang dvnganh lyis sat das.
Yuda
4 Yhensain taiq, Yuda dius jens gas yaunos doms kuot doms kuot, haih gvng mas ngos nyamoq lyis jyoengh joeng das. Nyamoq gas ngos jyauh cho lhyi dius ngis khyoq las ngos tyingtoh dang lyis ma chank. Nyamoq lyis nyamoq phauh thyeih moq phuqsoe dah, hau dvyhangteh ma jus mangso yah shwih whang loh. 5Housoeh las ngos Yuda thoq mas nyi khyoq las Yerusalem dah thoenkgus jesdvp lyis ngheq kat das.
Mangso Israel lyis Soetuon
6 Yhensain taiq, Israel dius jens gas yaunos doms kuot doms kuot, haih gvng mas ngos nyamoq lyis jyoengh joeng das. Nyamoq gas jyen ma yoh cap dah topkoq bang yahge thyvkoq dvzomh phauh yangh ma yoh dyei dah shohjyen bang lyis jons ungh kat. 7Nyamoq gas yomnhuk las pangh soeu ma bos bang lyis nang nheh las nyungs bang lyis duon tyamp. Vbusbih dvyuk yahge nyah uwus gas hau dvyhangteh dah jons vmesbih yah yhet goh las ngah gyingshang nyings lyis lhoq lhoeuh. 8Nyungs bang tank toh las yoeus toh dah dyimis lyis dius jens paiq joqyos khanghmuh mas tsain nyhoeuh yhet. Nyamoq ngwis jyen shauh bang jyank masyah yoeus dah zvbiq lyis nyamoq Mangso dah yhenmuh mas tsain shuk.
9Nghuot laus eq ngah dius jens eh, ngos namoq nyhenshang arit zains teh nyhang lha wons zains teh kank bos dah Amori dius lyis saiq nyet doeu tyamp teh shank shoq mhont tyamp. #Lyi 3.8-11 10Ngos namoq lyis Egutu masyah shwih thuq las, sihyos chank nyeici zvn top shwih los las Amori mau gas namoq nyang zis nghuot khyvlyis dyei toh. 11Ngos namoq dah loloeu dvyhamh lyis lvpe jens, Namoq dah loyvm jens dvyhamh lyis Naziri dius kuot das zis khyen yoeus. Israel dius jens eh, haih cho ma jus lhyeh? Ngos Yhensain taiq goeus.#Gyu 6.1-8 12Nghuot laus eq namoq gas Naziri jens lyis zvbiq shuk nhang lha, lvpe jens lyis, ngah loeus vtaiq goh ge tsain tung. 13Gvshih ngos namoq lyis tsoh mas thungh thyi das las namoq gas jyo thuq dah lhyingh teh noskyingh das. 14Wuih lyis nyap soeu yangh phang ma luiq, yombos soeu nyah yom dyuk loh das; jeslo jens nyamoq nyang kang lhyi ma yoh khyuot yoeus das. 15Lyei baiq bang ma yoh thoenk yap, wuih nyap bang ma luiq, nyang ji bang nyamoq nyang kang phang ma luiq das. 16Hauh buisnyeis lyis womh thank jeslo jens yangh nyamoq dah kyonhkhyi tyamp las cangh das. Yhensain taiq goeus.
Currently Selected:
AMO 2: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.