1 SAMUEL 4
4
Thanghchvp Kwi Jons Loh
1Hauh yoq lyis Philisti jens Israel jens lyis zan das xiklyis tsain huom toh. Gvshih Israel jens gas Philisti jens lyis zan das xiklyis loh las Ebeneza nvm mas thoeng toh. Philisti jens eq Aphek wus mas dvp thoeng toh. 2Philisti jens gas Israel jens lyis jeszan las zan changh lyis nyamoq Israel jens lyis ung lha nyei khyoengh ko jeszan pa mha sat. 3Jes luiq los bang nyamoq thoenggus mas jweh los lyis, Israel uhshe bang taiq zis gas, Khvnyhik Yhensain yang lyis Philisti xikkhonh mas chamus somh nhang lah? Yhensain dah Thanghchvp Kwi los las jeswus yomsoq masyah yang lyis khyuot yoeus bas jungh, Shilo wus masyah loh yoeus goh, ge. 4Housoeh dius jens gas Shilo mas dius nhang lha Kherubim#4.4 Dang khonh jens mas yoeuh aq. jo mas nyeis, Yomzains Yhensain dah Thanghchvp Kwi lhyi yoeus los. Yhensain dah Thanghchvp Kwi yah dvgeh Eli dah lotang Hopni yahge Phineha bos los.#Dyu 25.22
5Thanghchvp Kwi thoenggus mas jweh los lyis Israel jens yomkat kaiq las maulop nyeisloeh loh. 6Housoeh kaiq hoeu thwe Philisti jens xauhgyo lyis, nyamoq taiq zis gas, Hebre jens dah thoenggus mas hou iq kaiq zis gas chah vjyuk nghuot lah, ge. Housoeh nyamoq gas Yhensain dah Thanghchvp Kwi hauh thoenggus mas jweh los zis seq. 7Philisti jens gyuk las taiq zis gas, mangso ka thoenggus mas jweh los, ge. Nyamoq taiq zis gas, Yang mvtanhzoe nghuot goeus. Khanhamp eq heisoeh ma bweh ku. 8Yang mvtanhzoe nghuot goeus, yang lyis yomzains mangso jens dah loq masyah hank khyuot yoeus das? Mhanhdyvp mas Egutu bang lyis yomh dvnganh yah sat dah Mangso ka haih zis nghuot goeus. 9Womh ge Philisti jens eh, Hebre jens namoq jyank mas jonsdoeus ku teh yang nyamoq jyank mas jons ma doeus bas jungh yom hont zis yah yukgis teh kuot geh. Yukgis jens teh zan geh, ge.
10Housoeh Philisti jens jeszan xungh las Israel somh. Nyamoq nyang yuk nyang toeu zvng pheh tsain phang. Jeszan khyom zainsmuh bweh las somh mons shei. 11Mangso dah kwi eq jeswus loq mas jweh las, Eli dah lotang Hopni yahge Phineha eq gyoh tyamp.
Eli Shei
12Benyamin dius dvyuk jesphung mhayah wuih las, nyah dyi langchuiq, uhloms mas tsoh lhyauq zis yah hauh nyeih lyis nyang Shilo wus mas jweh loh. 13Nyang jweh loh lyis yoeuh aq, Eli gas choyvm, tank mas langh tsung toh. Khasoeh ge lyis nyang gas Mangso dah kwi lhyi chiq nyeis. Wuih los soeu ka wus vkhau mha jweh las loeus hoeuh yvmvyah yuk khanghmuh gyuk zis yah tsain kaiq nyeis. 14Housoeh kaiq hoeu thwe lhyi Eli xauhgyo lyis nyang taiq zis gas, Hou iq hoeu dah thwe ka cha nghuot lah, ge. Hauh soeu eq Eli lyis lvnyap los taiq. 15Gvshih Eli gas gauci xet zvn bos goeus las ma nyvng lo shoq nyoq gos goeus. 16Hauh soeu Eli lyis taiq zis gas, Ngos gas jeszan masyah los soeu nghuot, ngos khvnyhik hou mhayah phang los, ge.
Eli hauh soeu lhyi nyei zis gas, ngah lo eh, chamus goeus lah, ge.
17Loeuskyoh soeu phuk taiq zis gas, Israel jens gas jes somh goeus. Monssoe dah Israel jesphung ka jeszan mas shei goeus. Nah lotang Hopni yahge Phineha eq shei goeus, Mangso dah kwi eq gyoms goeus, ge.
18Mangso dah kwi cho xauhgyo lyis, Eli gas khomh nvm mas nyang tsung tank masyah nungs pheh lains zis yah lainzain jingh las shei. Khasoeh ge lyis nyang gas nyenhkyi bos goeus, gungs eq thyenh soeu nghuot. Nyang gas Israel jens lyis nyeici zvn uhshe khoq goeus.
Phineha dah Chauhmuh Shei
19Nyah doeusmuh nghuot dah Phineha yhensain nyhiq gas ung mha loshang chi zis buisnyeis dyingh goeus. Yhensain dah Thanghchvp Kwi jeswus loq mas jweh cho, nyah nyimuh yahge yhensain phoq shei cho xauhgyo lyis nyang lokhoeu nos nos los las lo khoeu. 20Nyang shei loh nyeis lyis nyah nvm mas yap joq dah vmesbih jens nyang lyis taiq zis gas, Vgyuk, nvng yukgis lo khoeu goeus, ge. Nghuot laus eq nyang ma toeuh lo, chah soe eq ma bos lo. 21Nyang hauh loshang lhyi Ikhabod#4.21 Ikhabod ge dah nyings gas, Hebre mas, phunk ma bos ge vjyuk nghuot. ge nyhink: khasoeh ge lyis Mangso dah Thanghchvp Kwi jeswus loq mas jweh loh las eq, nyimuh yahge yhensain phoq gvng mas eq Mangso dah phunk nyoqnho Israel dius jens jyank masyah dyuk loh goeus. 22Nyang taiq, Mangso dah Thanghchvp Kwi yoeus loh yvmvyah Mangso phunk gas Israel jyank masyah bi loh goeus, ge.
Currently Selected:
1 SAMUEL 4: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.
