1 HWANKTI 19
19
Eliya Sina Boms mas
1Ahab gas Eliya kuot cho dvnganh, Bala dah lvpe jens dvnganh lyis sham yah khasoeh sat cho Yezebel lyis taiq kyoh. 2Yezebel gas Eliya jyank mas loeuskyoh soeu nhang lha taiq zis gas, Nvpyo gvshih shvhoeu lhyi ngos nah kang lhyi lvpe jens dah kang lhyi teh ma kuot lyis gas mangso jens ngos lyis hauh thoq lyis kuot bas jungh, ge. 3Eliya hauh zis seq lyis, nyah kang xiklyis Yuda mau, Besheba wus pheh nyah jyeidwis yah dvgeh loh. 4Nyang gas mhanhdyvp gyung dvnyeih loh las ratam zains#19.4 Ngochang nyingh top ma seq las Ratam ge dah Hebre nyingh kat toh khyei mha jweh las tsung toh. Housoeh nyang shei bas jungh ge shvmanh dung zis gas, Geh goeus Yhensain eh, gvshih ngah kang lhyi yoeus tyamp dyei lo aq, ngos ngah phauh thyeih moq thoq lyis gis soeu ma nghuot, ge.#Yon 4.3
5Housoeh nyang ratam zains khyei mha lains yhet lyis, loeuswons dvyuk nyang lyis nyetlos nyettant los tanh las taiq zis gas, Toq las zo aq, ge. 6Nyang yoeuh kat lyis, nyah uhloms yvm mas nyi mas kank dah ohlhyoq yahge jeis dvthuk joq. Nyang hauh zis zo shuk las doms yhet. 7Yhensain dah loeuswons aiq vlhain nyang lyis los tanh las taiq zis gas, Nah xiklyis gyung gas svsoh xing yvmvyah, toq las zo aq, ge. 8Housoeh las nyang toq zo shuk. Nyang hauh wom dah yom yah Mangso dah boms ge, Horeb boms jweh shoq nyeici nyeih nyeici nyens loh. 9Nyang lukkhyung dvkoeuq mas nyenh lyis wvng yhet.
Yhensain ka nyang lyis nyetlos nyettant taiq, Eliya, nvng heimha cha kuot nyeis, ge.
10Nyang toeuh zis gas, Ngos gas Maukhung Jesphung Yhensain Mangso shot pheh nhaiq kank wvng. Khasoeh ge lyis Israel jens gas nah thanghchvp lyis tyamp, nah phon jens lyis thyoq tyamp, nah lvpe jens lyis eq moengsa yah sat. Ngos kyingh dvnyet lo. Gvshih nyamoq ngos lyis sat das ge xo nyeis, ge.#Rom 11.3
11 Yhensain nyang lyis taiq zis gas, Thuq las ngah xikkhonh boms thoq mas yap joq aq, ge. Lholhyi Yhensain lai loh las svsoh than dah lyeis gas boms chink, luk lyis khwih loh laus eq Yhensain ka hauh lyeis mas ma bos. Lyeis dah thang lhyi maunyeis dwis los, nghuot laus eq Yhensain ka hau maunyeis dwis yvmas ma bos. 12Maunyeis dwis thang lhyi nyi los, nghuot laus eq Yhensain ka houmha ma bos, nyi dah thang mha sam sam ge dah thwe los.
13Hauh yvlyis Eliya xauhgyo lyis nyah nyoqnho lhyi mis#19.13 cloak ge, lainzain mas twih las kvtoq masyah lhangh toh dah dyiloq ma dap dah thoq dyi yah nghop las luk-uk khomh mas thuq yap joq. Hauh uhlyis nyah jyank mas thwe dvkoeuq nyetlos nyettant taiq los zis gas, Eliya eh, Nvng heimha cha kuot nyeis, ge.
14Nyang toeuh zis gas, Ngos gas Maukhung Jesphung Yhensain Mangso shot pheh nhaiq kank wvng. Nghuot laus eq Israel jens gas nah thanghchvp lyis tyamp, nah phon jens lyis thyoq, nah lvpe jens lyis moengsa yah sat las ngos kyingh dvnyet lo. Nyamoq gas ngos lyis sat das ge tsain xo nyeis, ge.
15 Yhensain nyang lyis taiq zis gas, Nvng los yvchank tauh loh aq. Damasku mhanhdyvp jweh lyis wus vkhau mha wvng las Hazael lyis Siria hwankti khyvlyis coeu huot dyei aq.#2Hw 8.7-13 16Nimshi lo Yehu lyis eq Israel hwankti khyvlyis coeu huot dyei aq. Nah joqyos mas lvpe duot das xiklyis Abel Mehola wus mas Shaphat lo Elisha lyis coeu juot dyei aq, ge.#2Hw 9.1-6 17Housoeh Hazael dah sham yah luiq soeu lhyi Yehu sat das. Yehu dah sham yah luiq soeu lhyi Elisha sat das. 18Nghuot laus eq Bala lyis ma paiq, nyah gungslho lhyi bvlot ma tanh dah Israel dius nyhet khyoengh lyis ngos toh toh das, ge.#Rom 11.4
Elisha lyis Lui
19Eliya hou mhayah loh lyis noeu dvphung yah yosphuk nyeis dah Elisha lyis loh nyvng; dvci aiq kya yah yos phuk nyeis yvmas Elisha gas thang thank vkya yah phuk nyeis. Eliya gas nyah mis khyuot las Elisha lyis doeuh kih dyei. 20Housoeh nyang gas noeu lyis toh khoq las Eliya thang mha chank wuih las taiq zis gas, Ngah ungwes uwus lyis loh jeshuh khoq nhang aq. Hauh thang lhyi ngos nah thang mha chank das, ge.
Eliya toeuh zis gas, Gis goeus. Loh aq, ngos nvng lyis ma tomp, ge.
21Elisha eq nyah jyank masyah yosphuk changh jens jyank loh las nyah noeu dvkya sat, yos phuk kyahsoe lhyi thangh kuot las jyauq lho lha dius jens lyis tsoh lyis nyamoq zo. Hauh thang lhyi nyang toq las Eliya thang mha chank las nyang lyis phuqsoe.
Currently Selected:
1 HWANKTI 19: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.