Matyo 9

Jesu nen wo ne ndula taal ɓudu uy

Mrk 2.1-12; Luk 5.17-26

1Gɨna Jesu ɗɔl tɨ kwa̰r ɗəng hul la ər ɗen larɨm ɓɔ, ər si tɨ Kaparnom ne toni ər ti tɨ nin, 2gɨna a hina na wo ne ər ndula taal ɓudu uy ne ley tɨ kwal hul. Gorne Jesu ləg a hul kula gɨna, ər ja gɨ wo ne ndula taal ɓudu uy ɓə: «Par əm hul ka sɨgra ən ɓa̰! Ən hul ɗina tɨ əm ɓijim sul!» 3Gɨna, bi tɨ gṵ hul ɓla taper ɗolɔ tɨ ilgɨ tɨ a nirimu ɓə: «Ɓər ne ɓurum Ndɨla!» 4Jesu una a ilgɨ la ər ja gɨ a: «Kəyjaa yḭ na ilgɨ ɓijim kuna ne tɨ i nirimu a? 5Kəy jaa jo tɨ ndog nari tɨ ja: “Ən hul ɗina ən tɨ əm ɓijim sul” ɓee “O̰ ndal əm si a?” 6Ən taam ɓə ka yḭ una ɓari ɓə: tɨ nəgri sul le, Yin, Wo Ɓa̰#9.6 Wo Ɓa̰tɨ taan ne Jesu may bay tuna ər ndula ya̰m kəw sul. ən na dwari tɨ hul ɗina tɨ bi ɓijim sul.» La ər ja gɨ wo ndula taal ɓudu uy ɓə: «O̰ ndal, əm so əm kwal la əm si tɨ əm gə̰y!» 7Ɓər o̰ ndal la ər si tɨ ər gə̰y. 8Gorne bi ləg wa̰y ne gɨna, ayri ka a. A teen Ndɨla ne naa gɨ biɓari dwari ɗəng kuna ne.

Jesu soon Matyo

9La, Jesu nɨm un ne. Gorne ər wo tɨ saal gɨna, ər ləg ɓər paa ndil ɓə Matyo ti tɨ un tɨ lambo tay la ər ja gɨ ər ɓə: «Hina tɨ ən lɔ!» Matyo o̰ ndal la ər si tɨ ər lɔ. 10Ɗa̰y paa, Jesu ti tɨ wa̰y tudi mu na ər bi tɨ wa̰y edɨ tɨ Matyo gə̰y na bi tɨ lambo tay dɨbla la bi tɨ ɓijim kar la. 11Gorne Parisyḛ-a ləg wa̰y ne gɨna, a ja gɨ ər bi tɨ wa̰y edɨ ɓə: «Kəyjaa jo i wo tɨ gɨ i wa̰y ɓla twi wa̰y na bi tɨ lambo tay a na bi tɨ ɓijim kar la a?» 12Jesu laa a jaa ne la ər ja gɨ a: «Bi ndula nga̰ jo a taam doktor lo, lɛ tɨ bi tɨ mo̰y jo a taam ər. 13I si i edɨ jaa ne a kya̰ tɨ maktub hul ɓə: “Ən taam ɓə i ka hul bor na peer jo, lɛ ən taam i mum tɨ hima ɓina lo bad.” Kəysul ən hina bi tugla soon lo lɛ ən hina bi tɨ ɓijim kar jo jaa.»

Jesu la tɨm na ndu yungni la

Mrk 2.18-20; Luk 5.33-39

14Gɨna, Ja̰ Batis na bi hina tɨ Jesu ndɔ la a ɓiri ər jaa kuna ne: «Kəyjaa yini la Parisyḛ-a la, i ti na ndu yungni lɛ əm bi ti na ndu yuni lo a?» 15Jesu duga gɨ a: «Bi ne a hom a tɨ ɓaar ɓə a ndɔ wa̰y tudi kway gorne wo tɨ ii wo tɨ daan a? Lula sul ɓə hina gorne a ɓə wo tɨ ii jul tɨ a daan gɨna, tɨ ɗa̰y ne jo a ɓə tɨm na ndu yuni.»

16«Wo ɓə sər ɓani sula na ngɔmi hiin koblo ɗɨb lo. Kəysul sər ɓani ɓə komni la, ngɔmi hiin ɓə dḛr la, ta hura ɓə təng ɗəng nari la. 17Wo ɓə ham ɓeri bɛ tɨ ɓɔl hiin hul lo kəysul ɓɔl ɓə umni. Ham la ɓɔl la gun ɓə kud. Ndini ham ɓeri bɛ tɨ ɓɔl ɓaani jo hul. Jo tɨ in lo gɨna, ham la ɓɔl la tɨ ndidi gun ɓə kud.»

Jesu nen Juyb-a wa̰ay ɓa̰ ii la ii ne do ər sər mu la

Mrk 5.21-43; Luk 8.40-56

18Gorne Jesu wo ja jaa ɗang gɨna, Juyb-a na wa̰ay paa hina tɨ ər ndɔ. Ər tɨba tɨ ər kwi la ər ja gɨ ər: «Ən ɓa̰ ii uy ndogle, əm hina əm kay əm daa tɨ ər sul ka ər jaar.»

19Jesu o̰ si tɨ ər lɔ na ər bi tɨ wa̰y edɨ. 20Ii ɓudu ne hima yey tɨ ər ndula na an dɔkɔmɛ kar sap hina tɨ Jesu ɓəgri ər do ər ngɔmi mu. 21Kəysul ər ilgɨ tɨ ər hul ɓə: «Jo ən do ər ngɔmi mu ngoy gɨna, ən ɓə nina tina.» 22Jesu yiga ji ləg ər la ər ja gɨ ər: «Ən ɓa̰ ii, par əm hul ka sɨgra! Kəysul əm hul kula nen əm.» Tɨ daamu ɗay ii nen. 23Gorne Jesu an tɨ wa̰ay gə̰y, ər ləg bi tɨ hu koni la bi namkla na wa̰y tɨ kar gɨna ər ja gɨ a ɓə: 24«I par i ndɔ teni kəysul, ɓa̰ ii uy lo, lɛ ər ley lom.» Lɛ ya̰ a ka ər siri. 25Gorne a kun bi tɨ bayri gɨna, Jesu wur tɨ li hul. Ər par ɓa̰ ii daa la ər o̰ tɨ ndal. 26Bi laa jaa ne tɨ lɔr nəgri ne sul gun.

Jesu nen bi ji nina tɨ ndidi

27Gorne Jesu so ul tɨ saal gɨna, bi ji nina tɨ ndidi kun ər lɔ na ngɔr tɨ a mu: «Ləg i jindemni, Dabid na ɓa̰ ka!»

28Gorne Jesu an tɨ ər gə̰y gɨna, bi ji nina ne hina tɨ ər ndɔ la ər ɓiri a: «Yḭ ko hul ɓə yin lɛm wa̰y ne i ɓiri ən kar bla a?» A duga gɨ ər: «M, Baali.» 29Jesu nay daa do a ji la ər ja ɓə: «Ka Ndɨla naa gɨ i wa̰y ne i taam na i hul kula!» 30A ji ləg un. Jesu ja gɨ a jaa na gṵ sɨgra kuna ne: «Yḭ laa ɓari, i ka gɨ wo ɓudu jaa ne lɔ jul lo.» 31Lɛ a si a ja jaa tuna Jesu sul tɨ lɔr nəgri ne gun.

Jesu nen wo ɗugri

32Gorne a wag tɨ saal, a hina na wo ɗugri ne jinsə ɓəw ər mu. 33Tɨ daamu gorne Jesu kun jinsə ɓag gɨna, wo ɗugri ɗolɔ tɨ ja jaa. Ɓɔr bi dɨbla ji nari la a ja ɓə: «Yini ləg wa̰y kuna ne ɗa̰y ɓudu tɨ Israhel lo!» 34Lɛ Parisyḛ-a ja ɓə: «Tɨ jinsə na wa̰ay jo naa gɨ ər dwari tɨ jinsə-a kun.»

35Jesu si tɨ lwərgɨ nii gun la lwərgɨ ɓḭ gun la, ər ɓla gɨ bi mum dɨbla tɨ Juyb-a na ləgɨ tɨ peer tay. Ər ɗo gɨ a beel tɨ Jaa Ndinimani ɓani tuna Ndɨla waan sul. Ər nen bi tɨ mo̰y gun la ər jul pɛw gun tɨ bi sul la. 36Gorne Jesu ləg bi ne gɨna, ər ləg a jindemni, kəysul a angal teni la a dwari teni la kuna həm kuur ne wo tɨ a ɓaw teni. 37Gɨna Jesu ja gɨ ər bi tɨ wa̰y edɨ ɓə: «Cida tɨ ya ɓina tɨ ɗəng, lɛ bi tɨ cida kar gaw. 38I ɓiri Baali wo tɨ ya ka ər toon na bi tɨ ya ɓina.»

Currently Selected:

Matyo 9: nie

Highlight

Copy