Matyo 10

Jesu ton ər bi tɨ wa̰y edɨ dɔkɔmɛ kar sap

Mrk 3.16-19; Luk 6.14-16

1Jesu soon ər bi tɨ wa̰y edɨ dɔkɔmɛ kar sap tɨ ər ndɔ la ər naa gɨ a dwari tɨ jinsə sul tɨ a kun. Ər naa gɨ a ul mu tɨ bi tɨ mo̰y gun nina la, bi kɔgri gun nina la. 2Bi tɨ wa̰y edɨ#10.2 Bi tɨ wa̰y edɨ dɔkɔmɛ kar sap ne Jesu bɛ a tɨ ər lɔ kuna ər bi tɨ tomni, ər edɨ gɨ mum ne tuna Ndɨla waan sul. dɔkɔmɛ kar sap na ndil jo le: Ne toni mani tɨ Simo̰ ne a soon ər Piyɛr a na ər ɓun tɨ A̰dre la, Jak a na ər ɓun tɨ Ja̰, Jebede na ɓimi la, 3Pilip la Bartelemi la, Tomas la Matyo wo tɨ lambo tay la, Jak, yḭr tɨ Alpe na ɓa̰ la, Tade la, 4Simo̰, wo ne moon lɔr jaa la, Judas Iskariot, wo tɨ Jesu sul sula.

Jesu toon ər bi wa̰y edɨ

Mrk 6.7-13; Luk 9.1-6

5Jesu ton ər bi tɨ wa̰y edɨ dɔkɔmɛ kar sap la ər peer a kuna paa ne: «Yḭ ka i ɗa̰y kay tɨ bi ton tɨ Juyb kalɔ maan lo la, yḭ ka wur tɨ lwərgɨ nii tɨ Samari hul lo. 6Lɛ yḭ si tɨ bi tɨ Israhel ne a ti kuna həm ne haam no̰ maan. 7Gorne yḭ si gɨna, yḭ ɗo beel gɨ bi ɓə: “Ndɨla na waan tɨ ndog.” 8Yḭ nen bi tɨ mo̰y la, i naa gɨ bi ul mu tɨ tɨm jili la, i nen bi tɨ yo la, i kun jinsə-a la. Yḭ ten bla huna, i naa gɨ bi bla la. 9Yḭ ka daab la, gursu la, sele la sula tɨ i kraab hul lo. 10Yḭ ka bɔg sula tɨ i daa lo la, ngɔmi tɨ paa lɔ səng lo la, kungu lo la, ta ngurum lo la. Kəysul wo tɨ cida na ul mu tɨ ər wa̰y tɨ daa sul tina.

11«Gorne yḭ wur tɨ lɔr ɗəng ɓee tɨ lɔr ɓa̰ hul gɨna, yḭ taam wo ne ɓə i par tɨ ər ndɔ la, yḭ ti na ər marway ɗa̰y ne yḭ ɓə un ne nɨm. 12Gorne yḭ wur tɨ wo gə̰y a, yḭ ka gɨ ər lapya. 13Jo gorne bi tɨ gə̰y par i tɨ a ndɔ gɨna, ka i lapya gə̰y na a, lɛ jo gorne a par i tɨ a ndɔ lo gɨna, ka i lapya duga gɨ i. 14Jo gorne yḭ si tɨ nin lɛ a par i ɓoy lo gɨna, yḭ wag tɨ gə̰y ne ɓee tɨ lɔr ɗəng ne mu i ɗɨb i kungu bur tɨ gɨ a ɓla ɓə Ndɨla hul laar ər tɨ a sul lo. 15Kuri, ən ja gɨ i tɨ bayri, na ɗa̰y tɨ sarya kar, pɛw ne bi tɨ lɔr ɗəng ne ɓə tina ɓə jaa ne Ndɨla tungni tɨ bi tɨ Sodom a na Gomor sul ura.»

Jesu-a na ər bi a jindemni wur

Mrk 13.9-13; Luk 21.12-17

16Jesu ja gɨ ər bi tɨ wa̰y edɨ: «Yin, ən toon i kuna həm tɨ jərjəng-a daan. I kay i jicina tɨ i ndɔ sul kuna kɔ la yḭ ɗina kuna gugoli-a la. 17I kay jicina tɨ i ndɔ sul na bi, kəysul a ɓə na i saal tɨ bi tɨ jaa tungni kwi la a ɓə i ɗɨb na ngar tɨ Juyb-a ləgɨ tɨ peer tay hul. 18Yḭ ɓə tɨm tɨ guborno̰ la, woom la kwi yin jaa. Tɨ un ne jo ya̰ la, bi tɨ Ndɨla una kuri lo a ɓə ən jaa laa tɨ i mu. 19Gorne a ɓə i par gɨna, yḭ ka ilgɨ tɨ jaa ne i wo ja sul lo. Kəysul Ndɨla ɓə gɨ i jaa tɨ ja naa tɨ un ɗay. 20Jaa ne wo wag tɨ i mu, ɓə o̰ tɨ i ndɔ lo, lɛ i Ba tɨ Ndɨla na Lal jo ɓə jaa ja tɨ i mugor. 21Peer ɓungɨ ɓə a ɓungɨ sul sula tɨ a humna la, ba ɓə ər ɓa̰ sul sula tɨ ər humna la, ɓimi ɓə o̰ a bəgɨ koor la. A ɓə a nɨm tɨ bi tɨ bi humna daa nɨ a ɓə a humna la. 22Bi gun ɓə i koor yin jaa, lɛ wo ne par ər hul kula sɨgra marway mu tɨ tong gɨna ɓə nina. 23Gorne bi ɓə i jindemni wur tɨ lɔr ɗəng paa hul gɨna, yḭ yey, i si tɨ lɔr jak hul. Kuri ən jaa gɨ i tɨ bayri, yḭ ɓə yaal Israhel lorgɨ sul yeri kuna paa ne marway nɨ yin, Wo Ɓa̰ ən ɓə hina i tina.

24«Wo tɨ wa̰y edɨ tɨ ɗəng ura wo tɨ gɨ ər wa̰y ɓla lo la ha̰r tɨ ɗəng ura ər Baali lo la. 25Ndini ne wo tɨ wa̰y edɨ ɓə tɨm kuna wo tɨ gɨ ər wa̰y ɓla la, ha̰r ɓə tɨm kuna ər Baali la. Jo gorne a soon Baali gḛy Beljebul, wa̰ay tɨ jinsə maan gɨna, kəyjaa jo a ɓə jaa tɨ bi tɨ gə̰y sul a?»

I hul ka i dugun lo

Luk 12.2-7

26«I hul ka i dugun tɨ wa̰y ɓudu in sul lo. Kəysul mum gun ne waal ndɔ ɓə ndɔ ɓla tɨ bayri, la jaa kuru gun ɓə wag tɨ un ndeeri la. 27Jaa ne ən ja gɨ i na syɛl, yḭ ja na tili, jaa ne a hurga gɨ i tɨ i tulɔ, yḭ ɗo na beel tɨ ndal. 28Yḭ ka gɨ bi ton lɛm i ndula ya̰m kəw humna lɛ a lɛm i ndo̰yngɨ humna lo, oy lo. Lɛ i oy gɨ Ndɨla ne lɛm i ndo̰yngɨ la i ndula ya̰m humna na laa ne uy lo. 29Pay yḭ una ɓə wo lɛm ɗḭ ɓḭ tɨ ndidi huna na sele ɓudu lo a? Lɛ ɗḭya̰ ɓudu in ɓə tɨba tɨ lɔr bla i Ba Ndɨla hul laar lo. 30Jo tuna yḭ sul gɨna, i sul ɓwḭ kaw Ndɨla ɓra gun. 31Yḭ ka ayri kar lo, ɓə i towol tɨ dɨbla ura ɗḭ ɓḭ ne gun!

32«Wo ne ja ən jaa tɨ bayri tɨ bi kwi gɨna, yin kaw, ən ɓə ər jaa ja tɨ bayri tɨ ən Ba ne wo tɨ ndɨlasul kwi la. 33Lɛ jo wo ne sulɔ ən sul tɨ bi kwi gɨna, yin kaw ən ɓə ər sul sulɔ tɨ ən Ba kwi tɨ ndal pi la.

Ən hina gɨ i na lapya lo lɛ tɨ sal jo

Luk 12.51-53; Luk 14.26-27

34«I ka i ho̰ni kay ɓə ən hina gɨ i na lapya tɨ nəgri sul lo. Ən hina na lapya lo lɛ, ən hina na pɛni tɨ sal. 35Kəysul ən hina ɓa̰ na ba a daan ɓaan la, ɓa̰ ii a na ər na̰ a daan ɓaan la, ii a na ər mo̰ tɨ ii a daan ɓaan la. 36Wo na peer tɨ pḛngɨ ɓə tɨm ər bi tɨ ər gə̰y. 37Wo ne ka ər ba ɓee ər na̰ kum nari ura ən, lɛm tɨm ən wo lo. Wo ne ka ər ɓa̰ ɓər ɓee ər ɓa̰ ii kum nari ura ən, lɛm tɨm ən wo lo la. 38Wo ne so ər tɨla tɨ tərgɨ#10.38 Tɨla tɨ tərgɨ sula, tɨ tɨm ndog tɨ ndula naa gɨ ulu kuna Jesu. barita ər hina tɨ ən lɔ lo gɨna, ər tɨ ən wo lo la. 39Wo ne ja ɓə may ɓə ər ndula ya̰m ɓaw, ər ɓə ər haam lɛ wo ne haam ər ndula ya̰m yin jaa ɓə ər tina.»

Wo ne par i tɨ ər ndɔ par yin la

Mrk 9.37,41; Luk 9.48; Luk 10.16; Ja̰ 13.20

40«Wo ne par i tɨ ər ndɔ par yin man tɨ ər ndɔ la, wo ne par ən tɨ ər ndɔ par wo ne ton ən tɨ ər ndɔ la. 41Wo ne par nebi tɨ ər ndɔ kəysul ər tɨ nebi gɨna, ər ɓə wa̰y tɨ daa sul ne tuna nebi-a sul tina, la wo ne par wo tugla tɨ ər ndɔ kəysul ər tɨ wo tugla gɨna, ər ɓə wa̰y tɨ daa sul tɨ wo tugla maan tina la. 42Ən ja gɨ i tɨ bayri, jo wo naa gɨ ən wo ne gaw tɨ peer lɔ ndu ɗina ɓa̰ ndḛni tɨ pinjal hul gɨna, ər ɓə wa̰y tɨ daa sul haam lo bad.»

Currently Selected:

Matyo 10: nie

Highlight

Copy