Matyo 18

Wo ne ɗəng nari ura peer tɨ Ndɨla na waan hul

Mrk 9.33-37; Luk 9.46-48

1Na lula sul ɗay, Jesu na bi tɨ wa̰y edɨ kori tɨ ər ndɔ a ɓiri ər jaa ɓə: «Ja jo tɨ wo ɗəng nari ura peer tɨ Ndɨla na waan hul a?» 2Jesu soon ɓa̰ paa, ər kay ər tɨ a daan, 3la ər ja gɨ a: «Kuri, ən ja gɨ i tɨ bayri, jo yḭ yɛr i ndɔ kuna ɓimi lo gɨna, yḭ ɓə wur tɨ Ndɨla waan lo. 4Jo wo ka ər ndɔ kuna ɓa̰ma ne lo gɨna, ər ɓə tɨm wo ɗəng ər peer ura tɨ Ndɨla waan hul lo. 5La wo ne par ɓa̰ma na yin ndil tɨ ər ndɔ gɨna, ər par yin tɨ ər ndɔ la.»

Kay jicina tɨ i ndɔ sul

Mrk 9.42-48; Luk 17.1-2

6«La wo ne ka nɨ ɓa̰ma ɓudu ne ko ən hul tɨ peer daan tɨba tɨ ɓijim hul gɨna, golgo tɨ gɨ ər kura ɗəng ɓəwlu tɨ ər aan tɨ ər jiga tɨ larɨm duli ɗəng ji. 7Ndemni gɨ bi tɨ dunya̰ ne ka bi dɨbla nɨ tɨba tɨ ɓijim hul, kuri, mum ne ɓə paa kar na ɗa̰y sul, lɛ ndemni gɨ wo ne din paa tɨ ɓijim hul! 8Jo əm daa ɓee əm ɗa̰y ɗo əm tɨ ɓijim hul gɨna, əm tḭ a əm burum a ɓag na əm, kəysul golgo gɨ əm ne əm ɓə wur tɨ un tɨ tɨm jili na əm daa ɓudu ɓee əm ɗa̰y ɓudu, ura ne əm ɓə wur tɨ laa ne uy lo na əm dəgɨ tɨ ndidi ɓee əm ɗə̰ygɨ tɨ ndidi gun. 9Lɛ jo tɨ əm ji jo ɗo əm tɨ ɓijim hul gɨna, əm jul ər əm jiga ər teni. Kəysul əm wur tɨ Ndɨla waan hul ji taal ɓudu golgo, ura wur tɨ nina hul ji taal tɨ ndidi.»

Jaa lar tuna ham ne haam sul

Luk 15.3-7

10«Yḭ kay i jicina tɨ i ndɔ sul tɨ ɓimi ləg na wa̰y kar lo. Kəysul ən ja gɨ i tɨ bayri, tɨ ndɨlasul pi, a malayka lor tɨ ən Ba kwi na ɗa̰y sul a jaa. 11Yin, Wo Ɓa̰ ən hina bi ton haam nina.

12«Kəyjo yḭ ilgɨ tuna jaa ne sul a? Jo wo na həm aru lɛ ɓudu tɨ peer daan haam gɨna, ər ɓə ton dug doso kar doso nɨm tɨ nan sul, lɛ ər ɓə saal ne ɓudu ne ham taam lo a? 13Ən ja gɨ i tɨ bayri, jo gorne ər si ər ten ər gɨna, ər ndula laar ɓə həm dug doso kar doso ne maan ura. 14I Ba tɨ Ndɨla ne wo ndal pi kaw, taam ɓə wo ɓudu tɨ ɓimi ne daan ka haam lo.»

Paa peer tɨ ɓijim sul

15«Jo əm ɓun ka gɨ əm ɓijim gɨna, əm si əm ten ər na sul la əm ɓla gɨ ər wa̰y gajele ne ər ka. Jo ər laa əm jaa gɨna, əm nen ər. 16Jo ər ɓini əm jaa laa gɨna, əm duga əm si “na wo ɓudu ɓee bi ndidi kuna maktub tɨ Ndɨla maan ja. Kuna ne yḭ ɓə i jaa kaaw tɨ bi tɨ ndidi ɓee bi tɨ tedi kwi.” 17Jo gorne ər ɓini a jaa laa gɨna, əm si əm ja gɨ bi ton do sul tɨ paa na Krist ndil. Jo ər ɓini a mu laa gɨna, əm ləg ər kuna wo ne una Ndɨla lo ɓee kuna wo tɨ lambo tay.

18«Kuri, ən ja gɨ i tɨ bayri, mum gun ne i ɓəw tɨ nəgri sul le, ɓə tɨm tɨ ɓəwlu tɨ ndɨlasul pi la, mum gun ne i cigri tɨ nəgri sul le ɓə tɨm tɨ cigri tɨ ndɨlasul pi la.

19«Ən ja gɨ i cam, jo bi ndidi tɨ i daan tɨ nəgri sul le laa paa mu la a ɓiri kəy wa̰y kaw, ən Ba ne wo tɨ ndɨlasul ɓə gɨ a wa̰y ne a ɓiri naa. 20Kəysul gorne bi tɨ ndidi ɓee tedi tay paa na ən ndil, yin wo tɨ a daan.»

Jaa lar tuna hul ɗina sul

21Gɨna Piyɛr kori tɨ Jesu ndɔ ər ɓiri ər: «Baali, jo ən ɓun ka gɨ ən ɓijim gɨna, ən hul ɓə ɗina tɨ ər sul lahul tɨ wa? Pay marway lahul kili a?» 22Jesu duga gɨ ər: «M-m, tɨ lahul kili ngoy lo, lɛ marway duk kili lahul kili.

23«Kəysul, Ndɨla na waan tɨ kuna wa̰ay paa ne taam ər mum lɔ ləg na ər bi tɨ cida. 24Gorne ər ɗolɔ tɨ wa̰y ɓra gɨna a hina gɨ ər na wo paa ne na gursu dubu sap tɨ ər sul. 25Wo tɨ cida ne lɛm gursu ne səng lo gɨna, ər Baali naa gṵ ka a huna ər kuna ha̰r la, ka huna ər ii la ər ɓimi hari na ər mum tɨ tina gun tɨ gursu ne səng. 26Gɨna wo tɨ cida ha̰w ɗa̰y tɨ ər Baali kwi ər ja gɨ ər: “Ɗo əm hul tɨ lɔr tɨ ən sul ɓə ən ɓə gɨ əm hula səng gun!” 27Ər Baali ləg ər jindemni gɨna, ər jul hula tɨ ər sul lɛ ər nɨm ər, ər si.

28«Gorne wo tɨ cida ne wag tɨ un ne gɨna, ər ten ər paa kɔr tɨ cida ne ər hula tɨ gursu aru wo tɨ ər sul. Ər par ər sɨgra tɨ ər an tɨ ər aan mur la, ər ja gɨ ər: “Əm səng gɨ ən, ən hula!” 29Ər paa kɔr tɨba tɨ ər kwi la ər ka gɨ ər kɔgri. Ər ja ɓə: “Ɗo əm hul tɨ ən sul ɓə ən ɓə gɨ əm gursu səng.” 30Lɛ wo tɨ cida ne ɓini. Ər ɗo ər paa tɨ dangay nɨ ka ər səng ər hula bari. 31Gorne bi tɨ cida tapeer ləg wa̰y ne ka paa gɨna, a ndula laar a lo la, a hina a ɗo jaa ne tɨ a Baali tulɔ. 32Gɨna Baali toon soon ər ja gɨ ər: “Yim tɨ wo tɨ cida hul ɗoyri! Ən jul hula gun tɨ əm sul kəysul yim ka gɨ ən kɔgri. 33Ndini ne yim kaw əm ɓə əm paa kɔr jindemni ləg kuna ən ləg əm jindemni la” 34Hul laa ka Baali, ər ɗo ər tɨ dangay marway na lula ne ər ɓə ər hula səng bari.» 35Tɨ wa̰y ɓudu ne «ən ba ne wo tɨ ndɨlasul ɓə gɨ i kar, jo wo hul ɗina tɨ ər ɓun sul na hul ɓudu lo.»

Currently Selected:

Matyo 18: nie

Highlight

Copy