Luk 8

Aa ne an Jesu lɔ

1La Jesu si tɨ lwərgɨ nii la, lwərgɨ ɓḭ la tɨ beel ɗula tɨ Jaa Ndinimani ne tuna Ndɨla waan sul. Ər bi tɨ wa̰y edɨ dɔkɔmɛ kar sap si na ər la, 2ta aa tapeer ne Jesu kun jinsə tɨ a sul la nen-a mo̰y kaw si na ər la: Aa ton tɨ Mari tɨ Magdala ne Jesu kun jinsə lwɔngɔ tɨ ər sul la, 3Ja̰n ne tɨ Suja na ii la, Wa̰y Erod na wo tɨ gə̰y sul sula ne ndil ɓə Suja̰n la, ta aa tapeer paa ne yaar ər na a mum tɨ tina tɨ a daa la.

Jaa lar tuna wo tɨ wa̰y ndulu

Mat 13.1-9; Mrk 4.1-9

4Gɨna bi dɨbla o̰ tɨ lwərgɨ nii jak jak tay peer tɨ Jesu ndɔ, la ər ja gɨ a jaa lar ne: 5«Ɓər paa si tɨ ər waal hul tɨ wa̰y ndulu. Gorne ər ɗɨga nduri gɨna, nduri tapeer tɨba tɨ ul taal. Bi si tɨ sul la, ɗḭ kaw tuy gun la. 6Tapeer tɨbɨn tɨ nəgri kərgɨ sul, a o̰, lɛ a oli gun, kəysul nəgri ne hun lo. 7Tapeer tɨbɨn tɨ umi daan, a o̰ ɓudu, lɛ umi kubgɨ a sul. 8Nduri tapeer tɨbɨn tɨ nəgri hɔl sul. A o̰ la a ka sul la. Jaa kaw toy ji aru la.» La Jesu ja gɨ a cam: «Yḭ laa ɓari, jo yḭ na tori tɨ ja laa gɨna, i laa jaa!»

Kəyjaa jo Jesu ja jaa na lar a

Mat 13.10-17; Mrk 4.10-12

9Jesu na bi tɨ wa̰y edɨ ɓiri ər jaa lar ne ji. 10Ər duga gɨ a: «Kəysul yḭ Ndɨla naa gɨ ul mu tɨ wa̰y kuru tuna ər waan sul una, lɛ tuna bi gun sul, a ɓə jaa laa na jaa lar, nejo

“A ɓə un tali kay lɛ, a ɓə lɛm wa̰y ɓudu in ləg lo,

a ɓə jaa laa lɛ, a ɓə ji una lo la.”»

Jesu jul jaa lar tuna wo tɨ wa̰y ndulu lɔ

Mat 13.18-24; Mrk 4.13-20

11«Jaa lar ne ji jo le: Nduri tɨ Ndɨla na jaa. 12Nduri ne tɨba tɨ ul taal ti kuna bi tapeer ne laa jaa lɛ jinsə jul jaa ne tɨ a nirimu tɨ gɨ a ul kway tɨ hul kula la tɨ nina tina la. 13Nduri ne tɨba tɨ kərgɨ sul ti kuna bi tapeer ne laa jaa la a ko na ndula laar la, lɛ a nɨm jaa ne wur ndeem tɨ a ndɔ lo. A hul kula təwəl lo. Gorne wa̰y tɨ sangni an a, a nɨm a hul kula. 14Nduri ton tɨbɨn tɨ umi daan wag bi ne laa Ndɨla na jaa, lɛ ngɨnɨm tɨ mum tɨ dunya̰ la, mum tɨ tina la, ndula laar tɨ dunya̰ la kubgɨ a sul, a lɛm ji ɓla lo. 15Nduri ne tɨba tɨ nəgri hɔlum sul tɨ bi ton a laa Ndɨla jaa la a ko la. Tɨ bi ne ko jaa na nirimu ɓari la ndinimani la. A kay tɨ a hul la, toy ji na hul par sɨgra.

Jaa lar tuna lampa sul

Mrk 4.21-25

16«Jo wo kay lampa laa gɨna, ər wo guu sula hul tɨ sul lo la ər wo wur tɨ ko̰ygɨ lɔ lo la. A kay ər tɨ ndal nejo bi ne wur tɨ li hul ɓə na un ləg. 17Kəysul mum gun ne waal ndɔ ɓə ndɔ ɓla tɨ bayri la, jaa kuru gun ɓə wag tɨ un ndeeri. 18Yḭ kay i ho̰ni ɓari tuna i ul tɨ jaa laa. Kəysul wo ne na wa̰y tɨ ər daa, a ɓə gɨ ər paa naa tɨ sul lɛ wo ne na lo, wa̰y ne ər ilgɨ ɓə ər na kaw a ɓə jul tɨ ər daa.»

Jesu na na̰ la ər ɓungɨ la

Mat 12.46; Mrk 3.31

19Jesu na na̰ la ər ɓungɨ la hina tɨ ər ləg, lɛ a lɛm kori ndog tɨ ər ndɔ lo kəysul bi tɨ dɨbla. 20A ja gɨ Jesu ɓə: «Əm na̰ la əm ɓungɨ la lor wo tɨ bayri, a taam əm ləg.» 21Lɛ Jesu ja gɨ a: «Ən na̰ la ən ɓungɨ la tɨ bi ne laa Ndɨla jaa la a ka na cida la.»

Jesu na dwari ura saaw ɗəng

Mat 8.23; Mrk 4.35

22Ɗa̰y paa Jesu hoon tɨ kwa̰r ɗəng hul na ər bi tɨ wa̰y edɨ. Ər ja gɨ a ɓə: «Ka i ɗen tɨ ɗaglə ɗəng tapaa.» La a si. 23Gorne Jesu na bi tɨ wa̰y edɨ wo kwa̰r nira gɨna, ər wo ley lom. Tɨ daamu, saaw təw ɗəng tɨba tɨ larɨm sul, ndu təgɨm sir kwa̰r ɗəng hul nɨ a tɨ ndog na duli. 24Jesu na bi tɨ wa̰y edɨ kori tɨ ər ndɔ a uya̰ ər, la a soor ər: «Baali, Baali, yini wo ulu.» Ər jar la ər meer saaw la ndu na diri la. A mugla, la un ɗina ɗɨrəw la. 25La Jesu ja gɨ ər bi tɨ wa̰y edɨ: «I hul kula wo ɓay a?» Ayri ka a la, ɓɔr a ji la. A ja gɨ peer ɓə: «Kəy wo jo saaw la ndu diri la, la a laa ər mu.»

Jesu nen wo ne jinsə yiga ər ji

Mat 8.28; Mrk 5.1

26Jesu a na ər bi tɨ wa̰y edɨ a an tɨ lɔr nəgri sul tɨ Gerasa ne wo tɨ nəgri sul tɨ Galile tɨ ɗaglə ɗəng ne wo tɨ tapaa. 27Gorne Jesu jir tɨ Kwa̰r ɗəng hul gɨna, wo tɨ lɔr ɗəng paa ne jinsə yiga ər ji tung ər kwi. Toni ɓagcagri ər wur ngɔmi lo la, ər ti tɨ li hul lo la, lɛ ər ti tɨ ngəlɨm sul. 28Gorne ər ləg Jesu gɨna, ər tɨba tɨ ər kwi, ər ka ngɔr la, ər ja tɨ ndal: «Jesu, Ndɨla baw ɗəng na ɓa̰, kəyjo əm taam tɨ ən ndɔ a, ən ka gɨ əm kɔgri, ka ən pɛw kar lo!» 29Gɨna, Jesu ja gɨ jinsə ka ər wag tɨ ɓər ne ndɔ, kəysul ər yeri ər sul toni lahul dɨbla. A ɓəw ər daa na cɛn la a bɛ gəgrə tɨ ər ɗa̰y tɨ ər ɓaw, lɛ ər tḭ gəgrə la jinsə si na ər tɨ tap hul. 30Jesu ɓiri ɓər ne: «Əm ndil ɓə kəy a?» Ər duga gɨ ər: «Ən ndil tɨ “dɨbla”.» Kəysul jinsə dɨbla wur tɨ ər ndɔ. 31La a ɓiri Jesu nɨ ər ka a kun bay tɨ tulɔ baw ɗəng tɨ lal ɓijim-a maan hul lo.

32La ndog na un ne, kosong kur dɨbla wo wa̰y tudi tɨ nan sul. Jinsə ka gɨ Jesu kɔgri ka ər naa gɨ a gṵ tɨ wur tɨ kosong-a hul. Ər naa gɨ a ul mu tɨ wur tɨ kosong ne hul. 33Gɨna jinsə wag tɨ ɓər ne ndɔ la a wur tɨ kosong hul la. Kosong kur gun o̰ tɨ nan ɗa̰y a jir na yal a bɛ gɨ tɨ ndu a diri ɗad-ɗad.

34Gorne bi tɨ kosong ɓaw ləg wa̰y ne ka paa gɨna, a yerɨm, a si, a ja jaa ne gɨ bi tɨ lwərgɨ nii la, gɨ bi tɨ lwərgɨ ɓḭ ne yeri a sul la. 35Bi wag tɨ bayri tɨ wa̰y ne ka paa ləg. A hina tɨ Jesu ndɔ la a ten wo ne toni jinsə yiga ər ji ti tɨ nəgri tɨ Jesu kwi. Ər wur ngɔmi la ər sul duga tɨ tugla. Gɨna ayri ka a nari. 36Bi ne ləg mum ne ja gɨ bi ne hina tɨ bəgri ka waa ta Jesu jul jinsə tɨ ɓər ne sul. 37Gɨna bi gun tɨ lɔr nəgri sul tɨ Gerasa a ɓiri Jesu ka ər si ɓag na a, kəysul ayri ka a nari. Jesu ɗɔl tɨ Kwa̰r ɗəng hul la ər si la.

38Wo ne jinsə yiga ər ji ka gɨ Jesu kɔgri ka ər ti na ər. Lɛ Jesu kun ər la ja gɨ ər ɓə: 39«Duga, əm si tɨ əm gə̰y, əm jul mum gun ne Ndɨla ka gɨ əm lɔ.» Gɨna ɓər si, ər ja gɨ bi gun tɨ lɔr ɗəng ne hul mum gun ne Jesu ka gɨ ər.

Jayrus na ɓa̰ ii la ii ne do Jesu na ngɔmi mu la

Mat 9.18-26; Mrk 5.21-43

40Gorne Jesu duga hina tɨ ɗaglə ɗəng nari mu tɨ Galile tapaa gɨna, bi dɨbla par ər tɨ a ndɔ, kəysul a ji gun a wo ər a̰y. 41Na lula sul ɗay, ɓər paa ndil ɓə Jayrus an. Ər tɨ wa̰ay tɨ Juyb-a na li tɨ paa tina maan. Ər tɨba tɨ Jesu kwi la, ər ka gɨ ər kɔgri tɨ hina tɨ ər gə̰y la, 42kəysul ər na ɓa̰ ii ɓudu lag-lag ne an ɓə lɛm dɔkɔmɛ kar sap ne ti ndog na ulu. Gorne Jesu tɨba tɨ ul tɨ saal gɨna, bi dɨbla dugun ər.

43Ii paa ne hima yey tɨ ər ndɔ na an dɔkɔmɛ kar sap wo ɗay la. Ər yṵga ər mum tɨ tina gun tɨ doktor maan, lɛ wo ɓudu in lɛm ər nina lo. 44Ər kori tɨ Jesu bəgri la ər do ər sər mu la. Tɨ daamu, hima ne yerɨm tɨ ər ndɔ tung. 45La Jesu ɓiri: «Jaa jo do ən a?» Bi gun sulɔ, gɨna Piyɛr ja gɨ ər: «Baali, bi dɨbla yer əm la a dugun əm la.» 46Lɛ Jesu ja: «Wo paa do ən, kəysul yin, ən una ɓari ɓə dwari paa wag tɨ ən ndɔ.» 47Gorne ii ne una ɓə ər lɛm ər ndula wal lo gɨna, ər kori tɨ Jesu ndɔ na kɔbgɨ ər tɨba tɨ ər kwi la. Ər jul gɨ ər jaa lɔ tɨ bi gun kwi, kəyja ər do ər sər mu la, ta ka waa ta ər ten lapya tɨ daamu la. 48Jesu ja gɨ ər: «Ən ɓa̰ ii, əm hul kula nen əm. Si na lapya.»

49Gorne Jesu wo ja Jaa ɗang, wo paa o̰ tɨ wa̰ay tɨ Juyb-a na li tɨ paa tina hul hina. Ər ja gɨ ər: «Əm ɓa̰ ii uy teni, ka Baali ɓɔr lo!» 50Lɛ Jesu laa jaa ne, la ər ja gɨ Jayrus: «Ka ayri kar lo, ko əm hul ngoy, ər ɓə nina.» 51Gorne Jesu an tɨ gə̰y gɨna, ər naa ul mu ka wo in ka wur tɨ li hul na ər lo. Lɛ tɨ Piyɛr la, Ja̰ la, Jak la ngoy jo, la ɓa̰ na ba la, ɓa̰ na na̰ la. 52Bi gun cḛy la a cḛy a ndɔ tuna ɓa̰ ii ne sul la. Gɨna Jesu ja gɨ a: «Yḭ ka cḛy lo, ər uy lo, ər ley lom jo.» 53Lɛ a ka ər ɓəji kəysul a una ɓə ər uy kuri. 54Gɨna Jesu par ɓa̰ ii ne na daa la ər soon ər na gṵ sɨgra la ər ja: «Ən ɓa̰, əm jar!» 55Tɨ daamu ər lal duga tɨ ər ndula la ər o̰ ndal. La Jesu naa gṵ ka a naa gɨ ər wa̰y tudi. 56Ɓɔr ɓa̰ ii ne na bi tɨ twila ji nari, lɛ Jesu naa gɨ a gṵ tɨ gɨ wo in wa̰y ne ka paa lɔ jul lo.

Currently Selected:

Luk 8: nie

Highlight

Copy