Ja̰ 1

Jesu Krist tɨ Jaa ne o̰ tɨ Ndɨla ndɔ

1Toni barita Ndɨla ɓə mum ɗula, Jaa wo tɨ nin teni. Jaa ti na Ndɨla la yḭr maar tɨ Ndɨla na kew la. 2Ər ti toni na Ndɨla tɨ mum lɔ ɗula. 3Ndɨla ka mum gun na yḭr la, wa̰y ɓudu ne Ndɨla ɗo bla yḭr in teni. 4Tɨ yḭr jo ər naa gɨ mum gun tɨm jili, la tɨm jili tɨ un ndeeri tɨ biɓari maan la. 5Un ndeeri, ndeeri tɨ un ɗoyri daan, lɛ un ɗoyri una ər lo.

6Ndɨla toon ər wo tɨ tomni paa ndil ɓə Ja̰. 7Ər hina kuna timo̰ tɨ gɨ bi jaa ja tuna un ndeeri sul, nɨ ka bi gun ko hul na ul mu tɨ yḭr ndɔ. 8Ja̰ may jo tɨ un ndeeri lo, lɛ ər ja jaa tuna un ndeeri sul. 9Jaa ne le, tɨ un ndeeri ne tɨ kuri. Gorne ər hina tɨ dunya̰ gɨna, bi gun tɨ dunya̰ ɓə ndeeri.

10Ər wo tɨ dunya̰ ɓagcagri. Na yḭr jo Ndɨla ɗo na dunya̰, lɛ bi tɨ dunya̰ una ər lo. 11Ər hina tɨ ər ɓungɨ maan le, ər ɓungɨ ɓini ər par tɨ a ndɔ. 12Lɛ bi gun ne par ər tɨ a ndɔ, ər naa gɨ a ul mu tɨ duga Ndɨla na ɓimi. 13Ya̰ ne a tɨ Ndɨla ɓimi na ul mu tɨ twila tɨ hima hul lo la, na ul mu tɨ ndula ya̰m lo la, na woɓari na hul taam lo la, lɛ tɨ Ndɨla jo duga a ər ɓimi.

14Jaa ne duga ndula yaam la, ər hina ər ka lɔr na i la. Ta yi ləg ər taan la. Tɨ taan ne Ba naa gɨ ər ɓa̰ ɓudu kam lag lag, ɓari la kuri la sir ər hul.

15Ja̰ ja jaa tuna ər sul la ər ja tɨ ndal ɓə: «Yḭ ləg Wo ne ən ja gɨ i ər jaa toni ɓə “wo ɗəng paa wo hina tɨ ən bəgri”, kəysul ər ura ən la, ər ti toni tɨ ən kwi barita a toy ən.»#1.15 Mat 3.11; Mrk 1.7; Ja̰ 1.27 16La yi ji gun i ten ər mum tɨ tina la, ɓari na paa ɓari la. 17Kəysul Ndɨla naa i gṵ hul na ul mu tɨ Moys ndɔ, lɛ ɓari la kuri la hina na ul mu tɨ Jesu Krist ndɔ. 18Wo ɓudu ne ləgɨ Ndɨla in teni, lɛ tɨ ər ɓa̰ ɓudu ne wag tɨ ər ho̰ni ngoy jo ləg ər. Tɨ yḭr jo ər ɓla ər gɨ bi ka a una ər.

Ja̰ ja jaa tuna ər sul

Mat 3.1-12; Mrk 1.1-8; Luk 3.1-18

19Jaa ne Ja̰ ja na lula sul ne Juyb woom tɨ Jerusalɛm toon bi tɨ hima ɓina la, lebi-a la#1.19 Tɨ Lebi na kalɔ jo a tɨ bi tɨ hima ɓina tɨ Ndɨla li hul. tɨ ər jaa ɓiri. A ɓiri ər ɓə: «Yim tɨ jaa a?» 20Ər duga gɨ a jaa na hul ɓudu tɨ bayri ɓə: «Yin tɨ Mesi lo.» 21A ɓiri ər: «Lɛ yim tɨ kəy wo a? Pay yim tɨ nebi Eli a?» Ja̰ duga gɨ a: «La-la, yin tɨ yḭr lo.» A ja gɨ ər: «Yim tɨ Ndɨla na Nebi ne yini wo a̰y a?» Ər duga gɨ a: «La-la.» 22Gɨna a ɓiri ər: «Lɛ yim tɨ ja ara? Yini taam duga na tomni tɨ gɨ bi ne toon ī naa. Kəy jaa jo əm ɓə ja tuna əm sul a?» 23Ja̰ duga gɨ a ɓə: «Yin tɨ:

“Wo ne ən gṵ cḛy tɨ tap hul ɓə:

Yḭ kaaw gɨ Baali ul ɓḭ ka a lor tugla!”#1.23 Esa 40.3»

Nejo tɨ jaa ne Esay, Ndɨla na nebi ja.

24Bi tɨ tomni ne a toon a tɨ Ja̰ ndɔ, Parisyḛ-a wo tɨ a daan la. 25A ɓiri ər jaa cam: «Jo yim tɨ Mesi lo la, yim tɨ Eli lo la, yim tɨ Ndɨla na Nebi lo la, lɛ kəyja əm ka bi batɛm a?» 26Ja̰ duga gɨ a: «Yin, ən ka gɨ bi batɛm na ndu, lɛ wo paa wo tɨ i daan lɛ yḭ una ər lo. 27Ən lɛm goni ər kṵngɨ swal cigri lo.» 28Mum ne gun ka paa tɨ Betani, tɨ larɨm tɨ Jurdḛ tapaa, tɨ un ne Ja̰ ka gɨ bi batɛm tɨ nin.

Jesu, Ndɨla na ham ɓa̰

29Gaana, Ja̰ ləg Jesu wo hina tɨ ər ndɔ gɨna, ər ja ɓə: «Yḭ ləg Ndɨla na ham ɓa̰ ne jul ɓijim tɨ bi tɨ dunya̰ sul. 30Tɨ yḭr jaa jo ən ja gorne ən ja gɨ i ɓə: “Wo paa wo hina tɨ ən bəgri. Ər tɨ wo ɗəng ne ura ən, kəysul ər ti toni tɨ ən kwi barita a toy ən.” 31Yin man kaw, ən una ər toni lo. Lɛ ən hina ən ka bi batɛm na ndu nɨ ka bi gun tɨ Israhel una ər.»

32Ja̰ ja jaa ne cam gɨ bi ɓə: «Ən ləg Ndɨla na Lal jir tɨ ndɨlasul kuna gugoli hina ti tɨ ər sul. 33Yin, man kaw ən una ər ɗa̰y ɓudu lo, lɛ Ndɨla ne toon ən nɨ ən ka gɨ bi batɛm na ndu ja gɨ ən: “Əm ɓə ən Lal ləg. Ər ɓə jir la ər ɓə tɨm tɨ wo paa sul la. Tɨ wo ne jo ɓə gɨ bi batɛm kar na Lal ɓari na dwari.” 34Yin, Ən ləg wa̰y ne na ən ji la, ən ja jaa tuna ər sul ɓə ər tɨ Ndɨla ɓa̰.»

Jesu soon ər bi tɨ wa̰y edɨ ne toni mani

35Gaana, Ja̰ duga hina tɨ un ɗay cam, na ər bi tɨ wa̰y edɨ tɨ ndidi tɨ peer daan. 36Gorne ər ləg Jesu gar-gar na ɗira gɨna, ər ja ɓə: «I ləg, Ndɨla na ham ɓa̰.» 37Ja̰ na bi tɨ wa̰y edɨ tɨ ndidi laa jaa ne gɨna, a so ul tɨ Jesu lɔ. 38Gorne Jesu yiga ji ləg a na hina tɨ ər lɔ gɨna, ər ɓiri a: «Kəy jo yḭ taam a?» A duga gɨ ər: «Rabi, ne ji ɓə wo tɨ gɨ bi wa̰y ɓla, əm ti tɨ ɓay a?» 39Ər duga gɨ a: «Yḭ hina, i ləg ən un ne ən ti tɨ nin.» A si a ləg ər un ne ər ti tɨ nin la, a ti na ər na ɗa̰y ɗay na lula tɨ nḛni tɨ jeel.

40Wo ɓudu ne tɨ bi tɨ ndidi ne daan ne laa Ja̰ na jaa la, ər so ul tɨ Jesu lɔ tɨ A̰dre, Simo̰ Piyɛr na ɓun. 41Wo tɨ toni mani ne A̰dre ten ər tɨ ər ɓun tɨ Simo̰, ər ja gɨ ər: «Yini ten Mesi.» Mesi na ji ɓə «Wo ne Ndɨla ɛr ər.» 42La ər hina na Simo̰ tɨ Jesu ndɔ. Jesu ləg ər gar-gar la ər ja gɨ ər: «Yim tɨ Simo̰, Ja̰ na ɓa̰. A ɓə əm soon Kepas.» Ndil ne ji ɓə «kura.»

Pilip a na Natanayel

43Gaana, Jesu taam saal tɨ lɔr nəgri sul tɨ Galile, tɨ ər ul sul ər ten Pilip la ər ja gɨ ər: «Hina tɨ ən lɔ!» 44Pilip tɨ wo tɨ Betsayda, A̰dre a na Piyɛr a na lɔr. 45Lɔ tɨ pla, Pilip ten Natanayel la ər ja gɨ ər: «Yini ten wo ne Moys ja ər jaa tɨ maktub tɨ gṵ hul la, nebḭ-a kaw a ja jaa tuna ər sul la. Tɨ Jesu wo tɨ lɔr tɨ Najarɛt, Josep na ər ɓa̰.» 46Natanayel duga gɨ ər: «Pay wa̰y ndinimani ɓə o̰ tɨ lɔr tɨ Najarɛt la a?» Pilip duga gɨ ər: «Hina əm ɓə ləg.»

47Gorne Jesu ləg Natanayel wo hina tɨ ər ndɔ gɨna, ər ja jaa tuna ər sul ɓə: «Yḭ ləg Israhel na ɓa̰ ɓudu ne wa̰y gajele ɓa̰ in teni tɨ ər ndɔ.» 48Natanayel ɓiri ər: «Əm una ən tɨ ɓay a?» Jesu duga gɨ ər: «Ən ləg əm gorne əm ti tɨ ndɔg lɔ toni barita Pilip soon əm.» 49Gɨna Natanayel duga gɨ ər: «Wo tɨ gɨ bi wa̰y ɓla, yim tɨ Ndɨla na ɓa̰ la, yim tɨ Israhel na wa̰ay la.» 50Jesu duga gɨ ər: «Əm ko hul kəysul ən ja gɨ əm ɓə ən ləg əm tɨ ndɔg lɔ lo a? Əm ko hul ɓə əm ɓə mum dɨbla ne ura yḭr ne ləg!» 51La ər ja cam: «Kuri ən ja gɨ i tɨ bayri, yḭ ɓə ndɨlasul ləg na təng la i ɓə malayka-a ləg na ɗɔl la, jir la, tɨ Wo Ɓa̰ sul.»

Currently Selected:

Ja̰ 1: nie

Highlight

Copy