Mateus 10

Ca tora' cocon oro apóstolo Jeju

Marcos 6.7-13; Lucas 9.1-6

1Tomi' ac caparut na Jeju. Tomi' naparut pain ca taxipa' urut con ca', pain ca ma' 12 urut ca'. Harahap je, tomi' xuhu' ta ac caparut na. Mi' inuhu' pain ca tomi' jein pin huhun oro caxicon jam ta. Mi' inuhu' pain ca quep xio pin huhun oro wari' co caxi nana quem, wiricoco co ximin nana pain ca caxi tamana nucucun, ac i ma' na ca tomi' caparut. 2Ma' 12 urut pain ca tomi' ac i ma' caparut Jeju ma', pain ca apóstolo je pain ca tomi' hwet huhun pain capija oro wari' ta caparut. Mo urut: Simão ma', co o naparut ma'. Pedro na xijein wixicon Simão ma'#10.2 O' ma' ni iri non Simão Jeju ne, pain ca Pedro pin ra ta con pane, ca' na ca coromicat nucun: Hwara' opa pan ra cocon oro win apóstolo ma ma'. Ac ca taramaxicon pe ho' momon tara, ac i ma' na ca coromicat nucun Jeju pane. Ma' nana wari' co Simão Simão wet nonon, ma' ac caca na co Simão Pedro nonon, ma' ac caca na co Pedro e' nonon quem.. Ma' ac ca na coxa' ca ma' quem, André ma'. Ma' ac ca na Tiago con coxa' ca João ma' quem. Mana panxica Zebedeu nana Tiago con João ma'. 3Ma' ac ca na Filipe con Bartolomeu con Tomé ma'. Wata' quem, pain ca Mateus ta' ca'. Cut in taxipa' inain oro imposto ca pagar je tococwa oro wari' pane ira. Ma' ac ca na Tiago panxica Alfeu ma'. Ma' ac ca na Tadeu ma'. 4Ma' ac ca na Simão co jain jain tamana nonon oro win ma' ca pain ca witan ca' xun cocon oro romano ma'. Ma' ac ca na Judas Iscariotes ma' quem. Wirico Judas Iscariotes co quep xiho' nonon oro taramaxicon pain ca quep xun cocon Jeju ma', ame hwe e'. Ac i ma' urut pain ca taxipa' urut con Jeju pane, pain ca apóstolo je caparut pane.

Ca tomi' xo' tococwa pain ca taramaja nucucun

5Tomi' xo' ac caparut na pain ca taxipa' urut con ca', pain ca 12 urut ca'. Ta mama' hwein ca to caca co om judeu nana pain ca aram aram tomi' hwet xun huhun pain capija oro wari' me ta. Ta mama' camain' hwein oro cidade nucucun oro wari' nein Samaria quem me. 6Pirao' e' jujun oro wari' nein Israel ma', co an xiho' nanain ovelha ca pan' ara'am ma'. 7Pijim' ca' jujun, wixicam pin ta' na xec pain ca taramaxicon pe ho' pin ton cocon oro wari' Iri' Jam ta tara ca pijim' nuhu'. 8Quep xio pin jujun oro wari' co ma' nonon caji nan, wiricoco oro wari' co ma' nonon oro xijein ca caxi wa quem. To' e' mami' jujun co cono' pin nana, tomi' jein pin jujun oro caxicon jam nucucun oro wari' quem. Ta pagar xut me huhun oro wari' co quep xiho' hwe me, xi pagar xine pan xuhu' pain ca mi' e' xuhu' pain ca hwara' opa nuhu' ta. 9Ta cut hwein dinheiro me, ta cut mama' camain' hwein me ta. 10Ta cut hwein caji coco ca mam' cut wa carawa ma' quem me. Ta cut tocwan hun wom je caji caxim je pana ca mam' pan xu wa quem me. Mi' pan tuturuhu' pain carawa ca cao' wa oro wari' co quep xiho' xi' hwe, xi hohot ara ne pain ca mi' xihwe pain carawa pain ca taramaja nuhu' ta naparut.

11Tomi' ac caparut na: Tan' mama' iri jein oro xijein cidade ne, je pain oro ca paric to ne xirim ma' quem, pirao' ac hun tara wari' co tomi' querec te nuhu' ma', co harahap je ta nuhu' ma'. Wirico tara co hwet hwe, to ho' ac hun tara. Om ta paca' hun, mon to wet mon to wet maqui' pa' ac cuhu' tara xec nein ca hwet xun huhun xucucun wari' pain xijein cidade. 12Corom iri jein xiricon ne, tomi' ac huhun tara oro co to nanain ma'. Param urut con Iri' Jam pain ca mi' cuhu' pain ca om toron ne xumuhu', je pain ca mi' cuhu' pain oro ca awi wa ca' jujun. 13Mo ta tomi' querec te cucuhu', mi' ac tococwa tara pain ca om toron ne ximicocon, mi' ac tococwa tara pain oro ca awi wa quem. Mo ta om tomi' querec te cucuhu', om ta mi' tococwa pain ca om toron ne ximicocon, om ta mi' tococwa pain oro ca awi wa quem. 14Mo ta om tomi' querec te cuhu' wari' ma', mo ta om caca oro win ma' ca pain xiricon co taraju tain nanain ca pijim' nuhu' ma', mo ta om ma' camain' ca wari' pain cidade nucucun co taraju xin nanain ca pijim' nuhu' ma' quem, paca' ac huhun tara, wap camara' ac hwein tara ximirinain macaracocon pain caximahu' pain ca paca' hwein cidade nucucun. Ma' ta querec pin' xujuhu' pain ca pan teretem nuhu' pain ca noc hwein ca taraju wa ca pijim' nuxut ca' ac huhun tara. 15Je ca tomi' xuhu' ca', tomi' iri'o' inuhu' ta ac caparut na. Maqui' iri tara xec nein ca wap toton oro wari' pain ca caracat nucucun Iri' Jam ne, wap tamana ac cocon tara co om tomi' querec te nunuhu' pain ca pijim' nuhu' ma'. Wap paxi' totoron oro wari' nein Sodoma cocon oro wari' nein Gomorra co caracat tamana nana pain cara pane. Ane wap tamana pan ton cocon oro wari' co om tomi' querec te nunuhu' pain ca pijim' nuhu' ma' ne, ac i ma' na ca tomi' caparut ma'.

16Tomi' ac caparut na: Pain ca pijim' mi' jujun pain capija oro wari' ta xuhu' ca', ac ca hwet jujun oro caxicon copacao' ta xuhu' na, xi awi caca ta. Ac oro ovelha huhun quem, xi narain ho' taxi' xujuhu' cocon ta. Je ca tomi' ca' xuhu' ca': Querec je me! Ma' tara xumuhu' cocon me. Win ca em' pain ca tama' noro xaxa' nucun pain ca om mon to wet ne winacon ma', ac i ma' je cocon oro wari' co noc nunuhu' ma'. Ane na e' ne pain ca om mana' huhun ne. Win ca xucu' pain ca om mana' taxi' ca quem. 17Ma' tara xumuhu' me, xi quep xim ara cucuhu' oro wari' ta. Cut mi' ac cucuhu' tara cocon oro taramaxicon co juiz nana, wap to ac cucuhu' tara pain oro xirim ca cut in to xucucun ma' quem. 18Cut mi' tuturuhu' cocon oro taramaxicon, tomi' querec ac cucuhu' tara pain oro ca ara hwe ma'. Ara ac i ma' tuturuhu', xi om ne ca howa ara mahu' ta. Je i ma' ira, na e' na pain ca tomi' hwet huhun pain capija oro taramaxicon cocon oro wari' co om judeu nana ta. 19Ta toron ne xumuhu' pain ca aram aram quep xim cucuhu' oro taramaxicon co tomi' querec xim nunuhu' quem me. Ta cain' cain' xuxun ne hwe me. Ta cain' xi tomi' narain ho' ac xijexi' ne hwe me, ta tomi' ac i ma' hwe me ta. Ame hwe e', coco' quima hwet xun iri jujun ne, mi' ac cuhu' tara pain ca tomi' wa Iri' Jam. 20Xi wahu' ne co tomi' xi' pan nana. Je Tamataracon Cotere' tara co tomi' pan pahu' ta naparut.

21Ma' tara wari' co tomi' mi' ton non cocon oro taramaxicon cwaji' ca ma'. Mon cwa' aji' cwa', to' pa' pin jun ta totoron. Ac i ma' tara co wanxi' ma' quem. Mon cwa' panxita' cwa', to' pa' pin jun panxita' cwa' totoron. Ac i ma' tatara mana panxica wari' ma' quem, noc pin totoron cote caca cacam jicocon ma', to' parapa' pin ac tacacama tara quem. 22Noc noc pi' pin tuturuhu' oro wari', xi om ne ca howa ara mahu' ta. Ane tomi' xuhu' pain i ca' ne: Wari' co howa cara napa' ma', pain ca howa howa pi' pin pa' con oro ca quep em' wa ma', wirico tara co to' witan wa ta. 23Mo ta quep em' to cucuhu' pain cidade ca to hwe ma', jein mama' ac hwein tara xijein cidade. Tomi' pe mi' inuhu' pain i ca' quem: Om ta mama' pi' pin querec hwein oro xijein cidade pain Israel ca', maqui' pa' ac xuhu' tara. Wata' pain ca Iri' Wari' ta' ca', maqui' pa' ac xuhu' tara pain ca taramaja taramaja wet nuhu' ta naparut.

24Noro jun wari' co ca' na wa pain oro ca taxi' wa ma' ac caparut na. Om ca taxi' tiquin' ca' con co ca' na pan non ma'. Wari' co taramaja mi' e' non taramaxicon nucun ma' quem, om ca hwara' opa tiquin' ca' con taramaxicon nucun. 25Carawa ca ara mi' tocwa co ca' na ma', ara mi' ac tocwa tara co ca' na wa ma' quem. Carawa ca ara mi' tocwa taramaxicon ma', ara mi' ac tocwa tara co taramaja mi' e' non ma' quem, je cwerein, hohot na ta je. Je ca tomi' xuhu' ca': Taramaxicon paxi' ina, ane tomi' noro cacapa' co noc nanapa' cwa' ne. Caxicon Jam ma ta nanapa'. Wahu' iri na pain ca wari' ne xuhu' ca' ne, tomi' xirac tamana tuturuhu' quem. Ac ca om tomi' xirac homa cacapa' na pain xocori ca'. Ame hwe e', tomi' xirac tamana pan tuturuhu' ta naparut.

26Je ca tomi' xuhu' ca' ac caparut na. Ta jin' huhun oro wari' co quep em' xim nunuhu' me ta. Oro ca om taxi' querec caca oro wari' con Iri' Jam ma', pijim' mi' jujun pain oro wari' ta. Ta joc xim camain' hwein me ta. 27Ca tomi' ne pain ca tomi' noc xa xuhu' pain ca paric to nexi' pain xirixi' ca', pain ximijain xim ca', tomi' hwet pi' pin ac huhun tara pain oro wari' pain tocon xina. 28Ta jin' huhun oro wari' me ta. To' parapa' taxi' paxi' nanain ca cwere wa, ane om to' parapa' taxi' cacain ca tamatara wa ne. Iri' Jam iri na ne, ha' non pain ca wap cain ca cwere wa, ha' non pain ca wap cain ca tamatara wa pain cote ne xe quem. Je ca tomi' xuhu' ca': Wirico pan tara co jin' hwe ta. 29Noro jein wijimain me ma' quem ac caparut na. Om ca hwara' ne dinheiro nein. Mo ta cut 2 xin irin, wijimain e' tara dinheiro nein ca pagar jein capari' waximain, xi iri' carawa ne ta. Ane querec wet cain Cotere' ne. Mo ta noc cain pain ca mi' pin wa, om ca mi' pin ximao ne. 30Ac i ma' nuhu' quem, mam' pe wet cara nuhu', taxi' pi' pin nain oro coxumuhu', taxi' nain tununuhu' pain ca mija nein quem. Querec wet nuhu' quem. 31Je ca tomi' xuhu' ca' ac caparut na. Win ne ca querec wet cain wijimain me ma'. Ane awi tiquin' ca' hwein ca mija nein wijimain me con ne. Je ca tomi' xuhu' ca': Ta jin' huhun oro wari' co quep em' xim nunuhu' ma' me ta na ca tomi' caparut ca'.

32Tomi' ac caparut na: Wari' co tomi' hwet nonon oro win ma' ca pata' pain ca Taramaxicon ne inon Jeju ta cocon pata', ame hwe e'. Main tomi' ca' ton Te co pe pawin cwain: Wari' ne inon co cwa' ta ton con. 33Wari' co tomi' ca' nonon oro win ma' ca ma' iri na ne, pain ca om ca querec pin' ton Jeju ta, om ca Taramaxicon ne ton ta cocon ma', ame hwe e'. Main tomi' ca' ton Te co pe pawin cwain: Om ca wari' ne ton co cwa' ta ton con ta naparut.

34Cain' ca coromicat mao mahu' quem ac caparut na. Ja' tomi' querec te toton nonon oro wari', je ca maqui' cain macan' ca', ac i ma' na ca coromicat nuhu' pata' ra? Ta coromicat ac i ma' hwe me ta. Maqui' iri inain macan' pane ne, mana' caracan ac xucucun na oro wari'. Xi to' i'ina ara toton pain ca pijim' mi' toton pain capijacon Iri' Jam ta. Ma' nana co tomi' querec te nanain, ma' nana co noc nanain quem. Noc ac xucucun na quem. 35Panxica wari' ma', mana' non cote ca pata', xi maqui' ara ta' ta. Ac i ma' na cainacam narima' ma' quem, mana' nam jicam pata'. Ac i ma' na manacon cawinacam ma' quem, mana' nam tamanacam pata'. 36Pain ca nari xequequem ma', noc caracan xequequem pata'. Ac i ma' na ca tomi' caparut.

37Wari' co tomi' querec te tamana non cote ca cam jicon ma', mo ta om tomi' querec te tiquin' ca' capa' cacam, om ca hohot ne pain ca taxipa' capa'. Mo ta tomi' querec te tamana cacam mana panxica wari' ma', mo ta om tomi' querec te tiquin' ca' capa' cacam, om ca hohot ne pain ca taxipa' capa' quem. 38Wari' co ja' ja' xim paxi' napa' ma', mo ta xiram pa' cain curucun pain ca jin' cain ca mi' pin wa pain ca taxipa' capa' ma', om ca hohot ne pain ca taxipa' capa' ma'. 39Wari' co win xumu e' nain ca param pan nucun pain macan' ca', om ta e' cara pe cain pawin. Wari' co miri'om nain ca param pan nucun pain macan' ca' iri na ne, pain ca win xumu e' capa' ma', wirico tara co e' cara pe tain nain pawin ta naparut.

40Wari' co tomi' querec te nuhu' ma', tomi' querec te napa' quem ac caparut na. Wari' co tomi' querec te napa' ma', tomi' querec te non co cwain co hwet roron oro wari' pain macan' ta napa' quem. 41Wari' co tomi' querec te non co pijim' hwet nain capijacon Iri' Jam ma', mo ta tomi' querec te con pain ca pijim' nucun ma', mi' ac tocwa tara pain oro ca awi wa. An tarain co pijim' ma', an ac cain tara co tomi' querec te non ma' quem, je je ari tara carawa ca cut xi' caca. Wari' co tomi' querec te non co xut xo' ma' quem, mo ta tomi' querec te con pain ca xut xo' nucun ma', mi' ac tocwa tara pain oro ca awi wa. An tarain co xut xo' ma', an ac cain tara co tomi' querec te non ma' quem, je je ari tara carawa ca cut xi' caca ta.

42Mo ta ma' ca wari' co xiram pa' non win ma' ca co taxipa' napa' ma'. Xiram pa' inem, xi om ne ca taxipa' ara mon Jeju ta, mo ta tomi' ac i ma' con pain ca xiram pa' con ma', ame hwe e'. Main mi' toron pain ca awi wa Iri' Jam ta. Tomi' iri'o' ina, wijimain paxi' tara carawa ca mi' con win ma' ca ma', am cam mi' e' con pain wijimain ca xio ne com ma', om paxi' tara ca hwara' opa ca win ma' ca co xiram pa' ca ma'. Je i ma' ira, mo ta xiram pa' con, aram aram mi' pan ac con tara pain ca awi wa Iri' Jam ta na ca tomi' caparut Jeju pane.

Currently Selected:

Mateus 10: TBPN

Highlight

Copy