Ruum 3

1Bang soko ono su okon-a ko ono yo su koinginan nu Kinoringan nu so koyuwan-a su kisunat, ado gaam kooliban ong lobuw Yaudi kai, om ado gaam kosudaan nu oturan mai musunat? 2Nga sobana ko osuang kooliban nu lobuw Yaudi. Koido yo po nga ono yo nipongaarap nu Kinoringan tinongaran Niyo so kai. 3Nga pudi pona kuwai inong mai lobuw Yaudi dai mongowaid nu tinongaran nu Kinoringan nipongaarap Niyo oono, tumanon-a nu Kinoringan onu nijanji Niyo nu gulu ri. 4Pudi pona moomudut lobuw so wonuo tu, nga obana ya kiawi' tinongaran nu Kinoringan, soko nokosurat so Buuk nu Kinoringan tangar ni Raja Daud gulu ri nu,

“Oo su Kinoringan!

Obana ya

kiawi' totongaran Mu.

Om dai koponapud lobuw

nu dai musuat gogoma'on Mu,”

koo ri.#Lgu 51:4

5Nga kuwai gaam lobuw mutangar nu, “Ono yo kooraai nu kogoyaan toko no su pointolang so lobuw wokon nu koo'oluk nu Kinoringan. Nadi, bang bana ya ono, dai musuat ong oinsaadan toko nu Kinoringan suat so koraayan toko oono,” koo. Nga itu yo po ombo ya tangar nu lobuw. 6Dai musuat ong mutangar toko nu dai opatut oinsaadan toko nu Kinoringan suat nu koraayan toko, so' okon ko toko ya su oinsaadan Niyo, nga kiawi' lobuw oinsaadan-a Niyo ong wagu.

7Kuwai lobuw wokon mutangar nu, “Owarong momudut toko so' kiat nu ono, oilaan nu lobuw nu dai momudut ong Kinoringan, om royowon sono Iyo nosiro, om mutangar nosiro nu owarong ono om dai otoop ong oinsaadan nosiro suat so poomudut nosiro no,” koo. Dai musuat om olowong totongaran soko ono. 8Bang obana ya totongaron nu lobuw oono, koputangar iyo sono nu, “Gaam nai' momaal toko nu oraai su' kointolang sono ongo wowarong-o,” koo. Kuwai mutangar nu, ono yo su pontudukan ku kolaai, nga dai musuat totongaron nosiro oono. Otoop ong oinsaadan nu Kinoringan lobuw montuduk nu soko ono.

D'ado ido ya momaal nu koinginan

nu Kinoringan

9Monokod kou gaam nu toko lobuw Yaudi, worongon po nu Kinoringan ko' lobuw wokon. Dai musuat ono. Tinudukan ku yo kou nu, kiawi' lobuw, kiat-o so lobuw Yaudi kumoo yo so okon ko Yaudi nga kinuasa nu koraayan. 10Soko iri nokosurat-o so Buuk nu Kinoringan nu,

“D'ado ido koyuwan

d'ado kosola'an,

insan ido nga d'ado.

11D'ado ido koorati

nu onu yo po obana

suat so Kinoringan,

om d'ado ido mongusaa' so Iyo.

12Kiawi' nosiro minulaiw

kiat so Kinoringan,

om kiawi' nga d'ado kosudaan.

D'ado ido momaal nu owarong,”

koo ri.#Lgu 14:1-3; 53:1-3

13“Osaim totongaron nosiro no

om owutong

soko lobong nosukab.

Moomudut nosiro

om opodos totongaran

poinsakit nu inawo nu lobuw,

soko tindukon nu topirik.#Lgu 5:9; 140:3

14Bisigon nosiro lobuw

maid nu totongaran

koinsakit nu inawo.#Lgu 10:7

15Oruoi-ruoi nosiro monginsaad

om momatoi nu lobuw.

16Siombo-ombo ianan nosiro

nga mononsara'

om mongaagut-o po nosiro nu lobuw.

17Om dai moilo nosiro

muwowarong-warong.#Yis 59:7-8

18Dai nosiro mongorumat

nu Kinoringan,”

koo ri.#Lgu 36:1

19Indadi, oilaan toko yo nu onu yo po tinangar so Ukum ni Musa nga niarap so toko lobuw Yaudi, nu kuosaan toko nu Ukum ni Musa oono, om otoop ong mongowaid toko nu kiawi' ponuu'an so Ukum oono. Indadi, dai musuat ong mutangar toko nu dai otoop insaadan toko, so' kiawi' lobuw so wonuo tu nga kikoraayan. 20D'ado ido koyuwan kopuwarong so Kinoringan pudi mongowaid nu Ukum ni Musa. Ido-ido ya tomod nu Ukum ni Musa, ono yo pointolang nu bana ya nu kikoraayan toko.#Lgu 143:2; Gal 2:16

Gama' toko kopuwarong so Kinoringan

21Nga, kosiono nopotuduk-o Kinoringan so toko nu gama' toko kopuwarong so Iyo, om pontudukan Niyo oono d'ado ya kopukowitan nu Ukum ni Musa, pudi pona iri yo Ukum ni Musa om ongo buuk sinurat nu poo'abar gulu ri su pointolang nu pontudukan nu Kinoringan oono, 22ono yo, tokodon nu Kinoringan nu kopuwarong toko so Iyo ong poimaid toko so si Yisus Kristus. Isai yo po nga kopuwarong so Kinoringan ong poimaid so si Yisus Kristus, lobuw ka nu Yaudi ko' okon ko Yaudi, so' Kinoringan-o po dai mominig nu lobuw.#Gal 2:16

23Kiawi' lobuw nga kikoraayan, om orawu' kiat so Kinoringan, ono moingin monapul so toko no. 24Nga kiat so koowarong nu Kinoringan, tinorima' toko sono Niyo nu soko dai insan kikoraayan. Om okon ko kiat so koo'ilo toko, nga si Yisus Kristus-o su nopolabus so toko kiat so koraayan oono.

25Si Kristus-o po tinantu nu Kinoringan nu matoi, su' kiat so kinopotoyan om kinotuntugan nu raa' Niyo ri, ompunon sono nu Kinoringan koraayan toko ong poimaid toko so si Yisus Kristus. Waalon nu Kinoringan soko ono tayon Niyo ong oilaan toko nu ooluk pongukuman Niyo, pudi pona otaan Iyo om dai osikap mongukum so toko. 26Nga pagka subai kuwai ponginsaadan suat so koraayan nu ongo lobuw so wonuo tu, ono yo ko' nipoinsaad nu Kinoringan si Yisus. Kiat nu ono, oilaan toko nu ooluk pongukuman nu Kinoringan, om kopuwarong sono so Iyo isai yo po poimaid so si Yisus.

27Indadi bang soko ono, dai toko kopongondos nu onu yo po. Dai koputangar toko nu, kopuwarong toko so Kinoringan so' mongowaid toko nu Ukum ni Musa, nga torima'on toko nu Kinoringan kiat so koimaidan toko so si Yisus Kristus. 28Pagka soko ono, mutangar aku nu, kopuwarong toko so Kinoringan kiat so koimaidan toko so Iyo. 29Nga kuwai gaam lobuw mutangar nu, lobuw-a nu Yaudi su ipatan nu Kinoringan. Dai obana ono, so' Iyo yo su mongipat nu lobuw Yaudi om okon ko Yaudi. 30Pagka ido-ido ya Kinoringan, kopuwarong lobuw Yaudi so Iyo ong poimaid nosiro so si Yisus Kristus, om soko ono ya pudi lobuw okon ko Yaudi.#Pom 6:4; Gal 3:20 31Indadi mutangar aku nu, kiat-a so koimaidan toko so si Yisus su kopuworongan toko so Kinoringan. Nga okon ko soko ono yo po tangar ku, d'ado yo sono kosudaan toko nu Ukum ni Musa, so' kiat so koimaidan toko ono, kopongowaid toko sono nu Ukum.

Currently Selected:

Ruum 3: TomPWPgLgPn

Highlight

Copy