Ruum 10
10
1Oo su kosusulodan ku inong koimaidan, moingin aku sobana nu osopulan ongo lobuw inong ku bansa Yaudi, om ono yo su indomoon ku so Kinoringan. 2Oilaan ku nu sobana ko mogkari'-kari' nosiro maid so Kinoringan, nga pudi pona soko ono, ado kosudaan nu ono so nosiro so' dai oilaan nosiro koinginan nu Kinoringan. 3Pagka dai oilaan nosiro ong onu koo kopuwarong so Kinoringan nu musuat-o so koinginan Niyo, maid sono nosiro nu gama' wokon, ono yo mongowaid nu Ukum ni Musa. Indadi, pagka moingin nosiro maid nu gama' nosiro kondiri, dai sono nosiro musimbaba' musuat nituduk nu Kinoringan oono. 4Koompusan nu gogoma'on ni Kristus, d'ado yo sono kosudaan mongowaid nu Ukum. Indadi, isai poimaid so Iyo, kopuwarong-o sono so Kinoringan.
Kiawi' lobuw poimaid taakan
nu kowiawan
5Minonurat si Musa so ongo lobuw mokimuwarong so Kinoringan nu gama' mongowaid nu Ukum nu, “Isai mongowaid nu Ukum, om ado ido dai waidon niyo, miau iyo musingkolaid maid so Kinoringan,” koo ri.#Ot 18:5 6Nga itu yo su totongaron nokosurat suat so ongo lobuw kopuwarong so Kinoringan, iri koimaidan so si Kristus su kopuworongan nu, “Dai musuat ong momikir kou nu, kopuwarong lobuw so Kinoringan ong kuwai lobuw mian so surga mongowit so si Kristus muntiba. 7Om dai musuat ong momikir kou nu kopuwarong lobuw so Kinoringan ong kuwai lobuw mian so polak nu lobuw minatoi mongoluli' so si Kristus,” koo ri. 8Nga itu yo su tinongaran ni Musa suat so gama' kopuwarong so Kinoringan nu, “Oruoi sobana ong poimaid kou nu tinongaran nu Kinoringan. Poimaid kou nu tinongaran oono om polombus so lobuw wokon,” koo ri. Ono yo su tinongaran nu Kinoringan nituturan mai, nu subai poimaid lobuw so si Kristus.#Pom 30:12-14 9Om bang paabar toko nu si Yisus-o su Tuhan, om sobana ko poimaid nu noluli'an Iyo nu Kinoringan, kolabus toko kiat so koraayan toko om kopuwarong sono nu Kinoringan. 10Kiat so poimaid toko so inawo, kopuwarong toko sono nu Kinoringan, om paabar toko suat so koimaidan toko, om taakan sono nu kowiawan musingkolaid. 11Itu yo su nokosurat so Buuk nu Kinoringan nu, “Isai poimaid so si Yisus, dai oiman-iman ong wagu,” koo ri.#Yis 28:16 12Ourug ono so kiawi' lobuw, so' Tuhan-o yo po dai moominig, lobuw ka nu Yaudi intawa okon ko Yaudi. Ido-ido ya Kinoringan om Iyo yo su Tuhan nu kiawi' lobuw, om tobangon-a Niyo isai yo po mokitabang so Iyo. 13Soko tangar nu Kinoringan nokosurat nu, “Isai mokitabang so TUHAN, iyo yo su taakan nu kowiawan musingkolaid maid so Iyo,” koo ri.#Yl 2:32
14Nga dai kopokitabang lobuw so Tuhan Yisus Kristus ong dai po nosiro poimaid so Iyo. Om dai po poimaid lobuw so Tuhan ong dai po korongou nu abar suat so Iyo. Om dai korongou lobuw suat so Iyo ong ado lobuw paabar. 15Om dai kopongaabar lobuw ong d'ado monuu' so iyo. Soko tangar nu Kinoringan nokosurat nu,
“Sobana ko owarong
kologa'an nu ongo lobuw
potuturan nu Abar Owarong
suat so gogoma'on nu Kinoringan
monabang so toko,”
koo ri.#Yis 52:7 16Nga okon ko kiawi' lobuw poimaid nu Abar Owarong suat so si Kristus, so' nokosurat-a tinongaran ni Yisaya, poo'abar nu Kinoringan-i nu, “Oo TUHAN, osuang lobuw dai poimaid nu abar nituturan mai no,” koo ri.#Yis 53:1 17Indadi, tadi' ya poimaid lobuw ong korongou-o nosiro nu pontudukan nu obana, om tadi' ya korongou lobuw nu pontudukan obana oono ong kuwai lobuw potuturan nu ono, ono yo pontudukan obana suat so si Kristus.
18Kuwai gaam lobuw mutangar nu, “Dai nopoimaid ongo lobuw Yaudi so' dai insan opirongou nosiro Abar Owarong oono,” koo, nga nokorongou-o bo nosiro, so' nokosurat-o so Buuk nu Kinoringan nu,
“Nokolongkop-o so wonuo tu
tinongaran nosiro,
om pontudukan nosiro no
nga nokologa' yo
so isan nu tana' tu,”
koo ri.#Lgu 19:4
19Nga bang sumambut lobuw nu, “Dai gaam nokoorati lobuw Yaudi nu kodau kiat so Kinoringan suat so si Kristus,” koo, tongaron ku sono iyo nu, tantu nokoorati yo bo nosiro nu ono, so' togna ri si Musa yo su minutangar nu nokoorati yo lobuw Yaudi nu kodau nu Kinoringan so' nokosurat-o tinongaran nu Kinoringan so Buuk Niyo nu,
“Popomoingaon Ku kou nu bansa
tokodon muyu nu okon ko
bansa pinili' Ku,
om poungoton Ku kou so bansa
tokodon muyu
nu dai koorati no,”
koo Kinoringan.#Pom 32:21
20Om opogi si Yisaya mutangar polombus nu tinongaran nu Kinoringan nu,
“Nooyangan Aku yo nu lobuw
dai modium so Aku,
om minintolang Aku yo so lobuw
dai mongoduat
suat so Aku no,”
koo Kinoringan.#Yis 65:1
21Nga suat so bansa Israil, minutangar si Yisaya nu, “Oowianan Aku maau-paau nu bansa dai mongkinongou om okosog oono,” koo ri.#Yis 65:2
Currently Selected:
Ruum 10: TomPWPgLgPn
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
