Lukas 4

Kininaman si Yisus

(Mat 4:1-11; Mrk 1:12-13)

1Nokouli' yo po si Yisus kiat so Bowang Yurdan, kinuasa sono Iyo nu Atod nu Kinoringan, owito yo Iyo nu Atod oono so padang pantai solaid opat nopulu runat. 2Iri yo su notatad Niyo dai minongokan nu onu-onu ya om winitilon sono. Om dii yo pinonginaman so Iyo nu Wowaidon nu Moinat.

3Tongaro yo Iyo nu Wowaidon nu Moinat-i nu, “Bang bana nu Anak Ko nu Kinoringan, popusiliwo yo ongo watu iitu nu baang-baang,” koo.

4Sumombuto yo si Yisus nu, “Nokosurat-o so Buuk nu Kinoringan nu, ‘Okon ko ookanon-a su kowiau nu lobuw tu,’ koo ri,” koo.#Pom 8:3

5Nopupus iri, owito yo si Yisus nu Wowaidon nu Moinat-i so timpak nu ido bulud, om pinosiou niyo si Yisus sontagal nu onu yo po so wonuo tu, 6om tongaro nai' nu Wowaidon nu Moinat-i nu, “Kiawi' nosiou Mu oono itaak ku so Ikau, so' nitaak-o ono so aku, om opogboya'an ku yo ono potaak so isai-isai ya koinginan ku potaak. 7Kiawi' oono osongapan Mu ong usaa'on Mu aku,” koo.

8Sumombuto yo si Yisus nu, “Nokosurat-o so Buuk nu Kinoringan nu, ‘Ido-ido ya TUHAN, ono yo Kinoringan mu kowasa usaa'on mu, om ono yo koinginan Niyo no su waidon mu,’ koo ri,” koo.#Pom 6:13

9Owito yo si Yisus nu Wowaidon nu Moinat-i so bandar Yirusalim om pinotimpak so limboungan nu Waloi Maayo nu Kinoringan-i, om tongaro yo nu, “Bang bana nu Anak Ko nu Kinoringan, tuun-o so tana' no, 10so' nokosurat-a so Buuk nu Kinoringan nu,

‘Suu'on nu Kinoringan

ongo susuu'on Niyo no

popongipat so ikau.

Soludon ko ya nosiro

nu palad nosiro no,#Lgu 91:11

11su' dai kosondot

akod mu no so kowotuan,’

koo ri,” koo Wowaidon nu Moinat-i.#Lgu 91:12

12Sumombuto yo si Yisus nu, “Nokosurat-a so Buuk nu Kinoringan nu, ‘Ikod-o ponginam nu TUHAN, ono yo Kinoringan mu,’ koo ri,” koo.#Pom 6:16

13Notopodan-o po Wowaidon nu Moinat-i monginam so si Yisus soko iri, laiwi ya sono Iyo nu Wowaidon nu Moinat-i, om mongindad nu iya owarong pululi'an monginam so Iyo.

Tinumimpuun-o si Yisus mugogoma'on

so Galilia

(Mat 4:12-17; Mrk 1:14-15)

14Mululio yo si Yisus so Galilia om kinuasa nu Atod nu Kinoringan. Nokolongkop-o sono dii tuturan suat so Iyo. 15Montuduko yo Iyo nu kolobuwan so ongo waloi sosombooyangan, om rinayou Iyo nu kiawi' lobuw.

Tinulak si Yisus so Najarit

(Mat 13:53-58; Mrk 6:1-6)

16Miano yo si Yisus so Najarit, so tontong kinosukodan Niyo ri, om minian so waloi sosombooyangan-i nu Runat Pongintoronan, soko koopotan. Minundii Iyo mongobasa' nu Buuk nu Kinoringan. 17Taaki yo so Iyo buuk, iri sinurat ni Yisaya poo'abar nu Kinoringan gulu ri, om noyoyak-o po Niyo, nololagan-o Niyo totongaron iitu nu,

18“Kinuasa Aku

nu Atod nu Kinoringan,

so' pinili' Aku yo Niyo

potuturan nu abar owarong so lobuw omiskin.

Sinuu' Aku Niyo

monuturan so lobuw

ong onu koo gama' rumorogo momaal nu koraayan.

Sinuu' Aku popomali'

nu lobuw bolou,

om monapul nu lobuw

kiat so alod-alod nosiro,

19om paabar nu iya nu Kinoringan

powiau nu lobuw songapan Niyo,”

koo.#Yis 61:1-2

20Luluno yo koimbagu ni Yisus buuk iiri om ulii yo Niyo so moomugogoma'on-i, om mogomo yo Iyo.#4:20: Iya oono, mogom ongo lobuw Yaudi ong montuduk. Kiawi' lobuw so waloi sosombooyangan-i minomontong so Iyo. 21Tumimpuuno yo si Yisus mutangar so nosiro nu, “Runat iitu, notuman-o tinangar so Buuk nu Kinoringan iitu, iya nu norongou muyu ono,” koo.

22Owarong sobana totongaron Niyo iiri, sampai noondayan nosiro om poimbana so Iyo. Minutangar sono nosiro nu, “Okon-a ka ko anak Iyo ni Yusup?” koo.

23Mutongaro yo sono si Yisus nu, “Tantu sinsiriban iitu yo poinongan muyu so Aku nu, ‘Oo duktur, pusimpali' yo,’ koo kou. Om mutangar kou ya nu, ‘Onu-onu norongou mai winaal Mu so Kapornaum, waalo ya pudi tuui so inungkiaton Mu tu,’ koo kou,” koo.

24Mutongaro po si Yisus nu, “Ondomo muyu yo nu, koduung poo'abar nu Kinoringan, dai imaidon so inungkiaton niyo.#Yns 4:44 25Ondomo muyu, iya ni Ilia, ono yo poo'abar nu gulu ri, osuang balu so wonuo nu Israil. Iya iiri minondab tolu notoun om putonga', om lobuw-i landu osimpit nu mookan.#1 Raj 17:1 26Soko iri pona, dai ya sinuu' nu Kinoringan si Ilia poian so ido pona balu bansa Israil-i, ala' nai' sinuu' Niyo si Ilia poian so ido balu okon ko Yaudi, so Sarapat, so wonuo nu Sidun.#1 Raj 17:8-16 27Soko iri ya, osuang lobuw bolangon so wonuo nu Israil nu iya ni Ilisa, nga d'ado ido so nosiro nopoli'an, sondiang ko ido yo koyuwan, nga lobuw nu Siria, ngaran niyo si Naaman,” koo si Yisus.#2 Raj 5:1-14

28Kiawi' lobuw so waloi sosombooyangan iiri minungot nu norongou tinangar Niyo suat nu poo'abar nu Kinoringan gulu ri monabang nu lobuw okon ko Yaudi. 29Mogtuui minundii nosiro om sinusub si Yisus polaiw, om inowit nosiro so timpak nu bulud opangkat, padu nipulid so piroung-i, 30nga sinumiat-a Iyo so puola'an nosiro ri mulaiw.

Lobuw sinorungan nu moinat

(Mrk 1:21-28)

31Noopod iri, miniano sono si Yisus so Kapornaum, ido bandar so wonuo nu Galilia. Minontuduk Iyo nu kolobuwan dii nu Runat Pongintoronan. 32Noiranan kolobuwan-i nu poomontuduk Niyo, so' kiawi' totongaron Niyo ri kikopogboya'an.#Mat 7:28-29

33So waloi sosombooyangan iiri, kuwai ido koyuwan sinorungan nu moinat. Lumuapo yo lobuw iiri nu,

34“Uui Yisus lobuw Najarit, onu ka waalon Mu so kai? Mongobinasa Ko bo gaam so kai komoinatan. Otondu'an ku ya Ikau. Ikau-o su osusi sinuu' nu Kinoringan,” koo.

35Luapi yo ni Yisus moinat sinumarung iiri nu, “Ukokop-o! Pulaiw-o so lobuw iitu!” koo. Pinokurasai po nu moinat-i koyuwan nu lobuw iiri so tiningkuangon nu lobuw suang-i om inuyud-a mulaiw, nga dai yo pinosokitan lobuw oono.

36Kiawi' lobuw-i noiranan, om mutotangar-tangar nu, “Okon ko nogina-gina tinangar Niyo ri. Kikopogboya'an om kikuasa Iyo monusub nu komoinatan om lumabus sono nosiro!” koo. 37Nokolongkop-o sono tuturan suat so si Yisus dii.

Minomali' si Yisus nu osuang lobuw

(Mat 8:14-17; Mrk 1:29-34)

38Mulaiwo yo si Yisus so waloi sosombooyangan-i om miano yo so waloi ni Simun. Iya oono tumogom iwan ni Simun, om niabar-o iri nu kolobuwan-i so si Yisus. 39Miano yo Iyo so obi' nu woinoi sumakit iiri, om polio yo Niyo togom-i. Linumiong-o sono togom nu woinoi-i, om mogtuui tinumungag pookan om poinum so nosiro.

40Lumidop su runat, osuang lobuw minongowit nu suku-sakat dai kaatu' ri mian dii si Yisus. Topopo yo Niyo ulu nosiro ri soro ido-ido om momali' nu rorooton nosiro ri. 41Minulaiwo sono moinat sinumarung so lobuw iiri maid nu monsok-gonsok nu, “Ikau-o Anak nu Kinoringan!” koo.

Nga pinogos ni Yisus nosiro poputangar, so' noilaan-o nosiro nu Iyo yo Raja Nijanji nu Kinoringan.

Minontuduk si Yisus so Galilia

(Mrk 1:35-39)

42Pogsusuab, mulaiwo yo si Yisus kiat so bandar iiri, om miano yo so tontong oyiyingo, nga dinium-a Iyo nu kolobuwan-i. Nooyangan-o po Iyo nosiro, mindomoo yo nosiro nu dai polaiwon kiat dii so nosiro. 43Nga tongaro yo ni Yisus nosiro nu, “Subai lumongkop Aku ya so tontong wokon, potuturan so kiawi' lobuw nu Abar Owarong, nu oduruk-o mogkuasa Kinoringan soko raja, so' ono yo ponuu'an nu Kinoringan s'Aku,” koo.

44Lumongkopo yo sono si Yisus potuturan nu Abar Owarong so waloi sosombooyangan so Yudia.

Currently Selected:

Lukas 4: TomPWPgLgPn

Highlight

Copy