Yuanis 19

1Mosuwo yo si Pilatus om monuuo yo nu ongo soujar popongolubak so si Yisus. 2Minomaal nosiro nu tolungas wakau kiruwi, om sumboli yo nosiro so ulu ni Yisus. Noopod iri, popusobungo yo Iyo nu sabung mongkomiang-miang, 3om muuli'-uli' nosiro dii si Yisus musingkoorumat-orumat nu, “Mogkuasa yo musingkolaid raja nu lobuw Yaudi!” koo. Noopod iri, sompako yo Iyo nosiro.

4Lumobuso po si Pilatus om tongaro yo lobuw suang-i nu, “Siowi muyu yo! Polobuson ku Iyo su' oilaan muyu nu d'ado ya noimpa'an ku kosola'an Niyo,” koo. 5Lumobuso yo sono si Yisus minomakai nu tolungas kiruwi om sabung mongkomiang-miang. Mutongaro yo si Pilatus so nosiro nu, “Siowi muyu yo lobuw oono!” koo.

6Nosiou-o po si Yisus nu ongo wowaidon nu imam om moongipat-i, gumonsoko yo nosiro nu, “Solibon Iyo! Potoyon Iyo!” koo.

Mutongaro yo si Pilatus so nosiro nu, “Olapo muyu yo Iyo, om solibi muyu ya. D'ado ya ong aku noimpa'an kosola'an Niyo,” koo. 7Sumombuto yo lobuw suang-i nu, “Mongowaid nu oturan nu ugama mai, subai potoyon Iyo so' minutangar Iyo nu Anak Iyo nu Kinoringan,” koo. 8Norongou-o po ni Pilatus tinangar nosiro iiri, sumundur po iyo lumaa'. 9Mosuwo yo iyo koimbagu om noowit-o po si Yisus masuw, duato yo niyo nu, “Siombo ka inungkiaton Mu?” koo.

Nga dai ya sinumambut si Yisus. 10Indadi mutongaro po si Pilatus nu, “Dai Ko ka moingin mokimutangar-tangar so aku? Ondomo yo nu kikopogboya'an aku polabus intawa posalib so Ikau,” koo.

11Sumombuto yo si Yisus nu, “Dai ya kopogbaya' ko so Aku ong okon ko Kinoringan su popogbaya' so ikau. Ungkiat-o nai, lobuw pokomouli' so Aku tuui so ikau-o su maayo po koraayan ko' ikau,” koo.

12Norongou-o po iri ni Pilatus, moingin po bana iyo polabus so si Yisus. Nga gumonsoko yo ongo lobuw Yaudi ri nu, “Bang nilabus mu Iyo, alod-alod ko sono ni Raja Maayo nu Ruum. Isai musingkoraja-raja, alod-alod iyo ni Raja Maayo,” koo.

13Norongou-o po iri ni Pilatus, owito yo niyo si Yisus lumabus om mogomo yo so oogoman moongobisara' so tontong ingoranan nu Pontaan Watu (bang so tangar Yaudi ingoranan nu Gabata). 14Iya iiri, oduruk-o mirotu om runat iiri yo putimos-timosan suat nu Rami-Rami Paska. Tongaro yo ni Pilatus lobuw Yaudi ri nu, “Tudi yo raja muyu tu,” koo.

15Songgonsok-gonsok sono nosiro nu, “Solibon Iyo! Potoyon Iyo!” koo.

Duato yo ni Pilatus nosiro nu, “Patut ka solibon ku Raja muyu tu?” koo.

Sumombuto yo ongo wowaidon nu imam-i nu, “Si Raja Maayo ya su raja mai,” koo.

16Pagka soko iri, komoulii yo ni Pilatus si Yisus so nosiro nu solibon.

Nisalib si Yisus

(Mat 27:32-44; Mrk 15:21-32; Luk 23:26-43)

Olapo yo sono nosiro si Yisus, 17om owito yo Iyo lumabus kiat so bandar pinoponimban nu salib Niyo, mian so tontong ingoranan nu, “Popolakan nu Doupuk”,#19:17: Doupuk; intawa: duakup bang so tangar nu Yaudi ingoranan Gulguta. 18Dii yo pinosoliban nosiro so si Yisus. Om kuwai ya duo koyuwan sondiang ko Iyo nisalib so musompodi Niyo ri. 19Minonuu' si Pilatus pokapit nu surat so kayu pinosoliban so si Yisus soko itu,

Itu Yo Si Yisus

Kiat So Najarit,

Raja Nu Lobuw Yaudi.

20Osuang-a lobuw Yaudi malib-talib nokobasa' nu surat iiri, so' orani ya so bandar pinosoliban so si Yisus iiri. Surat nikapit iiri sinurat so tangar Yaudi, tangar Ruum, om tangar Yunani.#19:20: Ibrani yo po tangar nu lobuw Yaudi, Latin-o po tangar nu lobuw Ruum, om Yunani tangar nu lobuw Yunani. 21Tongaro yo si Pilatus nu wowaidon nu imam-i nu, “Kodi yo surati nu, ‘Raja nu lobuw Yaudi’, nga surati yo nu, ‘PinokoRaja Iyo nu lobuw Yaudi’, koo yo ya,” koo.

22Nga sumombuto yo si Pilatus nu, “Onu yo po nokosurat ku no yo, dai yo pindaan,” koo.

23Nokosalib-o po nu ongo soujar-i si Yisus, olapo yo nosiro pokakas Niyo ri om boogio yo nosiro opat. Olapo po nosiro sabung Niyo olanggau, d'ado wilit-i. 24Mutotongaro yo nosiro nu, “Kodi toko yo pisio sabung iitu, nga musuus#19:24: Gama' yo po nosiro musuus, momakai nu watu kitanda' mongilo ong isai su komanang. toko ya ong isai kosongapan,” koo. Nourug soko iri tayon ong otuman iri nokosurat so Buuk nu Kinoringan-i nu,

“Puboboogi'an nosiro

pokakas Ku no,

om musuus nosiro

pongilaan ong isai kosongapan nu sabung Ku no,”

koo ri. Om soko iri yo winaal nu ongo soujar iiri.#Lgu 22:18

25Nga mundii-dii so obi' nu salib ni Yisus ino om kominan Niyo ri, om si Maria sawo ni Kulupas, om si Maria Magdalina. 26Nosiou-o po ni Yisus ino Niyo om aku, mompomaid kosomodan bana Niyo, tongaro yo Niyo ino Niyo ri nu, “Oo Ino, itu yo su anak mu,” koo.

27Om tinangar aku ya Niyo nu, “Itu yo su ino Mu,” koo. Kiat-o nu iri poogolo ku yo ino ni Yisus so waloi ku ri.

Kinopotoyan ni Yisus

(Mat 27:45-56; Mrk 15:23-41; Luk 23:44-49)

28Noilaan-o ni Yisus nu noopod-o Niyo kiawi' gogoma'on Niyo ri, om tayon ong otuman tinangar so Buuk nu Kinoringan, mutongaro yo sono Iyo nu, “Lugangon Aku,” koo.#Lgu 69:21; 22:15

29Kuwai dii ido mangkuk kiasuw nu sungoi nu anggur mousom. Poloobo yo nosiro nu golugut so mangkuk iiri, om tonongi yo nosiro so pompod nu kayu om suloyi yo so munung Niyo ri. 30Nososop ni Yisus sungoi nu anggur iri, mutongaro yo Iyo nu, “Noopod-o,” koo.

Nopupus iri, tinumuku ya Iyo om minatoi-o sono.

Tinuda' Obik ni Yisus

31Dai moingin ongo wowaidon nu lobuw Yaudi ri ong olaid mawid-tawid bangkai nu lobuw nisalib-i om otaiwan nu Runat Pongintoronan. Makin-o po Runat Pongintoronan nu iya iiri oogot po ko' koopotan. Pagka runat pinosoliban so si Yisus runat kolimo, mokililaa yo ongo lobuw Yaudi ri so si Pilatus nu podangon akod nu ongo lobuw nisalib-i tayon ong osikap matoi, om niuntiba yo sono. 32Indadi miano yo soujar-i momodang gulu po nu akod nu duo koyuwan nisalib so musompodi ni Yisus. 33Nga nokologa' yo po nosiro dii so Iyo, siowi nosiro su minatoi-o Iyo, indadi dai yo sono pinodang nosiro akod Niyo ri, 34nga tudaa yo nu ido koyuwan soujar-i obik Niyo ri nu bangkau, om minusit sono su raa' mugawul nu sungoi. 35(Aku yo su nokosiou nu noongourug iiri, om nituturan ku ono so kou tayon Ku ong poimaid kou. Tuturan ku oono obana, om oilaan ku nu obana ya ono). 36Ono yo ko' nourug soko oono tayon ong otuman iri nokosurat so Buuk nu Kinoringan-i nu, “D'ado ido ya opodang nu tulang Niyo no,” koo ri.#Kin 12:46; Pong 9:12; Lgu 34:20 37Kuwai ya wokon nokosurat so Buuk nu Kinoringan nu, “Osuang lobuw kosiou so Iyo, ono tinuda' nosiro no,” koo ri.#Ja 12:10; P'tolang 1:7

Nilobong si Yisus

(Mat 27:57-61; Mrk 15:42-47; Luk 23:50-56)

38Nopupus iri, mokililaa yo si Yusup, lobuw kiat so bandar Arimatia so si Pilatus nu olapon bangkai ni Yisus. Iyo nga mompomaid-a ni Yisus, nga dai ya nipokoilo so lobuw suang so' lumaa' iyo nu wowaidon nu lobuw Yaudi ri. Pagka linila'an-a iyo ni Pilatus, olapo yo sono niyo bangkai ni Yisus. 39Si Nikudimus, iri baya' linumoga' dii si Yisus nu awi, nga minaid-a so si Yusup. Minongowit iyo kiro-kiro tolu nopulu kilu nu kolonungan ingoranan nu muur om garu.#19:39: Koosuang om kootaas nu kolonungan oono, soko ponondu'an nu otoroido inawo mugogoma'on suat so si Yisus (muur om garu: Siowan Kamus Kitab).#Yns 3:1-2 40Olapo yo nu duo koyuwan iiri bangkai ni Yisus om soluyo yo nu koukuputi maid nu kolonungan-i, so' ono yo su adat nu lobuw Yaudi suat so mongolobong. 41Dii so pinosoliban so si Yisus, kitonoman. Tonoman iiri, kiuang nu watu koowaal-a om dai po insan opongolobongan. 42Lobongi yo sono nosiro dii bangkai ni Yisus so' iri yo su orani, om susuab koimbagu no, Runat Pongintoronan nu lobuw Yaudi.

Currently Selected:

Yuanis 19: TomPWPgLgPn

Highlight

Copy