Yuanis 1

Si Yisus-o su Tinongaran nu Kinoringan minusiliw nu lobuw

1Dai po nowaal wonuo tu ri, kuwai yo iri Tinongaran nu Kinoringan. Tinongaran oono muido-ido yo nu Kinoringan om muinong-a nu Kinoringan. 2Kiat po nu timpuun-i muido-ido yo Kinoringan om Tinongaran oono. 3Iyo yo su pinakai nu Kinoringan momaal nu kiawi' pinuwaal Niyo, om d'ado songginis pona ourug so wonuo tu ong d'ado Iyo. 4Iyo yo su impuunon nu kowiawan#1:4: Iyo yo su impuunon nu kowiawan; intawa: Onu yo po pinuwaal, miau so' kopuido so Iyo. musingkolaid. Om kowiawan oono yo su soko onawau tumogu' so kotuongan nu pomikiran nu lobuw. 5Onawau oono kotogu' so kotuongan nu wonuo tu, om kotuongan dai kaalib nu onawau oono.

6Ido koyuwan sinuu' nu Kinoringan, ingoranan so si Yuanis#Mat 3:1; Mrk 1:4; Luk 3:1-2 7linumoga' paabar so lobuw suat nu onawau oono, tayon ong kiawi' lobuw korongou om poimaid. 8Okon ko si Yuanis su onawau oono, nga potuturan-a iyo nu ono. 9Linumoga' onawau obana so wonuo tu monogu' nu pomikiran nu lobuw.

10Tuui-tuui yo Iyo so wonuo tu, om Iyo yo su minongowangun nu wonuo tu, nga lobuw so wonuo tu dai kotondu' so Iyo. 11Linumoga' Iyo so bansa Niyo, nga osuang lobuw bansa Niyo dai poimaid so Iyo. 12Nga isai monorima' om poimaid so Iyo, taakan-a Niyo nu kopogboya'an osiliw nu inonakan nu Kinoringan. 13Osiliw nosiro nu inonakan Niyo okon-a ko puonakon nu lobuw, nga Kinoringan su mongurug so nosiro nu inonakan Niyo.

14Tinongaran nu Kinoringan oono minusiliw nu lobuw owarong om obana om minogol tuui so toko. Nosiou toko yo kobontugan Niyo, iri nitaak nu Kinoringan so Iyo, so' ido-ido ya Iyo Anak nu Kinoringan.

15Nopotarang si Yuanis so lobuw suang suat so Iyo nu, “Itu yo lobuw tinangar ku so kou nu, ‘Sumusuut so aku lumoga' nu oogot po ko' aku, so' dai po su nopuanak, kuwai yo Iyo,’ ” k'aku ri.

16Pagka sobana ko owarong Iyo, d'ado pupus Niyo mongoborakat so toko. 17Si Musa sinuu' nu Kinoringan monaak nu Ukum so ongo lobuw, nga si Yisus sinuu' Niyo mongoluluud so toko om obana ya kiawi' totongaron Niyo. 18D'ado po ido nokosiou-o nu Kinoringan, nga si Yisus, iri ido-ido Anak nu Kinoringan su pointolang nu Kinoringan so toko, so' dadan Iyo mido-ido so Amo Niyo.

Nopotarang si Yuanis Moongodiu'

ong isai iyo

(Mat 3:1-12; Mrk 1:1-18; Luk 3:1-18)

19Minonuu' lobuw Yaudi kiat so Yirusalim nu imam om lobuw Liwi ri mongoduat so si Yuanis nu, “Isai ko ka itu?” koo.

20Bontolo ya niyo sumambut nu, “Okon po ko aku su Raja Nijanji nu Kinoringan#1:20: Raja Nijanji nu Kinoringan, ono yo, Masias. Siowan Kamus Kitab. iiri,” koo. 21Mongoduato yo nosiro nu, “Bang soko ono, isai ko? Si Ilia ko gaam?” koo nosiro.#Pom 18:15,18; Mal 4:5

Sumombuto yo si Yuanis nu, “Okon-a,” koo.

“Ikau-o gaam iri Poo'abar wokon#1:21: Poo'abar wokon, ono yo orap-orapon nu lumoga' potuturan suat so kologa'an nu Poowiau, ono yo Raja Nijanji nu Kinoringan. nu Kinoringan,” koo nosiro.

“Okon-a,” koo iyo. 22“Obari kai yo ong isai ko su' moilaan mai paabar so lobuw minonuu' so kai ri,” koo nosiro. 23Sumombuto yo si Yuanis nu, “Aku yo iri maau-paau so padang pantai nu, ‘Tulido yo lalan nu TUHAN!’ soko iri tinangar ni Yisaya,” koo iyo.#Yis 40:3 24-25Mongoduato po sinuu' nu lobuw Parisi ri so iyo nu, “Bang okon-a ko ikau su Raja Nijanji nu Kinoringan, intawa si Ilia, intawa Poo'abar wokon nu Kinoringan, nokuro su mongodiu' ko nu lobuw?” koo.

26Sumombuto yo iyo so nosiro nu, “Mongodiu' aku nu lobuw sungoi su pokayon, nga kuwai po ido koyuwan nai so kou nu dai muyu otondu'an. 27Sumusuut Iyo so aku lumoga' nga obantug po Iyo ko' aku, om insan monguyad nu tali nu kasut Niyo no nga dai su otoop,” koo.

28Pinutongaran-o po niyo nu ono kiawi' dii so Bitania so sondipawon nu Bowang Yurdan, iri pinongodiu'an niyo nu lobuw-i.

Moongidu' nu koraayan nu lobuw

29Susuab-i nosiou-o ni Yuanis si Yisus lumoga' dii so iyo. Mutongaro yo iyo nu, “Siowi muyu yo! Iyo yo su Anak nu Dumba#1:29: Anak nu Dumba: Siowan Kamus Kitab. sinuu' nu Kinoringan mongidu' nu koraayan nu lobuw so wonuo tu! 30Iyo yo iri tinangar ku nu sumusuut so aku lumoga', nga oogot po Iyo ko' aku, so' dai po su nopuanak, kuwai yo Iyo. 31Togna ri dai po su kotondu' so Iyo, nga linumoga' aku mongodiu' nu sungoi pokayon su' otondu'an Iyo nu lobuw Israil,” koo.

32Om mutongaro po si Yuanis nu, “Nokosiou aku nu Atod nu Kinoringan#1:32: Atod nu Kinoringan: Ong kolompukan mutangar, Atod Osusi (Roh Kudus). kiat so langit sinumorupa nu asang, sinumangkad so ulu Niyo ri. 33Iya iiri dai ku po notondu'an ong isai Iyo, nga kinodawan aku nu Kinoringan, iri minonuu' so aku popongodiu' so Iyo momakai nu sungoi-i nu, ‘Bang kosiou ko nu ido koyuwan untibaan nu Atod nu Kinoringan, Iyo yo ono su monuu' nu Atod Niyo mogkuasa so kou,’ koo Kinoringan. 34Aku yo kondiri nokosiou nu tinuturan ku iitu, om mongaabar aku so kou nu Iyo yo su Anak nu Kinoringan,” koo si Yuanis.

Mompomaid togna ni Yisus

35Koduo runat-i, kakal po dii si Yuanis om duo mompomaid niyo ri. 36Nosiou-o po niyo si Yisus tumalib, mutongaro yo iyo nu, “Siowi muyu yo Iyo, ono Anak nu Dumba#1:36: Anak nu Dumba: Siowan Kamus Kitab. sinuu' nu Kinoringan-o!” koo.

37Kiduo-duo nu mompomaid niyo ri nga nokorongou nu tinangar niyo iiri, indadi, maido yo sono nosiro so si Yisus. 38Kumowiio si Yisus su muut-suut nosiro so Iyo. Duato yo sono Niyo nu, “Onu ka diumon muyu?” koo.

Sumombuto yo nosiro, “Oo Rabi, siombo ka pinolakan Mu?” koo. (Orati nu rabi so tangar Ibrani, “moomontuduk”.)

39“Tuui kou yo, om siowi muyu yo,” koo si Yisus. Maido yo nosiro om mintorono yo dii nu runat iiri. Iya iiri kiro-kiro jaam opat nu awi-awi.

40Ngaran-o po nu ido koyuwan nokorongou nu tinangar ni Yuanis om minaid so si Yisus, ono yo si Andrias sulod ni Simun Pitrus. 41Diumo yo sono ni Andrias sulod niyo ri, si Simun. Nokopusambat-o po, tongaro yo niyo nu, “Nosambat mai yo Raja Nijanji nu Kinoringan nu powiau so toko, iri paawon toko nu Masias!” koo. (Masias so tangar Ibrani muinong nu Kristus so tangar nu Yunani, orati yo po nga Raja Nijanji nu Kinoringan.) 42Owito yo ni Andrias si Simun mian dii si Yisus.

Bontongi yo iyo ni Yisus om tongaro yo nu, “Ikau-o po si Simun, anak ni Yuanis, nga kosiono, ngaran mu sono si Koipas,” koo. (Koipas muinong nu Pitrus nga orati nu kiduo oono, watu.)

Minomaau si Yisus so si Pilipus om

si Natanil

43Pogsusuab, tinantu yo ni Yisus nu mian so Galilia. Nosambat sono Niyo si Pilipus, om tongaro yo nu, “Waid-o so Aku!” koo. 44Si Pilipus oono kiat so Baitsaida, songido nu kampung so si Andrias om si Pitrus. 45Diumo yo ni Pilipus si Natanil om tongaro yo nu, “Nosambat mai yo lobuw kinuan ni Musa so buuk niyo ri, om nokosurat so ongo buuk nu poo'abar nu Kinoringan, iri ingoranan so si Yisus, anak ni Yusup kiat so Najarit,” koo.

46Sumombuto yo si Natanil nu, “D'ado noilaan ku nu kuwai lobuw owarong lumoga' kiat so Najarit,” koo.

Sumombuto yo si Pilipus nu, “Kayo, om ikau kondiri su kosiou,” koo. 47Nosiou-o po ni Yisus si Natanil lumoga', mutongaro yo Iyo suat so pogokalan ni Natanil nu, “Itu yo su lobuw Israil nu dai moomudut om moongaakal,” koo. 48Duato yo ni Natanil si Yisus nu, “Onu ka kotondu'-tondu' Mu so aku?” koo.

Sumombuto yo si Yisus nu, “Dai ko po nopaau ni Pilipus, nosiou Ku yo ikau mogom-ogom so obi' nu puun nu nunuk,” koo. 49Sumombuto yo iyo nu, “Oo Guru, Ikau-o su Anak nu Kinoringan! Ikau-o su Raja nu lobuw Yaudi,” koo. 50Mutongaro yo si Yisus nu, “Pagka notangar Ku nu nosiou Ku ikau mogom-ogom so obi' nu puun nu nunuk, ono yo ko' oimbonaan ko gaam. Nga momaal Aku ya nu koiran-iran kaalib po nu ono ong wagu,” koo. 51Om mutongaro po Iyo so nosiro nu, “Bana ya tongaron Ku so kou iitu nu, kosiou kou so Aku, Anak nu Riniba,#1:51: Anak nu Riniba: Siowan Kamus Kitab. om suminsing langit om ongo susuu'on nu Kinoringan muntiba mindakod so tiningkuangon Ku,” koo si Yisus.#Pgn 28:12

Currently Selected:

Yuanis 1: TomPWPgLgPn

Highlight

Copy