Pinongurugan 43

Minian kosusulodan ni Yusup so Masir maid so si Binyamin

1Osokakan-o sobana likop so Kanaan. 2Naawi' yo po nu sompinunguan ni Yakub mongokan paroi winoli so Masir-i, tongaro yo ni Yakub inonakan niyo ri nu, “Ian kou po so Masir momoli nu paroi okanon toko,” koo.

3Sumombuto yo sono si Yahuda nu, “Minongoogot mongodau moomogkoilo nu Masir-i so kai nu dai kai posombaton so iyo ong dai ya kowaid toudi mai no. 4Bang powaidon mu nai' iyo, mompanou kai ya momoli nu ingkookan. 5Nga bang dai mu ya powaidon iyo, dai kai ya mompanou, so' oogot sobana kodau nu moomogkoilo iiri nu dai kai posombaton so iyo ong dai ya kogayud si adi',” koo.

6Mutongaro yo si Yakub nu, “Nokuro su niabar muyu nu kiadi' kou po? Sobana ko mongaagut kou so aku,” koo.

7Sumombuto yo nosiro nu, “Linugit kai niyo mongoduat suat so toko sompuaamo nu, ‘Miau po ka si apa muyu? Kuwai po ka toudi muyu kusoi?’ koo. Sinombutan mai ya sono kiawi' dinuat niyo iiri. Ado ya tontam-tontam mai nu suu'on kai niyo popongowit nu toudi mai no,” koo.

8Mutongaro yo sono si Yahuda so amo niyo ri nu, “Powaido yo si adi' so kai su' kopanou kai osikap om d'ado likopan so toko. 9Aku yo su mogkoilo so iyo. Bang dai ku oowit iyo muli' miau-wiau tuui so ikau, aku yo su suntuton mu musingkopatoi ku. 10Bang minompanou toko osikap, kiro ku induo toko yo muuli',” koo.

11Mutongaro yo sono si Yakub nu, “Bang soko ono, pongowit kou nu gonggamon owarong kiat tuui, ono yo salong, paa' nu munsong, ongo rampa, inosak#43:11: inosak; intawa: minyak lanung om bubua' owarong niasuw so karut muyu no. 12Pongowit kou ya nu siin oinduo koosuang ko' gulu ri, om owito muyu ya koimbagu siin niasuw nosiro so karut muyu ri, kalu nolupaan-a nosiro. 13Owito muyu yo si adi' muyu, om uli' kou ya osikap. 14Muda-mudaan ong poworongon-a nu Kinoringan Maayo Kuasa inawo nu moomogkoilo so Masir-i su' oluluudan sono iyo om nilabus si Simiun. Suat-o po so aku, bang oliongan aku yo nu inonakan, kuraan po ati,” koo.

15Owito yo sono nu kosusulodan ni Yusup tutungkap om siin-i so Masir maid so si Binyamin. Nokologa' yo po so Masir, sumombato yo nosiro so si Yusup. 16Nosiou-o po ni Yusup si Binyamin om kosusulodan niyo ri, tongaro yo niyo moomugogoma'on so waloi niyo ri nu, “Owito yo ongo lobuw iitu so waloi. Pookanon ku nosiro maid so aku nu runat tu. Indadi pongogaras-o nu pongayam om onsako yo,” koo. 17Waalo yo nu moomugogoma'on iiri nisuu' ni Yusup.

18Laid nosiro manou-panou mian so waloi, mutotongar-tongaro yo kosusulodan ni Yusup maid nu lumaa' nu, “Kinopongowitan-o po so toko tuui, suat-o so iri siin niasuw so karut toko ri nu kinologa'an toko gulu ri. Potigogon toko sono nosiro mongaakom, om olapon koladai toko no om uriponon toko nosiro,” koo.

19Indadi, nokorani so longobon nu waloi ni Yusup, tongaro yo nosiro moomugogoma'on so waloi iiri nu, 20“Oo tuan, nokobaya' kai yo lumoga' tuui momoli nu ingkookan. 21-22Muli' kai ri, minaloi kai so lolanon om binuka' mai karut mai ri. Siowi mai su musod-rusod siin pinongobarai mai nu paroi-i, om ado ya kurang. Dai mai oilaan ong isai noporusod koimbagu nu siin iiri so karut mai ri. Indadi, inowit mai ya sono siin iiri mululi' tuui. Sondiang ko ono, minongowit kai po nu siin pomoli mai koimbagu nu ingkookan,” koo.

23Mutongaro yo moomugogoma'on so waloi iiri nu, “Ikod kou ya kilaa' om kigagau. Iri yo Kinoringan usaa'on ni apa muyu su nopaasuw koimbagu nu siin iiri so karut muyu ri. Naalap ku yo siin pinongobarai muyu nu paroi-i,” koo.

24Indadi, owito yo sono nu moomugoma'on iiri si Simiun dii so nosiro, om ingoli yo niyo nosiro masuw so waloi. Nokaasuw so waloi, taaki yo sono niyo nosiro nu sungoi puugasan nu akod, om sumado yo niyo koladai nosiro ri. 25Noopod iri, lukano yo nosiro tutungkap-i nu nitaak so si Yusup ong kouli' iyo, so' pinokoilo yo laid nosiro nu moomugogoma'on-i nu pookanon nosiro maid so si Yusup.

26Nokouli' yo po si Yusup, taaki yo nosiro tutungkap-i so iyo om sumurukudo yo so tiningkuangon niyo ri. 27Mongoduato yo sono si Yusup so nosiro nu, “Minonuturan kou so aku nu gulu ri suat so amo muyu nu otuo yo. Ali'-ali' ya ka iyo?” koo.

28Sumombuto yo nosiro nu, “Oo, ali'-ali' ya,” koo, om sumurukudo yo so tiningkuangon ni Yusup.

29Nosiou-o po ni Yusup si Binyamin, adi' niyo ri, mutongaro yo iyo nu, “Itu yo gaam su sulod toudi muyu, iri kinuan muyu ri. Muda-mudaan ong borokatan ko ya nu Kinoringan,” koo. 30Inumurad sono sobana inawo ni Yusup nu koo'impong om oluluudan nu adi' niyo oono. Pagka dai yo notongka'an niyo moitotangi', mulaiwo yo iyo mosuw so bilik niyo ri om tumongio yo. 31Noopod-o iyo tumangi', murogupo yo iyo om lumobuso yo koimbagu maid nu poninikokon, om monuuo yo iyo popomolak nu ingkookan.

32Si Yusup-o po om kosusulodan niyo ri pinopusondiang nu mija. Iri ongo lobuw nu Masir-i nga sinumondiang nu mija pinongokanan so' koiyu'-iyu' so nosiro ong tumuruk mongokan so lobuw Ibrani. 33Iri kosusulodan ni Yusup pinopururusun poogom so oogoman so mija otingkuangan niyo ri, ongko ri po om toudi ri nai'. Musisiou-siowo yo sono nosiro, oiranan nu gama' poogom so nosiro ri. 34Polaki yo nosiro nu ingkookan kiat so mija ni Yusup, om si Binyamin pinolakan inglimo koosuang ko' poroongkaan niyo ri. Mongokano om monginumo yo sono nosiro om monginsudu'an.

Currently Selected:

Pinongurugan 43: TomPWPgLgPn

Highlight

Copy