Pinongurugan 42

Minian kosusulodan ni Yusup so Masir momoli nu paroi

1Norongou-o po ni Yakub nu kiparoi po ong so Masir, tongaro yo niyo inonakan niyo ri nu, “Nokuro su modog-odog kou ya om d'ado goma'on? 2Norongou ku nu kiparoi po ong so Masir. Ian kou dii momoli nu paroi su' dai toko matoi likopan,” koo.#P'rapan 7:12

3Miano yo sono opulu musulod iiri so Masir momoli nu paroi. 4Nga dai ya pinowaid ni Yakub si Binyamin, toudi ni Yusup, so' lumaa' iyo nu kobambor nu kosusaan.

5Pagka olikop sobana so Kanaan, osuang-a lobuw minian so Masir momoli nu paroi nokopuiya nu inonakan ni Yakub.

6Poowoli yo po nu paroi so lobuw kiat so pilolongkop nu wonuo oono, nga si Yusup, moomogkoilo nu Masir. Indadi, lumogaa yo sono poroongkaan niyo ri om sumurukudo yo so tiningkuangon niyo. 7Nosiou-o po ni Yusup kosusulodan niyo ri, notondu'an-a niyo nosiro, nga musingkodai-dai iyo kotondu'. Longasi yo niyo nosiro mongoduat nu, “Ombo kiat muyu?” koo.

Sumombuto yo nosiro nu, “Kiat kai so Kanaan, minian kai tuui momoli nu paroi,” koo.

8Kotondu' pona si Yusup so nosiro, nga dai ya nosiro kotondu' so iyo. 9Noondoman sono niyo upian niyo suat so nosiro ri. Mutongaro yo iyo nu, “Kou yo po moonoluku. Tomod muyu yo po mian tuui mongudio ong ombo tontong koosuwan mongolawan nu lobuw tuui,” koo.#Pgn 37:5-10

10Sumombuto yo nosiro nu, “Okon-a tuan, ono-ono ya su tomod mai momoli nu ingkookan. 11Kai yo po sonsulod, owarong kai ya, okon-a ko moonoluku,” koo.

12Mutongaro yo si Yusup so nosiro nu, “Owudut kou! Tomod muyu yo po tuui mongudio ong ombo tontong koosuwan mongolawan nu lobuw tuui,” koo.

13Sumombuto yo nosiro nu, “Kai yo po opulu om duo musulod, om muido ya amo mai dii so Kanaan. Ido sulod mai minatoi-o, om toudi niyo ri otoron-a dii si apa mai,” koo.

14Mutongaro yo si Yusup nu, “Bana ya tangar ku tu nu kou yo po moonoluku. 15Moingin aku monginam so kou, ono yo mongibot aku momakai nu ngaran nu raja, nu dai kou po kolaiw tuui ong dai muyu po oowit si adi' muyu tuui. 16Ido ya koyuwan so kou pouli'on ku mongalap so si adi' muyu, wokon-o taanon po tuui musingkoilo ku nu bana ya tinangar muyu no ko' dai. Bang dai, mongibot aku momakai nu ngaran nu raja, nu kou yo po bana-bana ya nu moonoluku,” koo. 17Jiilo yo sono ni Yusup nosiro kotoluan.

18So kotolu ri, mutongaro yo si Yusup so nosiro nu, “Aku yo po obinsuut om lulumaa' nu Kinoringan. Nilabus ku ya kou ong maid kou nu tangar ku tu, ono yo 19bang bana nu owarong kou ya, taanon ku po ido koyuwan so kou, om wokon-o kouli' ya mongowit nu paroi winoli muyu no suat so anak sawo muyu su' dai matoi likopan. 20Oopod ono, subai owiton muyu toudi muyu ri tuui. Ono yo su pongilaan ku nu bana ya totongaron muyu no, om dai ku ya kou potoyon,” koo. Tinumaayun-o sono nosiro nu tinangar niyo iiri.

21Mutongar-tongaro yo sono nosiro nu, “Na, kon! Itu yo koompusan nu gogoma'on oraai toko so adi' toko ri. Minokisapul iyo nima iri so toko nga dai toko ya pinoduli'. Itu yo sono su nisuli' so toko,” koo.

22Mutongaro yo si Rubin nu, “Ono yo tinangar ku so kou ri, nu dai niposindoraai si adi', nga dai muyu ya rinongou. Indadi ono sono tu nosunsuli'an toko sono nu kinopotoyan niyo,” koo. 23Dai ya noilaan nosiro nu koorati si Yusup nu tangar nosiro, so' bang mokimutangar-tangar nosiro so iyo, kuwai ya lobuw poorati nu tangar nosiro. 24Tumolikudo yo sono si Yusup om tumongio yo. Noopod-o tumangi', tumingkuango yo iyo koimbagu mokimutangar-tangar so nosiro. Olapo yo sono niyo si Simiun, om kogosi yo niyo.

Minuli' kosusulodan ni Yusup so Kanaan

25Poosuwi yo sono ni Yusup nu paroi karut nu kosusulodan niyo ri, om rusodi yo niyo siin nosiro ri so karut-i, om binoota'an po niyo nu ingkookan so lolanon. Noopod-o po nosiro murogama' nu kiawi' nisuu' ni Yusup, 26sokoyi yo nosiro ongo karut nu paroi-i so koladai nosiro ri om momponowo yo. 27So tontong kinowoloyan nosiro ri, bukaa yo nu ido koyuwan so nosiro karut niyo ri, su monumad nu koladai. Siowi niyo su molak-polak siin niyo ri so dirimbou nu paroi-i. Mutongaro yo sono iyo nu, 28“Au! Nipululi' ya koimbagu siin ku tu. Siowi muyu bo, nga musod-rusod so karut ku tu,” koo. Sobana ko oogutan om lumaa' sono nosiro. Mududuato yo nosiro nu, “Onu gaam waalon nu Kinoringan so toko?” koo.

29Nokologa' yo po so Kanaan, tuturani yo nosiro so amo nosiro ri nobomboran nosiro iiri nu, 30“Linongasan kai nu moomogkoilo nu Masir-i, om tinapud kai nu kai yo po moonoluku kolaai. 31Nga sinombutan mai nu, ‘Kai yo po owarong-a, okon-a ko moonoluku. 32Opulu om duo kai musulod, muido nu amo, nga ido sulod mai ri minatoi-o om toudi niyo ri otoron-a dii so amo mai so Kanaan,’ koo kai. 33Mutongaro yo sono moomogkoilo ri nu, ‘Kinaman ku kou nu bana ka nu owarong kou ya ko' oraai. Indadi taanon ku po tuui ido so kou, wokon-o kopululi' ya mongowit nu paroi su' dai likopan anak sawo muyu. 34Oowit muyu yo tuui so aku toudi muyu ri, om poimaid aku nai' nu okon-a ko moonoluku kou, nga owarong-a om otulid inawo. Ono sulod muyu tinaan ku no nga niuli' ku ya so kou, om koogol kou sono so tontong iitu om mudagang,’ koo moomogkoilo ri,” koo nosiro.

35Indadi, nobubus-o po nosiro asuw nu karut-i, om nosiou nu dii ya dumpit om siin nosiro ri, linumaa' sono nosiro sompuaamo. 36Mutongaro yo amo nosiro ri nu, “Moingin kou bo gaam nu oliongan aku nu inonakan ku. Si Yusup d'ado yo, si Simiun nga ado yo, om kosiono si Binyamin po su olapon padu muyu. Osonsara' aku yo bo sono itu!” koo.

37Mutongaro yo si Rubin so amo niyo ri nu, “Pogoyudo ya si Binyamin so aku. Owiton ku ya iyo muli'. Bang dai ku oowit iyo muli', potoyo ya kiduo anak kusoi ku no,” koo.

38Sumombuto yo si Yakub nu, “Atuuk dai! Dai ku ya nipoowit si Binyamin so kou. Minatoi-o ongko niyo ri om iyo po su miau. Kalu kolalag-a pudi iyo nu kopuraai-raayan so lolanon. Otuo aku yo itu, om ono yo su kopatoi so aku, koogutan owaal muyu no,” koo.

Currently Selected:

Pinongurugan 42: TomPWPgLgPn

Highlight

Copy