Pinongurugan 38

Si Yahuda om si Tamar

1Dai olaid kiat nu iri, tumondiango yo si Yahuda so kosusulodan niyo ri, om minido molak so ido kusoi kiat so Adulam, ngaran niyo si Ira. 2Dii yo kinoputondu'an niyo om ido roraa nu Kanaan, anak ni Sua, om ontuno yo sono niyo roraa iiri. 3Minomontian-o sono woinoi iiri om nokopuanak nu kusoi, om ingorani yo ni Yahuda so si Iir. 4Minomontian-o woinoi iiri om nokopuanak-a nu kusoi, om ingorani yo so si Unan. 5Nokopuanak-o woinoi iiri nu ido kusoi, om ingorani yo so si Siila. Oliwang si Yahuda so Kojib nu muanak so si Siila.

6Poontuno yo sono ni Yahuda si Iir anak ongko niyo ri so si Tamar, 7nga sobana ko oraai kogoyaan ni Iir sampai minungot TUHAN so iyo om pinatoi. 8Mutongaro yo sono si Yahuda so si Unan, adi' ni Iir nu, “Ontuno yo sawo nu ongko mu no, om ondoto yo su' kisolusuk ongko mu ri,” koo. 9Nga noilaan-a ni Unan nu okon-a ko iyo su kosongapan nu inonakan niyo. Indadi, koduung ong mondot iyo nu sawo nu ongko niyo ri, posimaidan-a niyo kotompus rawut niyo ri so dilabus su' d'ado sono solusuk nu ongko niyo ri. 10Nga kogoyaan niyo iiri sobana ko koungotan nu TUHAN, om pinatoi-a pudi iyo.

11Mutongaro yo sono si Yahuda so si Tamar, kotakin niyo ri nu, “Uli' po so kotutuaan mu, musingkosukod ni Siila, anak ku no,” koo. Minutangar iyo soko iri so' lumaa' iyo nu potoyon-a nu TUHAN pudi si Siila. Mulio yo sono si Tamar so ino amo niyo ri.

12Olaid-laid kiat nu iri, minatoi-o sono sawo ni Yahuda. Nopupus-o po iyo mongulid, ingoli yo niyo si Ira, una'-una' niyo kiat so Adulam-i, mian so Timna, so pongoburutan nu dumba niyo ri. 13Norongowan sono ni Tamar nu mian iwan niyo iiri so Timna mongoburut nu dumba. 14Indadi, mupokokaso yo iyo nu okon ko pokakas nu balu. Musulobudo yo iyo om mogomo yo so longobon nu bandar Inaim, so lalan mian so Timna. Winaal niyo iri so' noilaan-o niyo nu nosukod-o si Siila, anak toudi ni Yahuda, nga dai po iyo poontunon nu omulok oono.

15Nosiou-o po ni Yahuda si Tamar, intaman niyo ong sundal, so' notombol buatan niyo ri. 16Pagka dai noilaan ni Yahuda nu woinoi-o po iiri kotakin niyo, mobio yo sono iyo om tongaro yo nu, “Kayo muondot kito,” koo.

Mongoduato yo sono si Tamar nu, “Onu ka itaak mu so aku ong mondot aku so ikau?” koo.

17Mutongaro yo si Yahuda nu, “Poowitan ku ikau ido uyog nu kambing,” koo.

Sumombuto yo si Tamar nu, “Tumaayun aku ya, nga subai kuwai niogol mu musingkologa' nu kambing kuanon mu no,” koo.

18Mongoduato yo si Yahuda nu, “Onu ka otoop niogol ku?” koo.

Sumombuto yo si Tamar nu, “Ogoli yo pondulung kitanda' nu songapan mu no maid nu tinggol om tutungkud mu no,” koo. Taaki yo sono ni Yahuda kiawi' iiri, om muondoto yo nosiro, sampai notianan si Tamar. 19Mulio yo sono si Tamar om muiduo yo nu sulabud, om sobungo yo niyo koimbagu sosobungon nu balu ri.

20Kotinu-tinuan kiat nu iri, suuo yo ni Yahuda si Ira, una'-una' niyo ri, paapit nu uyog nu kambing, om popongalap koimbagu nu gonggamon niogol niyo dii si Tamar, nga dai ya nosambat ni Ira woinoi iiri. 21Mongoduato yo sono si Ira nu ongo lobuw nu, “Siombo yo woinoi sundal, iri obulit mogom-ogom so isan nu lalan sundur so Inaim tu ri?” koo.

Sumombuto yo nosiro nu, “D'ado insan kisundal tuui,” koo.

22Mulio yo sono si Ira dii si Yahuda om mutongaro yo nu, “Dai ku ya nosambat woinoi iiri. Dinuat ku yo ongo lobuw dii, nga d'ado ya insan kisundal tuui, koo nosiro,” koo.

23Sumombuto yo si Yahuda nu, “Oo, pobiaran-o gonggamon iiri dii so iyo, d'ado ya koiyu' so kito. Kuwai yo pinongobarai, nga dai mu ya nosambat iyo,” koo.

24Kiro-kiro tolu noulan kiat nu iri, nokorongou si Yahuda nu abar nu minusinsundal si Tamar, kotakin niyo ri om momontian-o.

Mutongaro yo sono si Yahuda nu, “Olapo muyu iyo om nisubo yo so apui sampai matoi,” koo.

25Laid mongowit lumabus so si Tamar, mongodawo yo iyo so iwan niyo ri nu, “Iri yo songapan nu gonggamon iitu su nokotian so aku. Tondui muyu ya ong isai songapan nu pondulung kitanda' maid nu tinggol om tutungkud iitu,” koo.

26Notondu'an sono ni Yahuda gonggamon iiri, om mutongaro yo nu, “D'ado ya sala' nu woinoi oono. Aku yo su dai minonuman nu janji ku so iyo ri. Kopotutan-o po nipoontun ku iyo nu omulok ku tu, si Siila,” koo. Kiat nu iri dai yo sono minondot si Yahuda so si Tamar.

27Nologa' pinuonakan ni Tamar, anak niyo ri minuapid. 28Muanak iyo ri, polobuso yo nu ido lolaing-i sompodi longon niyo ri. Kuyuti yo sono nu bidan-i longon niyo ri om kogosi yo nu tingkal omiang. Mutongaro yo bidan-i nu, “Itu yo su gulu lumangus,” koo. 29Nga pogogoko yo koimbagu nu lolaing iiri longon niyo ri. Indadi iri ya sono apid niyo ri su nokopogulu lumangus. Mutongaro yo sono bidan-i nu, “Sobana ko obasag ko lumabus,” koo. Indadi iningoranan sono lolaing gulu linumangus-i so si Piris.#38:29: Orati-o po nu ngaran Piris so tangar Ibrani nga, sinumosog lumangus. 30Om nokosusuut nai' lumangus toudi ri, iri kinogosan longon niyo ri nu tingkal omiang. Ingorani yo sono iyo so si Jira.

Currently Selected:

Pinongurugan 38: TomPWPgLgPn

Highlight

Copy